Saturday, October 30, 2010

Paggamit ng commemorative plates, bawal na

Isinusulong ngayon sa Mababang Kapulungan na gawing krimen ang di-otorisadong paggamit ng mga commemorative car license plates kung pagbabatayan ay ang panukala nina Cagayan de Oro Rep. Rufus Rodriguez at Abante Mindanao Rep. Maximo Rodriguez Jr.

Layunin ng HB01172 nina ng mga Rodriguez na matigil na ang pag-abuso sa mga commemorative plates na karaniwang ginagamit ng mga di marunong sumunod sa batas trapiko upang matakasan nila ang kanilang traffic violations.

Batay sa HB01172, ang commemorative license plate (CLP) ay isang bagay na nagsisilbing tagapag-paalala at nagbibigay pugay sa isang makasaysayang lugar, pangyayari, pagkakataon, lihitimong organisasyon at mga pambansang bayani at ito ay maaari lamang gamitin sa limitadong panahon at nakalagay sa harapang bahagi ng sasakyan.

Sunabi ni Rodriguez na sa kasalukuyan, ang commemorative plates umano ay nagagamit upang ang taong mayroon nito ay makapagyabang o di kaya ay maipakita na sila ay mas importante kumpara sa mga taong wala nito.

Idinagdag pa ng mambabatas na bagaman at hindi kasing bulgar ng paggamit ng sirena at wang-wang, pareho pa rin ang impresyon umano na ipinapahatid o nais ipahatid ng taong gumagamit ng CLP.

Mayroon din umanong mga traffic enforcer at maliliit na pulis ang nasisindak pa rin sa mga CLP kaya imbes na hulihin kapag nagkaroon ng traffic violation ang mga sasakyang mayroon nito ay pinipiling iwasan na amang imbes na hulihin dahil may commemorative plates.

Nagagamit din umano ang mga commemorative plates na ito upang maiwasan ang pagsunod sa programang pinapairal ng Metro Manila Development Authority (MMDA) na Unified Vehicular Volume Reduction.

Thursday, October 21, 2010

Regulasyon sa pagbebenta ng bottled water, isinusulong

Upang mabantayan at magkaroon ng maayos na regulasyon sa pagbibenta ng mga nakabotelyang inumin, inihain nina Cagayan de Oro City Rep Rufus Rodriguez at kanyang kapatid na si Abante Mindanao party-list Rep Maximo Rodriguez, Jr. ang HB01075 o “Safe Bottled Water Act", na naglalayong maprotektahan ang mga mamimili sa mga ibinebentang tubig-inumin sa mga pamilihang bayan.

Siinabi ng mga mambabatas na tungkulin umano ng pamahalaan na bantayan ang produksyon at pagbebenta ng nakabotelyang inumin at tiyakin ang kalidad ng mga mineral, carbonated at bottled water, at mga pinanggagalingan o pinagkukunan ng tubig na ginagamit dito.

Sa kasalukuyan, ayon sa kanila, ay wala pang batas na ipinaiiral para sa regulasyon ng mga bottled water at ang mga mamimili ay nagbabayad ng mahal sa pag-aakalang mas mataas ang kalidad ng tubig na kanilang binibili at iniinom kaysa sa tubig na nanggagaling sa gripo.

Idinagdag pa ng mga mambabatas na layunin ng panukala na mapangalagaan ang mga mamimili mula sa mga iligal na kalakaran tulad ng mga produktong nanggagaling sa mga mapanagnib na pinagkukunan ng tubig

Sa ilalim ng panukala, ang direktor ng Bureau of Food and Drugs (BFAD) at ang kalihim ng Department of Health (DOH) ang mangangasiwa at magtatatag ng monitoring program at mag-aanalisa ng mga nakabotelyang tubig na ipinagbibili sa merkado, kasama na ang pagpapairal ng mga pamantayan sa lahat ng antas ng mga sangkap na naayon sa kalidad na mineral, spring, natural sparkling water at vended water.

Wednesday, October 20, 2010

Update hinggil sa epekto ni “Juan”

Nanawagan ngayon ang mga mambabatas mula sa Northern Luzon sa pamahalaan na bigyan sila ng tulong dahil na rin sa matinding epektong dala ng bagyong “Juan” na sumalanta sa kanilang lalawigan nitong Lunes.

