Palpak na programang computerisasyon ng GSIS, tinuligsa ng mambabatas

Palpak ang programang computerisasyon ng Government Service Insurance System (GSIS) matapos ang limang taong pagpapatupad nito na naglalayon sanang makapaghandog ng maayos at mas maasahang paglilingkod sa mga kasapi nito.

Ito ang binitiwang mga kataga ni Iloilo City Rep Raul Gonzalez, Jr ng kanyang sinabing patong patong na ang reklamo laban sa GSIS dahil sa pagkabigo nitong aksyunan ang mga pangako ng maayos na paglilingkod sa milyon-milyong mga myembro nito.

Ayon kay Gonzalez, sinimulan ng GSIS ang malawakang programa ng computerisasyon noong Mayo ng 2003 sa pamamagitan ng pagpapaunlad ng computer hardware, paglalagay ng mga makabagong software programs, pagrerepaso ng sistema, pamamaraan at pagsasaayos ng talaan sa computer ng kontribusyon at pagbabayad sa utang ng mga kasapi, subali’t nabigo ang tanggapan na mapabilis ang transaksyon para sa mga myembro nito.

Idinagdag na nito na sa katunayan ay isinisisi pa nga ng mga opisyal ng GSIS ang kanilang kapalpakan sa problemang kanilang nararanasan sa ginagamit nilang computer program.

Iminungkahi ni Gonzalez sa pamamagitan ng HR01049 para siyasatin ang kapalpakan ng GSIS at ang ipinaiiral nitong programa sa computerisasyon na nagdulot ng pagkabigo at pagbagsak ng kalidad ng serbisyo ng naturang tanggapan.

Paggamit ng plastic bag, ipagbabawal na

Pagpapataw ng dalawampiso at limampung sentimong excise tax sa lahat ng plastic bag lamang ang tanging solusyon upang mahadlangan ang mga mamimili sa supermarket, grocery, service stations at sales outlet mula sa paggamit ng di-natutunaw na mga bagay.

Sa panukalang batas ni Albay Rep Al Francis Bichara, ang HB04234, sisikapin nitong hadlangan ang mga mamimili na gumamit ng mga di-natutunaw na mga bagay upang maprotektahan ang kalikasan at labanan ang epekto ng global warming.

Sinabi ni Bichara sa kanyang panukala na sa gawang petrochemical na isang non-renewable resource, ang plastic bag ay non-biodegradable material na aabutin ng 15 hanggang 1,000 taon bago ito natutunaw.

Subalit taliwas ito sa pananaw ng industriya ng plastic batay sa naging pahayag ni Alfonso Siy, tagapangulo ng Philippine Plastic Industry Association, Inc, ng kanyang sinabi na ang wastong pagtatapon ng plastic ang malaking suliranin at ang tanging paraan lamang ay ang tamang disiplina diumano.

Idinagdag pa sa pahayag na tiyak umanong mababawasan ang volume ng produksiyon ng plastic na magiging sanhi ng kawalan ng trabaho ng may 350,000 na namamasukan sa industriya kapag nagpataw umano ng buwis sa plastic.

Ngunit hindi sakop ng panukala na patawan ng excise tax ang mga mamimili na may sariling dalang plastic bag kapag bumili siya ng paninda sa grocery at supermarket, sabi ni Bichara.

Palugit sa kwalipikasyon ng mga kawani ng BFP at BJMP, pinalalawig

Ipinasa na sa ikatlo at pinal na pagbasa sa Kongreso ang HB06000 na iniakda ni Nueva Ecija Rep Rodolfo Antonino na may layuning palawigin ng limang taon ang palugit upang makumpleto ang kwalipikasyon sa ilalim ng Civil Service Law ng mga kawani ng Bureau of Fire Protection (BFP) at Bureau of Jail Management and Penology (BJMP).

Sinabi ni Antonino na bagama’t kailangang itaas ang kalidad ng paglilingkod ng mga namamahala ng tanggapan ng pamatay-sunog at bilangguan, malaking problema umano ang kakaharapin ng pamahalaan kapag tinanggal sa tungkulin ang mga kasalukuyang tauhan dahil lamang sa kakulangan sa kwalipikasyon sa edukasyon.

Ayon sa kanya, ang mga kawaning ito ay dumaan sa matinding pagsasanay kaya’t may sapat silang kakayahan, kasanayan at karanasan sa kanilang ginagampanang tungkulin.

Sa kasalukuayng batas, itinakda ang minimum educational at civil service eligibility qualifications sa bawat unipormadong tauhan ng BFP at BJMP, mula ikalawang taon sa kolehiyo hanggang makatapos ito ng apat na taong kurso, at unang antas hanggang ikalawang antas, o ikatlong antas ng civil service eligibility, ayon sa pagkakasunod.

Ang patakarang ito ay hindi dapat na maging sagabal sa paglilingkod, kaya’t hinihiling sa panukala na palawigin ng hanggang limang taon pa ang kinakailangang kwalipikasyon para sa kanila, dagdag ng mambabatas.

