Mga panuntunan at regulasyon sa pagpapatupad ng housing loan restructuring, aprubado na

Inaprubahan na ng Kongreso ang implementing rules and regulations o ang mga panuntunan at regulasyon sa pagpapatupad ng Socialized and Low-Cost Housing Loan Restructuring and Condonation Program batay sa itinakda ng RA09507 na nilagdaan ni Pangulong Gloria Macapagal-Arroyo noon ika-13 ng Oktubre 2008.

Dahil dito, sinabi ni Vice President at Housing and Urban Development Coordinating Council concurrent chairman Noli de Castro na matutulungan na ng pamahalaan ang mga homeowners na nahihirapan sa pagbabayad ng monthly amortization sa kanilang housing loan.

Batay sa naturang programa, maaari nang mag-aplay ng loan restructuring at condonation ang mga housing loan borrowers na may tatlong-buwan nang pumalya sa buwanang pagbabayad sa mga government financial institutions at housing agencies.

Sakop ng naturang batas ang mga housing loan accounts sa mga institusyon tulad ng GSIS, SSS, Pag-IBIG Fund, National Home Mortgage Finance Corporation, Social Housing Finance Corporation, Home Guaranty Corporation at National Housing Authority na may principal loan amounts na hindi hihigit sa P2.5 million.

Marami nang nakumbensi ang Speaker para sa Con-Ass

Nagpahayag si Pampanga Rep Juan Miguel Arroyo na marami nang kongresista ang nakombinse ni House Speaker Prospero Nograles upang suportahan ang pagkilos na amiyendahan ang Saligang Batas sa pamamagitan ng Constituent Assembly habang kanya namang itinanggi na pinipilit ng Malakanyang ang mga mambabatas upang suportahan ang charter change.

Iginiit ni Arroyo na hindi dapat bigyan ng malisya ang ginagawang paghimok ni Nograles sa mga mambabatas na pumirma sa resolusyon na nagpapatawag ng con-ass sa mga senador at kongresista sapagkat tungkulkin naman umano ng lider ng Kamara at kasama sa kanyang trabaho ang kausapin ang kanyang mga kasamahan sa kapulungan.

Sinabi ng nakababatang Arroyo na nagpahayag lamang ng isang paniniwala si Nograles kung kayat kinumbinse niya ang kanyang mga colleague at naniniwala siya na marami na rin ang nakombinse ang Speaker.

Matantandang ipinahayag kamakailan ni Nograles na 17 pirma na lang ang kulang sa con-ass resolution na nakatakda pang ihain ni Camarines Sur Rep Luis Villafuerte upang makumpleto ang 197 pirma na kakatawan sa three-fourths membership ng Kamara at Senado.

Sinabi naman ni House Majority Leader Arthur Defensor na kapag naihain na ang resolusyon ni Villafuerte, kaagad silang maghahain ng petisyon sa Korte Suprema upang alamin kung pwede o hindi na bumoto ng magkahiwalay ang mga senador at kongresista sa mga aamiyendahang probisyon sa Konstitusyon.

Solon: Napipintong pagpasa ng right of reply bill, magdulot lamang ng problema

Nagpahayag ng malaking reserbasyon si Quezon Rep Lorenzo Tanada sa right or reply bill na ipinasa ng Senado sa pangatlo at pinal na pagbasa at nakabinbing ipasa na rin ng Kamara, nang kanyang sinabi na maaaring ang solusyon ay magpapatindi pa sa maging problema.

Mariing sinabi ni Tanada na dapat lamang na i-encourage ng Mababang Kapulungan ang mga mamamahayag na masugid nilang sundin ang journalist's code of ethics.

Ayon sa kanya, sapat na umanong maging batayan ang naturang panuntunan upang maseguro na ang media ay makapag-presenta ng balanseng pagpapahayag ng mga isyu sa lahat ng kinauukulan.

Idinagdag pa ng mambabatas na kung ang mga public figure ay sawa na sa mga expose at mga kontrobersiya kung saan sila ay inilalarawan bilang mga masasama, dapat lamang na maging matino sila sa kanilang paninilbihan at maging magagandang huwaran sila ng may prinsipyong liderato.

Samantala, nagsumite naman si Bacolod City Rep Monico Puentevella ng kanyang amiyenda sa naturang panukala na naglalayong tugunan ang mga pangamba ng mga mamamahayag lalu sa usapin ng tinatawag na editorial discretion, mga pagpapataw ng penalty at pagpapatupad ng batas na hindi dapat matikil ang kalayaan sa pamamahayag.