Ayon kay Isabela Rep Rodolfo Albano, Sr. nangangailangan ngayon ng mga relief goods ang mga mamamayan sa kanyang distrito.

Kailangan umano nila ng pagkain, mga gamit sa pagtatayo ng bahay dahil maraming pamilya ang nasiraan at nawalan ng bahay dahil kay “Juan.”

Nauna na rito, nanawagan na rin si Isabela Gov Faustino Dy III na bigyan sila ng tulong sa sektor ng agrikultura dahil mahigit sa 89,000 ektarya ng lupain na pinagtamnan ng palay at 11,000 ektarya ng pananim na mais ay nasira dahil hindi pa ito naaani nang dumating si “Juan” sa Northern Luzon.

Ayon naman kay Nueva Vizcaya Rep Carlos Padilla, sa kasalukuyan ay tinitingnan pa ng mga otoridad sa kanyang lalawigan ang laki ng epekto at mga nasirang pananim sa kanilang lugar.

Aniya maaaring hindi man kasing laki ng halaga ng nasira sa Isabela at Cagayan ngunit hindi pa rin ito maaaring ipagwalang bahala dahil kabuhayan ng kanyang mga kadistrito ang nakasalalay dito.

Monday, October 18, 2010

Mas mataas na CCT para sa ARMM, isinusulong

Dahil sa katotohanang ang Autonomous Region of Muslim Mindanao (ARMM) ang maituturing na siyang pinakamahirap na rehiyon sa buong bansa, nais ni Muntinlupa City Rep Rodolfo Biazon na maitaas ang pondong ibibigay dito sa pamamagitan ng conditional cash transfer o CCT.

Ang panawagang ito sa kanyang mga kasama sa Mababang Kapulungan ay ginawa ni Biazon bago pa man maipasa sa ikalawang pagbasa ang panukalang 2011 national budget.

Ayon kay Biazon ang ARMM ang karapat-dapat na mabigyan ng mas malaking hati o kahit P2 billion-share sa CCT

Nagtataka rin umano si Biazon kung bakit sa kabila ng katotohanang ang ARMM ang siyang pinakamahirap na rehiyon ay siya pa ang may maliit na pondo sa cash transfer program.

Sa pagdinig ng 2011 national budget, napag-alamang kay ARMM DSWD regional secretary Hadja Pombaen Kader na isa ang rehiyon ng ARMM sa makakatanggap ng conditional cash transfer program ng gobyerno.

Ngunit sinabi rin ni Kader na ang cash transfer allotment para sa ARMM DSWD ay hindi sapat upang matugunan ang mga proyekto at programa ng tanggapan sa buong rehiyon.

Ayon kay Biazon ang conditional cash transfer ng DSWD ay nagkakahalaga ng P21 billion na sasakop sa isang 5-year program.

Ikinatuwa naman ni Tawi-Tawi Rep Nur Jaafar ang panukalang pagtataas sa conditional cash transfer allotment para sa ARMM, aniya malaki ang maitutulong nito kung mapagbibigyan ng Department of Budget and Management (DBM).

Ayon naman kay Sulu Rep Tupay Loong ang karagdagang pondo para sa ARMM DSWD at dapat na naisama sa panukalang pondo sa national office ng DSWD.

Friday, October 15, 2010

Babala hinggil sa prostate cancer

Nababahala si Cagayan de Oro City Rep Rufus Rodriguez sa paglobo ng bilang ng mga nagkakasakit ng prostate cancer sa bansa.

Batay sa pinakahuling pag-aaral, 25% o 11.8 milyon ng 47.4 milyong kalalakihan na lagpas sa 40 taong gulang ay maaaring may ganitong karamdaman at kapag hindi ito nasuri ng maaga ay maaaring ikamatay ng pasyente.

Dahil dito ay inihain nina Rodriguez at Abante Mindanao Party-list Rep Maximo Rodriguez, Jr. ang HB00590 o ang Prostate Cancer Public Awareness Act, na naglalayong magtatag ng isang programa upang pukawin ang kamalayan ng mga kalalakihan para sa maagang pagpapasuri ng karamdaman ng prostate cancer.

Ayon kay Cong Rufus, ang prostate cancer ang nangungunang dahilan sa pagkasawi ng mga kalalakihan sa bansa, kaya’t marapat lamang na mabigyan ng wastong edukasyon at babala ang ating mga kalalakihan sa panganib na dulot ng prostate cancer.

