Rehistro para sa national ID sytem, dapat umpisahan na sa lalung madaling panahon

Sinabi ni Deputy Speaker at 1-Pacman Rep Michael Romero na dapat umpisahan na ang pagrehistro para sa National Identification System bago mag-ika 30 ng Hunyo upang mapadali at mapabilis ang delivery ng ayuda sa mga mamamayan na labis na apektuhan ng lockdown na sanhi ng COVID-19 pandemic.
Ayon kay Romero, ang isang functional national ID ay maaaring makasalba sa mga buhay at ang last digits ng naturang ID card ay maaaring gamitin para sa quarantine para ma-determina kung sino ang mga lumabas sa kanilang mga tahanan.

Dapat aniya, functional ang national ID na ito kagaya ng ginagamit ng Singapore para mag-distribute ng kanilang bayad o ayuda sa mga nagta-trabaho.

Bagamat may mga inherent data limitations ang National ID System o ang PhilSys, iminungkahi ni Romero kay Acting Secretary Karl Kendric Chua ng Socio Economic Planing na kanyang utusan ang Philippine Statstics Authority na umpisahan na kaagad ang mass registration sa loob ng 60 araw o hindi lalagpas sa June 30.

Dahil dito sinabi ng mambabatas na kaugnay dito, hinahanda na niya ang isang panukala na mag-aamiyenda sa National ID Law para ito ay maging useful lalu na sa pag-pili ng mga target beneficiaries ng ayuda ng pamahalaan at mga serbisyo nito.

Repeal sa continuing professional development law, balak ihain sa Kamara

Balak na maghain si House Deputy Speaker at Davao City 1st District Rep Paolo Duterte ng panukalang batas na may layuning amiyendahan at tuluyang i-repeal ang RA 10912 o ang  Continuing Professional Development (CPD) Act of 2016.

Sa isang pahayag, sinabi ni Duterte na bagamat sinusuportahan niya ang habang-buhay na learning process ng mga propisyunal, ang pag-require sa kanila batay sa itinakda ng CPD law ay nakakadagdag lamang sa mga pasanin at problema na kanilang kinakaharap.

Ang nabanggit na batas ay isang mandatory requirement bago ang isang propisyunal ay makapag-renew ng kanyang professional identification card.

Ayon kay Duterte, matapos ang isang mahabang araw upang kumita ang isang professional, ito ay magli-leave sa trabaho para dumaan sa isang hindi makatarungang pasakit para lamang mai-renew nito ang kanyang lisensiya upang makapagpatuloy na mag-practice ng kanyang prupisyon.

Idinagdag pa ng mambabatas na puwede namang tulungan ng gobyerno ang mga professional na makasabay sa global o international professional standards sa pamamagitan ng iba pang mga pamamaraan.

Matatandaang ang natural batas ay inakda ni dating Senador Antonio Trillanes IV noong 2016.

Dayuhang nag-viral habang tumatangging arestuhin ay isang overstaying na turista lamang, ayon pa sa isang mambabatas

Ipinahayag ni 1-PACMAN Rep Enrico “Eric” Pineda na kaniyang napag-alaman sa Bureau of Immigration (BI) na si Javier Parra Salvador ng Dasmariñas Village, ang dayuhang nag-viral habang tumatangging arestuhin, ay nagtataglay lamang ng isang tourist visa at hindi residente ng Pilipinas.

Sinabi ni Congressman Pineda na maaari umanong isang overstaying na turista si Mr. Parra at noong kanyang sinabi sa video release sa social media na siya ay may 80 empleyadong Filipino, ito ay malinaw na paglabag sa kondisyon ng kanyang tourist visa, hindi siya popuwedeng magpatakbo ng anumang uri ng negosyo dito sa ating bansa.

Kamakailan lamang ay ipinahayag ni Foreign Affairs Secretary Teodoro Locsin ang  temporary suspension ng lahat ng dayuhan gayundin din ang mga visa-free privileges ng lahat ng dayuhan.

Ang lahat ng dayuhan ay binigyan ng pagkakataon ng pamahalaan na makabalik sa kani-kanilang bansa kasunod ng ipinatupad na lockdown.

Naghahanda na sa kasalukuyan ang Makati police upang masampahan ng kaso si Parra na lumabag sa pinaiiral na enhanced community quarantine (ECQ).

Mga may-ari ng supermarkets at minimarts, hinamon ng isang solon na manatiling bukas ang kanilang tindahan ng mahabang oras nitong COVID-19 crisis

Hinamon ni House Deputy Speaker at Surigao del Sur Rep Johnny Pimentel ang mga leading supermarket at minimart chain na manatiling bukas ng mahabang oras ang kanilang mga establisimiyento dahil sila lang naman ang namamayagpag sa kasalukuyan at mag-umpisa na silang mag-hire, on temporary basis, ng mga naka-furlough na mga empleyado.

Hinikayat ng mambabatas ang retailing sector na ipagpatuloy nila ang kanilang hiring ng part-time workers upang tauhan at buksang muli ang kanilang mga tindahan at grocery ng mahabang oras sa pag-operate nitong panahon ng COVID-19 crisis.

Ayon kay Pimentel, sa ganitong paraan ang mga retailer ay makatulong sa pamahalaan na maibsan man lang economic pain na dulot ng krisis habang kanilang tinutulungan ang mga mamamayan na makapag-stock ng iba pang mga basic na pangangailangan sa kanilang mga tahanan.

Ang panawagang ito ng mambabatas ay naka-direkta sa SM Retail Inc., Robinsons Retail Holdings, Cosco Capital Inc., Philippine Seven Corp. at iba pang mga big retailers.

