-MATAGUMPAY NA NAIPALIWANAG SA MGA PAGDINIG SA KAMARA ANG TRANSAKSIYON NG PHARMALLY, AYONSA ISANG MAMBABATAS

Naniniwala si Surigao del Sur Rep. Johnny Ty Pimentel, na ang mga maling akala sa mga transaksyon ng pamahalaan sa Pharmally Pharmaceutical Corp., ay matagumpay na naipaliwanag ng mga inanyayahang tagapagsalita, sa mga idinaos na pagdinig ng Committee on Good Government and Public Accountability sa Kamara. 

Sinabi ni Pimentel, Vice Chairman ng Komite, na ang imbestigasyon ng Kamara ay nagsilbing paraan, upang maging malinaw ang usapin sa pagbili ng Department of Health (DOH), ng mga suplay para sa COVID-19 mula sa Pharmally, sa pamamagitan ng Procurement Service ng Department of Budget and Management (PS-DBM).

Ipinahayag ng mambabatas kahapon sa lingguhang pulong balitaan ng Ugnayan sa Batasan na ang perception ng tao na overpriced ang face shield ay mali dahil sa Senado lumabas nga ‘yong issue na overpriced daw.

Idinagdag pa ng mambabatas na napatunayan ng Komite sa unang tatlong pagdinig na wala ding ‘ghost deliveries’ ng mga biniling produkto ang PS-DBM.

(Idinagdag niya na, “Upon clarifying these issues, it was found out that the faceshields were not overpriced at all. In fact, even COA Chairman Mike Aguinaldo testified in the Senate that in the COA Report, they never mentioned the overpricing.”

Sinabi ni Pimentel na, ayon sa Department of Trade and Industry (DTI), na siyang may mandato upang imonitor ang mga presyo ng lahat ng mga pangunahing produkto sa panahon ng kalamidad at kagipitan, ang mahigpit na pangangailangan sa face masks sa gitna ng pandemya ang nagtulak sa pagtaas ng halaga nito.

“At that time, the price monitored for face mask was 100 to 120 pesos, this was because of the scarcity of the items at that time. Nung lumuwag na ‘yong supply ng face mask, bumaba na,” aniya.)

“The items – the 500,000 masks supplied by Pharmally were inspected and properly accounted and delivered to PS-DBM. So klaro po ‘yon, in fact there were several signatories, marami po tayong resource persons, one of which is Mr. George Mendoza na tinanong natin kasi siya ang nag-receive ng mga items. Kumpleto po ng mga dokumento, na pati ‘yong mga frontliners who received the face mask ay properly documented po,” ani Pimentel. Si Mendoza ay dating hepe ng PS-DBM inspection division.

Ang ikatlong maling akala na nilinaw sa mga pagdinig ay ang paggagawad ng malaking bahagi ng P42-B pondo, na ginamit sa pagbili ng produktong may kaugnayan sa COVID sa ilalim ng Bayanihan 1, na matinding pumabor sa Pharmally.

“Pinakita ng mga resource persons dun that actually sa PPE, there were 17 suppliers. And then dun sa face mask naman there were 8 suppliers, karamihan dun mga local suppliers na. One of that is EMS. Hindi po na-corner ng Pharmally ‘yong bulk,” ani Pimentel.

Pinabulaanan sa mga naturang pagdinig ang mga alegasyong ang proseso sa pagbili ng ng mga proudukto mula sa Pharmally ay iligal, dahil hindi nasunod ang mga probisyon ng RA 9184, o ang Government Procurement Reform Act.

Ipinaliwanag ni Pimentel na, normal sa mga binibili ng mga ahensya ng pamahalaan ang dumaan sa competitive public bidding.

“However, merong provisions na inilagay ang Kongreso doon sa Bayanihan 1 that these requirements are not needed for the negotiated procurement under emergency cases. May provisions sa Bayanihan Act 1 na (under) abnormal conditions, emergency yung purchase natin, madalian because lives were at stake. It was a matter of life and death,” paliwanag ni Pimentel.

Binigyang-diin niya rin na ang bansa ay, “caught off-guard” nang manalasa ang pandemya, at ang pamahalaan ay nagkakandakumahog sa paghahanap ng mga kagamitan para sa COVID-19, na maipamamahagi sa mga nagulantang na mga manggagawa sa kalusugan. Ito ang naging dahilan para sa ehekutibo at lehislatura na magpatupad ng mga kinakailangang hakbang, upang maayos na matugunan ang epekto ng pandemya sa sektor ng kalusugan sa bansa.

“Kasalanan ba ng gobyerno? Kasalanan ba ng Presidente o ng ahensya na tayo ay nagmamadali because at stake ang buhay ng mga frontliners natin? Wala silang mga face mask, wala silang face shield, PPE. Eh punong-puno na ang mga ospital,” giit pa niya. #

-PAGBILI NG MGA BAGONG EROPLANONG C-130, ININDORSO NI SPEAKER VELASCO NA MAISAMA SA 2022 BADYET

Bilang totoo sa kanyang salita, inindorso ni Speaker Lord Allan Velasco na maisama sa panukalang 2022 pambansang badyet ang pagbili ng tatlong  bagong C-130J na eroplano ng Philippine Air Force (PAF).

Ginawa ni Velasco ang pag-iindorso matapos ang kanyang pakikipagpulong sa mga opisyal ng PAF na pinangunahan ni Commanding General Lt. Gen. Allen Paredes sa Kamara noong Lunes.

