Wednesday, February 23, 2011

Pagbabago sa hanay ng kapulisan, iminungkahi

Kumilos na ngayon ang Kamara upang gawing mahusay ang pagkuha, pagpili pati na ang pagtaas ng rangko sa Philippine National Police (PNP) upang matiyak na ito ay magiging kagalang-galang, mapagkakatiwalaan at higit sa lahat, maipanumbalik ang tiwala ng taumbayan sa institusyon.

Inihain ni Zamboanga del Sur Rep Aurora Enerio-Cerilles ang HB01996 upang baguhin ang pagkuha at proseso ng pagpili sa PNP at amiyendahan ang RA08551 o ang Philippine National Police Reform and Reorganization Act of 1998.

Nanawagan si Cerilles sa liderato ng Kamara para pagtibayin ang panukala sa lalong madaling panahon bunsod ng napabalitang talamak na dayaan sa entrance examination at promotional tests sa pulisya.

Nakapandaya umano ang mga hindi kuwalipikadong aspirante na makapasok sa PNP, ayon sa balita.

Ito ay nakakalungkot, ayon kay Cerilles, dahil kung sino pa ang inaakalang magpo-protekta sa ating kaligtasan ay iyon pa ang gumawa ng pandaraya para lamang makapasok sa PNP.

Para matiyak na sumunod ang isang aspirante sa lahat ng reglamento sa kalusugan ng katawan at pag-iisip, pati na ang hindi paggamit ng mga ipinababawal na gamut, nakasaad sa panukala na pamamahalaan ng NAPOLCOM sa pamamagitan ng accredited government hospitals ang regular na psychiatric, psychological drug and physical tests na walang pinipiling araw at oras at walang babala.

Tuesday, February 22, 2011

Panibagong mungkahi hinggil sa legal separation, inihain

Iminungkahi ni Occidental Rep Amelita Calimbas-Villarosa na amiyendahan ang Family Code upang makapaghain ng mas marami pang legal na paraan ang mga mag-asawang naghahangad na maghiwalay sanhi ng mga problema sa kanilang pagsasama.

Sa HB02144 na inakda ni Calimbas-Villarosa, aamiyendahan nito ang Section 55 ng Executive Order No. 209 o ang Familay Code of the Philippines dahil ayon sa kanya, karaniwang umanong dinadahilan ng mga mag-asawa ang 'di pagkakasundo’ o irreconcilable incompatibility sa paghahangad nilang maghiwalay matapos silang magsama ng matagal.

Ngunit hindi daw ito sapat na dahilan sapagkat nakakalimutan na lamang umano ng mga ito ang kasagraduhan ng kasal hanggang pati ang kanilang mga anak ay maapektuhan sa kanilang paghihiwalay.

Ayon sa mambabatas, maaaring maghain ng mas mabigat na kadahilanan ang babae para sa legal na paghihiwalay tulad ng pagkakasakit ng sexually transmissible disease ng lalaki o pagbabanta sa buhay ng nagrereklamo at magulang, kapatid at mga anak nito.

Maaari din umanong idahilan ang pagtanggi ng lalaki na suportahan ang asawa at mga anak at ang pagtanggi ng lalaki na maghanap ng disenteng trabaho at kabuhayan para sa pagtataguyod ng maayos na pamilya at bukod pa rito ay maaari ding idahilan ang pagkagumon sa sugal at pagiging bakla ng lalaki.

Naniniwala si Calimbas-Villarosa na ang mga nabanggit na dahilan ay mas realistic at more responsive upang maihain ang legal separation.

Monday, February 21, 2011

Pagtataas ng age requirement para sa SK , ipinanukala

Nais ng isang mambabatas na taasan ang nararapat na edad ng mga kasapi ng Sangguniang Kabataan (SK) magmula 18 at gawing 25 taong gulang na para ganap na makatutugon ang mga ito sa kanilang mga atas at mga hamon sa paninilbihan.

Sa isang privilege speech, sinabi ni San Juan Rep Joseph Victor Ejercito na ang kasalukuyang batas hinggil sa SK ay puno ng mga panukala at mekanismo na pumoprotekta sa mga kabataan sa kurapsiyon, manipulasyon at impluwensiya ng ilang mga pulitiko.

Ayon sa kanya, tamang-tama lamang umano ang edad 18-25 dahil umabot na ang mga ito sa isang level of maturity at kakakayanang umako ng mga responsibilidad kaysa sa itinadhana sa kasalukuyang batas na 15-17.

Nakalulungkot umano ang estado ng mga kabataan ngayon, sa kanilang murang edad, ay ini-expose na ng kanilang mga magulang sa maruming larangan ng pulika kung kayat ayaw daw niyang magiging tagamasid lamang na sila ay ginagamit ng mga balikong pulitiko at kahit ng kanilang mga sariling magulang para lamang makamtan ang kanilang mga makasariling interes.