Ang SM Retail ang siyang nagmamay-ari ng SM Supermarket, SM Hypermarket at ang Savemore chains, habang ang Robinsons Retail naman ang nagpapatakbo ng  Robinsons Supermarket, The Marketplace, Rustan’s Supermarket, Shopwise, Ministop, Southstar Drug at The Generics Pharmacy chains.

Dalawang bangko ng pamahalaan, may mahahalagang papel sa pagbangon ng bansa mula sa COVID-19 crisis

Ipinahayag ni Albay at House  Economic Stimulus Cluster co-chair Rep Joey Sarte Salceda ang kahalagahan ng Land Bank of the Philippines (LBP) at Development Bank of the Philippines (DBP) sa pagbangon ng bansa mula sa kasalukuyang COVID-19 crisis.

Sinabi ni Salceda na nakasaad ito sa calibra­ted economic stimulus program na binalangkas ng House Economic Stimulus Cluster na nakatakdang talakayin ng Kamara sa muling pagbubukas ng sesyon nito sa susunod na linggo.

Ayon kay Salceda, chairman ng House Ways and Means  committee, ang pakikiisa, kahandaan at malawak na karanasan ng LBP ay nagbibigay ng malakas na tiwala na magiging tagumpay ang stimulus plan.

Kapwa mahusay ang patakbo sa LBP at DBP sa nakaraang mga taon, dagdag pa niya, na parehong nagsusulong ng kanilang missionary expansion kaya ang mabisang ugnayan nila sa mga small and medium enterprises (SME) ay magiging mahalaga sa pagsasakatuparan ng mga stimulus loans

Iminungkahi din ni Salceda ang Negative Interest Loans, isang stimulus package na aakit sa mga kumpanyang may pera na mamuhunan sa bansa.

Mabagal na distribusyon ng SAP sa mga benepisyaryo, ikinadismaya ni Defesor

Nagpahayag ng pagka-dismaya ang isang lider ng Kamara de Representantes dahil sa mabagal na distribusyon ng cash aid sa mga benepisyaryo na target ng batas na Bayanihan to Heal as One na kanilang ipinasa noong nakaraang buwan.

Hinikayat ni House public accounts committee chairman Rep Mike Defensor ang Departments of Labor and Employment (DOLE), Agriculture (DA) at Social Welfare and Development (DSWD) na madaliin ang implemetasyon ng finacial assistance progran (SAP) ng pamahalaan para sa mga sektor na apektado ng enhanced community quarantine.

Tinukoy ni Defensor ang ulat ng Malakanyang sa Kongreso hinggil sa implementasyon ng Bayanihan law noong nakaraang Lunes kung saan ito ay nagpapakita na isang kaunting bahagi lamang ng ating mga magsasaka at displaced OFW ang mga nakatanggap ng ayuda.

Hindi matanggap ni Defensor ang pahayag ng DSWD hinggil sa pagkabalam ng implementasyon ng ₱200 billion na SAP sa loob ng Bayanihan law.

Matagal pa umano, ayon sa Anakalusugan partylist representative na maging ganap ang pagpapatupad ng naturang batas kung ang pagbabatayan ay ang ulat ng ehekutibo sa Kongreso.

Marapat lamang daw na bilisan ang proseso ng pag-distribute upang ang ayuda ay makarating sa mga mahihirap nating mga kababayan at manggagawa sa lalung madaling panahon.

Palawigin ang mga serbisyo ng mga contractual goverment employees hanggang sa katapusan ng taon, mungkahi ng isang solon

Hinikayat ni Cagayan de Oro 2nd district Rep. Rufus Rodriguez ang Malacañang na i-extend o palawigin ang serbisyo ng mga contractual emplyees sa burukrasya hanggang sa katapusang ng taong 2020.

Tinukoy ni Rodriguez ang datos ng Civil Service Commission (CSC) na nagsasabing humigit kumulang sa 700,000 personnel ang naitalang na-hire ng pamahalaan sa pamamagitan ng tinatawag na job-order (JO) o contract-of-service (COS) arrangement.

Sinabi ng mambabatas na inindorso niya kay Pangulong Rodrigo Duterte na dapat ang mga kontrata ng mga empleyadong ito ay seguradong maipalawig hanggang December 31, 2020 para naman sila mabigyan ng kaunting seguridad dito sa panahong walang katiyakan.

Ayon sa kanya, sa panahong ito ng COVID-19 pandemic, ang pinalawig na enhanced community quarantine (ECQ) sa Luzon sa iba pang parye ng bansa ay para bagang malinaw na pangitsin na ang mga kontrata ng mga empleyadong ito ay posibleng hindi na ma-renew o maipalaeig pa.

Idinadag pa niya na ang bansang Pilipinas ang isa sa mga bansang tinamaan ng COVID-19 pandemic sa Southeast Asia sa usapin hinggil mga mga tinamaan ng sakit na ito.

Mahahalagang mga panukala, tatalakayin ng Kongreso sa pagbubukas nito sa a-4 ng Mayo

Tatalakayin ng Kongreso ng Pilipinas ang ilang mga mahahalagang nakabinbing panukala sa pagbabalik ng mga sesyon nito sa ika-4 ng Mayo na ang karamihan nito ay ang yaong mga may kaugnayan sa pag-tugon sa magiging epekto ng COVID-19 pandemic sa mga mamamayan at sa ekonomiya ng bansa.

Ito ang ipinahayag ni House Speaker Alan Peter Cayetano kahapon nang kanyang sinabi na nagpapaubaya na lamang ang mga mamamayan sa loob ng anim na linggong lackdown na pinagandang tawagin na enhanced community quarantine (ECQ).