Kamara at Senado, desidido na aprubahan ang right to reply bill

Nakapagpasya na ang mga mambabatas sa Senado at Kamara de Representantes at desidido pa rin sila na aprubahan ang right of reply bill sa kabila ng matinding pagtutol ng ibat ibang organisasyon sa sektor ng pamamahayag.

Nanindigan si Manila Rep Bienvenido Abante na hindi lalabagin ng panukala ang kalayaan sa pamamahayag at pagpapahayag nang kanyang iginiit na karapatan ng sinumang indibidwal na binabatikos sa media na magkaroon ng kaukulang espasyo at airtime upang madinig ang kanyang panig.

Nauna na ang Senado sa pag-apruba ng naturang panukala at hinihintay na lamang ang pag-apruba sa bersyon ng Kamara para magpatawag ng bicameral conference committee hearing.

Ang bersyon sa Kamara ay inihain ni Bacolod City Rep Monico Puentevella habang si Senate Minority Leader Aquilino Pimentel Jr. naman ang may-akda ng bersyon sa Senado.

Nakasaad sa panukala na maaaring makulong at magmulta ang mga mamamahayag na hindi magbibigay ng espasyo o airtime sa binatikos o inakusahang personalidad.

Ang hindi rin pagsunod sa panukala ay maaaring maging dahilan din upang isara ang kumpanya ng media.

Ngunit nanindigan ang ibat ibang grupo ng mga mamamahayag na ang right to reply bill ay isang paraan ng pagsikil sa malayang pamamahayag at labag ito sa Saligang Batas.

Kinatigan naman ni Aurora Rep Juan Edgardo Angara ang paliwanag na ito kaya inurong niya ang suporta sa panukala at ayon sa kanya, bibigyan uamno niya ng pagkakataon ang media na magpatupad ng tinatawag na self censorship.

Estados Unidos, binatikos ng mambabatas dahil sa paglabag sa kasarinlan ng bansa

Binatikos ni Manila Rep Bienvenido Abante ang pamahalaan ng Estados Unidos sa pagtanggi nitong ilipat ang kustodiya ng nahatulang sundalo sa kasong panggahasa sa isang Filipina sa Subic nang kanyang sinabi na isa umano itong walang pakundangang paglabag at pambabastos sa kasarinlan ng bansang Pilipinas sa kabila ng ipinag-utos ng Korte Suprema na ilipat na ito sa pasilidad ng bansa.

Sa kanyang privilege speech, tinuligsa ni Abante ang patuloy na pananatili ni Lance Corporal Daniel Smith sa kalinga ng mga Amerikano na nagpapakita ng isang di-magandang halimbawa sa relasyon sa pagitan ng Pilipinas at Amerika na siyang itinuturing pa namang isang kaibigan.

Binatikos din ng mambabatas si US President Barack Obama sa pagwawalang bahala nito kay Pangulong Gloria Macapagal Arroyo na isa umanong malaking insulto sa bansa lalo na sa mga mamamayang Pilipino.

Sinabi ni Abante na noong nakaraang pagbisita ni Pangulong Arroyo sa Washington ay hindi ito binigyang galang ni Obama sa Annual Prayer Breakfast sa kabila ng pagdalo nito katabi pa sina Secretary of State Hillary Clinton at Speaker ng Kamara ng Amerika na si Nancy Pelosi.

Idinagdag pa ng solon na bukod sa pagbabayad ng benepisyo sa mga Pilipinong beterano ng World War II na nakidigma para sa mga Amerikano ay walang dapat na tanawing utang na loob ang Pilipinas sa Estados Unidos.

Ayon sa kanya, hindi umano namamalimos ang mga beteranong Filipino sa kanila bagkus ay sumisigaw lamang sila ng katarungan at pantay na pagtrato at paggalang.

Pagsasapribado ng Girl Scouts of the Philippines (GSP) Charter, aprubado na sa Kamara

Inaprubahan ng House Committee on Government Enterprises and Privatization ang pagbalangkas ng panukala na magsasapribado sa Girl Scouts of the Philippines Charter (GSP).

Sa panukalang iniakda ni Occidental Mindoro Rep Ma. Amelita Villarosa, layunin nito na ibalik ang kalagayan ng GSP bilang government-owned or controlled corporation (GOCC).

