-IMPLEMENTASYON NG MGA BATAS SA ARCHITECTURE AT INTERIOR DESIGN, SINIYASAT NG KOMITE

Sinimulan na ang pagsisiyasat ng Special Committee on Creative Industry sa Kamara de Representantes kahapon hinggil sa kalagayan ng implementasyon ng Republic Act 9266 o ang Architecture Act of 2004, RA 10350 o ang Philippine Interior Design Act of 2012, kabilang na ang ilang mga batas na may kaugnayan sa propesyunalismo ng pagdidisenyo.

Sinabi ni Pangasinan Rep. Christopher de Venecia, Chairman ng Komite at may akda ng House Resolution 1668 kung saan ibinatay ang pagsisiyasat, ang kahalagahan ng pagsusuri kung gaano at umaayon ang mga kasalukuyang batas sa bansa hinggil dito.

Ipinaliwanag ni de Venecia na ang pagsusuri sa kalagayan ng industriya ay makakatulong sa mga propesyunal na mapaunlad ang malawak na pagdidisenyo, at umangkat ng mga kalidad na materyales na angkop sa mga pangangailangan ng mga Pilipino, lalo na sa gitna ng pandemya, na hindi mailalagay sa alanganin ang pangangalaga ng mga makasaysayang lugar.

Dahil dito, iminungkahi ni De Venecia na talakayin din ng Komite ang mga huling kaganapan sa implementasyon ng National Building Code of the Philippines, Government Procurement Reform Act, at ang Natural Cultural Heritage Act.

-PAGBABAKUNA SA KAMARA, UUMPISAHAN NA SA A-10 NG MAYO

Uumpisahan na ng Kamara de Representantes ang COVID-19 vaccine rollout para sa mga kawani nito sa susunod na buwan.

Sa isang memorandum circular na nilagdaan ni House secretary general Mark Llandro Mendoza, ang mga empleyado na napabilang sa unang apat na grupo sa priority list ang babakunahan ng Sinovac vaccine umpisa sa Mayo 10.

Ang mga health worker sa Kongreso ang mauuna makatatanggap ng vaccine jabs na susundan naman ng mga senior citizen, persons with comorbidities at frontline personnel sa mga essential sector

Paparating pa lamang ang mga bakuna na manggagaling sa Quezon City government bilang order ng Kamara para sa Novavax vaccines, ayon sa isang insider sa kapulungan.

Novavax doses ang siyang gagamitin para sa mga nahuhuling House personnel at kanilang mga dependent.

-PAHIRAP AT ABALA LAMANG SA ORGANIZERS NG COMMUNITY PATRIES ANG IPINATUTUPAD NA DOCUMENTARY REQUIREMENTS

Nagpahayag ng pagkabahala si Quezon City Rep. Anthony Peter "Onyx" D. Crisologo laban sa iilang mga opisyal na nagpapatupad ng documentary requirements sa mga grupo at indibidwal na nag-organisa ng community pantries.

Sinabi ni Crisologo na bukod sa ito ay pahirap at abala sa mga organizer, nakaka-discourage din ito sa mga nagnanais mag-put up ng kani-kanilang mga sariling community pantry.

Ayon sa kanya, sa halip na dagdagan ang pansin ng mga organizers ng community pantry sa pagkuha ng permit para maisagawa ang kanilang pamamaraan na tumulong ay dapat silang tulungan at suportahan para maipagpatuloy nila ang kanilang magandang hangarin na matugunan ang pangangailangan ng mga kababayan nating mahihirap.

Samantala, hinikayat ng mambabatas ang publiko na suportahan ang mg community pantries at tulungan sila sa kanilang pamamaraang makapaggawad ng ayuda sa lubos na naapektuhan ng COVID-19 pandemic.

-MANDATORY VACCINATION, IPINURSIGE NI REP. BARZAGA SA KONGRESO

Itinutulak ngayon sa Kamara de Representantes ni Cavite Rep. Elpidio Barzaga Jr. na gawing mandatory ang pagbabakuna para sa lahat ng mga Pilipinong ‘eligible’ o kuwalipikado na maturukan ng COVID-19 vaccine upang makamtan ang tinatawag na “herd immunity.”