Friday, February 18, 2011

Pagbabawal ng pagto-troso sa loob ng 12 taon, ipinanukala

Ipagbabawal na ang commercial logging sa buong bansa sa loob ng labindalawang taon umpisa sa pagkakapasa ng panukala na inihain ngayon sa Kamara de Representantes.

Alinsunod sa naging pahayag ni Pangulong Benigno Aquino III, naghain si Laguna Rep Danilo Ramon Fernandez ng HB02176 na may layuning ganap na magpapatupad ng pagbabawal ng pagto-troso o papuputol ng mga punong-kahot upang gamiting pang-komersiyal na layunin.

Sinabi ni Fernanadez na bagamat marami nang mga batas na ipinasa hinggil sa forest conservation, patuloy pa ring nagiging banta sa mga buhay at ari-arian ng mga mamamayan dahil sa walang habas, irisponsable, di mapigilan at mapaminsalang aktibidades ng pang-komersiyal na pagto-troso.

Ayon sa kanya, mayroon na talagang pangangailangang magpasa ng isang batas na tunay na tutugon sa bumababang estado ng ating kagubatan at maisalba nag mga mamamayan sa masamang epekto ng global warming na dulot ng pagkakalbo ng ating kagubatan.

Kaakibat sa panukalang ito ay ang mabigat na kaparusahang ipapataw sa sinumang lalabag na tao o kumpanya sa batas na ito.

Wednesday, February 16, 2011

Problema sa polusyong dulot ng ingay, tutugunan ng Kongreso

Nagbabala si Marikina Rep Marcelino Teodoro sa panganib ng epekto na dulot ng polusyon sa ingay kapag hindi agad na umaksyon ang pamahalaan.

Dahil dito, inihain ni Teodoro ang HB01839 o Anti-Pollution Act of 2010 na naglalayong magpatupad ng regulasyon sa ingay at iangat ang kamalayan ng mga mamamayan sa panganib na dulot nito sa kalusugan.

Sinabi ni Teodoro na nakakalungkot daw na walang umiiral na batas para matugunan ang polusyon sa ingay na karaniwang hindi pinapansin.

Ayon sa kanya, batay sa pag-aaral ng World Health Organization, ang sobrang ingay ay labis umanong nakakaapekto sa kalusugan ng isang tao na abala sa kanyang araw-araw na gawain tulad ng pag-aaral, trabaho, gawaing bahay, at maging sa pamamasyal, at nakakagambala sa pagtulog, nakapagdudulot ng sakit sa puso, pag-iisip, nakakapagbawas ng lakas, gayun na rin sa pagbabago ng asal tulad ng pagkabugnot.

Bagamat may ilang umiiral na regulasyon hinggil sa pangangalaga sa mamamayan laban sa ingay tulad ng Sec 85 ng PD No 856 o ang Code on Sanitation noong administrasyon pa ni Marcos, ang mga lungsod tulad ng Puerto Princesa sa Palawan at San Juan sa Metro Manila ay nagpairal ng ordinansa na nagsusulong upang labanan ang polusyon dulot ng ingay.

Iilang mga panukala ang inihain noong nakaraang 14th Congress nguni’t hindi ito naisabatas hanggang sa nagtapos na ang sesyon ng Kamara noong Hunyo dahil hindi ito tinatratong problema o dahil sa walang pakialam ang ilan nating kababayan kaya’t nabale-wala lang ang pagbabawal sa sobrang ingay.

Tuesday, February 15, 2011

Carnapping, gagawin nang non-bailable crime

Alinsunod sa naging pahayag ni Pangulong Benigno Aquino III, hinimok ngayon sa Mababang Kapulungan na ideklara ang carnapping bilang isang krimeng hindi mapi-piyansahan o non-bailable crime na may kaakibat na hindi bababa sa apatnapung taong pagka-bilanggo.

Sa pamumuno ni Camarines Sur Rep Salvio Fortuno, may-akda ng HB04003, kinondina ng mga mambabatas ang di-napigilang mga insendente ng carnapping kamakailan lamang na nagresulta ng pamamaslang ng may tatlong katao.

Sinabi ni Fortuno at ni Malabon Rep Josephine Veronique Lacson-Noel na patuloy pa rin umanong mamamayagpag ang carnapping bilang isang backyard na negosyo kung hindi tutugon ang gobyerno sa paglutas ng problema.

Layunin ng nabanggit na panukala, kahalintulad ng HB04033 ni Lacson-Noel, na patawan ng kaparusahang reclusion perpetua o pagkakakulong ng hindi bababa sa apatnapung taon kung saan hindi papayagang ma-pardon ang salarin hanggang hindi lalagpas sa tatlumpong taong nakapiit ito.