Ang mga kalalakihan daw na nag-iedad 40 taong gulang ay dapat na sumailalim sa madalas na pagsusuri upang malaman kung may palatandaan na mayroon itong prostate cancer.

Kapag mas maagang nasuri at nagamot ang sakit na ito ay maliit lang umano ang gastos ng pasyente kesa kung ito ay malala na.

Napakasimple lang ng proseso sa pagpapasuri na tinatawag na prostate ultrasound kaya’t huwag ng magbakasakali ang ating mga kalalakihan upang maaga nating malaman kung may palatandaan tayo ng prostate cancer giit na mambabatas.

Thursday, October 14, 2010

Polusyong sanhi ng plastic, susugpuin

Sinabi ni Aurora Rep Juan Edgardo Angara na mahalaga umano ang mga plastic bag at marami ang pakinabang ng tao rito ngunit kung subukan itong isaklob sa ulo at ibuhol sa leeg ng walang makakapasok na hangin, natitiyak umanong sa loob lamang ng 15 minuto ay wala nang buhay ang tao kapag hindi ito kusang tinanggal at ito daw ang nangyayari sa mga daluyan ng tubig at ilog sa buong Kamaynilaan.

Tayo mismo, ayon kay Angara, ang pumapatay sa ating mga sarili dahil kapag hindi nakadaloy ang tubig sanhi ng mga bara ay malalim na baha ang igaganti ng kalikasan sa atin. Ang tanging dahilan lamang ng pagbabara ng ating mga ilog ay ang walang pakundangang pagtatapon ng basura na karamihan dito ay plastic at ang tanging paraan lamang na nakikita niya ay tanggalin angmga ito upang dumaloy ang tubig.

Dahil dito, inihain niya ang HB00496 o Plastic Bag Recycling Act of 2010, HB00501 o Stores Proactive in Plastic Bag Recycling Act of 2010, at HB03452 o ang Environmental Levy Act na naglalayong bawasan ang paggamit ng plastic, paghikayat sa paggamit ng mga alternatibong sisidlan tulad ng papel, canvas at tela at gumawa ng sistema kung papaano itatapon, iipunin at ire-recycle ang mga plastic para sa kapakanan ng kalikasan.

Matatandaan na noong nakaraang taon ay sinalanta ng bagyong Ondoy ang bansa na nagpalubog sa halos buong Kamaynilaan dahil sa mga baradong daluyan ng tubig.

Nang humupa ang baha ay tumambad sa sambayanan ang sangkaterbang basura, plastic at putik na nakabara sa mga daluyan ng tubig at ilog.

Ang kalamidad ay kumitil ng maraming buhay at sumira ng bilyong halaga ng mga ari-arian at kabuhayan.

Layunin ng panukala na mabawasan ang walang humpay na paggamit ng plastic bags na pangunahing sanhi ng pagbabaha kung saan ay malawakan itong ginagamit sa bansa.

Karamihan daw dito ay sando bags, shampoo sachets, maliliit na plastic na sisidlan at mga botelyang gawa sa plastic, at karamihan nito ay non-biodegrable.

Bukod sa hindi ito nabubulok ay nagsasangkap din ito ng lason at kemikal na maaaring napapahalo sa ating pagkain ng hindi natin nalalaman.

Layon din nito na magpatupad ng mga pamamaraan kung papaano ito maire-recycle sa mura at epektibong paraan at paghihimok sa mga tindahan sa wastong pagtatapon, pag-iipon at paggamit ng mga alternatibong sisidlan na maaaring gamiting muli.

Tuesday, October 12, 2010

Pangongotong, mabigat na parusa ang naghihintay

Parusang anim na taong pagkabilanggo, pagsibak sa serbisyo at habangbuhay na diskwalipikasyon na makapaglingkod sa pamahalaan ang ipapataw sa mga pulis, ahente ng NBI at mga tagapagpatupad ng batas na mapapatunayang sangkot sa kotong at iba pang iligal na gawain.

Inihain ni Aurora Rep Juan Edgardo Angara ang HB00246 o ang “Kotong Act of 2010” upang maibalik ang integridad at katapatan ng mga tagapatupad ng batas at maibalik sa kanila ang tiwala ng mamamayan.