Iminungkahi ni Barzaga sa House Bill 9252 na amyendahan ang Republic Act 11525 o ang COVID-19 Vaccination Program Act of 2021 upang matiyak na mababakunahan ang malaking bahagi ng populasyon ng bansa para sa target na herd immunity.

Ayon kay Barzaga, vice chairman ng House Committee on Health, kung gagawing mandatory ang pagbabakuna ay mas marami ang magiging ligtas laban sa COVID-19 na siya ring mithiin ng Department of Health (DOH).

Tinukoy sa panukala na magiging trahedya sa bansa kung may ligtas at epektibong bakuna ngunit marami naman ang ayaw magpaturok dahil sa takot o matinding pangamba.

Hindi na anya bago ang pag-oobliga sa vaccination law kahit sa ibang bansa lalo na kung ito naman ay ipapatupad para sa kapakanan ng nakararami.

Aniya, kinikilala naman ng Saligang Batas na higit pa ring mahalaga ang kalusugan ng ge­neral public kumpara sa karapatan ng indibidwal sa kalusugan.

-PANUKALANG HEALTH PROCUREMENT AND STOCKPILING BUREAU SA DOH, APRUBADO NA SA KAMARA

Inaprubahan kahapon sa isang online meeting ng Committee on Ways and Means sa Kamara de Representantes, sa pamumuno ni Albay Rep. Joey Salceda ang panukalang magtatatag ng Health Procurement and Stockpiling Bureau sa ilalim ng Department of Health DOH.

Ang HB06995 na inihain ni Quezon Rep. Angelina Tan, Chairperson ng Committee on Health na layong magsusulong ng pag-iimbak ng mga mahahalagang gamot at medisina, bakuna, mga kagamitan, at materyales para sa pampublikong kagipitan sa kalusugan ang ipinasa nila.

Iminungkahi ng Komite na pahintulutan ang DOH na manghingi at tumanggap ng mga gawad, mana, kaloob, donasyon at kontribusyon, at malilibre ang mga ito sa donor’s tax.

Sinabi ni Tan na ang kahalagahan ng pagpasa ng panukalang ito ay hindi matatawaran dahil nakakaranas na tayo ng kakulangan sa gamot at bakuna sa kasalukuyan, at ang pagsasabatas ng panukalang ito ay tiyak na mangangahulugan na matutugunan nito ang naghihirap natin sa suplay ng mga gamot.

-ISANG PART-LIST GROUP, NAG-DONATE NG DAGDAG PANG RT-PCR MACHINE SA BENGUET

Suportado ng ACT-CIS partylist group ang mga pangangailangan ng Benguet para labanan ang COVID kung kaya’t nag-donate na  naman ito ng high flow oxygen sa Benguet General Hospital kamakailan.

Noong nakaraang lingo ay muli na namang nag-turn over si Benguet Congressman Eric Yap, na siya ring kinatawan ng ACT-CIS Party-list, ng isa pang RT-PCR machine upang matugunan ang agarang pangangailangan ng pagamutan at masolusyunan ang kanilang backlogs sa COVID-19 testing.

Nabatid na ito na ang ikatlong machine na ipinagkaloob ng mambabatas simula nang mag-umpisa ang pandemya ng COVID-19 sa bansa noong nakaraang taon.

Una na siyang nagkaloob ng RT-PCR machine sa Baguio General Hospital dahil ang Molecular Laboratory sa Benguet ay isinasailalim pa sa konstruksiyon ng panahong iyon.

Ang ikalawang makina naman ay inilagay sa bagong tayong laboratoryo sa lalawigan, kasama ang isang Automated Extractor.

Ayon kay Yap, nagpapatupad sila ngayon ng agresibong testing upang mapalakas pa ang effort ng lalawigan na masugpo ang COVID-19.

Dagdag pa niya, hindi lamang ang Benguet ang magbebenepisyo rito kundi maging ang kanilang mga kalapit na lalawigan sa Northern Luzon.

-MGA KAUTUSAN NG DOH AT FDA NA UMANO’Y HUMAHADLANG SA PAMAMAHAGI NG SERBISYONG KALUSUGAN SA PUBLIKO, SINIYASAT SA KAMARA

Nagdaos ng isang motu proprio investigation ang Committee on Good Government and Public Accountability sa Kamara de Reprentantes kahapon, sa pamumuno ni DIWA Rep. Michael Edgar Aglipay, hinggil sa umano’y kwestyunableng patakaran at polisiya ng Department of Health (DOH) at ng Food and Drug Administration (FDA), na nakakahadlang sa pamamahagi ng pampublikong serbisyo para sa kalusugan ng mamamayang Pilipino.