Ayon kay Cayetano, napag-kasunduan na nila ni Senate President Vicente Sotto III na ituloy nila ang pag-convene ng sesyon sa Mayo a4 at kung may ECQ pa ay isasagawa nila ito electronically online kagaya ng kanilang ginawa noong tinalakay ang Bayanihan Act.

Idinagdag pa ng Speaker na handa silang magdaos ng sesyon kahit sa buong mga gabi pa hanggang kina-umagahan nito.

Umaasa ang lider ng Kamara na mapag-tuonan ng mga mambabatas na mapag-aralan ng maigi ang mga panukalang tutugon sa pagpuksa sa COVID-19 pandemic kagaya ng ginagawa sa Estados Unidos kung saan gumugol ang mga legislator doon ng mahabang panahon para matalakay lamang ang kanilang mga economic stimulus programs.

Majority Leader Romualdez, nananawagang suportahan ang mga inisyatibo ng pamahalaan laban sa COVID-19

Nananawagan si House Majority Leader at Leyte Rep Martin Romualdez sa mga mamamayan na suportahan ang mga inisyatibo ng administrasyon sa paglaban sa COVID-19 ng sabihin niya na ang kalabang ito ay matatalo lamang sa pamamagitan ng koopetasyon ng bawat isa.

Ang pahayag na ito ay kanyang sinabi doon sa pag-resume ng Defeat COVID-19 Committee (DCC) technical working group meeting ng economic stimulus package cluster.

Isa si Romualdez sa mga key leaders na namuno sa pagbangon ng Tacloban City at Region VIII galing sa pananalanta ng Typhoon “Yolanda” noong taong 2013.

Sinabi pa ni Romualdez na kung mapag-ipon lamang natin ang ating mga resources, walang dudang maka-survive tayo at malagpasan natin ang krisis na ating kinakaharap sa kasalukuyan.

Ang Sub-Committee on Economic Stimulus and Response Package na pinamunuan nina Rep Joey Salceda ng Albay, chairman ng House Committee on Ways and Means, Rep Sharon Garin ng AAMBIS OWA, chairman ng House economic affairs committee, at Rep Stella Luz Quimbo ng Marikina City, ay gumawa na ng economic response presentations at napagkasunduan nila na kanilang i-consolidate ang mga  proposal at mga mungkahi ng mga resource person at i-submit ito sa mother committee, ang DCC.

Resumption sa May 4 ng sesyon ng Kongreso, tuloy pa rin kahit i-extend ang ECQ ng Pangulo

Ipinahayag ni House Speaker Alan Peter Cayetano na ituloy pa rin ng Kongreso ng Pilipinas ang pag-resume ng mga sesyon nito sa a4 ng Mayo kahit mag-desisyon pa ang Pangulong Rodrigo Duterte na i-extend ang Luzon-wide enhanced community quarantine (ECQ) na magtatapos sa a30 ng Abril.

Sinabi ni Cayetano na napag-usapan na nila at pumayag na si Senate President Vicente Sotto III na ituloy nila ang sesyon ng Kamara de Representantes at ng Senado bagamat posible na i-extend ng Pangulo ang lockdown sa Luzon.

Ayon sa Kanya, batay sa Saligang Batas, ang Kongreso ay magko-convene sa Mayo a4 ngunit maaaring ganapin ng bawat kamara ang kani-kanilang sariling online sessions bilang pagsunod sa quarantine protocols na ipinatutupad ng pamahalaan para mahinto na ang transmisyon ng coronavirus disease 2019 (COVID-19).

Idinagdag niya na kung ang ECQ ay maiangat na, maari na nilang isagawa ang sesyon online kung kayat hinihintay na lamang nila ang announcement ng Pangulo sa April 30.

Ganap na pag-inspeksiyon sa mga lumabag sa ipinatutupad ECQ ayon pa kay Barbers

Nais ni Surigao del Norte 2nd district Rep Robert Ace Barbers na ang lahat na mga sasakyang nangangahas na suwayin ang Enhanced Community Quarantine (ECQ) ay dapat ganap na inspeksiyunin ng Philippine National Police (PNP) sa kanilang mga checkpoint para sa mga iligal na droga

Sinabi ni Barbers na kanyang naobserbahan noong nakaraang mga araw na maraming mga motorista ang lumalabas sa kabila ng estriktong kautusan ng pamahalaan na travel restriction upang mahadlangan ang pagkalat ng coronavirus disease (COVID-19).

Sa nakita daw niya, ipina-flagdown lamang ng mga PNP personnel sa checkpoint at ini-isyuhan ng traffic citation tickets ang mga violator sa quarantine travel at hindi na sila gumagawa ng ganap o thorough search sa mga driver at sasakyan.

Sinabi ni Barbers na siya namang namumuno ng House Committee on Dangerous Drugs, na maaari na umanong i-thoroughly check ang mga quarantine violators para sa illegal drugs at iba pang mga kontrabando dahil nakalabag na sila sa batas batay sa Republic Act (RA) No. 11469, Bayanihan to Heal as One Act kaya puwede na silang arestuhin.

Ayon sa Mindanao lawmaker, nakatanggap siya ng mga report na ang mga drug trafficker ay nananamantala magpuslit ng iligal na droga dahil sa pagpapatupad ng ECQ sapagkat may malaking shortage diumano ng illegal drugs sa Kamaynilahan.

Romualdez: May sapat na pondo ang pamahalaan para sa CIVID-19

Sa Defeat COVID-19 Committee on the Economic Stimulus Package virtual meeting na isinagawa, sa pangunguna ni House Majority Leader at Leyte Rep Martin Romualdez, tinalakay ng mga mambabatas ang isyung inihain nina Cluster Co-Chairs Joey Salceda, Sharon Garin at Stella Quimbo.