Sinabi ni Angara na ang pagpapatupad ng mga batas tulad ng PNP Reform Act, Anti-Graft and Corrupt Practices Act at iba pang kahalintulad na batas na nagpaparusa sa mga opisyal ng pamahalaan sa mga kasong kriminal at administratibo ay hindi sapat upang matigil ang pangongotong, hulipdap at iba pang uri ng krimen na karaniwang ang mga biktima ay mga may mabababang kita tulad ng taxi, jeepney, truck, bus drivers, at maging mga nagtitinda sa bangketa dahil napakagaan ng parusang ipinapataw sa kanila.

Ayon kay Angara, na napapanahon na upang ituring ang pangogotong ng mga nabanggit na tagapagpatupad ng batas bilang isang krimen na may kaakibat na mabigat na kaparusahan at naglalayong maibalik ang dignidad ng mga opisyal na naglilingkod ng tapat sa kanilang sinumpaang tungkulin.

Monday, October 11, 2010

Mabisa ang Vitamin B

Tinatawag na may neutral tube defect o malubhang kapansanan sa utak at gulugod ang libu-libong sanggol na ipinanganganak taun-taon.

Maaaring mapigilan na magkaroon ng kapansanan ang sanggol na isisilang ng isang ina kung ito ay iinom ng folic acid o vitamin B mula sa gulay, beans at citrus fruits habang pagdadalang-tao.

Isang panukalang batas HB00592 ang inihain nina Cagayan de Oro Rep Rufus Rodriguez at Anak Mindanao Party-list Rep Maximo Rodriguez na naglalayong itaguyod ang mabuting dulot ng folic acid para mapigilan na magkaroon ito ng kapansanan sa utak at gulugod.

Ayon kay Rodriguez ang kadalasang tawag dito ay spin bifida, hindi hustong pagsasara ng spinal column at anencephaly, nakakamatay kapag ang isang sanggol ay isinilang ng malubha at bahagyang nabuo ang utak at bungo.

Mapipigilan daw ang pagkakaroon ng neutral tube defect kung lahat ng buntis ay iinom ng 400 micrograms ng folic acid araw-araw habang nagdadalang-tao.

Thursday, October 07, 2010

Panukala hinggil sa cyber crime, inihain

Dahil sa sunud-sunod na napapabalitang mga krimen na kinasasangkutan ng internet, nanawagan ngayon si dating pangulo at Pampanga Rep Gloria Macapagal-Arroyo sa Kamara na agad aksiyunan ang kanyang panukalang naglalayong protekhan ang bawat mamamayan laban sa mga malisyosong pag-atake gamit ang cyberspace.

Inihain ni Macapagal-Arroyo ang HB00383 kung saan co-author ang kanyang anak na si Camarines Sur Rep Diosdado Arroyo na naglalayong gawing krimen ang paggamit ng Internet upang gumawa ng mga iligal na gawain.

Ayon kay Macapagal-Arroyo, nakakaalarma na ang patuloy na pagdami ng krimen gamit ang Internet dahil ang internet ay umaabot sa iba’t-ibang lugar at bansa sa buong mundo.

Dahil sa pagkalat umano ng mga taong ginagamit ang internet upang gumawa ng iligal na aktibidad, dapat na masiguro ng pamahalaan na may sapat na proteksiyon ang mamamayan laban dito at masigurong may seguridad, integridad, kumpidensiyalidad ang kabuuang impormasyon at komunikasyon ng bansa.

Sa ilalim ng panukala na mas kikilalanin bilang Cybercrime Prevention Act of 2010, may pananagutan sa batas at ituturing na krimen ang gagawing pakikialam ng sinuman na mapapatunayang gumawa ng krimen gamit ang internet, at nakiaalam sa confidentiality, integrity at availability ng isang computer data and systems, computer forgery at iba pang kahalintulad nito.

Kasamang din sa ituturing na krimen at may kaakibat na kaparusahan ang cybersex, child pornography at unsolicited commercial communications, at pagtulong upang maisakatuparan ang paggawa ng cyber crime.

Wednesday, October 06, 2010

Department of Information and Communications Technology, itatatag

Aprubado na sa dalawang komite sa Kamara ang pinag-isang panukala na magtatatag sa Department of Information and Communications Technology (DICT), ayon kay Zamboanga del Norte Rep Cesar Jalosjos, chairman ng committee on government reorganization.