Sinabi ni Antonino na karamihan sa mga apektadong tauhan ay nahihirapang sumunod sa patakarang itinatakda para sa kanilang kwalipikasyon, dahil marami sa kanila ay tumatanda na at kulang ang kanilang oras sa pagganap ng kanilang tungkulin kung gugulin pa nila sa pag-aaral sa kolehiyo, bukod pa sa pagiging abala sa pagganap ng kanilang tungkulin bilang mga ama ng tahanan na nakatutok din sa pag-aaral ng kanilang mga anak.

Nangangailangan ng malaking halaga ang pamahalaan sa pagbabayad ng benepisyo sa pagreretiro ang mga tatanggaling kawani, gayung hindi mabayaran ang mga regular na nagreretiro, bukod pa sa malaking gastos sa pagsasanay ng libo-libong bagong kawani, giit pa ni Antonino.

Eleksyon sa ARMM nais isabay sa pambansang halalan

Ipinanukala ni Lanao del Sur Rep Faysah RPM Dumarpa sa HB04885 na isabay na lamang ang halalan sa Autonomous Region of Muslim Mindanao o ARMM sa pambansang eleksiyon tuwing ikalawang lunes ng Mayo simula sa taong 2010 at gaganapin kada ikatlong taon.

Sa ilalim ng panukala, ang pagbabago ng petsa ng halalan sa ARMM na ginaganap tuwing ikalawang lunes ng Agosto ay makakatulong maisulong ang usaping pangkapayapaan sa rehiyon.

Sinabi ni Dumarpa na dapat isabay na ang eleksyon ng ARMM sa lokal at pambansang halalan at ang mga kasalukuyang nakaupo bilang regional governor, regional vice governor at mga miyembro ng Regional Legislative Assembly ng ARMM ay magpapatuloy sa kanilang panunungkulan sa bisa ng hold-over capacity hanggang sa maihalal at maging lehitimong opisyal ang mga maibobotong kapalit nila.

Ayon kay Dumarpa babaguhin na rin ang pagtatapos ng termino ng mga halal na opisyal ng ARMM na kung dati ang termino ng mga halal na opisyal ay nagtatapos ng ika-30 araw ng Setyembre 2005, sa ilalim ng naturang panukala ay magtatapos ang kanilang mga termino sa ika-30 araw ng Hunyo sa 2013.

Panawagan ni Guingona sa mga OFW: magparehistro para sa 2010 elections

Hinikayat ni Bukidnon Rep Teofisto Guingona III ang mga OFW na magparehistro para sa halalang 2010.

Sinabi ni Guingona na bilang mga bagong bayani ng Pilipinas, dapat mabatid ng mga OFW na ang karapatang bumuto ay isang makapangyarihang instrumento na maaaring magdulot ng magandang pagbabago sa kanilang bayan.

Nauna nang iniulat ni Foreign Affairs Undersecretary for Special Concerns Rafael Seguis na hanggang noong Abril 21, ang bilang ng mga bagong Overseas Absentee Voters ay 52,557.

Ayon kay Guingona, maliit na porsiyento lamang ito kung ihahambing sa target na isang milyong rehistradong OFW.

Ayon naman sa Bantay Eleksyon 2010, isang koalisyon ng mga electoral stakeholders na itinatag ng Consortium on Electoral Reforms, napakahalaga ang halalang 2010 maghahalal ng bagong pangulo pagkaraan ng 2004 presidential elections.

Bago rin ayon pa sa kanya na ang mga nakaupo sa Commission on Elections na mangangasiwa sa halalan sa ilalim ng panukalang automated election system na ngayon pa lamang masusubukan sa buong bansa.

Idinagdag pa ni Guingona na ang mga nasa ibang bansa ay dapat makilahok sa proseso ng halalan at ang pagpaparehistro ang una at pangunahing hakbang sa demokratikong prosesong ito.

Mga Kabataan, hinikayat magparehistro para sa 2010 election

Hinikayat ni Bukidnon Rep Teofisto Guingona III ang mga kabataan na magparehistro sa COMELEC (Commission on Elections) upang ang mga ito ay makalahok sa papalapit na halalan sa taong 2010

Sinabi ni Guingona ang kabataan ang bumubuo ng malaking bahagi ng kabuuang populasyon ng mga botante at kapag ang mga ito ang nagkaisa, maaari na nilang baguhin ang politika ng bansa.

Batay sa datus ng Comelec, sampung porsiyento (10%) pa lamang o 191,000 sa 1.9 na milyong mga bagong botante ang nakapagparehistro na binubuo ng mga naging 18 taong gulang pataas.

Nakababahala umano ang ganito kaliit na porsiyento ng mga rehistradong bagong botante kung kaya't kailangang humanap ang pamahalaan, lalo na ang Comelec, ng paraan upang abutin at hikayatin ang mga kabataan na makilahok sa darating na halalan.

Ayon pa sa kanya, kailangang mabatid ng mga kabataan kung gaano kahalaga ang kanilang gagampanang tungkulin sa larangan ng pambansang politika.

Pinaalalahanan din ni Guingona ang mga kabataan hinggil sa pressures at kaguluhan sa politika ngunit hindi sila dapat matakot sa sitwasyon kung kaya't dapat maging maingat sila at maging mapagmatiyag.