Sa kanyang pananalita, sinabi ni Aglipay na ang pagsisiyasat ay alinsunod sa inihaing House Resolution 1711 nina Speaker Lord Allan Velasco at Deputy Speaker Bernadette Herrera-Dy, bunsod ng dalawang circular mula sa mga naturang tanggapan ng pamahalaan na ipinalabas nang manalasa ang pandemya noong nakaraang taon.

Ang una ay ang DOH Department Memorandum No. 2020-0138 na nagpapatibay sa Philippine Society for Microbiology and Infectious Diseases (PSMID) Clinical Practice Guidelines of COVID-19 at ang pangalawa ay ang FDA Circular No. 2020-012 na hinggil naman sa patakaran ng pagrerehistro ng mga produkto ng gamot sa ilalim ng emergency use for COVID-19.

Ipinaliwanag ni FDA Director General Eric Domingo sa Komite, na sa panahon ng pandemya, ay bumuo ang ahensya ng ilang mekanismo upang maging madali para sa mga produkto na makukuha ng publiko.

-PAGTALAKAY SA POLUSYONG DULOT NG PLASTIK, ISINUSULONG NI SPEAKER VELASCO SA EARTH DAY 2021

Sa paglahok ng Pilipinas sa pandaigdigang komunidad sa pagdiriwang ng Earth Day, nanawagan ngayon si House Speaker Lord Allan Velasco na tugunan ang polusyong dulot ng plastik, na isa sa pinaka nakakabahalang usapin hinggil sa kalikasan.

Sinabi ni Velasco na malaki ang pangangailangan na pasimulan na ang isang direkta at maaasahang hakbang, para masugpo ang polusyon sa plastik, tulad ng pagpapatupad ng pagbabawal sa mapanganib at hindi kinakailangang minsanang gamit ng mga produkto ng plastik.

Ayon pa kay Velasco, kailangan nating maging determinado at maagap sa pagsupo ng polusyon sa plastik dahil kinukulang na tayo ng panahon para maisalba ang ating planeta.

Binanggit niya ang mga datos mula sa International Union for Conservation of Nature (IUCN), na mahigit sa 300 milyong tonelada ng plastik  ang nagagawa sa buong mundo bawat taon, at umaabot sa 8 milyong tonelada nito ay natatapon sa karagatan, na lubos na nagdudulot ng panganib sa ecosystem ng mga lamang dagat.

-MAHUSAY NA PAGBABAKUNA SA ILALIM NG COVID-19 VACCINATION PROGRAM, TINIYAK NG MGA MAMBABATAS

Sa idinaos na pagpupulong kahapon ng Department of Health (DOH) at National Task Force Against COVID-19 na pinangunahan ng Committee on Trade and Industry at ng Committee on Health, tinalakay ng mga mambabatas ang kalagayan ng implementasyon ng Republic Act 11525 o ang COVID-19 Vaccination Program Act of 2021.

Sa kanyang pambungad na pananalita, sinabi ni Navotas City Rep. John Reynald Tiangco, chairman ng House Commttee on Trade and Industry na ang pagpupulong ay naglalayong linawin ang mga sumusunod: 1) mga responsibilidad ng bawat ahensya ng pamahalaan, lokal na pamahalaan at mga pribadong indibiduwal; 2) mga itinakdang panahon para sa pagbili ng mga bakuna at ang pagbabakuna; at 3) pagtukoy sa mga prayoridad na talaan kabilang na ang pagtitiyak sa kalinawan sa pagbili ng bakuna.

Samantala, binigyang-diin naman ni Quezon Rep. Angelina Tan ng Committe on Health na kailangang tutukan ng Kapulungan ang pagtitiyak ng malawakan at mabilisang implementsayon sa programa, pagsusulong ng pinaigting na pagsusuri ng risk-based COVID-19, gayundin ang pagpapaunlad ng mga pasilidad sa isolation at quarantine.