Ang panukala ay dapat sanang naging batas na noong ika-14 na Kongreso subalit hindi na ito napagtibay kayat muli itong inihain sa ika-15ng Kongreso nina Camarines Sur Rep Luis R. Villafuerte, may akda ng HB00064 at Aurora Rep Edgardo Angara, may akda naman ng HB00498.

Ayon kay Taguig Rep Sigfrido Tinga, chairman ng committee on information communications technology, ang pagtatatag ng DICT ay kinakailangan umano upang mapamahalaan ang pagpaplano, paglalatag ng polisiya at pagpapairal ng mga patakaran para maisulong ang maunlad na teknolohiya o ICT sa buong bansa at maisama bilang isa sa pangunahing programa ng pamahalaan.

Source code ng automated election, pinabubunyag sa COMELEC

Pinuri ni Cagayan de Oro City Rep Rufus Rodriguez ang Kataastaasang Hukuman sa kautusang ipinalabas nito sa Commission on Election (COMELEC) para ibunyag ang source code na iniingatan ng komisyon upang malinis na ang mga usapin sa dayaan sa nakaraang halalan.

Sinabi ni Rodriguez na makabubuti sa bansa ang kautusan ng hukuman na iginiit ng Center for People Empowerment in Governance (CenPEG), na nagsusulong para ibunyag ng COMELEC ang source code ng automated election system (AES), matapos nilang ihain ang petisyon, na kagyat na dinesisyunan ni Associate Justice Roberto Abad sa isang court en banc.

Ayon kay COMELEC Commissioner Nicodemus Ferrer sa kanyang pagharap sa pagdinig ng House committee on appropriations, susundin ng COMELEC ang kautusan ng Supreme Court na ibunyag ang source code sa ibat-ibang partido pulitikal o grupo na opisyal na humuhingi nito, subalit magpapalabas muna sila ng mga patakaran upang mapangalagaan ang seguridad ng source code at hindi ito magamit sa katiwalian.

Matatandaang aminado ang COMELEC sa ilang napaulat na pagkakamali sa naging resulta ng automated elections subalit hindi naman anila ito malawakan.

Ayon pa kay Ferrer, magpapairal ng patakaran ang COMELEC sa mga nagnanais na humingi ng source code upang hindi ito magamit sa katiwalaian o panloloko dahil maraming nakabinbing protesta sa resulta ng halalan at dapat ay hindi maging sanhi ito upang mapawalang saysay at kawalang tiwala ang mga susunod pang automated elections.

Batay sa Section 12 ng Republic Act 9369, kapag ginamit sa halalan ang teknolohiya ng automated elections, ang COMELEC ang mangangalaga sa sistema at seguridad nito, sa pamamagitan ng paggamit ng source code na ihahayag lamang sa mga opisyal na partido politikal o grupo para sa kanilang sariling pag-aanalisa sa resulta ng halalan.

Tuesday, October 05, 2010

2 taong dagdag sa basic education, suportado ng mga mambabatas

Nagpahayag ng suporta si Sorsogon Rep Salvador H. Escudero III, chairman ng House committee on basic education sa panukalang palawigin pa ng dalawang taon ang basic education sa bansa.

Ngunit dapat umano ay na-aangkop ito sa pagbabawas naman ng haba ng itatagal sa pag-aaral ng ilang kurso sa kolehiyo.

Sinabi ni Escudero na mayroong mga kurso sa ilang unibersidad at kolehiyo sa bansa na dapat ding bawasan ang taon ng pag-aaral nito.

Ayon pa sa mambabatas, ang pagbi-beterinaryo sa ibang bansa ay tinatapos lamang sa loob ng apat na taon ngunit dito sa atin, kailangang bunuin ang pitong taon ng estudyante bago ito makapagtapos ng kurso.

Ang mga medical student sa Pilipinas ay kailangang bumuno ng 13 hanggang 14 na taon bago matapos ang kurso ng medisina samantalang sa ibang bansa, natatapos lamang ito sa loob ng pitong taon.

Maging ang pagiging abogado, dagdag pa ni Escudero, inaabot ng walong taon dito sa Pilipinas, samantalang natatapos ito sa ibang bansa sa loob lamang ng anim na taon.