Pangmatagalan pangangalaga sa mga lolo't lola, isinusulong

Isinusulong ngayon ang panukalang tutuguon sa pangmatagalang pagbibigay-kalinga sa humigit-kumulang 4.6 milyong lolo at lola sa buong bansa na inaasahan pang lalago ang bilang hanggang 9.2 milyon sa taong 2016.

Sinabi ni Pampanga Rep Carmelo Lazatin sa HB02438 na dapat palawigin ang retirement age ng mga empleyado ng pamahalaan hanggang 70 taong gulang dahil ang mga Senior Citizens ay maaari pang magtrabaho ngunit dapat matiyak na hindi makakasama sa kanilang kalusugan ang pagtatrabaho at hindi ito gaanong mabigat batay sa kanilang pisikal na kakayahan.

Tataguriang Senior Citizens’ Long Term Care Act, layon ng panukala na makapagdulot ng regular na tulong na nagkakahalaga ng P50, 000 sa lahat ng tahanang kumakalinga sa matatandang may karamdaman, walang tirahan at abandonado.

Bibigyan din ng pagkakataong mahing miyemo ng PHILHEALTH ang lahat ng matatanda sa buong bansa na pangangasiwaan ng mga health at social services sa mga lokal na pamahalaan, upang makaiwas sila sa anumang karamdaman at magkaroon sila ng sapat na kalusugan ng
isip at katawan.

Nakasaad din sa HB 2438 ang pagbibigay sa kanila ng pagkakataong makapag-aral at sa mga programang tulad ng geriatric training, pag-eehersisyo, ballroom dancing at iba pang pisikal na aktibidad na makakatulong upang mapanatiling malusog ang kanilang pisikal na kalagayan.

Ayon pa kay Lazatin, layunin din ng panukala na mabigyan ng programang pangkabuhayan ang mga nakatatanda upang magkaroon sila ng kabuhayan at mapanatili ang kanilang dignidad bilang mga mamamayang may silbi pa sa lipunan.

PHILCOA, bubuwagin na

Iminungkahi ni Anwaray Rep Florencio Noel na buwagin at palitan na ang Philippine Coconut Authority (PHILCOA) at itatatag ang Philippine Coconut Industry Development Authority (PHILCIDA) bilang kapalit nito para mas mapaunlad pa ang industriya ng niyog sa bansa,

Sa iniakda niyang HB06093, ang pagtatatag ng PHILCIDA ang siyang tanging daan lamang umano upang mabigyan ng solusyon ang mga suliraning kinakaharap ng industriya ng niyog.

Nagbabala si Noel na kapag hindi agad naaksiyunan sa pamamagitan ng sapat na pag-aaral at pagbibigay ng suporta ng pamahalaan, ay posibleng tuluyang bumagsak at mamatay ang lokal na industriya ng niyog.

Ayon sa kanya, 68 sa 79 na probinsiya sa Pilipinas ay natataniman ng puno ng niyog at halos apat na porsiyentong bahagi ng 12 milyong ektarya ng lupaing pang-agrikultura dito ay niyugan kaya dapat lamang na ang ating bansa ang manguna sa industriyang ito, ngunit nakakalungkot umano na taliwas ito sa dapat na mangyari.

Sa ilalim ng kanyang panukala, ipinaliwanag niya ang maigting na pangangailangan na magtatag ng isang ahensiya na siyang mamamahala at magbabantay sa industriya ng niyog upang mapakinabangan ng ito ng lubos ng sambayanan. Isasalin na ang lahat ng kapangyarihan at tungkuling ng PHILCOA sa PHILCIDA kasama na ang lahat ng mga talaan at dokumento, pondo at pinanggagalingan ng pondo, mga kagamitan at yaman, mga empleyado at opisyal nito.

Ayon kay Noel tungkulin ng PHILCIDA na pag-aralan, bumuo, at gumawa ng paraan kung papaano mapapaunlad, mapapalawig at makakasabay sa kumpetisyon ang lokal na produkto ng niyog upang mapakibnabangan ng lubos ang industriya.

Pagbebenta ng mga bahagi ng katawan ng tao, mahigpit na ipagbabawal

Masusi nang mamanmanan ng pamahalaan ang anumang pagsasagawa ng organ transplantation sa bansa upang mabawasan kung hindi man tuluyang mapigil ang patuloy na pagdami ng nagbebenta ng maseselang bahagi ng katawan ng tao ng sa gayon ay mabawasan na rin ang humahabang pila ng mga naghihintay sa human organs.

Sa ilalim ng HB05930 ni Pampanga Rep Anna York Bondoc, ipagbabawal na ang sinumang mag-alok, umupa ng tao o serbisyo, o magsagawa ng paraan upang ang pagbebenta ng maseselang bahagi ng katawan ay maisakatuparan, lalo na kung ito ay ginamitan ng dahas, pamimilit, pambubuyo, pananakot, panloloko o alok ng salapi upang makakuha ng bahagi ng katawan ng isang tao.

