-MAGPAPALAWIG SA BISA NG PONDO NG ‘BAYANIHAN 2’ HANGGANG IKA-31 NG DISYEMBRE 2021, APRUBADO

Inaprubahan na ng Committee on Appropriations ang panukala na magpapalawig hanggang sa ika-31 ng Disyembre 2021, sa pagpapalabas, obligasyon, at pamamahagi mula sa inilaang pondo ayon sa nakasaad sa Republic Act 11494, o ang “Bayanihan to Recover as One Act,” o mas kilala bilang “Bayanihan 2.”

Sa hearing na pinangunahan ni Zamboanga City Rep. Manuel Jose Dalipe, Vice Chair ng Komite, inaprubahan ang substitute bill na mag-aamyenda sa RA 11519 o “An Act Extending the Availability of Appropriations under RA 11494 or Bayanihan 2.”

Pinalawig ng RA 11519 ang pagiging epektibo ng RA 11494 hanggang ika-30 ng Hunyo 2021.

Iminumungkahi ng substitute bill na mas lalo pang palawigin ito, mula ika-1 ng Hulyo 2021 hanggang ika-31 ng Disyembre 2021.

Sa kanyang sponsorship speech para sa panukala, sinabi ng mambabatas na ang Bayanihan 2 ay epektibo lamang hanggang ika-19 ng Disyembre 2020, subalit dahil sa pagsasabatas ng RA 11519 ay pinalawig ang pagkaepektibo ng batas hanggang ika-30 ng Hunyo 2021.

-PENSIYON NG MGA MILITARY AND UNIFORMED PERSONNEL, SISIYASATIN NG AD HOC COMMITTEE SA KAMARA

Bumuo ang Kamara de Representantes ng “ad hoc committee” para sa usaping pensyon ng military and uniformed personnel o MUP.

Inanunsyo sa plenaryo ng Kapulungan ang pagkakatalaga kay House Committee on Ways and Means chairman Joey Salceda bilang chairman o pinuno ng ad hoc committee at kay Appropriations Panel chair Eric Go Yap bilang vice chairman naman

Ninombrahan din bilang mga miyembro nito sina Deputy Speaker Isidro Ungab, Committee on National Defense and Security chairman at Ilo-Ilo Rep. Raul Tupas, Committee on Government Enterprises and Priviatization chairman at Paranaque Rep. Eric Olivarez, Committee on Public Order and Safety chairman at Masbate Rep. Narciso Bravo at Marikina Rep. Stella Quimbo.

Nauna nang inihain ni Salceda ang House Bill 9271 upang ayusin ang pension system para sa mga MUP.

Ayon kay Salceda, nagbabadya ang krisis sa sistema ng naturang pensyon ng mga MUP at iba pang nasa unipormadong serbisyo kung hindi magkakaroon ng agarang reporma.

Sinabi pa ni Salceda na sa kasalukuyan, mayroong P9.6 trillion na “unfunded reserve deficit” ang MUP dahil sa wala umanong maayos na sistema nito.

-PAGTATALO HINGGIL SA HOSPITAL EXPANSION BILLS, KINAMPIHAN NI ML ROMUALDEZ SI SENATOR BONG GO LABAN KAY MINORITY LEADER DRILON

Kinampihan ni Majority Floor Leader at Leyte Rep. Martin Romualdez si Senator Bong Go kaugnay sa naging pagtatalo nila sa pagitan ni Senate Minority Leader Franklin Drilon bunsod ng hospital expansion bills. 

Pinuri at pinasalamatan ni Romualdez ang malasakit ni Go para sa agarang pagpapatibay sa hospital expansion bills na napapanahon ngayong may COVID-19 pandemic. 

Ang mag-asawang Majority Leader at Tingog Partylist Rep. Yedda Marie Romualdez ay kabilang sa mga principal authors ng twin bills na nakabinbin sa Senado. 

Ito ay ang panukala para dagdagan ang bed capacities ng Eastern Visayas

Regional Medical Center (EVRMC) sa Tacloban City at Schistomiasis

Hospital sa Palo, Leyte.

Matatandaang nagkaroon ng mainit na debate sa Senado sina Go at Drilon matapos na hilingin ni Go na patigilin ang interpelasyon ni Drilon dahil pinapatagal lamang nito ang pagapruba sa panukala. 