Samantala, may tatlo pang kahalintulad na mga panukala sa Kamara na kasalukuyang nakabinbin sa committee on justice: ang HB04043 ni Sorsogon Rep Salvador Escudero III, ang HB03996 nina Buhay party-list Reps Irwin Tieng at Mariano Michael Velarde at ang HB01400 nina Cagayan de Oro Rep Rufus Rodrigguez at Abante Mindanao Rep Maximo Rodriguez.

Monday, February 14, 2011

Monopolya sa negosyo, dapat mawasata na

Bagamat iginagarantiya ng Saligang batas ang maprotektahan ang balanseng kompetisyon sa pamilihan, hindi pa rin ito sapat para mawala ang monopolya ng mga malalaking negosyante.

Layunin ng panukala nina Pampanga Rep Gloria Macapagal-Arroyo Camarines Sur Rep Diosdado Arroyo, ang HB01583 na gawing kasong kriminal ang lahat ng uri ng pakikipag-sabwatan na sisira sa malayang kompetisyon sa pamilihan.

Binatikos nina Arroyo ang patuloy na paghahari ng monopolya at kartel sa pamilihang bayan ng kanilang sinabi na mahabang panahon na rin umano ang sakripisyo ng mga maliliit na tindero at halos nagmamaka-awa sila sa malalaking kompanya dahil kulang sa regulasyon at proteksyon  ang sistema.

Nakasaad daw sa batas na kailangang itaguyod at palakasin ang malayang kompetisyon sa kalakalan, industriya at lahat ng komersiyo sa ekonomiya at pigilan ang pananatili sa kapangyarihan ng iilang indibiduwal na nagbabantang kumontrol sa produksyon ng kalakal.

Umaasa sina Arroyo na maisasabatas ang kanilang panukala para mapatawan ng mabigat na kaparusahan ang mga nasa likod ng monopolya at unfair trade practices ng mga walang-konsiyensang kompanya.

1 Corinto 13:4-7

Matiyaga ang pag-ibig at may kagandahang-loob. Hindi ito nagseselos, nagmamapuri, o nagmamataas. Hindi gumagawa ng di-tama o tumitingin sa sarili; hindi nagagalit o nagtatanim ng sama ng loob; hindi natutuwa sa kasamaan kundi nagagalak sa katotohanan. Ang pag-ibig ay nagbabata sa lahat, nainiwala sa lahat, umaasa sa lahat at nagtitiyaga sa lahat.

The Bible

Tuesday, February 08, 2011

Epekto ng pagbabago ng klima, mananatiling priyoridad

Isinusulong ngayon ang pagsasabatas ng People’s Survival Fund bill na naglalayong madagdagan ng mas malaking pondo ang mga programa para matugunan ang epekto ng pagbabago ng klima.

Sinabi ng bagitong mambabatas ng Quezon na si Rep Irvin Alcala na sa pagpupulong kahapon hinggil sa pagpasa ng naturang panukala, kanyang isinulong ang agarang pagpasa sa HB03528 na mag-aamiyenda sa RA09729 o Climate Change Act of 2009 dahil sa lumalalang kalagayan ng klima.

Ayon sa kanya, hindi umano maiiwasan ang lumalalang kalagayan ng klima sa buong mundo tulad ng pagkatunaw ng niyebe sa polar icecaps at Amerika, pagbaha sa Australia, at mga epekto ng El Niño at La Niña.

Maging ang temperatura umano sa bansa ay apektado na rin mula sa normal na 28ºC na bumaba sa 22.6ºC at sa lungsod ng Baguio ay bumaba rin ng 9.4ºC, ganun din sa Kamaynilaan na bumaba ng 19.8ºC at dahil dito ay labis na naapektuhan daw ang milyon-milyong pisong halaga ng produktong agrikultura.

Samantala, 46 mula sa 51 pag-ulan sa buong bansa ay nakapagtala ng pinakamataas na antas ng pagbagsak ng ulan na nagdulot ng mga pagbaha at pagguho ng lupa na naging sanhi ng pagkasawi ng maraming buhay at pagkawasak ng mga ari-arian.

Kabilang sa labis na naapektuhan ay ang Surigao City na nagtala ng 1800 mm na ulan noong Enero, at sa Samar na nagtala naman ng 1,524 mm na ulan, samantalang ang buong bansa naman ay nakaranas ng 22 malalakas na bagyo mula 2008 hanggang 2009.

Ayon pa sa mambabatas, sa Caraga Region, umabot sa 300,000 pamilya ang nawalan ng bahay sa loob lamang ng limang araw ng tuloy-tuloy na pag-ulan at 70,000 naman sa Davao del Norte, Compostela Valley at Albay, sanhi ng mga baha at pagguho ng lupa.