Sinabi ni Villarosa na kinikilala ng estado ang mahalagang tungkuling ginagampanan ng mga kabataan sa paghubog ng ating lipunan kaya’t tungkulin umano ng estado na isulong at pangalagaan ang kanilang malusog na pangangatawan, malinis na pag-uugali at pag-iisip, may takot sa Diyos at may mabuting pagkatao, gayundin ang pagmamahal sa bayan at nasyonalismo, at ang paghimok sa kanila ng pakikitungo at pakikipagtulungan sa mga pampublikong adhikain.

Ayon sa kanya, ang GSP ay isa sa mga umiiral na organisasyon sa Pilipinas ngayon na epektibong nagsusulong ng mga adhikain na nakasaad sa ating Saligang Batas.

Sa ilalim ng kanyang panukala, ang GSP bilang isang kurporasyon, ay libre sa anumang buwis batay sa batas.

Lahat ng mga donasyon para sa GSP ay libre rin sa donor’s tax at iaawas ito sa gross income ng donor ngunit mahigpit namang ipagbabawal ang iligal na paggawa, pagbebenta at
pamamahagi ng mga kagamitan at uniporme ng Girls Scouts.

Ganap na automation ng 2010 elections, handa nang ipasa

Ipinahayag kahapon ni House Speaker Prospero Nograles na ang Mababang kapulungan ay hindi nagpapatumpik-tumpik pa sa posisyon nito hinggil sa panukalang ganap na automation ng 2010 elections ng kanyang mariing sinabi na ang liderato ng Kamara ay nagpasya nang ipasa ang P11.3 bilyong supplemental budget para sa Commission on Elections (COMELEC).

Sinabi ni Nograles na ito marahil ang rason kung bakit binuo ng Kamara ang sarili nito bilang isang Committee of the Whole upang talakayin ang naturang supplemental budget para pondohan ang full automation ng 2010 local at national elecrtions upang mapabilis ang pagkaka-apruba nito sa plenaryo.

Binuo ang Kamara bilang Committee of the Whole nitong mga nakaraang sesyon upang ang mga deliberasyon ay maging malawak kung ang pag-uusapan ay ang mga makena at mga sistema na ipinanukala para sa automation program kung saan makakalahok ang mga technical person sa mga talakayan bago pa ito isalang sa buong plenaryo.

Ayon kay Nograles, wala naman umanong mga malalaking pagtutol sa naturang panukala maliban na lamang sa iilang mga reserbasyon ng mangilan-ngilang mga mambabatas na ang sistema ay maaaring hindi maging fool-proof .

Ang panukalang batas, ang HB05715, ay may layuning mag-outorisa sa pamahalaan na maglaan ng supplemental budget para sa isang Automation Election System sa halagang P11,301,790,000.00.

Panukala para sa pangangalaga ng mga ilog, aprubado sa Kamara

Nagpahayag ng pagkabahala si Oriental Mindoro Rep Rodolfo Valencia sa unti-unting pagkakasira ng mga ilog sa buong bansa dahil baka umano mawawalan na ng mga tahanan ang sari-saring uri ng mga flora at fauna at bukod pa rito, malaki ang naiaambag nito sa irigasyon sa mga palayan at sa pangingisda at pagkaing nakukuha rito at bukod pa rin sa ibat iba pang gamit nito tulad ng pinagkukunan ng malinis na tubig at nakapagdadala pa ito ng enerhiya sa mga mini-hydro prower plant.

Sinabi ni Valencia na ang pinakamabisang sandata para mapangalagaan at maprotektahan mula sa pagkawasak ng mga ilog at kapaligiran nito na siyang kagagawan ng mga berdugo ng kalikasan lalu na sa kanyang lalawigan ay ang pagpapasa ng kaukulang batas upang maseguro ang rehabilitasyon, proteksiyon at pangangalaga ng mga lugar na ito.

Dahil dito inihain ni Valencia ang HB03180 na magdideklara sa mga lugar sa pagitan ng Aglubang-Ibolo Rivers sa Bago, Naujan, Victoria, Sablayan, Victoria, Naujan, Baco, at Calapan City na ayon sa kanya ay winawasak ng walang humpay na resulta ng pagguho ng lupa, pagkakalbo ng kagubatan, pagdumi ng malinis na tubig at pagbaba ng kalidad nito bukod pa sa mga basurang ikinakalat ng mga tao, na pinatunayan naman ng Department of Environment and Natural Resources.