Sinabi ni Bondoc na libo-libong pasyente ang nangangailangan ng iba't ibang bahagi ng katawan ang namamatay habang naghihintay nito dahil na rin sa malaking kakulangan ng nag-aalay nito, subalit marami rin ang nabibiktima, naloloko, natutuksong magbenta ng parte ng kanilang katawan dahil na rin sa kakulangang ito, dahilan upang lumaganap ang human organs trafficking.

Ayon pa sa kanya, kakaunti lamang ang kusang nag-aalay ng parte ng kanilang katawan dahil na rin sa kakulangan sa impormasyon hinggil sa kabutihang naidudulot ng pagdo-donate ng human organs sa oras na yumao na ang isang tao.

Nakatakda ring pag-aralan ang mga polisiyang may kinalaman sa rasyunal, etikal at ang aspetong pagkakaroon ng sapat at pantay na impormasyon sa organ transplantation program sa bansa.

Mga sangkap na sustansya ng mga pagkain sa mga restoran, dapat i-display

Ipinalalagay ni ARC party-list Rep Narciso Santiago III ang impormasyon hinggil sa sangkap na sustansya o calorie count sa mga pagkaing inihahain sa mga restoran at iba pang establisimento na may kinalaman sa negosyo ng pagkain.

Sa HB05806, lahat ng negosyong may kinalaman sa pagkain ay dapat na maglagay ng impormasyon hinggil sa nilalamang bilang ng calorie sa bawat pagkaing inihahain nila.

Sinabi ni Santiago na tungkulin ng pamahalaan na mapangalagaan ang pangkalahatang kalusugan ng bawat mamamayan kung kaya't dapat lamang na malaman ng mga parokyano ng mga kainang ito kung ano ang mga sangkap ng pagkaing inihahain sa kanila lalo na ang calorie count nito.

Ayon sa mambabatas, mula pa noong 1994, nalalaman lamang ng mamamayan ang nutrisyong posible nilang makuha sa food labels o mga etiketa ng mga packaged foods, na nabibili sa mga tindahan ngunit walang paraan ang mga mamimiling mahilig kumain sa mga restoran na malaman ang mahahalagang impormasyon tulad ng nakikita sa food labels ng mga canned goods, dahil hindi nakasaad sa mga menu ng restoran ang impormasyon tulad ng bilang ng calories, na nakokonsumo ng mga kumakain.

Masusing babantayan ang mga restoran at mga katulad na establisimento kung ang mga ito ay susunod sa mga probisyong nabanggit sa panukala.

Mga sundalo at pulis na biktima ng Legacy, hindi dapat pabayaan

Ikinalungkot at ikinagalit ni Bukidnon Rep Teofisto Guingona III ang ulat na mahigit labindalawang libong sundalo at pulis ang nabiktima ng Legacy Group of Companies.

Sinabi ni Guingona na nagtiyagang mag-ipon ang mga sundalo at pulis para lamang tiyakin na may magandang kinabukasan ang kanilang mga anak at ipinagkatiwala nila ang kanilang pinaghirapang pera sa Legacy para sa edukasyon ng kanilang mga anak, tapos ito ang kanilang mapapala.

Ayon sa kanya, nakakadismaya talaga na ang kanilang mga panaginip ay basta na lamang sinira ng iresponsableng pamamahala at panloloko ng Legacy Group kung kaya't hindi dapat hinahayaan ng gobyerno na magkaroon ng isang sistemang sumisira sa layunin ng mga tao na mag-impok at paghandaan ang kanilang kinabukasan.

Batay sa datos ng Armed Forces-Police Saving and Loan Association Inc (AFPSLAI), 12,047 na sundalo at pulis ang nagbayad ng buwanang premium para sa mga policy ng Scholarship Plan Philippines Inc (SPPI) na mula sa Legacy group.

Idinagdag pa ni Guingona na ipinagtatanggol ng mga sundalo at pulis ang mga mamamayan laban sa kapahamakan kaya dapat lang na ipagtanggol din ng mga mambabatas ang mga pangarap nila na bigyan ng magandang edukasyon ang kanilang mga anak.

Dagdag sahod sa mga opisyal ng barangay, isinusulong ng mambabatas

Isinulong n Manila Rep Ma. Theresa Bonoan-David sa Kongreso na maiangat ang antas ng pamumuhay ng mga opisyal ng barangay sa pamamagitan ng karagdagang suweldo kada buwan.

Sinabi ni Boboan-David na ang dagdag na buwanang sweldo sa mga opisyal ng barangay ayon sa iminungkahi sa HB06059 ay isang paraan upang makaagapay sila sa pang-araw-araw na pamumuhay sa kabila ng patuloy na pagtaas ng presyo ng mga bilihin, lalo na sa presyo ng pagkain at mga produktong petrolyo.

Ayon sa kanya, ang mga opisyal ng barangay ang may pinakamababang sahod kumpara sa lahat ng ahensya ng gobyerno, sa kabila ng dami at bigat ng kanilang tungkulin samantalanag nagsisilbi rin sila bilang tagapag-ugnay o tulay sa pagitan ng mga mamamayan at pamahalaan at kanilang tinitiyak na ang lahat ng proyekto ng pamahalaan ay naibabahagi sa kanila.