Ito ay hinggil sa layunin ng usaping ayusin ang economic at financial standing ng bansa sa gitna ng coronavirus disease pandemic.

Inilatag din ni Finance Secretary Carlos Dominguez sa mga miyembro ang larawan ng mga dapat ipatupad at dapat gawin upang ang publiko ay makaraos sa krisis at muling makabalik sa normal na pamumuhay.

Tinitiyak ni Romualdez na may sapat na pondo ang gobyerno sa gitna ng pandemic.

Ang kailangan lamang aniya ay kabuuang P700 bilyon para magamit sa loob ng  survival period.

Ayon sa kanya, maaari tayong makalikom ng P1 trillion hanggang P1.5 trillion para maipatupad ang mga programa at proyekto kahit para sa  transitional at structural stimulus phases ng ating proposed stimulus package.

Sa pondong ito, siguradong mapapakain natin ang bawat pamilyang Pilipino at masisiguro din natin na masigla ang ating ekonomiya at may trabaho para sa mga nangangailangan at hindi lamang ngayong taon, kundi maging sa susunod pa na mga taon.

Maaaring tataas ang presyo ng bigas ngayong tagtuyot, babala ni Salceda

Maaaring magkaroon ng krisis sa presyo ng bigas sa susunod na mga linggo bunga ng tagtuyot na patuloy ding nana­nalasa sa mga bansa ng Thailand at Vietnam, kung saan umiimporta nito ang Pilipinas.

Ito ang babala ni House Ways and Means chairman Albay 2nd District Rep Joey Sarte Salceda na siya namang co-chairman din  ng House Stimulus Cluster, ng kanyang sinabi na ang ga­yong krisis sa presyo ng bigas ay lalong magpapahirap sa bansa sa pagtugon nito sa nagaganap na COVID-19 pandemic dahil sa mga export ban na ginagawa ng ilang mga bansa sa mundo.

Dapat diumanong asahan ito ng Departments of Agriculture (DA) at Trade and Industry (DTI) upang magawa nila ang mga kaukulang hakbang laban dito.

Ayon kay Salceda, nabigla siya sa nadiskubre niya nang magsimula siyang mamigay ng relief kaugnay ng ‘enhanced community quarantine’ (ECQ), P1,250 lang ang isang sako ng bigas sa NFA (National Food Authority) at nang masagad ang imbentaryo nila ng NFA ay bumili siya sa ‘commercial rice outlets.’

Dito na raw niya nalaman na patuloy na umaakyat ang presyo nito at kamakailan ay umabot na sa P1,850.

Buong akala niya na may ‘price freeze’ daw sa bilihing ito.

Pinaalalahanan ni Salceda ang DA at DTI na ang pagsasamantala ng ‘rice cartels’ sa kasalukuyang ‘emergency’ ay tiyak na hahadlang sa mga pagsisikap ng gobyerno na maibsan ang kahirapang dulot ng ECQ.

Isang miyembro ng security staff ng Kamara, nag-positibo sa COVID-19

Ipinahayag ni House of Representatives Secretary General Atty Jose Luis Montales kahapon na may isang miyembro ng security staff ng Kamara de Representantes ang nag-positibo sa coronavirus disease (COVID-19).

Sinabi ni Montales na na-admit ang pasyente sa isang ospital noong April 7 dahil sa pneumonia at kalaunan ay na-discharge din noong Apri 11, ngunit nakatanggap siya ng advise na mayroong isang security personnel ng House na nag-positibo sa COVID-19.

Ayon pa kay Montales, ang empleyado ay nagda-dialysis at huling nag-report sa trabaho noong Enero pa.

Ang security staffer ay na-admit sa ospital dahil sa pneumonia ngunit na-discharge agad ito at muli siyang inadmit dahil matapos itong i-test ay nag-positibo na sa coronavirus, bagamat hindi ito nakitaan ng sintomas muna dahil asymptomatic ito.

Matatandaang dalawang empleyado ng House printing service ang nag-positibo rin kamakailan lang sa coronavirus at ang isa na siyang may pre-existing medical conditions ay tuluyang nasawi dahil sa coronavirus.

Pagrebisa ng legislative calendar ng Kongreso, ikinonsidera ayon pa kay Speaker Cayetano

Ipinahayag kahapon ni House Speaker Alan Peter Cayetano and balak ng Kongreso ang pagkonsiderang baguhin ang legislative calendar nito sa gitna ng kinakaharap na corona virus disease 2019 (COVI-19) ng bansa ngayon.

Sinabi ni Cayetano na ang liderato ng Kamara de Reprentantes at ng Senado ay nagsagawa na ng inisyal na pag-uusap hinggil sa posibilidad na i-adjust ang kalendaryo ng mga sesyon matapos ang anim na buwang enhanced community quarantine (ECQ).

Ang Kongreso at kasalukuyang naka-Lenten break at mag-resume ang sesyon nito sa a4 ng Mayo, isang recess na halos napasabay sa implementasyon ng quarantine.

Ayon sa Speaker, pinag-usapan nila kung babalik sila sa resumption ayon sa aprubadong calendar o magsasagawa na lamang ba sila ng virtual session pansamantala, at mabilis niyang idinagdag pa na kanila namang gagawin kung anuman ang mainam para sa bansa.

Ngunit sinabi naman ni House Majority Leader Martin Romualdez na kung sakaling magpasya talaga ang Kongreso na hindi na lamang baguhin ang calendar, handa naman daw silang mag-resume ng sesyon sa a4 ng Mayo.