Sa parte naman House Committee on Natural Resources na pinamumunuan ni Negros Occidental Rep Ignacio Arroyo, inaprubahan na nito ang pagtakda na talakayin ang nabanggit na panukala alinsabay sa iilan pang mga panukalang kahalintulad nito na inihain ng iilan pang mga kongresista upang maiangat na sa plenaryo para ipasa ng Kamara.

Mamamayang nawalan ng tirahan, maging benepisiyaryo ng housing programs

Inaprubahan na sa ikatlo at pinal na pagbasa sa Kamara noong nakaraang linggo ang panukalang maggagawad ng rehabilitasyon at pabahay sa mga mamamayang nawalan ng bahay bunsod ng demolisyon sa mga lupaing pag-aari ng pamahalaan para mabigyang daan ang mga proyekto ng gobyerno at nasirang mga kabahayan bunsod na rin ng mga kalamidad.

Sinabi ni Manila Rep Amado Bagatsing, isa sa mga mag-akda ng HB05623 na dapat lamang umanong magkarooon ng sapat na batas na maggagawad ng resettlement area para sa mga apektado ng demolisyon sa mga lugar na mapanganib tulad ng estero at tapunan ng basura, mga biktima ng kalamidad at mga apektado ng mga proyekto ng pamahalaan sa Metro Manila.

Ayon kay Bagatsing, hinahanap umano ng MMDA ang mga nawawalang estero tuwing tag-ulan sa Kamaynilahan kayat demolisyon ang naging resulta nito kung saan libu-libong mga pamilya ang nawawalan ng tirahan at ang iba naman ay palipat-lipat na lamang sa mga mapapanganib na lugar ang kanilang mga pamilya tulad ng estero, sidewalk, kasada, liwasan at iba pang pampublikong lugar.

Sa ilalim ng panukala, maglalagay ng pondo ang pamahalaan para sa agarang ayuda sa mga mahihirap na mamamayang nawalan ng tirahan at ang pagtatatag ng resettlement centers, gayundin ang pagtatatag ng community mortgage program o iba pang socialized housing programs.

Walang kakulangan sa LPG ayon sa mga solon

Naniniwala ang mga mambabatas sa deklarasyon ni Energy Secretary Angelo Reyes na may nagaganap na iligal na pag-iimbak o hoarding ng liquefied petroleum gas (LPG) ng mga refilling stations at hindi ang kakulangan ng supply nito sa merkado.

Naniniwala si Bukidnon Rep Candido Pancrudo sa ulat ng Department of Energy (DOE) na may nagaganap na kutsabaan sa pagitan ng mga LPG refillers at ng tatlong dambuhalang kompanya ng langis upang palabasin na may kakulangan sa supply ng LPG at bigyang katuwiran ang pagtataas ng halaga nito.

Ayon pa sa knya, maaaring inaasam ng mga kompanya ng langis ang epekto ng pandaigdigang krisis sa ekonomiya sa bansa kaya't ikinakatuwiran nila ang dagdag na P2 kada kilogramo sa halaga ng LPG at dapat din na maging pamantayan ang barbula na ginagamit sa mga tangke ng gas at hindi maging ekslusibo sa iisang supplier ito upang mapabulaanan na may umiiral na kartel.

Matatndaang isiniwalat ni Reyes sa Kamara na nagsagawa na ang kanyang tanggapan ng masusing pagmamanman sa imbak ng LPG sa bansa kasama na ang halaga at kalidad nito at nakikipag-ugnayan din umano ang DOE sa DOJ, DOT, iba't ibang Local Government Units at mga kasapi ng Media upang matugunan ang malaking problema sa LPG.

Ipinanukala rin ang DOE na magsagawa ang pamahalaan ng malawakang kampanya sa impormasyon upang maengganyo ang mga independent players na magkaroon ng kontrata sa imbak at magpairal ng tinatawag na cylinder improvement program.

Sumang-ayon din sina Misamis Oriental Rep Yevgeny Vicente Emano at Bataan Rep. Herminia B. Roman kay Reyes na ang hoarding sa LPG ay pakana ng mga kompanya ng langis para pataasin ang halaga nito.