Sa ilalim ng HB 6059, layunin nito na taasan ang buwanang sahod ng mga opisyal ng barangay at bibigyan ang mga ito ng P1,200 na buwanang allowance o honorarium, samantalang P6,000 namn kada buwan para sa mga punong barangay.

Layunin din ng kanyang panukala na gawaran ng sapat na pagkilala at pasasalamat ang mga taong nasa likod ng bawat maunlad at tahimik na barangay dahil sila ang bumubuo at nagpapatupad ng mga batas pambarangay na siyang nagiging daan upang ang isang barangay ay maging maayos at tahimik.

Puslit na asukal, itapon sa dagat

Iminungkahi ni Negros Occidental Rep Jose Carlos Lacson na itapon kaagad sa dagat ang mga nakumpiskang puslit na asukal upang hindi na ito ibenta pang muli sa mga pamilihan ng mga taong mapagsamantala.

Sinabi ni Lacson na kailangang isabatas na ang HB05064 upang mapigilian na ang pagpupuslit ng asukal sa bansa at upang matulungan na mapanatiling mababa ang presyo nito.

Ayon kay Lacson, anumang paraan nang pagtatapon ng puslit na asukal na nasa pangangalaga ng customs ay isagawa basta’t testigo ang kinatawan mula sa Sugar Regulatory Administration at iba pang mga representante sa sector ng pag-aasukal.

Nakakagawa umano kaagad nang paraan ang mga walang-konsiyensyang sugar traders na maibenta sa pamilihan ang mga puslit na asukal na hamak na mas mataas na halaga kaysa sa world market price, giit pa ni Lacson.

Ayon sa kanya, napapanahon na upang bumalangkas ng isang batas ang Kongreso na magde-deklarang krimen ang magpuslit ng asukal na may katumbas na parusa sa ilalim ng batas ng bansa.

Kailangan aniyang pagtibayin ng Kongreso ang isang batas na wawakas at hahadlang sa pagpupuslit ng asukal sa bansa na nakaka-epekto sa pagkokolektang buwis ng gobyerno at sa domestic sugar production.

Trans fat contents sa mga produktong pagkain, dapat isiwalat sa mga etiketa

Ipinasa na sa ikatlo at pinal na pagbasa sa Kamara ang panukalang magbibigay ng proteksiyon sa mga mamimili laban sa panganib ng atripisyal na taba o ang tinatawag na trans fatty acids sa mga pagkaing prinoproseso.

Sa HB00615, sinabi ni Camarines Sur Rep Luis Villafuerte na dapat lamang na nakapaskel sa etiketa ng mga produkto ang nilalamang taba at langis na nagsasangkap ng trans fatty acids at dapat maghanap na lamang ng mga alternatibong sangkap na may mas mababang trans fats tulad ng paggamit ng matika.

Sinabi ni Villafuerte na ang mga toxic trans fats ay lubhang mapanganib sa kalusugan ng tao batay sa mga pagsasaliksik at ang mga ito ay nakapagdudulot umano ng iba’t ibang karamdaman tulad ng obesity, diabetes, cancer, arthritis, eczema, psoriasis, Parkinson's disease at iba pang sakit, kasama na ang mabilis na pagtanda.

Isinusulong ng mambabatas ang paggamit ng mantika na galing sa bunga ng niyog bilang alternatibong mantika kapalit ng inangkat na hydrogenated vegetable oil sa paggawa ng prinosesong pagkain.

Ipinaliwanag niya na mahigpit na umano ang mga batas at patakaran na ngayon ay ipinatutupad sa iba’t ibang bansa tulad ng Estados Unidos, Denmark at Canada hinggil sa paggamit ng trans fat, kaya’t magiging mas pabor sa mga nasa industriya ng niyog kapag ipinagbawal din sa Pilipinas ang paggamit nito.

Imbakan ng ani at kiskisan ng palay, ipamamahagi sa mga magsasaka

Nanawagan si ARC Rep Narciso Santiago III sa pamahalaan na patatagin ang kalagayan ng mga lokal na magsasaka sa pamamagitan ng pamamahagi ng mga pasilidad para sa kanilang mga ani, tulad ng gusali na magsisilbing bodega at kiskisan ng palay upang mapalago ang kanilang mga kita.

Dahil dito, inihain ni Santiago ang HB05698 o ang Post-Harvest Facilities Support Act upang isulong ang kaunlaran sa kanayunan upang maiangat ang kalagayan ng mga magsasaka at patatagin ang mga kasapian, sa pamamagitan ng pagtatayo ng mga gusali na maaari nilang gamiting imbakan ng kanilang mga ani sa bawat bayan at lungsod sa buong bansa.

Sinabi ni Santiago na ang pinatatag na sektor ng agrikultura ay makakaapekto sa katatagan ng iba pang pangunahing produkto sa merkado, kasama na rito ang iba’t ibang produkto mula sa bukid at lalawig ito sa iba pang industriya na mangangahulugan ng pag-unlad ng ating ekonomiya.

Iginiit pa ni Santiago na ang mga pasilidad na ito ay ipagbibili sa mga akreditadong kooperatiba at bibigyan ng 25 taong palugit upang bayaran ang mga ito.