(Kasalukuyang isinasagawa ng Kamara ang debate sa plenaryo sa panukalang ₱5.024-trilyong pambansang badyet para sa taong 2022.)

(“We fully support PAF’s modernization and priority projects for next year, particularly its plan to upgrade its fleet by buying brand new and modern aircrafts,” ani Velasco.")

Ipinahayag din ng Pinuno ng Kamara ang kanyang pagpapahalaga at pasasalamat sa PAF sa pagbabantay ng seguridad sa himpapawid ng bansa, pagtugon sa mga kalamidad, at pagdadala ng mga kagamitang medikal at mga suplay sa panahon ng pandemya dulot ng COVID-19.

Matatandaang nangako si Velasco na isasama ang pagbili ng mas maraming mga sasakyang panghimpapawid ng militar sa pambansang badyet nitong 2022 matapos nabumagsak ang isang PAF C-130 na sasakyang eroplano sa lalawigan ng Sulu noongnakaraang Hulyo 4, na pumatay sa halos 45 katao.

Ang sasakyang panghimpapawid, na magdadala ng mga tropa patungo sa isang operasyon laban sa paghihimagsik, ay bumagsak na may sakay na 96 katao.

Sinubukan nitong lumapag sa paliparan ng Jolo, ngunit sumobra sa runway at bumagsak sa kalapit na bayan ng Patikul.

Matapos ang isa sa pinakagimbal-gimbal na aksidente sa himpapawid sa bansa sahanay ng militar, nangako si Velasco na tulungan ang PAF na mapalitan ang nawalang C-130 na eroplano at suportahan ang mga pagsisikap na isaayos at gawing makabagoang armada nito.

(“I can only give my word that we in the House of Representatives will include in the 2022 budget the modernization of the PAF’s fleet and ensure the proper training of personnel in handling modern equipment,” sabi ni Velasco.)

Hinikayat ng Pinuno ng Kapulungan ang Armed Forces of the Philippines na magsagawa ng masusing imbestigasyon sa nangyaring insidente upang maiwasangmangyari muli ang mga nasabing sakuna.

Nanawagan din ang Speaker para sa isangpagsusuri ng mga protocol ng mga piloto ng PAF pati na rin ng isang imbestigasyon sakaligtasan ng mga runway sa buong bansa, lalo na sa mga lalawigan.

“We acknowledge the importance of our uniformed personnel, as our dear President Duterte himself has done so several times,” ani Velasco. “The least we can do is to ensure that this never happens again.” #

-PAGKAKAPASA NG PANUKALANG NAGPAPALAWIG SA REHISTRASYON NG MGA BOTANTE, PINAPURIHAN NI SPEAKER VELASCO

Pinuri ni Speaker Lord Allan Velasco bilang isang major step to prevent voter disenfranchisement ang pagpasa ng Kamara kahapon sa panukala na nagpapalawig sa rehistrasyon ng mga botante para sa May 2022 na pambansa at lokal na halalan nang isang buwan.

Nagpasalamat si Velasco sa kanyang mga kapwa mambabatas sa kanilang pagsuporta sa House Bill 10261 na kanyang inihain, kasama sina Majority Leader Ferdinand Martin Romualdez at Minority Leader Joseph Stephen Paduano.

Sa 193 pabor na boto, walang negatibo at walang abstensyon, inaprubahan ng Kapulungan sa ikatlo at huling pagbasa ang panukala na nagtatakda sa huling araw ng rehistrasyon ng mga botante sa, “30 days after the effectivity” ng naturang panukala.

Kapag naisabatas ang panukala, ang Commission on Elections (COMELEC) ay aatasang palawigin ang panahon ng rehistrasyon ng mga botante, na nakatakdang magtapos sa ika-30 ng Setyembre.

“We hope the Comelec will use the one-month extension to ramp up voter regisytration and ensure that more people can vote next year because we cannot afford to disenfranchise voters,” ani Velasco.

 

Nauna nang hinimok ng pinuno ng Kapulungan ang Comelec na sikaping matiyak na ang lahat ng Pilipino ay makakaboto sa Mayo 2022 halalan.

Ayon pa sa kanya, hindi dapat na hayaan ng Comelec ang proseso ng demokrasya sa halalan na mahadlangan, dahil sa pandemya ng COVID-19, na may potensyal na magresulta sa malawakang pagkawala ng karapatan ng sambayanang Pilipino.

“The right to vote in an election is one essential part of the democratic process, and Comelec is duty bound to make sure that all eligible voters are able to register and exercise their right of suffrage,” ani Velasco.

Ang mga datos mula sa Philippine Statistics Authority (PSA) ay nagpapakita na 73 milyong botante ang kwalipikadong lumahok sa halalan sa Mayo 2022.

Iniulat naman ng Comelec na mayroon lamang 61 milyong rehistradong botante sa bansa, hanggang sa ika-23 ng Agosto. Nangangahulugan ito na mayroon pang 12 milyong karapat-dapat na Pilipino na kailangan pang magparehistro.

Naniniwala si Velasco na sa pagpapalawig sa rehistrasyon ng mga botante, ay maiiwasan ang “massive voter disenfranchisement” dahil sa “extraordinary circumstances” dulot ng pandemya ng COVID-19.