Nagbabala naman si Science and Technology Undersecretary Dr Graciano Yumul na maaaring makaranas ang bansa ng 11 pang mas malalakas na bagyo sa taong ito.

Sa ilalim ng HB03528, magdaragdag ng mas malaking pondo ang pamahalaan para sa mga programa at proyekto para matugunan ang epekto ng pagbabago ng kilma at ang pondo nito ay kukunin sa General Appropriations Act (GAA), dibidendo mula sa Government Owned and Controlled Corporations, kita mula sa motor vehicle user’s charges, at pondo mula sa mga dayuhan sa ilalim ng compensatory financial mechanism.

Idinagdag pa ng mambabatas na sa pamamagitan ng panukalang ito ay maaari ng gamitin ang dating pinagkukunan ng pondo para sa programa ng climate change batay sa RA09729 mula sa internal revenue allotment (IRA) ng lokal na pamahalaan, sa iba pang mahahalagang programa tulad ng edukasyon at kalusugan.

Sunday, February 06, 2011

Biktima ng AIDS sa bansa, patuloy na dumarami

Nagpahayag ng pagka-bahala si Cavite Rep Lani Mercado-Revilla sa ulat na mahigit na 10,000 mga Filipino na ang positibong may Acute Immunity Deficiency Syndrome (AIDS) at patuloy pang dumarami.

Sinabi ni Revilla na batay umano sa mga datos mula sa mga tanggapan ng pangkalusugan, umabot sa 8,300 ang bilang ng may HIV/AIDS sa bansa noong 2007 at sa bilang na ito ay 2,200 ang kababaihan na nag-iedad 15 taong gulang pataas at may 1,305 na kaso ng HIV-positive naman ang napaulat noong 2010.

Ang bilang ng biktima ng HIV sa buong daigdig ay umabot sa 33.3 milyon mula sa 8 milyon, simula 1990 hanggang 2009 at sa bilang na ito, 15.9 milyon ang kababaihan at 2.5 milyon ang kabataan at ang mga pinakaapektadong bansa ay mula sa rehiyon ng Sub-Saharan Africa na may 22.5 milyong biktima ng AIDS, at pumangalawa ang rehiyon ng Southeast Asia na may 4.1 milyong biktima ng AIDS.

Ayon sa mambabatas maaari umanong mas mataas pa ang bilang ng mga AIDS carriers sa bansa kumpara sa nasa datos dahil maraming may ganitong karamdaman ang patuloy na inililihim ang kanilang kalagayan upang magtago sa kahihiyan at takot na sila ay yurakan ng kanilang komunidad.

Panahon na umano para kumilos ang pamahalaan upang hindi na umabot pa sa epidimiya ang bilang na naitala.

Idinagdag pa ng mambabatas na dapat daw na tiyakin na ang bawat biktima ng ganitong karamdaman sa bansa ay magkaroon ng pagkakataon na malunasan sa pamamagitan ng anti-retroviral therapy.

Wednesday, February 02, 2011

Whistleblowers, ganap na mapoproteksiyunan batay sa panukala

Sa ginta ng alingasngas sa pamahalaan na dulot ng imbestigasyon hinggil sa Php303 milyon plunder case laban kay Gen Carlos Garcia at paglitaw ni dating COA State Auditor Heidi Mendoza na tumestigo sa kaso, ipinanukala sa Kongreso ang pagbibigay ng ganap na proteksiyon sa sinumang titestigo laban sa tiwali na opisyan ng gobyerno.

Tatawaging whistleblower protection bill ang panukala na inihain ni Marikina Rep Marcelino Teodoro, ang HB01832 na may layuning mapaigting ang government at corporate accountability sa pamamagitan ng pagsuporta at proteksiyon sa karapatan ng mga empleyadong magsasalita laban sa katiwalian ng mga nakakataas sa kanila.

Sinabi ni Teodoro na sa state of the nation address ni Pangulong Benigno Aquino III noong nakaraang taon, binigyang diin umano ng pangulo ang kahalagahan ng whistleblower bill sa kampanya ng pamahalaan laban sa kultura ng pagsasaboy ng takot para sa mga nagnanais na magsiwalat ng kurapsiyon at katiwalian sa serbisyo publiko.

Ayon kay Teodoro, ang mga government officials na inakusahan ng irigularidad ay pagbabawalan nang magsasagawa ng anumang retaliatory action o pananakot laban sa mga empleyadong tumitestigo laban sa kanilang mga superior na may kaakibat na kaparusahan

Karamihan umano sa mga whistleblower ay nakakaranas ng panghaharas at kadalasan ay tinatakot na sibakin ng kanilang mga superyor na siyang naging sanhi ng pagkawalang ganang sumulong dahil sa chilling effect na kanilang nararanasan.
Free Counters
Free Counters