Idinagdag pa niya na ang panukalang ito ang titiyak sa malaking kita ng ating mga magsasaka.

Pangungutang ng mga LGUs, pinarerendahan ng mambabatas

Nagpahayag ng pagkabahala si Camarines Norte Rep Liwayway Vinzons-Chato sa napabalitang bilyun-bilyong pisong halaga ang nautang ng iba’t ibang Local Government Units (LGUs) sa buong bansa upang pondohan ang kanilang operasyon.

Dahil dito, inihain ni Vinzons-Chato ang HB06009 o IRA Securitization Prohibition Act upang amiyendahan ang Local Government Code na magbabawal sa mga LGUs ang pagsasangla ng kanilang mga Internal Revenue Allotment (IRA) bilang katibayan na mababayaran nila ang kanilang mga pagkakautang.

Ayon sa kanya, umabot sa P35 bilyon ang pagkakautang ng mga LGUs sa noong 2002, sa Landbank pa lamang ngunit marami sa pagkakautang na ito na ginamitan ng kanilang IRA bilang prenda ay hindi mabayaran dahil sa hindi nakolekta o walang kinitang buwis.

Kapag pinayagan umanong magpatuloy ang ganitong gawain ay manganganib na mabaon sa pagkakautang ang mga lokal na pamahalaan na mamanahin ng mga susunod na liderato at wala nang pakikinabangang IRA pa ang mga ito dahil ipambayad na lamang ito sa pagkakautang ng sinundang pamahalaan.

Naniniwala si Vinzons-Chato na ang kanyang panukala sa pag-aamiyenda sa LGC ay seseguro sa katatagan ng mga LGUs at ang IRA ay hindi handog mula sa pamahalaang nasyonal kundi karapatang iniatang sa mga lokal na pamahalaan sa ilalim ng Saligang Batas.

Nakukumpiskang droga, susunugin agad

Hindi na dapat hintayin pa ng Philippine Drug Enforcement Agency (PDEA) na magsampa ng kasong kriminal bago sunugin ang mga nakumpiskang ebidensiya.

Ito ang tinuran ni Negros Occidental Rep Jose Carlos Lacson ng kanyang sinabi sa panukalang batas na kanyang inihain, ang HB05984, na posibleng bumalik muli sa mga lansangan ang mga nakumpiskang droga dahil lamang sa kapabayaan ng kinauukulan.

Ayon kay Lacson, kung hindi man ito maalis ay dapat mahadlangan ang muling pagkalat sa mga lansangan ng mga ipinagbabawal na droga na kagagawan ng ilang tiwaling miyembro ng ating law enforcement agency.

Binanggit ni Lacson ang nakaraaang pagsalakay at pagsamsam ng PDEA ng malaking halaga ng shabu sa Quezon City, Manila at Cainta, Rizal.

Nagdududa pa rin ang taumbayan na posibleng pagbalik ng nakumpiskang droga sa mga lansangan, wika pa ni Lacson.

Ayon pa sa kanya, kailangan umanong bumalangkas ng isang matibay na panuntunan hinggil sa droga upang mapanatili ang kaayusan sa batas at itaguyod ang kapayapaan sa lipunan at wasakin ang panganib na idudulot ng droga.

Sa ilalim ng panukala, kailangang sunugin o wasakin kaagad ang lahat ng nakumpiskang droga, laboratoryo, kemikal at lahat ng kasangkapan nito pero magtitira lamang ng sapat o kaunting ebidebsiya para magamit habang dinidinig ang kaso.

Panawagan para sa pagpapalawig ng CARP, sinuportahan

Sinuportahan si Bukidnon Rep Teofisto Guingona III ang panawagan ng mga magsasaka na mabigyan sila ng kaligtasan sa pag-asang maipatupad na ang batas na tunay na magsasalba sa kanila sa matagal na nilang pagdurusa at pagkakabaon sa utang.

Matatandaang muli na namang nanawagan ang mga magsasaka sa Davao, Compostela Valley, South Cotabato sa mga mambababatas na ipasa na at ipatupad ang batas na magpapalawig at magrereporma sa Comprehensive Agrarian Reform Program (CARP).

Ayon kay Dagohoy Magaway ng Mindanao Farmers Development Center, magsasagawa ang mga magsasaka ng iba’t ibang paglalakbay gaya ng ginagawa ng mga peregrino upang ipaglaban ang kanilang lupain.

Sinabi ni Guingona na magmula Sumilao hanggang Calatagan, Batangas, ang mga magsasaka ay hindi tumitigil sa pakikibaka upang mapasakanila ang mga lupang kanilang sinasaka at ang kanilang laging sinasabi na ang repormang agraryo ang tunay na diwa ng kanayunan.

Ayon naman kay Numeriano Gaboten, isa sa mga magsasakang peregrino mula sa Davao del Sur, walang mangyayari sa ating bansa kung walang mga magsasaka, kaya nga dapat lang na suportahan ng lahat ng sektor ang mga ito dahil direktang naaapektuhan ng mga ito ang kanilang kaapakanan.