Ayon pa kay Velasco, ang anim na buwang supensyon sa rehistrasyon ng mga botante sa gitna ng pandemya noong 2020 ay naging hadlang sa maraming Pilipino, sa kanilang unang hakbang na makalahok sa halalan sa Mayo 2022.

Binanggit ni Velasco na ang rehistrasyon ay sinuspindi pa sa 2021 dahil sa pagpapairal ng iba’t ibang klase ng community quarantine sa buong bansa. #

-DAPAT MAKABOTO ANG BAWAT PILIPINO SA DARATING NA HALALAN — SPEAKER VELASCO

Hinimok ni Speaker Lord Allan Velasco ang Commission on Elections (COMELEC), na sikaping matiyak na ang lahat ng Pilipino na maaari nang bumoto sa Mayo 2022 elections ay makaparehistro, matapos na ipasa ng Kamara sa ikalawang pagbasa ang panukala na nagpapalawig sa deadline ng pagpaparehistro ng mga botante.

Ayon kay Velasco, hindi dapat na hayaan ng Comelec ang proseso ng demokrasya sa halalan na mahadlangan, dahil sa pandemya ng COVID-19, na may potensyal na magresulta sa malawakang voter disenfranchisement.

Inaprubahan ng lehislatura sa ikalawang pagbasa noong nakaraang Biyernes ang inamyendahang bersyon ng House Bill 10261, na nagtatakda sa huling araw ng rehistrasyon ng mga botante sa 2022 pambansa at lokal na halalan.

Sa ilalim ng panukalang inihain ni Velasco – kasama sina Majority Leader Ferdinand Martin Romualdez at Minority Leader Joseph Stephen Paduano – ang huling araw ng pagpaparehistro ng mga botante para sa halalan sa susunod na taon ay 30 araw matapos ang effectivity ng naturang panukala.

Sinabi ni Velasco na ang isang mahalagang hakbang na dapat na gawin ng Comelec para maiwasan ang pagkawala ng karapatan ng mga botante, ay palawigin ang panahon ng rehistrasyon na nakatakdang magtapos sa ika-30 ng Setyembre ngayong taon.

Ang orihinal na bersyon ng HB 10261, ay humihiling na palawigin ang deadline ng rehistrasyon ng mga botante hanggang ika-31 ng Oktubre 2021.

“Extending the voter registration would allow our young people, as well as those who have been deactivated, to register and vote in next year’s elections,” ani Velasco.

Ang mga datos mula sa Philippine Statistics Authority (PSA) ay nagpapakita na 73 milyong botante ang kwalipikadong lumahok sa halalan sa Mayo 2022.

Iniulat naman ng Comelec na mayroon lamang 61 milyong rehistradong botante sa bansa, hanggang sa ika-23 ng Agosto.

Kaugnay nito, hiniling ni Velasco sa Comelec na maglatag ng pamamaraan, upang mapagaan para sa mga Pilipino ang pagpaparehistro at pagboto, tulad ng pagsasaayos ng mga mahahabang linya sa pila, sa mga registration centers.

Ayon kay Speaker, hindi dapat na maging sagabal at pahirap para sa mga Pilipino ang pagpaparehistro para makaboto, lalo na sa mga ngayon pa lamang boboto, sa gitna ng mga dumaraming reklamo sa hirap na nararanasan sa proseso ng rehistrasyon.

Ikinalulungkot ni Speaker kung papaano ang mga nagpaparehistro ay nakakaranas ng napakahabang pila, na nagsisimula pa ng madaling araw, at kadalasan ay hindi rin umaabot sa rehistrasyon.

“Why do we make it so hard for people to register to vote? We urge the Comelec to make voting free, fair and easy,” ani Velasco.

Sinabi ng pinuno ng Kapulungan na marapat lamang na palawigin ang deadline ng voter registration, para sa mga nawala at nasayang na panahon dahil sa pandemya.

Ayon pa kay Velasco, ang anim na buwang supensyon sa rehistrasyon ng mga botante sa gitna ng pandemya noong 2020 ay naging hadlang sa maraming Pilipino, sa kanilang unang hakbang na makalahok sa halalan sa Mayo 2022.

Binanggit ni Velasco na ang rehistrasyon ay sinuspindi pa sa 2021 dahil sa pagpapairal ng iba’t ibang klase ng community quarantine sa buong bansa.

“Let’s give to registrants the time lost when they weren’t able to register. At least give them an additional month so that they could participate in the coming national elections,” aniya. #

-PAGSISIYASAT NG KAMARA SA ULAT NG COA SA MGA BINILING COVID-19 EQUIPMENT, IPINAGPATULOY

Ipinagpatuloy (ngayong araw) kahapon ng Committee on Good Government at Public Accountability sa Kamara, na pinamunuan ni DIWA Rep. Michael Edgar Aglipay, ang kanilang motu propio na imbestigasyon sa mga natuklasan ng Commision on Audit (COA), hinggil sa mga biniling medikal at health safety equipment ng Department of Health (DOH), sa pamamagitan ng Procurement Service-Department of Budget and Management (PS-DBM).

Dahil dito, tiniyak ni Aglipay na determinado ang Komite na magsagawa ng isang masusi at mabilis na pagsisiyasat.

Sa idinaos na pagdinig, binanggit ni dating PS-DBM Executive Director Lloyd Lao na ang PS-DBM ay nakipag-partner sa mga nagsusuplay, na mayroong kakayahang teknikal at pinansyal, upang makapamahagi ng pangangailangan ng pamahalaan nang tumama ang pandemya sa bansa.