Iniulat ni Vaccine czar Secretary Carlito Galvez Jr. na umaabot na sa 1,562,563 doses ng bakuna ang naiturok na hanggang ika-20 ng Abril 2021, na naglagay sa Pilipinas sa ikaapat na bansa sa Timog Silangang Asya sa vaccination rollout.

Idinagdag ni Galvez na ang pondo sa bakuna na nagkakahalaga ng P82.5-bilyon para sa 2021 ay nagmula sa mga utang sa multinational financial institutions, mga pondong natipid, mga pondong inilaan ng DOH, at pondo mula sa Bayanihan 2.

Tiniyak ni DOH Undersecretary Myrna Cabotaje sa mga mambabatas na dinagdagan ng pamahalaan ang mga tauhan sa kalusugan at mahigpit na nakikipag-ugnayan sa pribadong sektor upang maiayos ang pagka-episyente ng mga lugar ng pagbabakunahan, lalo na sa inaasahang pagdating ng mas maraming bakuna sa buwan ng Hunyo.

Binigyang-diin din ni Tiangco ang kahalagahan ng pribadong sektor, hindi lamang sa pagtulong sa programa, kundi maging sa pagpapasigla ng ekonomiya ng bansa.

Para kay Food and Drug Administration Director General Eric Domingo, binanggit niya na anim na bakuna ang ginawaran na ng Emergency Use Authorization, ito ay ang BioNTech, AstraZeneca, Sputnik V, Coronavac, Covaxin at Janssen.              

#SpeakerLordAllanVelasco

#SpeakerLAV

-PAGSIPA NG PRESYO NG KARNE NG BABOY AT IBA PANG PANGUNAHING BILIHIN, IIMBESTIGAHAN NG KONGRESO

Inaprubahan ng joint committees on Agriculture and Food na pinamumunuan ni Quezon Rep. Wilfrido Mark Enverga, at ng Trade and Industry na pinamunuan ni Navotas City Rep. John Reynald Tiangco ang resolution na nanawagan ng pagsisiyasat, in aid of legislation, sa nakakabahalang pagsipa ng presyo ng karne ng baboy at iba pang mahahalagang bilihin.

Sa isinagawang online hearing kahapon, sinabi ni Enverga na nakatanggap ng liham ang Office of the Speaker mula sa Office of the President, na nagrerekomenda ng pagtaas ng minimum access volume (MAV) para sa karne ng baboy, sa 350,000 metriko tonelada bilang dagdag sa kasalukuyang MAV na 54,210 metriko tonelada para sa 2021.

Idinagdag pa niya na noong a-29 ng Marso 2021, silang tatlo nina Speaker Lord Allan Velasco at Congressman Tiangco ay nagpadala ng liham sa Pangulo upang umapela sa rekomendasyon, at malinaw na ipinaliwanag ang paninindigan ng Kamara de Representantes na ang pag-aangkat ay gagawin lamang upang punan ang kakulangan sa suplay, batay sa umiiral na taripa, upang hindi lubos na maapektuhan ang naghihirap na sektor ng mga magbababoy.

Samantala, sinabi ni Agriculture Secretary William Dar na kanilang pag-aaralan ang mungkahi na magpairal ng hangganan sa presyo ng pag-aangkat ng karne ng baboy.       

#SpeakerLordAllanVelasco

#SpeakerLAV

-FDA HINIMOK NA BILISAN ANG PAGPROSESO SA PRODUKSYON NG MGA LOKAL NA GUMAGAWA NG GAMOT

Nakikita ni House Speaker Lord Allan Velasco ang lokal na industriya ng mga gumagawa ng gamot ang magpapalakas sa kakayahan ng bansa sa laban nito sa pandemyang dulot ng COVID-19 at nagsabing ang mga lokal na kompanya ay gumaganap ng mahalagang papel na matulungan ang paggawa at pamamahagi ng kinakailangang gamot upang masugpo at malunasan ang sakit sanhi ng COVID-19.

Dahil dito, nanawagan si Speaker Velasco sa Food and Drug Administration (FDA) na paghusayin ang pagiging episyente at maagap na proseso, lalo na ang may kaugnayan sa aplikasyon ng mga lokal na gumagawa ng gamot, para sa mga permiso ng Certified Product Registration (CPR) at Emergency Use Authorization (EUA).  