Speaker Cayetano: P50 bilyong piso ilalaan ng gobyerno para sa sektor ng micro, small and medium enterprises

Sinabi ni House Speaker Alan Peter Cayetano doon sa isinagawang virtual meeting ng Defeat Covid-19 adhoc committee ng Kamara de Representantes kasama ang mga economic managers, na ang financial assistance ay para sa mga nawalan ng pagkakitaan gaya ng comedy club, musikero, parlor o salon at maging ang mga masahista.

Ayon kay Cayetano, pinag-aaralan na rin ngayon ng Kongreso at ng mga economic managers kung papaano iko-convert ang 2019-2020 national budget upang magamit kaagad ng tao bagamat naka-focus ito sa social amelioration program.

Dagdag pa ng lider ng Kamara na pagtutuunan ng ibayong pansin ang 2021 national budget para sa mga maliliit na negosyo.

Hindi rin aniya dapat balewalain ang national ID system at health facilities bukod sa mga proyekto ng Department of Transportation, Department of Agriculture at ng Department of Public Works and Highways kapag bumalik na sa normal ang buong bansa.

Magkakaroon ang DOH ng 185,000 na mga bagong rapid 45-minute COVID-19 tests

Pinahayag ni Anakalusugan partylist Rep Michael Defensor na magkakamit ang Department of Health (DOH) ng 185,000 na kadi-develop pa lamang na mga rapid test na may kakayahang makapag-detect ng COVID-19 virus sa loob ng 45 minuto.

Sinabi ni Defensor na ang mga rapid COVID-19 tests na ito ay pangmalawakang ginamit na sa America, kabilang dito ang mga ospital sa State of New York, na siyang may pinakamaraming confirmed pandemic cases.

Ayon pa kay Defensor, ang naturang mga test kits ay i-deliver ng pautay-utay base sa linggo-linggong shipment na may initial batch na 3,000 test na datating dito sa Manila sa Biyernes, ika-17 ng Abril at lahat nang 185,00 tests ay direktang matatanggap na DOH at handa nanag i-deploy, kung kinakailangan.

Itong bagong coronavirus tests na kilalaning Xpert Xpress SARS-CoV-2 ay na-develop ng Sunnydale, California-based biotech firm Cepheid Inc., at ito ay aprubadong gamitin ng U.S. Food and Drug Administration (FDA) noong March 21 at subsequently ay cleared na rin ng  ating FDA sa bansa noong March 26, dagdag pa ni Defensor.

Inumpisahan nang magpulong ang defeat COVID-19 committee ng Kamara kahapon ng hapon

Inumpisahan na kahapon ng economic stimulus cluster ng Defeat COVID-19 Committee (DCC) sa Kamara de Representantes ang pagpupulong ng technical working group (TWG) para talakayin ang panukalang economic stimulus package sa gitna ng corona virus pandemic.

Sa isinagawang virtual meeting, ang mga attendees ay inaasahang magkaroon ng inisyal na talakayan hinggil sa proposed Economic Stimulus-Response Package na hinanda ni Albay 2nd District Rep Joey Salceda, AAMBIS-OWA Partylist Rep Sharon Garin at Marikina City 2nd District Rep Stella Quimbo.

Si Salceda ang chairperson committee on ways and means habang si Garin naman ang chairperson ng committee on economic affairs.

Sa kanyang opening remarks, nagpahayag ng hinagpis si Majority Leader and Leyte Rep Martin Romualdez na nagsilbeng co-chairperson ng DCC, kung bakit may marami pang mga isyu na dapat tugunan doto sa pandemic.

Ngnit mabilis naman niyang sinabi na malinaw daw ang misyon nating lahat sa panahon ng COVID-19 at ito ay ang siguruhing bukas ang mga tindahan at negosyo, may trabahong naghihintay sa mga manggagawa, may kikitain ang mga gustong magbanat ng buto at may pagkain sa bawat mesa.

Employers, oobligahing gawin nang electronic payroll ang pasahod sa mga empleyado

Pina-oobliga ng ACT-CIS partylist group ang mga employers na gawin nang electronic payroll ang paraan ng pagpapasahod sa lahat ng mga empleyado sa buong bansa.

Sinabi ni ACT-CIS Partylist Rep Jocelyn Tulfo na sa harap ng ipinatutupad na lockdown dahil sa COVID-19 ay nakita na malaki sanang tulong kung ang lahat ay may payroll ATM account kung saan naging madali sana ang pamamahagi ng tulong pinansyal ng Department of Labor and Employment (DOLE).

Isa sa mga problema umano ito na dapat agad na natugunan para hindi na maging problema muli sa hinaharap.

Ayon kay Tulfo, karamihan daw sa mga employers na nag-avail ng one-time aid relief na P5,000 sa DOLE ay wala palang electronic payroll system kaya’t hindi rin maibigay agad sa mga manggagawa ang ayuda mula sa pamahalaan.

Aniya, ang pinaka-basic na labor standards para sa compensation at benefits na dapat sinusunod ng lahat ng mga kumpanya ay ang pagkakaroon ng ATM payroll subalit nakalulungkot daw na marami pa rin ang wala nito.

Idinagdag pa ng mambabatas na dapat mahigpit nang maipatupad ang probisyon ng pagkakaroon ng minimum standard sa electronic payroll at dapat tiyakin ng DOLE na masusunod ang probisyong pagkakaroon ng electronic payroll para sa lahat ng empleyado ng pribadong sektor ito man ay regular, probationary, contractual, contractors, subcontracted, at casual.

Modified hearing ng Defeat COVID-19 committe ng Kamara, isasagawa ngayong hapon

Magdaraos ang Defeat COVID-19 Committee (DCC) ng Kamara de Representantes ng isang “modified hearing” mamayang hapon upang talakayin ang ilang mga panukala hinggil sa economic packages sa gitna nitong kinakaharap ng bansa na coronavirus pandemic.