Ipinaliwanag din niya na kailangang ipagawa ng DOH sa PS-DBM ang pagbili ng mga medical equipment na hindi lokal na nabibili.

Sinabi nina Lao at dating PS-DBM Director Warren Rex Liong na ang aktibidad ng PS-DBM ay kanilang ginawa para sa kabutihan ng bansa at sambayanang Pilipino.

Samantala, inako ni Pharmally Board Member Huang Tzu Yen na kanilang tiniyak na makakasunod ang kanilang kompanya sa mga rekisitos ng pamahalaan, upang hindi sila ma-blacklisted.

Idinagdag rin niya na ang kanilang kompanya ay tinulungan ng kanilang “friends” na si Economic Adviser Michael Yang, upang makumpeto nila ang paghahatid ng produkto.

Nang tanungin ni PHILRECA Rep. Presley de Jesus kung papaano mapoprotektahan kapag bumili ng pangangailangan sa panahon ng kagipitan, tumugon si Liong na, “Hindi magbabayad kung hindi dumating, na-inspect, at natanggap ang mga produkto.”

Iginiit niya ang kanyang pahayag noong nakaraang pagdinig na hindi nagbigay ng paunang bayad ang PS-DBM, at binayaran lamang aniya ang mga suplayer, matapos na makita at masuri kung nakatugon ba sa pamantayan ng DOH, at matanggap ng ahensya.

Muling magpupulong ang Komite sa ika-27 ng Setyembre 2021, ganap na alas 11 ng umaga, upang mabigyan ang mga ahensya at mga indibiduwal ng sapat na panahon, para makapaghanda ng kanilang mga dokumento na hinihiling ng mga mambabatas.   

#SpeakerLordAllanVelasco

#SpeakerLAV

-MALING COVID-19 TEST RESULT SA SUBIC NA ISINAGAWA NG PRC, TINALAKAY SA IMBESTIGASYON NG KAMARA

Sa pagpapatuloy ng imbestigasyon ng House Committee on good Government and Public Accountability sa Kamara, kinuwestiyon ni Deputy Speaker at SAGIP partylist Rep. Rodante Marcoleta ang diumano ay false positive results ng covid-19 sa Subic na isinagawa ng Philippine Red Cross (PRC).

Sa pagdinig ng komite na pinamunuan ni DIWA partylist Rep. Michael Edgar Aglipay hinggil sa kontrobersiyal na procurement ng mga pandemic items ng pamahalaan, napag-alaman ni Marcoleta na sa 49 na mga bakunado nang health personnel na na-test sa laboratoryo ng PRC, 44 ang tested positive sa covid-19, ngunit sa retest sa ibang pasilidad matapos ang tatlong araw ay ideniklarang negatibo ang mga ito sa virus.

Dahil dito, sinabi ni Department of Health (DoH) Secretary Francisco Duque III na nagsagawa na sa kasalukuyan ng pagsisiyasat ang Research Institute for Tropical Medicine (RITM), batay na rin sa complaint na natanggap ng DOH.

-DAPAT ORGANISADO ANG VOTER’S REGISTRATION AT PAGBABAKUNA SA PANAHON NG PANDEMYA — REP. TADURAN

Nagpahayag ng pagka-dismaya si ACT-CIS Partylist Rep. Rowena Niña Taduran sa nakikita niyang pamamaraan kung paano pinamamahalaan ang pagdagsa ng tao sa mga lugar ng bakunahan at pagpaparehistro ng botante.

Sinabi ni Taduran na sa panahon ng digital technology, dapat ay nakagawa na ang gobyerno ng episyenteng pamamaraan para maiwasan ang pagkukumpulan ng tao sa harap ng lumalalang pandemya. 

Ayon sa kanya, kulang daw tayo sa organisasyon, sa panahon na puwedeng i-schedule ang lahat digitally o online para di nagtutumpok-tumpok ang mga tao.

(Idinagdag pa niya na kung may kanya-kanyang schedule ang magpaparehistrong botante at ang magpapabakuna, hindi na kailangang maghintay ng napakatagal sa pila at makakagawa pa ng ibang gawain ang mga mamamayan.

Sa panahong ito na napakahirap gumalaw at pumunta sa lugar na maraming tao, kailangang may proper scheduling,” dagdag pa ni Taduran. 

“Pagdating sa voter’s registration, parang sadyang pinahihirapan ang mga mamayan na gustong makaboto dahil kailangan nilang pumila ng napakaaga para lang makapagparehistro. At ngayon, ayaw pa ng Comelec i-extend ang registration sa October?” tanong ni Taduran.)

Dahil dito, nanawagan si Taduran sa lahat ng barangay na makipagtulungan sa pag-i-i-schedule ng mga tao sa bakunahan at pagpaparehistro ng botante upang hindi na sumugod at magdikit-dikit sa mga lugar na ito nang wala namang kasiguruhan kung makakakuha ng bakuna o makakapagparehistro.

“Barangays should coordinate with the authorities concerned with the vaccination and registration of voters for the proper scheduling and to avoid crowding. This is the best that they can do to avoid the spread of the dreaded Covid 19 and to spare our fellowmen from wasting their time lining up,” pagtatapos ni Taduran. 