Matatandaang si Guingona ay bumoto laban sa HJR0019 na ipinasa ng Kongreso noong nakaraang Disyembre at sinabi niyang ang nabanggit na panukala ay isang huwad na CARP dahil wala itong puso, walang probisyon para sa sapilitang pagkuha at pamamahagi ng mga lupain o compulsory land acquisition and distribution.

Umaasa ang mga magsasaka sa mga responsableng mambabatas na kasamahan ni Guingona na makapagsagawa ang mga ito ng mga batas na kalaunan ay magkakaroon ng malaking epekto sa kanilang buhay.

Lunas sa nanlalabong paningin ng mga matatanda, isinusulong

Naghain si ARC party-list Rep Narciso Santiago III ng panukalang batas na may layuning lunasan ang mga may nanlalabong paningin at mga nagdurusa sa diperensya ng kanilang mga mata na kadalasan ay nagiging biktima ng mga aksidente tulad ng pagkapaso, pagkahulog o pagkatumba, pagkatalisod o pagkabangga, at karaniwang nagiging sanhi ng depresyon o kawalang-pag-asa.

Ang HB05049 o ang Senior Vision Services Act na inihain ng mambabatas ay magbibigay ng liwanag sa mga matatanda kahit hindi sila ganap na bulag, subali’t malabo ang paningin na lubhang nakakaapekto sa kanilang pagkilos at paggawa ng mga pang-araw araw na gawain.

Sa ilalim ng panukala, ipag-uutos sa Kalihim ng Kagawaran ng Kalusugan na magpairal ng mga patakaran at regulasyon upang maipatupad ang nasabing batas at titiyakin nito ang pagkakatatag ng mga serbisyo at pagpapalawak ng mga umiiral na serbisyo lalo na sa mga rehiyon.

Inaasahan ng mambabatas na magsusumite ng ulat ang Kalihim sa Kamara hinggil sa mga kaganapan ng programa, kasama na ang usaping pangpinansyal at ang mga rekomendasyon para sa pagpapalawig nito.

Mayamang karagatan, dapat pakinabangan ng mga Pinoy

Nanawagan kahapon si Negros Occidental Rep Alfredo Marañon III sa pamahalaan na ideklara ang mayamang karagatan ng bansa bilang protected zone para mapangalagaan ang pinagkukunan ng yamang-dagat mula sa mga lokal at dayuhang interes na nagkukunwaring papaunlarin umano ang karagatan upang mapagkunan ng pagkain at gamot.

Sa HR01041 na kanyang inihain, nais niya na magsagawa ang gobyerno ng isang masusing pag-aaral upang matukoy ang lahat ng lugar sa karagatan na sakop ng Pilipinas at ang pangangailangan na ito ay mapaunlad, mapangalagaan at maisulong bilang pandaigdigang destinasyon sa larangan ng turismo.

Ang pagkakahain ni Marañon ng resolusyon ay bunsod na rin sa mga ulat na ilang internasyunal na organisasyon ang nagbabalak na gawing pagkukunan ng pagkain at gamot ang ilang bahagi ng karagatang sakop ng bansa at maglagak ng puhunan para sa kanilang negosyo.

Ayon sa kanya, ang Bureau of Fisheries and Aquatic Resources (BFAR) ay dapat na magsagawa ng pag-aaral upang magamit ang bahaging ito ng karagatan para sa kabuhayan ng sambayang Pilipino.

Aniya, dapat na umanong magkaroon ng isang pambansang polisiya ang pamahalaan hinggil sa paggamit, pagpapaunlad at pamumuhunan sa ating mga karagatan para sa kapakinabangan ng ating mga mamamayan, at hihimukin natin ang pribadong sektor na makilahok sa pagpapaunlad na ito ngunit dapat din umanong magpatupad ng mga programa na tututok sa industriya ng turismo at iba pang kalakalan upang maging sagana ang daloy ng mga dayuhang salapi, gayundin ang pagsusulong ng lokal na turismo.

Kahandaan ng mga pamatay-sunog, pinasisiyasat ng mambabatas

Dahil sa nakababahalang pagdami ng naitatalang sunog sa mga nakalipas na buwan, pinasisiyasat ni Nueva Ecija Rep Eduardo Nonato Joson ang kahandaan ng mga ahensya ng pamatay-sunog, gayundin ang mga lokal na pamahalaan.

Pinagbatayan ni Joson ang datus na nagsasabing 39 na por syento ng naitalang sunog sa 16 na rehiyon sa bansa ay naganap sa Kalakhang Maynila noong nakaraang 2008, na ikinasawi ng 12 katao at nakasugat sa 12 pa.

Idinagdag pa daw ng talaaan na sa 315 insidente ng sunog noong 2008, 170 ang naganap sa mga lungsod at munisipalidad sa Kalakhang Maynila sa loob lamang ng isang buwan, mula ika-1 ng Disyembre hanggang ika-30

Umaabot daw sa P179,653,000 halaga ng mga ari-arian ang naabo sa buong bansa dahil sa sunog.