Samantala, umaasa naman si Romualdez na kaisa ng Kamara ang Senado sa mabilis na pagpapatibay sa mga panukala partikular na sa pagdadagdag ng bed capacities ng mga ospital upang makaagapay sa mga pagtaas ng bilang ng mga COVID-19 patients. 

-PLENARY DELIBERATIONS NG BAYANIHAN 3, UUMPISAHAN NA MATAPOS ITONG LUMUSOT SA KOMITE

Sa dinaluhang joint hearing ng House Committees on Economic Affairs at Social Services ni House Speaker Lord Allan Velasco kahapon, inaprubahan ng mga mambabatas ang substitute bill ng P405.6 bilyon Bayanihan 3 Bill na inaasahang magsisilbe bilang lifeline measure para sa ayuda sa mga mahihirap na pamilya at mga industriyang apektado ng COVID-19 pandemic.

Principal author si Speaker Velasco ng nabanggit na panukala at aabot naman sa 290 na mga kongresista ang nagpalista para maging principal author at co-authors din nito.

Sa pagdinig ng bill, umapela ang lider ng Kamara sa Senado na suportahan sila sa kapulungan para sa agarang pagpapatibay ng nasabing lifeline measure.

Dahil lusot na ito sa komite, inaasahang iaakyat na ito sa plenaryo para tuluyang aprubahan bago ang sine die adjournment sa June 5.

Batid ni Economic Affairs Chair Sharon Garin na hindi dapat galawin ang 'for later release' na budget sa ilalim ng 2021 national budget na malinaw na nakasaad sa panukala. 

Nakapaloob naman sa Bayanihan 3 ang "Ayuda to all Filipinos" o ang P1,000 na ayuda na ipagkakaloob sa lahat ng 108 million na mga Pilipino na ibibigay ng dalawang beses na may pondong P216 Billion. 

-00-

-HAKBANG NA DAGDAG NG MANGGAGAWA SA HEALTH SECTOR NG PRC, MALUGOD NA TINANGGAP NI SPEAKER VELASCO

Malugod na tinanggap ni Speaker Lord Allan Velasco ang pasya ng Professional Regulation Commission (PRC) na ituloy ang unang batch ng 2021 Nursing Licensure Examination (NLE) sa Hulyo imbes na sa Nobyembre.

Siabi ni Speaker Velasco na ito ay isang magandang kaganapan upang matulungan ang kakulangan ng pamahalaan ng mga manggagawa sa kalusugan na pinalala ng pagdami ng kaso ng COVID-19.

Kamakailan ay nakatanggap ng liham si Velasco mula kay PRC Chairman Teofilo Pilando Jr. at inaabisuhan siya na ang ipinagpaliban na May 2021 NLE ay inilipat sa ika-3 at 4 ng Hulyo, samantalang sa a-21 at 22 ng Nobyembre naman ay itinakda para sa ikalawang batch ng taon para sa nursing board exam.

Matatandaang ipinagpaliban ng PRC sa Nobyembre ang unang batch ng 2021 NLE na orihinal na nakatakda sa ika-30 at 31 ng Mayo, sa pakiusap ng Philippine Nursing Association dahil sa pagtaas ng bilang ng kaso ng COVID-19.

Ito ang nagbunsod kay Velasco na imungkahi na ang mga dapat na kukuha ng pagsusulit sa 2021 NLE ay pakilusin muna, bilang mga karagdagang tauhan sa gitna ng kakulangan ng mga manggagawa sa kalusugan sa buong bansa.

Sinabi ni Velasco na ang mga nursing graduates na hindi pa nakakapag-exam ay maaaring magtrabaho sa ilalim ng superbisyon ng mga rehistradong nars at doktor, sa isang mapagkakasunduang pagtatalaga ng PRC.

Sa kanyang liham kay Velasco, sinabi ni Pilando na isasaalang-alang muli ng PRC ang inisyal na pagpapaliban dahil “ganap nilang nauunawaan ang pangangailangan na magdaos ng NLE, upang madagdagan ang mga manggagawa sa kalusugan sa Pilipinas sa panahon ng kagipitan sa pampublikong kalusugan, habang naghahangad din ng kaligtasan at kapakanan ng mga mag-eeksamen at mga magsasagawa ng pagsusulit.”

Kinumpirma rin ng hepe ng PRC na ang serbisyo ng mga nursing graduates ay mapapakinabangan sa panahaon ng kagipitan sa pampublikong kalusugan.