-30-

-PROCUREMENT NG PPEs, FACE MASK ATBP, WALANG OVERPRICING — COA

Sa pagpapatuloy ng imbestigasyon ng Committe on Good Government and Public Accountability sa Kamara, wala umanong naganap na overpricing sa pagbili ng Procurement Services-Department of Budget and Management (PS-DBM) sa pandemic supplies tulad ng mga Personal Protective Equipments (PPEs), face mask at iba pa kabilang ang transaksyon sa Pharmally Pharmaceutical Corporation.

Sinabi ni Commission on Audit (COA) Chairman Michael Aguinaldo na hindi nila sinabing overpricing ang procurement ng PS-DBM sa pagdinig na pinamumunuan ni Diwa Partylist Rep. Michael Aglipay, Chairman ng Komite.

Pinahayag ni Aguinaldo na sa pagbili ng medical supplies ng nasabing tanggapan sa kasagsagan ng COVID-19 pandemic noong 2020, wala sa COA report ng PS-DBM ang statement na may overpricing, walang statement hinggil dito at ang obserbasyon ay mas nagsasabi lamang tungkol sa inventory management.

Una nang kinuwestiyon ng mga state auditors ang paglilipat ng Department of Health (DOH) ng P42 bilyong pondo sa PS-DBM para sa pagbili ng nasabing mga medical supplies.

Sa kanyang pahayag iguniit naman ni Aguinaldo na hindi tama na sabihing ang CoA ang nagsabi na may overpriced dahil wala namang sinabi doon sa report.

-SARA-BONGBONG, BAGAY MAGING MAGKA-TANDEM SA 2022 ELECTIONS AYON KAY REP. BERNOS NG ABRA

Bagay na maging katandem ni Davao City Mayor Sara Duterte si dating Senador Ferdinand Bongbong Marcos, Jr. o BBM ngayong darating na 2022 national elections sa susunod na taon.

Ito ang naging pahayag ni Abra Rep. Joseph Bernos, vice president ng Hugpong Para kay Sara o HPS kahapon sa official launching ng HPS, ng kanyang sinabi na  ang North-South formula ay isang mabisang kombinasyon upang manalo sa eleksyon.

Ayon kay Bernos, maaring maging bias siya sapagkat isang Ilocano at taga-norte siya ngunit yung north tsaka south ay isang subok nang formula at sa palagay daw niya, most logical choice umano si BBM sa vice presidential position.

Sa isang statement, sinabi naman ni Bernos na ang Duterte-Marcos tandem ay “best team” na kayang magpalakad ng bansa dahil sa kanilang mga karanasan at puso para sa mga ordinaryong mamamayan.

Inilungsad ang HPS sa kabila ng pahayag ni Mayor Duterte na hindi ito tatakbo sa isang national position matapos ianunsyo ng kanyang ama na si Pangulong Rodrigo Duterte na tatakbo ito sa pagkabise presidente.

Samantala, Nais ng mga sumusuporta kay Davao City Mayor Sara Duterte na umatras si Pangulong Rodrigo Duterte sa plano nito na tumakbo sa pagkabise presidente sa 2022 elections.

Sa opisyal na paglulungsad noong Lunes, iginiit ng citizen’s movement na Hugpong Para kay Sara (HPS) na si Mayor Duterte ang dapat na pumalit sa kanyang ama.

Naniniwala si dating Davao del Norte Governor at HPS Chairman Anthony Del Rosario na makikita ng Pangulo ang public clamor para sa kanyang anak na maging susunod na presidente.

“We hope we will be able to convince the President to reconsider his plans for 2022,” sabi ni Del Rosario.

-PANUKALA HINGGIL SA REGULASYON NG POLUSYON SA INGAY, APRUBADO SA KOMITE NG ECOLOGY

Inaprubahan (ngayong Miyerkules) ng Committee on Ecology sa Kamara kahapon ang mga panukala hinggil sa pagbabawas at pagkontrol sa ingay.

Ito ang House Bill 2516 na inihain ni Iloilo Rep. Raul Tupas at HB 3052 ni Quezon Rep. Angelina Tan.

Layon ng HB 2516 ang paglikha ng Noise Pollution Control Board, upang makontrol ang polusyon sa ingay.

Samantala, layon ng HB 3052 na kontrolin ang ingay na likha ng kaguluhan ng publiko, at ang paggamit ng videoke, o mga aparato na nagpapalakas ng tunog na hindi nagiging panganib sa kalusugan, kapayapaan o kaligtasan ng mga tao.

Magpapataw ito ng mga parusa para sa mga paglabag.

Sa kanyang pambungad na pananalita, sinabi ni Chairperson at Zamboanga del Norte Rep. Glona Labadlabad, na dahil ang pagkontrol sa ingay ay nailipat na sa mga lokal na pamahalaan (LGUs) ng Department of Environment and Natural Resources (DENR), ang bawat LGU ang siyang nagpapatupad ng kani-kanilang mga lokal na ordinansa.

Sinabi niya na kung titingnan ang iba't ibang mga regulasyon na isinasagawa ng bawat LGU, tila may kakulangan sa mga detalye.

Samantala, sinabi ni Tupas sa kanyang isponsorship, na ang pagkakalantad sa ingay ay may kaugnayan din sa posibleng epekto sa katawan, kabilang ang mga sipon, pagbabago sa presyon ng dugo, iba pang mga pagbabago sa karamdaman sa puso, pagtaas ng pagbisita sa doctor / ospital, mga problema sa sistema ng panunaw, kasama na ang pangkalahatang pagkapagod.