Sinabi Speaker Alan Peter Cayetano na ang naturang pagdinig ay nakatuon sa economic stimulus cluster ng DCC kung saan sina Albay Rep Joey Salceda, AAMBIS-OWA Partylist Rep Sharon Garin, at Marikina Rep Stella Quimbo ay magpi-present ng kanilang mga proposal.

Bilang pagsunod sa quarantine measures, sinabi ni Speker Cayetano na ang hearing ay isasagawa online.

Ayon lider ng Kamara, magsasalita sa umpisa ang ibang mga taga-executive at ipi-present naman ng tatlong congressman, sina Reps Salceda, Sharon Garin at Quimbo ang mga proposal nila  at pagkatapos ay bibigyan ng pagkakataon ang media na makapagtanong.

Sinabi naman ni Majority Leader at Leyte Rep Martin Romualdez na ang DCC ay naka-focus sa lahat ng mga usaping direkta at principally na may kaugnayan sa mga ankop na tugon ng pamahalaan kung papaano mapahinto ang pagkalat ng coronavirus at ang epekto nito sa ekonomiya at sa mga mamamayan lalu na sa mga manggagawa.

Subsidiya na ₱45 bilyon para mga manggagawa sa small at medium enterprises, ipinanukala

Iminungkahi ni Albay Rep Joey Salceda ang palalaan ng isang wage subsidy sa halagang ₱45 bilyon na magbi-benipisyo sa 5.98 milyong manggagawa small at medium enterprises at mga freelancer na naapektuhan ng pinalawig na enhanced community quarantine (ECQ) na ipinatutupad ng pamahalaan.

Iginiit ng House Ways and Means Committee Chair na ang kinikita ng mga nananggit na mga manggagawa ay ang lubhang tinamaan dahil sa ECQ na lalu pang pinalawig hanggang ika-30 ng Abril.

Kaya ipinanukala ni Salceda na ang wage subsidy ay ipamahagi sa mga manggagawa para sa tatlong buwan.

Ayon sa kanya, lumiham siya kay Pangulong Rodrigo Duterte kahapon upang irekomenda na umpisahan nang i-calibrate ang isang wage subsidy program para sa naturang mga manggagawa, ganun na rin sa gig economy upang makapag-operate na ito.

Iginiit pa ng mambabatas na ang kanyang panukala ay gagana bilang isang “payroll support program” na susuporta sa micro, small at medium enterprises habang may ECQ.

Modified enhanced community quarantine, inirekomenda ng isang mambabatas

Inirekomenda ni Committee on Transportation Chairman Edgar Mary Sarmiento na gawing modified ang enhanced community quarantine (ECQ) sa Luzon kasunod ng pagpapalawig nito.

Ayon kay Sarmiento, sa ilalim ng ‘modified ECQ’ ay pipili ng mga COVID-free zones o mga lugar sa Luzon na wala pang naitatalang COVID-19 cases.

Ngunit nilinaw naman ng kongresista na ang mga COVID-free zones ay nasa ilalim pa rin ng ECQ ngunit papayagan naman ang lugar na ito na ituloy ang ilang mga economic activities tulad ng mga negosyo, trabaho at transportasyon pero oobserbahan pa rin ang protocol sa quarantine guidelines tulad ng social distancing at skeletal workforce.

Hindi naman makakapasok ang mga taga-ibang lugar sa mga natukoy na COVID-free zones upang ma-contain at hindi makapasok ang sakit sa mga lugar na walang coronavirus.

Sa ganitong paraan aniya ay magtutuloy-tuloy pa rin ang pag-usad ng ekonomiya at mabibigyan ng pangangailangan ang mga apektadong lugar na hindi nasasakripisyo ang kampanya para puksain ang virus.

Batay aniya sa monitoring ng Department  of Health (DOH), sa 771 syudad at munisipalidad sa Luzon ay 105 sa mga ito ang may naitalang kaso ng COVID-19 habang sa 40 probinsya sa buong Luzon kasama ang NCR, 23 lamang ang may kaso ng coronavirus kung saan karamihan sa mga ito ay isa o dalawa lamang ang naitalang may sakit.

Bilhin ng NFA sa mataas na presyo ang palay ng mga magsasaka at ibenta sa mas murang halaga sa mamamayan sa gitna ng krisis

Hinimok ni Ako Bicol partylist Rep Alfredo Garbin ang National Food Authority o NFA na bilihin sa mas mataas na presyo ang palay ng mga local farmers, gaya sa alok ng mga private rice traders upang makagaan sa pasanin ang mga magsasaka sa gitna na rin ng corona virus disease 19 o COVID-19.

Sinabi ni Garbin na matapos bilhin ng NFA ang kanilang aning palay, maaring ipagbili ito sa publiko sa mas mababa namang halaga batay na rin sa prevailing market prices ng commercial rice.

Aniya, sa ganitong paraang pagbili sa mas mataas na presyo at ibenta sa mas mababang halaga makakatulong ang NFA sa mga magsasaka, consumers, at sa local governments na humahanap ng abot-kayang presyo ng bigas para sa relief goods ng mga mahihirap sa kanilang nasasakupang lugar.

Dagdag pa ng mambabatas, maari umano itong ituring na isang consumer subsidy na umaayon sa Bayanihan to heal as one Act at sa safety net provisions ng TRAIN Law.

Pagbabawas sa MOOE ng mga ahensiyang pamahalaan upang makalikom ng ₱160 billion para sa COVID-19, iminungkahi

Maaaring makalikom ang executive branch ng P160 billion para sa pagsugpo sa coronavirus disease 2019 (COVID-19) sa pamamagitan ng pagbabawas ng mga maintenance and other operating expenses (MOOE) ng mga ahensiyang pamahalaan.