Binanggit niya ang Memorandum Order No.14, series of 2009 ng Commission on Higher Education, na nagsasaagd na ang mga hindi pa lisensyadong nars na nakagraduate na ay maaaring bigyan ng responsiblidad tulad ng mga nursing aides sa mga ospital.

“Kapag sila (nursing graduates) ay nabigyan ng trabaho bilang nurse attendants o aides, dapat silang isailalim sa pamamahala ng isang rehistradong nars sa pasilidad,” ani Pilando.

Pinasalamatan ni Velasco si Pilando sa kanyang “kagyat na tugon at malinaw na plano at hakbang sa ating panawagan para sa agarang pagdaragdag ng mga manggagawa sa kalusugan, sa gitna ng patuloy na banta ng COVID-19.”

“Kakailanganin natin ang lahat ng tulong na ating makukuha, upang masugpo natin ang pandemyang ito,” dagdag ni Speaker. #

-WALANG RED-TAGGING SA MGA COMMUNITY PANTRY — GEN PARLADE SA PAGDINIG NG KAMARA

Sa pagdinig ng House Committee on Human Rights noong a19 ng Mayo, itinananggi ni Lt. Gen. Antonio Parlade na sila sa National Task Force to End Local Communist Armed Conflict o NTF-ELCAC ang nagpasimuno at na hindi sila nagrered-tag sa mga organizer o volunteers ng mga community pantries

Sinabi ni Gen. Parlade na hindi sila nagre-red-tag kundi nagbigay-babala at pinag-iingat lamang nila ang publiko laban sa ilang community pantry.

Pinuna rin ni Parlade ang ulat ng ilang media outlets na nag-sensationalize o nagpalaki sa isyu at nagbalita na kanya raw inamin ang profiling sa community pantry organizers.

Ani Parlade, noong Abril ay maraming netizens ang nagtanong sa kanila kung bakit may propaganda materials ang ilang community pantry at mayroon din aniyang humiling sa NTF-ELCAC na tingnan ang mga naturang pantry.

Ayon kay Parlade, sa lugar kasi kung saan matatagpuan ang Maginhawa Community Pantry ni Ana Patricia Non ay maraming non-government organizations o NGOs na may fund raising activities.

Sa panig naman ni Presidential Human Rights Committee Secretariat Usec. Severo Catura, kanyang pinalagan ang media reports na natatutok lamang daw kung papaano ipinapakita ng mga community pantry ang “incompetence” o kabiguan ng gobyerno sa pagtugon sa kahirapan at kakulungan ng tulong sa panahon ng COVID-19 pandemic.

Ani Catura, nagagamit tuloy ang bayanihan sa politika. Kinuwestyon din nito ang isang litrato ni Non kung saan nakataas ang kanyang kamao.

Samantala, pinagsabihan ni Rep. Lawrene Fortun ang NTF-ELCAC na mag-ingat sa messaging o paglalabas nito ng mga pahayag, na maaaring magresulta sa pagsasara ng ibang mga community pantry na ang karamihan naman ay may magandang intensyon.

-BAGONG PNP CHIEF ELEAZAR, MALUGOD NA TINANGGAP NI SPEAKER VELASCO SA ISANG COURTESY CALL

Malugod na tinanggap ni Speaker Lord Allan Velasco ang bagong hirang na hepe ng Philippine National Police na si Lieutenant General Guillermo Eleazar, sa isang courtesy call sa Office of the Speaker sa Kamara de Representantes sa Quezon City kahapon.

Personal na binati ni Velasco si Eleazar sa kanyang karapat–dapat na pagkakahirang bilang ika-26 na hepe ng Pambansang Pulisya.

Nangako si Speaker Velasco ng patuloy na suporta sa PNP na may lakas na 220,000 at sa mga planong reporma ni Eleazar sa pulisya.

Ayon ka Velasco, palagiang bukas ang Kapulungan sa pakikipag-tulungan at pakikipag-ugnayan sa PNP, upang matiyak ang pagpasa ng mga mahahalagang lehislasyon na lubos na makakatulong sa kanila, para epektibong maipatupad ang kanilang mandato sa pangangalaga ng kapayapaan at kaayusan, kabilang na ang mas lalong pagpapabuti ng kalidad ng tungkulin na kanilang ibinibigay sa publiko.

-PAGBABAWAL AT PAGDEDEKLARA SA KASAL NG MGA BATA BILANG ILIGAL, APRUBADO NA

Inaprubahan kahapon sa isang online hearing ng Commuttee on Women and Gender Equality sa Kamara ang panukala na naglalayong ideklara ang kasal sa mga bata bilang iligal.