Sinabi ni Joson na dapat sundin ng mga fire protection agencies at ng mga lokal na pamahalaan ang umiiral na probisyon ng Republic Act No. 9514, o ang Fire Code of the Philippines of 2008 kaya dapat umanong suriin ang kanilang kahandaan upang ganap na mabawasan ang sunog at biktima nito na karamihan ay mga kabataan.

Dahil dito, inihain ni Joson ang HR01034 na naglalayong tiyakin ang kaligtasan ng publiko, maisulong ang kaunlaran sa ekonomiya sa pamamagitan ng pagpigil sa lahat ng uri ng mapanirang sunog at maisulong din ang propesyunalismo sa naturang tungkulin.

Dapat daw na magpatupad ang pamahalaan ng mga batas at patakaran na susunod sa pamantayan ng pag-iwas sa sunog at ligtas na pamamaraan, gayundin ang kaakibat na responsibilidad sa tungkulin.

Isinusulong din ng mambabatas ang paggamit ng pondo ng Fire Protection Modernization Trust Fund para sa programa ng modernisasyon ng Bureau of Fire Protection (BFP), batay na rin isinasaad sa RA 9514.

Regulasyon sa negosyong oney transfer, pinarerepaso

Sa HR00293 na inihain ni Bagatsing, sinabi niya na ang ng panukalang isinusulong ay upang paunlarin ng Bangko Sentral ng Pilipinas (BSP) ang mga patakaran sa money transfer business na nagsisilbi sa milyon-milyong Overseas Filipino Workers (OFWs).

Ayon sa kanya, dapat umanong na repasuhin at paunlarin ang sistema ng serbisyong pananalapi ng mga financial institutions at non-bank remittance centers at kakayanan upang makapagsilbi ng mas epektibo at mas mura sa mas nakararaming bilang ng kliyente.

Sa kasalukuyan, lumolobo na umano ang bilang ng mga non-bank remittance companies na kumikita ng malaki sa mga ipinadadalang pera ng mga OFW at ang mga non-bank remittance centers na ito ay internet-based at nakapagtatatag na sila ng ugnayan sa mga bansang may malalaking bilang ng OFWs tulad ng Hilagang Amerika, Asia, mga isla sa dagat Pacifico at gitnang Silangan.

Laganap na rin daw ang kanilang mga sangay, ahente at mga ka-negosyo sa Pilipinas, dagdag pa ng mababatas.

Bukod dito ayon pa kay Bagatsing, ang mga ito ay naging kaakibat na rin sa koleksyon ng iba’t ibang ahensyang pamahalaaan tulad ng Social Security System, Pag-ibig at PhilHealth.

Naging malusog din daw ang kompetisyon sa remittance market kaya’t napapanahon na para repasuhin upang magkaroon ng mas malawak na transparency at accountability at magpapababa din sa singil at iba pang bayarin na hindi makakaapekto sa mabilis, ligtas at maaasahang remittance.

GK Robosnai Groundbreaking

07 April 2009
Groundbreaking
Gawad Kalinga Robosnai
East Fairview, Quezon City
Philippines

Mga Amerikanong mambabatas, gagawaran ng Filipino citizenship

Iminungkahi ni Zambales Rep Antonio Diaz na gawaran ng Filipino citizenship ang apat na Amerkanong mambabatas dahil sa kanilang matinding pagsuporta sa panukalang naggagawad ng kabayaran sa mga Filipinong beterano ng ikalawang digmaang pandaigdigan.

Sa HR01012, HR01013, HR01014 at HR01015, nais ni Diaz na magawaran ng pandangal na pagkamamamayan ng Pilipinas ang mga Amerikanong Senador na sina Theodore Stevens, Daniel Inouye at Daniel Akaka, at Kinatawan Bob Filner.

Sinabi ni Diaz na ang pamumuno ng nabanggit na mga mambabatas sa dalawang Kapulungan ng Kongreso sa Amerika ay naghatid ng magandang balita at tagumpay sa mahigit na 18,000 Pilipinong beterano, na karamihan sa kanila ay nasa rurok na ngayon ng kanilang katandaan.

Iniakda nina Senators Stevens, Inouye at Akaka ang S1315 na kinilala bilang Filipino Veterans Equity Bill at sa Mababang Kapulungan naman ay naghain din si Rep Filner ng kahalintulad na panukala kung saan ang pagkakaapruba ng mga ito ang naghatid ng minsanan at kabuuang bayad sa mga Pilipinong beterano at nagsilbi itong basehan para sa komprehensibong probisyon na maisama ang mga sila sa Stimulus Package Bill na kamakailan lamang ay inaprubahan ng Kongreso ng Estados Unidos.

Ayon kay Diaz, matapos umano ang mahigit na animnapung taong pakikibaka upang kilalanin ng pamahalaan ng Estados Unidos ang kanilang naging bahagi sa ikalawang digmaang pandaigdig ay nagtagumpay din ang mga Pilipinong beterano.

Idinagdag pa ng mambabatas na sa pamamagitan ng mga resolusyong ito ay tatanawin natin umano na isang malaking utang na loob at pasasalamat sa mga kapwa natin mambabatas sa Amerika, ang kanilang ibinahagi para sa katarungan at hustisya ng sambayanang Pilipino.