Ito ang iminungkahi ni 1-PACMAN party-list Rep Mikee Romero sa executive branch sa pamamagitan ng pag-reallign ng mga MOOE dahil karamihan naman ng mga ahensiya ay hindi nag-ooperate sa kasalukuyan dahil sa Luzon-wide enahanced community quarantine (ECQ).

Kabilang sa mga nilalaanan ng MOOE ay ang gasolina at krudo, kuryente, tubig, supplies at mga materiales, komunikasyon, advertising, representation o dining out at entertaiment, at travel allowance ng mga opisina.

Ayon kay Romero, kung tayo ay makaka-save ng 10 porsiyento dahil sa pagbabawas sa MOOE sa loob ng 45-day quarantine hanggang ika-30 ng Abril, makakalikom tayo ng ₱160 billion at ito ay makakatulong na para sa ating financial aid sa mga pamilyang apektado ng lockdown.

Pagtatag ng strategic national reserve ng mga importanteng medical supply, iminungkahi

Ipinanukala ng isang mambabatas ang paggawa ng strategic national reserve ng kinakailangang medical supplies batay sa naranasang health emergency dahil sa COVID-19 crisis.

Sinabi ni Deputy Speaker Johnny Pimentel na ang emergency stockpile ng life-saving pharmaceuticals, devices, at equipment para sa healthcare workers ay kinakailangan, dahil sa pagbulusok ng kinakailangang suplay pang-medikal habang patuloy namang kumakalat ang coronavirus disease.

Dapat aniyang magtatag ng isang tinatawag na “sufficient national hoard of vital medical supplies” bilang bahagi ng pangkalahatang pagiging handa sa pag-tugon sa mga panibagong malakihang disease outbreak.

Ayon kay Pimentel, nasaksihan natin ang mga pagkukulang ng mga essential supplies ng personal protective equipment (PPE), N95 respirator, aerosol boxes at contraptions na kailangan upang i-rescue ang mga pasyente ng COVID-19.

Aniya pa, kabilang din sa strategic reserve ang mga materyales na kinakailangan sa pagbuo ng temporary medical stations sa mga kritikal na lugar kapag mayroong krisis.

Iginiit pa ng solon na para maseguro ang tuloy-tuloy na suplay ng mga medical provisions, sa public man o sa private hospitals, dapat mayroong minimum in-facility inventory requirement ang mga ito.

Speaker Cayetano sa DSWD: Madaliing isaayos ang listahan para sa emergency cash assistance program ng gobyerno

Hinimok ni House Speaker Alan Peter Cayetano ang Department of Social Welfare and Development (DSWD) na madaliin na ang pagsasa-ayos ng listahan para sa social amelioration program ng gobyerno o pamamahagi ng cash assistance bunsod ng COVID 19 pandemic.

Sinabi ni Cayetano na hindi siya kumbinsido na 54.71 percent lamang o 1,788,604 na mga pamilya sa Metro Manila ang makikinabang sa social amelioration program sa ilalim ng Bayanihan to Heal as One Act.

Ayon sa kanya, nasa P106,906,055 ang kabuuang halagang ilalabas ng pamahalaan para sa unang tranche ng social amelioration program para sa nasa 18 million na mahihirap na pamilyang Pilipino.

Paliwanag pa ng lider ng Kamara, sa naturang halaga, mahigit P14 million ang hahatiin sa tig-P8,000 na siya namang ipapamahagi sa mga natukoy na mahihirap na pamilya sa National Capital Region (NCR).

Dahil dito ay pinatitiyak ni Cayetano sa DWSD ang pagkakaroon ng maayos na listahan upang malaman ang totoong bilang ng kung sino ang mga dapat mabigyan ng naturang emergency cash subsidy.

Mga frontliners sa pribadong sektor pinabibigyan din ng 25% hazard pay ng isang kongresista

Umapela si House committee on Labor and Employment Vice Chairman at TUCP Partylist Rep Raymond Mendoza sa pamahalaan na isama ang mga frontliner sa pribadong sektor na mabigyan ng 25% hazard pay sa ilalim ng Bayanihan Act .

Ayon kay Mendoza, tulad ng mga nasa pampublikong sektor ay lantad din aniya ang kalusugan ng mga frontliners sa private sektor na mahawa ng sakit dahil sa kanilang tuloy-tuloy na serbisyo sa gitna ng krisis kaya nararapat lamang aniya na mabigyan din ang mga ito ng 25% hazard pay.

Kabilang sa mga frontliners na pinabibigyan ng 25% hazard pay ay ang mga nasa media, bangko, supermarkets, security, manufacturing, sanitation, food industry, delivery at trucking at ang iba pang mga nagtatrabaho sa panahon ng enhanced community quarantine.

Sa huli ay sinabi ni Mendoza na itinuturing na bayani ang mga frontliners at magsisilbing token lamang ang 25% hazard pay bilang pagkilala sa kanilang pagsasakripisyo dahil tulad ng iba ay may pangangailangan at may mga pamilya ding umaasa sa kanila.

Huwad na twitter account na @house_files na nagpapakalat ng maling impormasyon kaugnay sa COVID-19, nadiskubre ng Kamara

Ipinahayag ng pamunuan ng House of Representatives na hindi nila pagaari ang Twitter account na @house_files  na nagpo-post ng mga maling impormasyon kaugnay sa Corona Virus Disease o COVID-19 gamit ang official seal ng Kamara.