Ayon sa kanya, naunawaan naman daw nila ang pangangailangan para sa isang masusing pag-aaral ng mga gamot at medisina, subalit kailangan umanong balansehin ito sa pamamagitan ng pagpapagaan sa mga pangangailangan ng mga lokal na gumagawa ng gamot, sa pag-aalis ng mga hadlang at mga red tape, at ang paulit-ulit na rekisitos.

-PAGSALI SA MAMAMAHAYAG SA A4 PRIORITY LIST SA PAGBABAKUNA, PINURI

Pinapurihan ni ACT-CIS Partylist Representative Rowena Niña Taduran ang desisyon ng pamahalaan na isali ang mga manggagawa sa media sa listahan ng susunod na batch ng priority group para sa programa sa pagbabakuna laban sa Covid 19.

Sinabi ni Taduran na ang mga manggagawa sa media ay matagal nang nakalantad sa virus simula nang magkapandemya sa kanilang paghahatid ng balita.

Ayon sa kanya, hindi naman umano huminto ang mga balita kahit may pandemya at sumusugod ang mga mamamahayag kung nasaan ang panganib ng Covid  para lamang makapaghatid ng impormasyon, kahit ang mga nasa technical, sumusuong sa panganib ng virus maibigay lang ang balita sa tao.

Pinasalamatan din ng mambabatas sina Testing Czar Vince Dizon at Director-General Karl Chua ng National Economic and Development Authority sa pagrerebisa ng A4 priority list para maisama ang mga manggagawa sa media.

-PAGPAPAUNLAD NG AGRIKULTURA SA MINDANAO, ISINUSULONG NG KOMITE

Tinalakay ng Committee on Mindanao Affairs sa Kamara kamakalawa ang mga paraan kung papaano mapapalakas at masusuportahan ang sektor ng agrikultura sa Mindanao, habang patuloy na nagdurusa mula sa pandemya.

Sinabi ni Lanao del Norte Rep. Mohamad Khalid Dimaporo, Chairman ng Komite, na ang 2021 national budget, lalo na ang sa agrikultura ay naituon para sa Luzon, na naging dahilan upang ang ikalawang pinakamalaking isla sa bansa ay makatanggap lamang ng maliit na alokasyon.

Sinegundahan ito ni Agriculture Secretary William Dar, at inulit ang hangarin ni Pangulong Rodrigo Roa Duterte, na tiyakin na ang mga pamuhunan ay patuloy na ibubuhos sa rehiyon ng Mindanao, upang maisulong ang katatagan at seguridad sa pagkain.

Nangako si Dar na pipilitin niyang makapag lobby ng karagdagang pondo para sa Mindanao, gayundin ang mga suporta sa pagtatatag ng mga mahahalagang imprastraktura, tulad ng farm-to-market roads at mga palengke sa mga lalawigan.

#SpeakerLordAllanVelasco

#SpeakerLAV

-RESOLUSYON HINGGIL SA MGA PROKLAMASYONG MAG-GAGAWAD NG AMNESTIYA SA MGA REBELDENG GRUPO, APRUBADO SA KAMARA

Inaprubahan na kahapon sa isang online hearing ang Committee Report hinggil mga panukalang maggagawad ng amnestiya sa mga miyembro ng Moro Islamic Liberation Front (MILF), Moro National Liberation Front (MNLF), Rebolusyonaryong Partido ng Manggagawa ng Pilipinas / Revolutionary Proletarian Army / Alex Boncayao Brigade (RPMP-RPA-ABB), at mga dating rebelde na kasanib ng Communist Terrorist Group (CTG), na nakagawa ng mga krimen na may kaakibat na kaparusahan sa ilalim ng Republic Act 3815 o Revised Penal code at mga espesyal na batas sa kanilang pagsusulong sa kanilang paniniwalang politikal.

Isinagawa ang hearing ng Committee on Justice, na pinamumunuan ni Leyte Rep. Vicente Veloso III, at ng Committee on National Defense and Security sa Kamara de Representantes sa ilalim naman ng pamumuno ni Iloilo Rep. Raul Tupas, batay sa mga panukala na inihain ni House Speaker Lord Allan Velasco alinsunod sa Proclamation Nos. 1090, 1091, 1092 at 1093.