Nagpasya ang komite na pinamunuan ni Bukidnon Rep. Maria Lourdes Acosta-Alba na ipasa ang panukala upang maprotektahan ang mga bata sa pamamagitan ng pagbabawal at pagdedeklara sa kasal sa mga ito bilang iligal at patawan ng parusa ang mga lalabag dito.

Sa kanyang pambungad na pananalita, tinukoy ni Acosta-Alba ang mga datos mula sa United Nations Children’s Fund, na nagpapakita na ang Pilipinas ay nasa ika-12 pinakamataas na bilang ng batang babae na ikinakasal sa buong mundo sa bilang na 726,000.

Sinabi niya na tinatayang 15 porsyento ng mga Pilipinong batang babae ay ikinasal bago humantong sa edad na 18 taong gulang, samantalang 2 porsyento naman ang ikinasal bago sumapit ang edad na 15 taong gulang.

Bilang kasapi ng mga bansa sa ASEAN, sinabi niya na naghahangad tayo na wakasan ang maagang pagpapakasal sa mga bata at sapilitang pagpapakasal sa taong 2030, alinsunod sa target na 5.3 ng Sustainable Development Goals (SDGs).

Aming pinagtibay ang Convention on the Rights of the Child noong 1990, na nagtatakda sa edad na 18 para sa pagpapakasal,” ani Acosta-Alba. Sa kanyang sponsorship speech, sinabi ni Herrera-Dy na pinagkaitan ng maagang pagpapakasal ng mga bata ang kanilang pagiging bata, nakasira sa pag-aaral at nalimitahan ang mga oportunidad. Samantala, sinabi ni Tambunting na nakaapekto ng labis sa pisikal at sikolohikal na pag-uugali ng mga bata ang maagang pagpapakasal. Ilan sa mga inanyayahang tagapagsalita na nagpahayag ng kanilang suporta sa panukala ay sina Philippine Legislators’ Committee on Population and Development (PLCPD) Executive Director Rom Dongeto; Child Rights Network Coordinator Mary Antonette Flores; Democratic Socialist Women of the Philippines (DSWP) Chairperson Elizabeth Angsioco; at Maguindanao Alliance of Youth Advocates (MAYA) Against Child Marriage Farhana Tala Ganoy.        

#SpeakerLordAllanVelasco

#SpeakerLAV

-SESYON TUWING HUWEBES NG KAMARA PARA TAPUSIN ANG IILANG PRIORITY MEASURES, IMUMUNGKAHI

Imumungkahi ni Deputy Speaker Rufus Rodriguez sa liderato ng Kamara de Representantes na magsagawa na rin ng sesyon ang Kongreso hanggang Huwebes. 

Sinabi ni Rodriguez na iri-rekomenda niya ang dagdag na isang araw sa linguhang sesyon para makagawa na sila ng kagyat na resolusyon at tuluyang maipatupad na ito.

Ayon sa kanya, masyadong maikli ang tatlong araw sa isang linggo na sesyon lalo pa at 3 linggo o 9 na session days na lamang ang natitira sa second regular session ng 18th Congress. 

Marami pa aniya ang priority measures na dapat pagtibayin ang Kapulungan tulad ng Bayanihan 3 at economic charter change bukod pa ito sa iba pang mga panukala na nakalinya ring aprubahan sa Kamara de Representantes.

Sakali aniya ay may tatlong dagdag na mga araw ng Huwebes na maaaring magsagawa  ng sesyon para matiyak na lahat ng mga mahahalagang panukala lalo na ang mga COVID-19 related measure ay maaaprubahan bago ang sine die adjournment sa June 5. 

Handa rin si Rodriguez na makipagpuyatan sa sesyon matapos lamang ang trabaho ng Kamara. 

Hinimok rin ng kongresista ang mga kasamahan na itodo na ang sesyon dahil kung tutuusin ay hindi kinakailangan ang physical presence ng mga mambabatas.

-IMBESTIGASYON SA PROYEKTONG KALIWA DAM, IPINAGPATULOY NG KAMARA

Ipinagpatuloy kahapon ng Committee on Indigenous Cultural Communities and Indigenois Peoples sa Kamara de Representantes ang kanilang imbestigasyon batay sa HR 15 at HR 309, hinggil sa New Centennial Water Source – Kaliwa Dam Project.