Sinabi pa ng mambabatas na ang Pilipinas ay kabilang sa mga bansa, na kulang sa pambansang patakaran at regulasyon, upang labanan ang polusyon sa ingay dahil sa kakulangan ng mga pamamaraan, upang tukuyin at sukatin ito, kabilang na ang hirap sa pagkontrol nito.

Sinabi naman ni Tan na ang kanyang panukala ay sumasalamin sa mga usapin at nasasakupan ng kaayusan at kaligtasan ng publiko, kalusugan sa publiko, at ekolohiya dahil sa patakaran na kinikilala ang ingay bilang isa sa mga nangungunang peligro sa kapaligiran, sa parehong pisikal at mental na kalusugan, at kapakanan ng bawat tao. Lumikha ang Komite ng isang technical working group (TWG), upang ayusin at pagsamahin ang dalawang panukala. Pamumunuan nina Batanes Rep. Ciriaco Gato Jr. at Manila Rep. John Marvin Nieto ang TWG.

#SpeakerLordAllanVelasco

#SpeakerLAV

-OCTA, HINDI TATANTANAN NG IMBESTIGASYON, AYON SA ISANG LIDER NG KAMARA

Nangako ang isang lider ng Kamara na kanilang huhubaran kung sino man ang mga “financiers and real people” na nasa likod ng research group na OCTA, na bigla na lamang sumulpot sa gitna ng pandemya ng COVID-19.

Sa idinaos na pulong balitaan ng Ugnayan sa Batasan, binatikos ni Deputy Speaker Jose Atienza ang ayon sa kanya ay “continuing effort” na itago ang mga tunay na nasa likod ng OCTA, na nagpapalabas ng mga pahayag at hula kahit na ang kanilang layunin ay isang “political polling firm.”

“There is a continuing effort to hide their faces behind a mask. ‘Yong amin, pagsisikap lang para malaman ng taumbayan, sino itong OCTA at ano ba talaga ang pakay nito?” ani Atienza, matapos niyang ibasura ang mga kritisismo laban sa pagsisiyasat na pinasimulan ng Kapulungan hinggil sa mga kredensyal at operasyon ng naturang research group.

Sinabi niya na ang mga lihim na financiers ng OCTA ay “should properly be unmasked” upang malaman kung ano ba talaga ang tunay na motibo nila.

“Definitely may nagpo-pondo diyan. ‘Pag magpa survey ka, it will cost you at least P500,000, P1 million. I don’t think anyone is doing any survey for free. So mayroong nagpo-pondo. Sino? Eh tingnan natin, sino nakikinabang sa trabaho ng OCTA,” ayon sa beteranong mambabatas.

Sa naturang pulong balitaan, sinabi ni DIWA Rep. Michael Aglipay – na siyang chairman ng Komite ng Good Government and Public Accountability – na ang mga pagtaya ng OCTA ay madalas na labis, at ang kanilang mga kinatawan ay umaakto na parang mga “radio commentators” sa pag-aanunsyo ng mga pagtaas sa kaso ng sakit.

Sumailalim sa matinding paggisa ang Octa mula sa Kapulungan ng mga Kinatawan sa pagsisimula ng linggong ito, matapos ang malalimang pagbusisi ng mga mambabatas sa mga kredensyal at mga pamamaraan upang suriin ang mga datos, at paghula sa mga kaganapan sa mga kaso ng COVID-19 sa bansa.

Inilunsad ng Komite ni Aglipay ang pagsisiyasat sa “qualifications, research methologies, partnerships and composition” ng OCTA, batay sa resolusyong inihain ng limang mambabatas na sina Deputy Speakers Bernadette Herrera at Kristine Singson-Meehan, Deputy Minority Leader Stella Luz Quimbo, at Reps. Sharon Garin at Jesus Suntay.

Nilinaw ni Aglipay na walang intensyon ang mga mambabatas na busalan ang bibig ng OCTA, subalit naniniwala sila na dapat lamang na pigilan nila ang kanilang sarili na magdeklara ng mga pagtaya at ulat bilang opisyal, dahil wala namang nagbigay sa kanila ng kapangyarihan mula sa pamahalaan.

“Never tayong mag-a-abridge ng right to speak. They can speak anytime, they can speak nonsense and they can speak against the government,” ani Aglipay.

“Ang ayaw natin ‘yong sinasabi nila na they are speaking officially, which they are not. They are not even part of the sub-technical working group on statistics of DOH and IATF. They have no official role.”

Pinayuhan ni Aglipay ang research group na maging tagapamagitan na lamang – “a private group that fiscalizes and sees to it that government does its job with their statistics.”

“Let science speak for itself, maging objective lang tayo. ‘Wag masyado komentaryo parang radio announcer na sila eh,” punto niya.

Sa kabilang dako, sinabi ni Atienza na dapat silipin ang awtoridad ng OCTA na magpahayag sa panahon ng pandaigdigang pandemya, lalo’t ang kanilang mga datos at mga hula ay may mahalagang impluwensya sa pamahalaan at sa mga tao.

“Napakalaki ng influence nila. Kung ano ang sinasabi nila, tinatanggap ng gobyerno, sinasalamin ng DOH, natatakot ang tao,” ani Atienza.