Ang pag-apruba ng panukala, ayon kay Veloso, ay isang kongkretong hakbang sa isang matatag na adyenda para sa kapayapaan. 

 Ang paggagawad ng amnestiya sa mga dating rebelde, ayon naman kay Tupas, ay isang mahalagang bahagi ng pagsisikap ng pamahalaan para sa isang komprehensibong usapan para sa kapayapaan.

#SpeakerLordAllanVelasco

#SpeakerLAV

-PANGGAGALINGAN NG PONDO PARA SA BAYANIHAN 3, TUTUKUYIN NG MGA ECONOMIC MANAGERS AYON KAY SPEAKER VELASCO

Ibinunyag ni Speaker Lord Allan Velasco na pinag-aaralan na ngayon ng mga economic managers ng bansa, ang mga potensyal na pagkukunan ng pondo para sa Bayanihan 3, ang panukala na tinatayang magpapasigla sa buhay ng sambayanan, sa gitna ng pandemyang patuloy na nananalasa sa ekonomiya at nagpapahirap sa kabuhayan ng milyon milyong Pilipino.

Ayon kay Velasco, sinabi sa kanya ni Finance Secretary Carlos Dominguez III at Budget Secretary Wendel Avisado sa ginanap na online na pagpupulong noong ika-8 ng Abril, na ang Department of Finance at Department of Budget and Management ay kasalukuyan na ngayong nasa proseso ng pagtukoy ng mga mapagkukunan ng pondo, upang mapausad na ang Bayanihan 3, na naglalayong pagaanin ang pagbangon ng ekonomiya na inilugmok ng krisis sa pangkalusugan.

Nauna nang inihain nina Velasco at Marikina City Rep. Stella Luz Quimbo, isang kilalang ekonomista, ang kanilang mga sariling bersyon ng Bayanihan 3 sa ilalim ng House Bill 8628 o ang “Bayanihan to Arise As One Act,” na humihiling ng P420-bilyong pondo upang pasiglahin ang pagbangon sa ekonomiya ng bansa mula sa krisis dulot ng COVID-19.

-PANUKALANG MAGHAHATI SA TATLO NG PANGALAWANG DISTRITO NG LALAWIGAN NG RIZAL, PIRMADO NA NG PANGULO

Pinirmahan na ni Pangulong Rodrigo Roa Duterte ang batas na maghahati sa second legislative district ng Rizal province sa tatlong bagong distrito.

Layon nito na mas matugunan ang mga pangangailangan ng mga residente at mapadali ang long-term recovery mula sa COVID-19 crisis.

Sa panukalang batas, ang House Bill 6222, na inihain nina Reps. Fidel Nograles, Jack Duavit, Roberto Puno at Resurreccion Acop, mananatili ang mga bayan ng Cardona, Baras, Tanay, Morong, Jala-jala, Pililla at Teresa sa 2nd district, samantalang ang Rodriguez ang maitatag na 3rd Congressional district at ang bayan ng Rodriguez ang magiging 4th district.

Nagbibigay ng direktiba ang nasabing batas sa Commission on Elections na magpalabas ng kinakailangang implementing rules and regulations sa loob ng 30 araw ng effectivity ng batas.

-DISTRIBUSYON NG AYUDA NG MGA LGUs, MAHIGPIT NA BINABANTAYAN SA KAMARA

Mahigpit na binabantayan ngayon ng ACT-CIS Partylist ang distribusyon ng ayuda ng mga local government units (LGUs) para sa mga apektado ng NCR Plus lockdown.

Sinabi ni ACT-CIS Rep. Eric Yap na marami daw ang nagte-text at tumatawag sa kanilang opisina hinggil sa kulang daw ang ibinibigay sa kanila na ayuda.

Ayon sa kanya sinabi da ni Panglong Rodrigo Roa Duterte na P1,000 bawat tao o P4,000 sa isang pamilya ngunit bakit may mga lugar daw na P1k lang ang inaabot sa isang pamilya?

Ani Cong. Yap, isang halimbawa ‘yung ale na nagsumbong sa “Tutok Erwin Tulfo” radio program from Bagong Barrio, Caloocan, P1,000 lang ang ibi­nigay sa kanya kahit pa dalawa ang kanyang anak na alam naman ng barangay daw.