Sa kanyang pambungad na pananalita, nagpahayag si committee chairman at Kalinga Rep. Allen Jesse Mangaoang ng kahalagahan ng Free Prior and Informed Consent (FPIC) ng Indigenous Cultural Communities (ICC) at Indigenous Peoples (IPs) sa proseso ng pagpapasya tungkol sa usapin.

Binigyang-diin ni Mangaoang na ang FPIC ay idinambana sa “The Indigenous Peoples’ Rights Act of 1997”, na naggagawad sa ICCs at IPs ng boses para pangalagaan ang kanilang mga interes, kung ang pinag-uusapan ay ang nagkakaisang pagpapasya.

Kinuwestyon ng isang mambabatas ang National Commission on Indigenous People (NCIP) sa ginawa nilang pagpapadali sa negosasyon ng Memorandum of Agreement, sa pagitan ng Metropolitan Waterworks and Sewerage System (MWSS) at Indigenous People (IPs), sa kabila ng pinaiiral na FPIC.

Sa kanyang tugon, sinabi ni NCIP Engineer Katherine Gullunan na walang natanggap na anumang “Resolution of Non-consent” ang komisyon mula sa mga apektadong IPs sa mga lalawigan ng Quezon at Rizal.

Sinabi Gullunana na nakatanggap lamang daw sila ng Resolution of Consent na isinumite ng FPIC Team at iyon ang naging basehan ng NCIP upang magpatuloy sa susunod na proseso ng NCIP.

Hinimok ni Zarate ang NCIP na pahintulutan ang Komite na tapusin ang kanilang imbestigasyon, bilang kortesiya sa Kapulungan sa dalawang resolusyon bago ipagpatuloy ang mga negosasyon.

Nanawagan si Mangaoang sa mga katutubo na magkaisa, lalo na sa mga usapin ng pagpapasya para sa kinabukasan ng kanilang susunod na henerasyon.

Nagtakda ang Komite ng panibangong pagdinig upang ipagpatuloy ang imbestigasyon sa usapin.

Layon ng HR 15 na inihain ni BAYAN MUNA Rep. Eufemia Cullamat, na imbestigahan ang umano’y krisis sa patubig at ang pagbabalik at mga epekto ng konstruksyon ng mga proyektong Kaliwa Dam at Laiban Dam.

Samantala, ang HR 309 ay inihain ni Rizal Rep. Juan Fidel Felipe Nograles, na naglalayong imbestigahan ang Centennial Water Source-Kaliwa Dam Project, at ang mga umano’y maanomalyang paggagawad ng kontrata sa China Energy Engineering Co. Limited.    

#SpeakerLordAllanVelasco

#SpeakerLAV

-SA PAGBALIK-SESYON NG KONGRESO KANINA, PUNONG-PUNO SILA NG TALAKAYING PANUKALA — SPEAKER VELASCO

Sa pagbalik-sesyon ng Kamara de Representantes kanina a las tres ng hapon, sinabi ni House Speaker Lord Allan Velasco na nahaharap silang mga mambabatas na punong-puno ng tatalakaying mga panukala na pangungunahan ng Bayanihan 3, at iba pang kaugnay na mga panukala na nasa adyenda nito.

Sinabi ng pinuno ng Kapulungan, lulubusin ng lehislatura ang natitira nitong tatlong linggo ng second regular session ng 18th Congress, upang maipasa ang third phase ng COVID-19 relief package, at iba pang kaugnay na mga panukala.

Ayon sa kanya, kailangan umano nilang tiyakin na magkakaroon sila ng mga batas na magpapasigla sa ating ekonomiya upang makabawi ang ating bansa mula sa pandemyang ito.

Idinagdag pa ng Speaker na nakahandang makipagtulungan ang Kamara sa Senado para matiyak na maisasabatas ang mga panukala bago sila magtapos.

Magwawakas na ang ikalawang regular session ng 18th Congress sa ika-5 ng Hunyo at nakatakdang magsimula ang ikatlo at final na regular session sa a-26 ng Hulyo na sasabayan ng huling State of the Nation Address (SONA) ni Pangulong Rodrigo Roa Duterte.

Sinabi ni Velasco na hangad ng Kapulungan na tiyakin ang nasa wastong oras na pagpasa ng mga “natitira pang prayoridad na mga panukala sa ilalim ng Administrasyong Duterte.”