Idinagdag niya na: “The issue is more fundamental: ano ang kanilang authority to be speaking in the time of a pandemic? Sabi ko nga para tayong nasa giyera nito, we are at war with the virus. Emergency situation ito. Bakit bigla na lamang silang kasali sa usapan? They’re speaking for and in behalf of what?”

Binigyang-diin ni Atienza na dapat na mayroong isang pinagkukunan ng impormasyon sa panahong ito ng kagipitan sa bansa.

“We cannot allow just anybody on the basis of good intention to now get into the picture. In times of war, there shoul be one source of information. You cannot allow anybody to speak for and in behalf of the two forces fighting it out,” aniya #

-PAGTATAYA NG OCTA RESEARCH SA COVID-19 AT MGA REKOMENDASYON NITO HINGGIL SA LOCKDOWN, SINIYASAT NG KOMITE

Sinimulang imbestigahan kahapon ng Committee on Good Government and Public Accountability sa Kamara, sa pamumuno ni DIWA Rep. Michael Edgar Aglipay, in aid of legislation, ang mga kwalipikasyon, pamamaraan ng pagsasaliksik, pakikipagsosyo, pati na rin ang komposisyon ng OCTA Research Philippines, na kinasasangkutan ng mga hula nito sa pagtaas ng COVID-19 at mga rekomendasyon sa lockdown.

Isinagawa ang imbestigasyon batay na rin sa House Resolution 2075 na inihain nina Deputy Speakers Bernadette Herrera at iba pang mga mambabatas.

(Kristine Singson-Meehan, Deputy Minority Leader Stella Luz Quimbo, Deputy Majority Leader Jesus Suntay at AAMBIS-OWA Rep. Sharon Garin.)

Nilinaw ni University of the Philippines Professor at OCTA Research Fellow Dr. Ranjit Rye na sila ay isang non-profit at non-stock na organisasyon na binubuo ng mga boluntaryong sosyal na siyentipiko at ilang mga doktor.

Sinabi din niya na ang kanilang COVID Research Team ay walang natatanggap na pondo mula sa anumang mga pampubliko o pribadong samahan.

Kinuwestiyon ni Herrera ang Department of Health (DOH) kung naisaalang-alang ba nila ang mga pagpapakita ng OCTA Research Team sa kanilang pagpapasya.

Sinabi ni Direktor ng DOH Epidemiology Bureau Alethea de Guzman, na walang opisyal na ugnayan sa OCTA sa ahensiya, ngunit tinatanggap nila at isinasaalang-alang ang mga istatistika at hula nito.

“Ang nakikita ko dito, ang feeling ng OCTA they had to take matters in their own hands because hindi nila nakikita ang DOH na nagpe-predict, na nagre-release ng mga impormasyon na ‘to and media really welcomed them. We have to face that reality in this committee hearing and I hope DOH learns something from it,” ani Herrera.

Samantala, ayon kay UP President Danilo Concepcion sa isang liham, ang mga personal na pagkukusa na kinasasangkutan ng ilang mga miyembro ng tauhan ng akademiko at pananaliksik ng UP tulad ng OCTA Research Team, ay walang kaugnayan sa unibersidad.

Hinimok ng Komite si Concepcion na magbigay ng detalyadong ulat ng P15-milyong subsidiya na inilaan sa pananaliksik na natanggap nito mula sa pondo ng Bayanihan 2 sa susunod na pagdinig. Nauna nang sinabi ni Rye na hindi sila nakatanggap ng bahagi ng subsidiya ng unibersidad noong nakaraang taon.

#SpeakerLordAllanVelasco

#SpeakerLAV

-PAGTALAKAY SA 2022 ₱297.13-B PANUKALANG BADYET NG DND, TAPOS NA SA KOMITE

Tinapos na (ngayong araw) kahapon sa isang hybrid na pagpupulong ng Committee on Appropriations sa Kamara, na pinangunahan ni Muntinlupa City Rep. Ruffy Biazon, Vice Chairperson ng Komite, ang pagtalakay sa panukalang ₱297.13-bilyong badyet ng Department of National Defense (DND) sa ilalim ng 2022 National Expenditure Program (NEP).

Ipinahayag ni DND Secretary Delfin Lorenzana na ang halagang ₱221.60-bilyon ay ilalaan para sa DND at mga sangay na ahensya nito, habang ₱75.53 bilyon naman ay para sa pensiyon at gratuity fund ng mga beterano at mga retirado nang Armed Forces of the Philippines (AFP).

Samantala, kasama sa mga layunin ng DND ang: 1) protektahan ang soberanya at integridad ng teritoryo ng bansa; 2) pagtataguyod ng sariling katatagan; 3) pagkamit ng pinakamataas na pamantayan ng kakayahan at kahandaan sa mga sakuna; 4) pagpapaigting ng operasyon sa pagsuporta sa pandaigdigang kapayapaan at seguridad; at 5) mabuting pamamahala.

Ayon kay Lorenzana, ilan sa mga espesyal na probisyon ng 2022 NEP ay nasa Quick Response Fund ng ahensya, na mag-aalok ng tulong pinansyal sa mga biktima ng panganib likas man o kagagawan ng tao, pagsasagawa ng mabilis na pagsusuri ng mga kinakailangan matapos ang kalamidad, gayundin ang paglalaan ng pondo para sa iba pang mga gastusin na kinakailangan, upang mabawasan o maibsan ang epekto ng mga kalamidad.