Ayon sa mambabatas, nirerekord nila ang mga sumbong at tatawagan ang mga LGUs kung bakit kulang ang ibinigay na cash ayuda sa kanilang mga constituents.

Iniipon daw nila ang mga reklamo ngayon at kapag natapos itong ECQ (enhanced community qua-rantine) ay maaring magpapatawag sila ng imbestigasyon at kapag napatunayan na binubulsa nila ‘yung pera, makakasuhan daw sila sa Ombudsman.

-PAMIMIRATA NG PELIKULA SA ONLINE, SINIYASAT SA KAMARA

Dahil sa lumalagong industriya sa digital media sa gitna ng pandemya, tinalakay kahapon ng Special Committee on Creative Industry and Performing Arts sa Kamara de Representantes ang mga naiulat na pamimirata sa online na laganap noong 2020 Metro Manila Film Festival (MMFF).

Isinulong ni Pangasinan Rep. Christopher de Venecia, Chairman ng Komite ang pagsisiyasat sa pamamagitan ng House Resolution 1588.

Sa naturang pagdinig, iniulat ni Film Director Quark Henares, pinuno ng Globe Studios, na ang MMFF ay nakaranas ng 90 porsyentong pagbagsak sa kita ng MMFF noong nakaraang taon.

Iniugnay niya ang pangyayari sa biglaang paglipat sa online streaming, kakulangan sa kasikatan, at pamamayagpag ng pamimirata sa online.

Hiniling ng Komite sa Metropolitan Manila Development Authority (MMDA) na isumite ang kanilang plano sa pagmemerkado, gayundin ang pagsuri at pagtugon sa mga posibleng agwat sa mga inisyatibo sa pagsusulong ng aktibidad.

Tiniyak ni De Venecia na ang mga mambabatas ay tutulong upang makahiling ng karagdagang pondo sa ilalim ng Department of Information and Communications Technology (DICT), upang magkaroon ng  sistema o teknolohiya para matukoy ang cybercrime.

-FOI AT AKSES SA IMPORMASYON, TATALAKAYIN NA NG KOMITE SA KAMARA

Bumuo ang Committee on Public information sa online hearing ng isang technical working group (TWG) upang talakayin ang mga panukala hinggil sa Freedom of Information (FOI) at patungkol sa pagpapalakas sa mga karapatang konstitusyunal ng mga mamamayan sa pag-akses sa impormasyon.

Sinabi ni Cagayan Rep. Joseph Lara, chairman ng komite, na ang TWG ay pamumunuan ni KABAYAN Rep. Ron Salo, na siya namang Vice Chair ng Komite.

Noong Hulyo 2016 ay nilagdaaan ni Pangulong Rodrigo Roa Duterte ang Executive Order No. 2, na inilalagay sa operasyon ng Executive Department ang constutional rights ng mga mamamayan sa mga impormasyon at mga polisiya ng estado sa ganap na pampublikong pagpapahayag at kahayagan sa serbisyo publiko.

Ayon kay Presidential Communications Operations Office (PCOO) Undersecretary Kristian Ablan, ang rekomendadong bersyon sa FOI ng Executive Department ay ang panukala na may mayroong tatlong mahahalagang tampok, na inaasahan nito na mapapabilang sa bagong batas tulad ng: “No Wrong Door Policy”; pagbuo ng independyenteng FOI Commission; at ang pagpapaunlad ng sistema sa pamamahala ng mga talaan ng pamahalaan.  

#SpeakerLordAllanVelasco

#SpeakerLAV

PAMAMAHAGI NG AYUDA SA MGA APEKTADONG PAMILYA NGAYONG ECQ PINABIBILISAN

 Nanawagan si ACT-CIS Partylist Rep. Niña Taduran sa lahat ng mga  local government officials sa NCR Plus na agad ilabas ang tulong para sa mga mamamayang apektado ng pinalawig pang ECQ. 

Ayon kayTaduran, karamihan  sa mga nasa NCR Plus ay arawan ang kita at hindi  makakain kung hindi kakayod araw araw. 

Aniya,hindi pa  kasama dito ang gastusin nila bawat buwan tulad ng pambayad sa kuryente at ilaw. 

Kaugnay nito ay iminungkahi rin ni Taduran at mga kasamahan nitong kongresista  na magdagdag ng health kit sa pagkaing ipapamahagi ng pamahalaan upang matiyak na may dagdag proteksyon ang mga mamamayan kontra COVID 19. 