Sinabi ni House Deputy Secretary General Atty. Darren de Jesus na nais nilang iparating sa publiko na ang official Twitter account ng Kamara ay @HouseofRepsPH. 

Ayon kay De Jesus, malinaw na paglabag ito sa Republic Act No. 11469, o ang Bayanihan to Heal As One Act of 2020 at Republic Act No. 10175, o ang Cybercrime Prevention Act of 2012. 

Aniya, napalitan ang account name sa @congresstita at patuloy na nagkakalat ng mga maling impormasyon.

Dagdag pa si De Jesus sa ngayon ay nakikipag-ugnayan na sila sa mga otoridad para sa pagkakilanlan ng mga nasa likod ng malisyosongTwitter account upang mapanagot ang mga ito sa batas dahil sa pagpapakalat ng maling impormasyong nagdudulot ng panic, takot at pagkalito sa publiko.

Panawagan ni Cong Mike Defensor: Tigilan na muna ng mga kritiko ang pagtutol sa gagawing pagtulong ng China sa atin

Hinimok ni House Committee on Health Vice Chairman at Anakalusugan Partylist Rep Mike Defensor ang ilang mga kritiko na tigilan muna nila ang pagtutol sa gagawing pagtulong ng China sa bansa. 

Ito ay kasunod ng pahayag ni Philippine Ambassador to China Chito Sta. Romana na iniaayos na ang nakatakdang pagdating sa bansa ng isang team ng mga Chinese medical experts na tutulong sa Pilipinas para labanan ang nakamamatay na sakit na COVID-19. 

Paliwanag ni Defensor, dapat na payagan at suportahan ang grupo ng mga doctor mula sa China dahil bukod sa may experience na sila sa paglaban sa COVID-19 ay tiyak na may dalang resources din ang mga ito na kinakailangan ng ating mga pagamutan. 

Malinaw din aniya na anumang tulong mula sa ibang bansa ay kailangang kailangan ngayon ng ating bansa lalo pa't nagkaroon na ng overcapacity ng mga pasyenteng may coronavirus at kulang na rin ang mga medical personnel matapos na mahawa ng virus ng mga ginagamot na pasyente. 

Bukod dito, patapos na ang China sa problema sa COVID-19 kaya mahalagang malaman natin ang experience at mga hakbang nila para mapababa ang bilang ng transmission at tuluyang mapuksa ang coronavirus.

Ilang kongresista, pumalag sa nakaambang pagpapaimbestiga ng PACC kay Vice President Robredo

Pumalag sina Ako Bicol Partylist Rep Alfredo Garbin Jr. at Anakalusugan Partylist Rep Mike Defensor kaugnay sa utos ng Presidential Anti-Corruption Commission (PACC) sa National Bureau of Investigation (NBI) na imbestigahan si Vice President Leni Robredo sa umano'y pagbabale-wala nito sa kakayahan ng gobyerno na puksain ang COVID-19 pandemic sa pamamagitan ng kanyang ibinibigay na tulong sa mga frontliners.

Sinabi ni Garbin na hindi ito ang tamang panahon para umiral ang pamumulitika kung nakikitang namamatay, walang makain at nagkakasakit ang mga Pilipino.

Kaugnay dito, sinabi naman ni Defensor na hintuan ang pag-i-imbestiga sa mga taong kusang-loob na tumutulong sa gitna ng emergency crisis.

Huwag din aniyang bigyan pa ng mabigat na pasanin si Pangulong Rodrigo Duterte sa gagawing hakbang ng NBI habang sinusubukan ng bansa na labanan ang COVID-19 pandemic.

Dagdag pa nina Garbin at Defensor hindi dapat pigilan ang pagtulong mula man sa kapartido o hindi ng administrasyon dahil hindi naman anila ito kompetensya bagkos ito ay bayanihan para sa ikabubuti ng sambayanan.

Sa huli ay hinimok ng dalawang mambabatas lahat na magtulungan bilang isang bansa at bilang kapwa Pilipino sa gitna ng krisis na kinakaharap ng bansa.

Malinaw na mensahe hinggil sa COVID-19 para maiwasan ang kalituhan, hiling ni Speaker Cayetano sa AITF

Para maiwasan ang kalituhan at maling interpretasyon ng mga mamamayan hinggil sa mga isyu sa COVID-19, hiniling ni House Speaker Alan Peter Cayetano sa mga miyembro ng Inter-Agency Task Force on Emerging Infectious Diseases (IATF) na maglabas ng malinaw na mga mensahe kapag nakikipag-usap at nagpapakalat ng mga mahahalagang impormasyon.

Sinabi ng Speaker na ito ay upang maiwasan ang kalituhan at mga maling interpretasyon sa parte ng mga mamamayan.

Binanggit ni Cayetano ang magkaibang pahayag nina Interior and Local Government Secretary Eduardo Año at Health Secretary Francisco Duque III hinggil sa isyu kung palalawigin pa o hindi ang Luzon-wide enhanced community quarantine.

Bagamat naiintidihan ni Cayetano na nais lamang ipahayag ng dalawang kalihim ang kanilang opinyon, ang isa ay sa law enforcement at ang isa ay sa health concern subalit dapat pa rin aniyang pinagkasunduan ito ng buong miyembro ng IATF. 

Samantala, nanawagan din si Cayetano sa DOH na klaruhin ang kanilang public health strategy pati na ang logistical distribution plan upang matulungang makaya ng mga public at private hospitals ang paggagamot sa mga pasyente ng COVID-19.

Sa pagsasabatas ng “Bayanihan to Heal as One Act.” kailangan aniyang malinaw ang public health strategy dahil malinaw din naman sa publiko ang habilin ng gobyerno na manatili sila sa kani-kanilang mga tahanan.