Strategic Petroleum Reserves (SPR), iminungkahi

Ipinahayag kahapon ni Bukidnon Rep Teofisto “TG” Guingona III ang kaniyang pagkabahala sa patuloy na pagdidepende lamang sa mga market players ng buong bansa upang masuplayan ang pangangailangan para sa petrolyo.

Sinabi ni Guingonana na dahil sa ganitong sitwasyon, wala umano tayong ibang magagawa sa panahon ng emergency, lalo na kapag ang sangkot ay isang mahalagang produkto kagaya ng LPG (liquefied petroleum shortage).

Ayon pa sa mambabatas, mula pa noong Disyembre, ang kakulangan ng LPG ang idinadaing ng mga mamamayan sa kabila ng malimit na pag-aanunsiyo ng Department of Energy (DOE) na may sapat na suplay nito, patuloy na humahaba ang pila ng mga taong nais bumili ng nabanggit na produkto.

Iginiit ni Guingona na tungkulin umano ng DOE na maging supplier of last resort ng mga mamamayan ito.

Ayon sa kanya, ang naranasang kakulangan sa LPG ang nagpapatunay na panahon na upang harapin ng pamahalaan ang mga isyu hinggil sa supply security.

Sa pagdinig ng Committee on Energy, iminungkahi ni Guingona na magpasa ng batas hinggil sa pagtatatag ng Strategic Petroleum Reserve (SPR) upang matugunan ang kakulangan sa petrolyo katulad ng ginawa ng Estados Unidos at Japan.

Dahil dito hinimok niya ang kaniyang kapwa mambabatas na suportahan ang naturang panukalang batas.

Nabahala si Nograles sa panibagong pagtaas ng presyo ng langis

Nagpahayag ng kanyang pagka-bahala kahapon si House Speaker Prospero Nograles sa naging desisyon ng mga kumpanyang langis sa bansa na magtaas ng presyo ng gasolina kahit sinabayan ito ng isang rollback sa presyo ng mga produktong krudo at gaas.

Sinabi ni Nograles na dapat lamang umanong igiit ng Department of energy ang regulatory functions nito upang mahadlangan ang anumang mga balaking pagpapaginansiya ng mga oil firm.

Ayon pa sa Speaker, hindi pa nga natapos ang problema sa LPG issue, ito na naman at tayo ay kumakaharap na naman ng isang gasoline price increase at ang napipintong rollback na 50 sentimos kada litro ng diesel at piso kada litro sa kerosene ay sapat nang itumbas sa 50 sentimos na pagtaas ng presyo ng gasolina.

Posible umanong may pagsisinungaling sa parte ng mga kumpanyang langis para makapagtaas ng kanilang mga presyo humigit kumulang tatlong buwan ang nakalilipas ng kanilang ipinahayag na sila ay mag-roll back dahil maaaring mayroon pa silang stock inventories na kanilang nabili habang ang presyo nito sa international market ay mababa pa.

Paggamit ng pamahalaan ng unprogrammed funds, ipagbabawal na

Ipagababawal na sa mga tanggapan ng pamahalaan, kasama na ang Office of the President, ang paggamit ng di-nakatalagang pondo o ang tinatawag na unprogrammed funds na nakapaloob sa taonang General Appropriations Act (GAA) sa sandaling maipasa ang HB05723.

Sa inihain panukala ni Bukidnon Rep Teofisto Guingona III, layunin nito na maiwasan na ang deficit o kakulangan sa pondo na taun-taon ay lumolobo dahil ayon sa kanya, bagamat ang unprogrammed funds na isang probisyon sa GAA bilang estratehiya upang sa panahon ng pangangailangan ay mahuhugot ito bilang karagdagang pang-pondo ng gobyerno sa mga taunang gastusin, naabuso umano ito ng ehikutibo dahil kahit na ang Kongreso ang pangunahing nag-aakda nito, kapangyarihan pa rin ng ehekutibo ang namamayani.

Sinabi ng mambabatas na ang pangangasiwa ng pondo ay dapat sumunod umano sa tamang prinsipyo ng pamamahala ng pondo na nakabatay sa mabisa at mahusay na paggamit ng yaman at ang kakulangan umano ng kongkretong probisyon sa pangangasiwa nito ay magreresulta sa hindi matatag na sistema.

Dahil dito ipinanukala ni Guingona na ipagbabawal din sa dalawang kapulungan ng Kongreso na magpasa ng panukalang tinatawag na unprogrammed funds sa General Appropriations Act.