Kabilang sa mga ipinasasama ng mambabatas sa ipamimigay na health kit ang face mask, face shield, sanitizer, bitamina at suplemento.

PAMAMAHAGI NG SOCIAL PENSION SA MGA SENIOR CITIZEN, INIHIRIT NA GAWING BUWANAN

 Umapela si Quezon City Rep. Alfred Vargas sa Department of Social Welfare and Development (DSWD) na gawing monthly ang pagbibigay ng pensyon sa mga senior citizens. 

Ayon kay Vargas , dapat  gawing katulad sa "payroll" ang pensyon ng mga nakatatandada  kasunod ng transition o paglilipat ng DSWD sa paggamit ng cash cards katuwang ang Landbank. 

Dagdag pa ng mambabatas, ngayong online na ang distribusyon ng mga benepisyo makabubuting gawin na ring buwanan ang pagbibigay ng pensyon lalo na ngayong may pandemya at higit lalo na kailangan ng mga matatanda ng regular na tulong sa pamahalaan.

Sa ngayon ang mga kwalipikadong senior ay nakakatanggap ng P500 buwanang pensyon na ibinibigay  kada anim na buwan sa halagang P3000.

-LIDERATO NG KAMARA, BUKAS SA SPECIAL SESSION PARA TALAKAYIN ANG BAYANIHAN 3

Pinahayag ni House Speaker Lord Allan Velasco na bukas sila Kamara kung magpapatawag ng special session para sa agarang pagapruba sa P420 Billion stimulus package na Bayanihan 3.

Ito ay kasunod ng panghihimok ni Senate Minority Leader Franklin Drilon kay Pangulong Rodrigo Duterte na magpatawag na ng special session para pagtibayin ang panibagong stimulus package na aayuda sa mga pamilya at mga negosyong apektado ng pandemya.

Sinabi ni Velasco na pangunahing may-akda ng Bayanihan 3, nakahanda anumang oras ang Mababang Kapulungan na magsagawa ng special session sakaling ito ay ipapatawag ni Pangulong Duterte.

Sa kasalukuyan, ang panukala ay inaaral pa ng Committees on Economic Affairs at Social Services ang Bayanihan 3.

-MGA OSPITAL NA SOBRA-SOBRANG MANINGIL SA MGA COVID PATIENTS, IPAPATAWAG SA KAMARA

Nagbabala si Albay Rep. Joey Salceda na kanilang ipatatawag sa Kamara ang mga opisyal ng ospital na sobra-sobra kung maningil sa mga pasyenteng tinamaan ng COVID-19.

Ayon kay Salceda, mayroong kapangyarihan ang pinamumunuan niyang House committee on ways and means upang ipatawag ang mga hospital manager.

Sabi ni Salceda, bagama’t nakatutok pa sa ngayon ang gobyerno para matugunan ang pagkalat ng COVID-19 sa bansa, may pagkakataon din aniya na kanilang isa-subpoena ang mga hospital manager para linawin ang isyu hinggil mataas na singil sa mga pasyente nila.

 

Ang babala ng mambabatas ay kanyang ginawa kasunod na rin ng nadiskubre sa pagdinig ng Kapulungan kamakailan na may mga ospital na naniningil umano ng P1,000 kada oras sa kanilang mga pasyente kahit nasa tent o tolda pa lamang naka-admit ang mga ito.

-HOUSEHOLD LOCKDOWN, IPINANUKALA SA KAMARA

Iminungkahi ni Marikina City Rep. Estella Luz Quimbo sa pamahalaan ang pagpapatupad ng household lockdown upang mahadlangan ang ibayong pagkalat pa ng Covid-19 virus sa bansa.

Sinabi ni Quimbo na imbes na isara ang mga lansangan ng mga barangay sa buong bansa, mas mainam daw na gagawin na lamang ang lockdown sa granular level na ang ibig sabihin ay magmula sa tahanan mismo ang pagpapatupad.

Marapat lamang daw, dagdag pa ni Quimbo na ang buong pamilya ay ang pagbawalang lumabas ng tahanan kung mayroong isa man lamang sa mga miyembro nito ay nagpositibo sa virus.