Sinabi naman ni Nueva Vizcaya Rep Carlos M. Padilla, hindi ang karagdagang dalawang taon umano ang dapat na bigyang pansin ng pamahalaan kundi ang malaking kakulangan sa mga guro, silid-aralan, libro at mga palikuran.

Sa kasalukuyan, matindi na raw ang tinitiis na paghihirap ng ating bansa, mamamayan at ng mga mag-aaral mula sa malaking kakulangang ito.

Impeachment proceedings laban kay Ombudsman Gutierrez, isasalang na

Tutuluyan ng Kamara ang pagsasampa ng impeachment complaint laban kay Ombudsman Merceditas Gutierrez sa buwan ng Nobyembre matapos ang deliberasyon sa panukalang badyet para sa taong 2011.

Sinabi ni Iloilo Rep Niel Tupas, Jr., nagpasya na ang justice committee na kanyang pinamunuan matapos magsampa ng mosyon ang 17 mambabatas na nagsusulong na hindi ipag-walang bahala ang kanilang sinumpaang tungkulin sa Saligang Batas.

Ayon anamn kay House Speaker Feliciano Belmonte Jr., sinusuportahan niya ang desisyon justice committee sa pagsusulong ng impeachment proceedings laban kay Gutierrez.

Naghain ang mga mambabatas ng mosyon sa Kataastaasang Hukuman upang ipawalang bisa ang status quo ante order na nauna na nilang ipinalabas matapos maghain ng mosyon si Gutierrez sa hukuman na ipatigil ang impeachment proceedings laban sa kanya.

Ayon kay Tupas, si Solicitor General at retiradong mahistrado Vicente Mendoza ang kumakatawan sa justice committee bilang abogado.

Iginiit ng mga miyembro ng komite ang kanilang mandato sa ilalim ng Article 11 Section 3 ng 1987 Saligang Batas na magsagawa ng pagdinig at isumite sa plenaryo sa loob ng 60 araw mula nang isampa ang reklamo, ang kanilang ulat kasama na ang resolusyon nito.

Nagbabala naman si Cagayan de Oro City Rep Rufus Rodriguez na kapag binalewala ng Kamara ang utos ng Korte Suprema ay maaaring humantong ito sa isang constitutional crisis, ngunit sinabi ni Deputy Speaker Lorenzo Tañada III na hindi mangyayari ito dahil hindi pa naman pinal ang hakbang ng Korte.

Ang payo ni Maguindanao Rep Simeon Datumanong ay umiwas na lamang ang justice committee sa anumang sitwasyon upang hindi magbanggaan ang Mababang Kapulungan at Kataastaasang Hukuman.

Naniniwala naman si Ilocos Norte Rep Rodolfo Fariñas na hindi maaaring magbanggaan ang Mababang Kapulungan at Kataastaasang Hukuman.

Hindi aniya maaaring i-contempt ng hukuman ang mga mambabatas sa pagsasagawa ng impeachment proceedings dahil mayroon silang tinatawag na parliamentary immunity kapag ang Kongreso ay nasa sesyon.

'Di ka nag-iisa, PNoy

Nagkaroon ng kakampi sa Kamara si Pangulong Noynoy Aquino kaugnay sa bantang excommunication ng Catholic Bishop Conference of the Philippines (CBCP).

Hinamon ni Iloilo Rep Janette Garin ang CBCP na huminto sa panghihimasok sa mga gawain ng gobyerno.

Sinabi ni Garin na marami pa umanong makabuluhang bagay ang maaaring gawin ng CBCP kaysa manatiling magbulag-bulagan sa totoong problema ng lipunan.

Sana naman daw ay maging katulong sila ng gobyerno sa pagpapa-angat ng buhay ng bawat pamilyang Pilipino kaysa nakatali sa dikta ng Vatican.

Ikinalungkot naman ni Gabriela partylist Rep Luzviminda Ilagan ang banta ng Simbahang Katolika kay Pangulong Aquino.

Samantala, sinabi ni Bishop Nereo Odchimar ng Tandag, pangulo ng CBCP na hindi titigil sa mga pagpula ang simbahang kung paninindigan ni PNoy ang kanyang sinabi na bigyan ng kalayaan ang mag-asawa sa paggamit ng artificial contraceptives.
Free Counters
Free Counters