Samantala, tinalakay naman ni Iloilo Rep. Raul Tupas, Chairman ng Committee on National Defense and Security ang mga inisyatiba ng Kamara upang matulungan ang DND, tulad ng mga panukalang batas na lumilikha ng Self-Reliant Defense Posture Program, pati na rin ang mga panukalang magbibigay ng libreng tulong-legal sa mga opisyal at tauhan ng AFP at sa iba pang mga ahensiya ng seguridad.

#SpeakerLordAllanVelasco

#SpeakerLAV

-PAGPASA NG PANUKALANG ‘HIDILYN DIAZ’, PINURI NI SPEAKER VELASCO

Nagkakaisang inaprubahan kahapon ng Kamara, ang panukala na maglilibre sa buwis para mga insentibo, gantimpala, at mga bonus na matatanggap ng mga pambansang atleta at kanilang mga tagapagsanay, lalo na ang mga nakipagtunggali sa katatapos na Tokyo Summer Olympics.

Sa botong 205, inaprubahan ng Kapulungan sa ikatlo at huling pagbasa ang bipartisan House Bill 9990 o ang “Hidilyn Diaz Act” na iniakda nina Speaker Lord Allan Velasco at 90 iba pang mambabatas na nabibilang sa parehong majority at minority blocs.

Sinabi ni Velasco na ang pagpapalibre sa buwis na isinasaad sa panukala ay “represent the token of gratitude and appreciation of Congress and the entire nation to Filipino athletes who have brought joy, pride and glory to the country.”

“This is our way of giving back to our exceptional national athletes, a well-deserved reward for their perseverance and hard work,” punto ni Velasco.

Dahil sa inspirasyong idinulot ng makasaysayang medalyang ginto na napagwagian ng weightlifter na si Hidilyn Diaz sa Tokyo Games, layon ng HB 9990 na amyendahan ang Republic Act 10699, o ang National Athletes and Coaches Benefits and Incentives Act na isinabatas noong 2015.

Hangarin nito na ilibre sa buwis ang mga insentibo, gantimpala, bonuses at iba pang uri ng kabayaran, kabilang na ang mga donasyon, regalo, kaloob at mga kontribusyon, mula sa mga pribado o pampublikong grupo o mga tao, na matatanggap ng mga pambansang atleta na nakipagtagisan ng lakas at nagtagumpay sa isang international sports competition. Ang panukalang paglilibre sa buwis ay sasaklawin din ang mga insentibo at gantimpala na matatanggap ng kanilang mga tagapagsanay.

Nagpahayag si Velasco ng pasasalamat kay Komite ng Ways and Means sa Kapulungan Chairman Rep. Joey Salceda, at iba pang mga may-akda ng panukala sa kanilang “enthusiastic support” sa HB 9990.

“With additional support and financial incentives such as those provided in HB 9990, we hope to encourage more local athletes to push themselves further and continue to bring honor to the Philippines,” dagdag pa niya.

Nauna nang pinagtibay ng Kapulungan ang resolusyon – na pangunahing ini-akda nina Velasco, Majority Leader Ferdinand Martin Romualdez at Minority Leader Joseph Stephen Paduano – na bumabati at nagpapasalamat sa buong delegasyon ng Pilipinas sa Olimpiyada, sa kanilang “highly successful and historic performance” sa 2020 Tokyo Games.

“The exceptional and remarkable finish of the athletes and their coaches during the 2020 Tokyo Olympics Games highlights the indomitable Filipino spirit to rise above adversities and ushers in a new era of sports heroes who bring joy and inspiration to our fellow Filipinos amid the difficult conditions brought about by the pandemic,” ito ay ayon sa tatlong pinuno ng Kapulungan sa kanilang resolusyon.

Binanggit ng mga lider ng Kapulungan kung papaano nangibabaw ang Pilipinas bilang pinakamagaling na gumanap na bansa sa Timog-Silangang Asya sa Tokyo Olympics at nilampasan ang kanilang tatlong tansong medalya na nakamit sa Los Angeles Games noong 1932.

Ang makasaysayang tala, ayon sa kanila, ay nakamit ng delegasyon ng Pilipinas sa Olimpiyada na kinabibilangan ng 19 atleta, kasama ang kani-kanilang mga tagapagsanay, na nakipagtunggali sa 11 iba’t ibang larangan ng palakasan.

Sinabi nila na ang mga Pilipinong atleta, kasama ng kanilang mga tagapagsanay “displayed their sportsmanship during the global multi-sports event and secured a spectacular four-medal haul,” kasama na ang medalyang ginto ni Diaz, dalawang medalyang pilak nina Nesthy Petecio at Carlo Paalam, at isang medalyang tanso ni Eumir Marcial.

Pinangunahan ni Diaz ang grupo ng mga atletang Pilipino sa pagwawagi ng kauna-unahang gintong medalya ng Olimpiyada para sa bansa, na nagwakas sa 97 taong paghahangad sa mailap na ginto; samantalang sina Petecio, Paalam at Marcial ay ipinakita ang kanilang kaibahan sa pagrerepresenta ng matagumpay na grupo ng mga boksingero sa kasaysayan ng bansa.

Pinagtibay din ng Kapulungan ang apat pang hiwalay na resolusyon, na naggagawad ng Congressional Medal of Excellence kay Diaz at ang Congressional Medal of Distinction naman kina Petecio, Paalam at Marcial. #