“Karamihan sa mga prayoridad na panukalang ito ay pasado na sa ikatlong pagbasa ng Kapulungan,” punto ni Velasco. “Maaaring sa susunod na tatlong linggo ay aantabayanan natin ang mga hakbang ng Senado sa mga panukalang batas na sinertipikahan ng ating Pangulo bilang ‘urgent’”.

Sinabi niya na ang mga panukala ay kinabibilangan ng Senate Bill 2094, na naglalayong amyendahan ang Public Service Act; SB 1156 o ang pag-amyenda sa Foreign Investments Act of 1991; at SB 1840 na mag-aamyenda sa Retail Trade Liberalization Act of 2000, sa pamamagitan ng pagpapababa sa kinakailangang puhunan para sa foreign capital enterprises.

Umaasa si Velasco na mamadaliin ng Senado ang pagtalakay nila sa panukalang Medical Reserve Corps Act, na inaprubahan ng Kapulungan sa huling pagbasa noong Marso.

“Pinatutunayan lamang ng COVID-19 ang ating pangangailangan ng pagkakaroon ng Medical Reserve Corps, na mabilis nating mapapakilos sa panahon ng krisis sa pampublikong kalusugan,” ani Velasco.

Sinabi ni Velasco na hinimok niya ang Komite ng Kalusugan sa Kapulungan ng mga Kinatawan, na madaliin ang pagpasa ng panukala na bubuo sa Philippine Virology Institute, at ang mga panukala para sa pag-iimbak ng mga gamot bilang bahagi ng pagtugon ng pamahalaan sa pandemya.

Matatandaang kahit na nakabakasyon ang Kapulungan ay tuloy tuloy ang pagdaraos ng mga pagdinig ng mga Komite, hinggil sa mga panukala at mga usapin para sa publiko sa panahon ng pandemya.

Isa rito ay ang substitute bill sa maraming panukala para sa Bayanihan 3, kabilang ang House Bill 8628 o ang “Bayanihan to Arise As One Act,” na inihain nina Speaker Velasco at Marikina City Rep. Stella Luz Quimbo.

Kailangan na lamang ng pag-apruba ng Komite ng Appropriations ang substitute bill bago ito iulat sa plenaryo, upang aprubahan na ito sa ikalawa at ikatlong pagbasa.

Inaprubahan ng mga Komite ng Economic Affairs, Social Services at Ways and Means sa Kapulungan ng mga Kinatawan ang P405.6-bilyon Bayanihan 3, na kinabibilangan ng dalawang yugto ng pamamahagi ng pinansyal na ayuda, na nagkakahalaga ng P2,000 na ipamamahagi sa bawat Pilipino, anuman ang estado nila sa lipunan.

Habang nakabakasyon, nagdaos din ang Kapulungan ng mga imbestigasyon, bilang ayuda sa lehislasyon, para sa maayos na implementasyon ng programa sa pagbabakuna para sa COVID-19, at ang mga kautusan ng Kagawaran ng Kalusugan at Food and Drug Administration na umano’y nakakasagabal sa paghahatid ng serbisyo sa publiko, at ang nakakabahalang pagtaas ng halaga ng karne ng baboy at mga pangunahing bilihin.

Sa pagbabalik-sesyon ng Kapulungan, sinabi ni Velasco na aaprubahan sa plenaryo ang mga House Resolution na nagpapatibay sa proklamasyon ni Pangulong Duterte, na naggagawad ng amnestiya sa mga rebeldeng Muslim at Komunista, na nagpasyang isuko ang kanilang mga armas at bumalik na sa lipunan.

Nauna nang inaprubahan ng mga Komite ng Katarungan, at ng National Defense and Security ang apat na resolusyon na nagpapatibay sa proklamasyon ng Pangulo, na naggagawad ng amnestiya sa mga miyembro ng Moro Islamic Liberation Front, Moro National Liberation Front, Rebolusyunaryong Partido ng Manggagawa ng Pilipinas/Revolutionary Proletarian Army/Alex Boncayao Brigade at Communist Terrorist Group.

“Ang programang amnestiya ng pamahalaan ay isang malaking hakbang tungo sa pagkakamit ng makatarungan at tumatagal na kapayapaan sa bansa, at ang paggabay sa mga dating rebelde pabalik sa buhay-sibilyan,” ani Velasco. 

Sinabi ni Velasco na ipagpapatuloy ng Kapulungan ang pagtalakay sa plenaryo ng Resolution of Both Houses No. 2, na naglalayong gawaran ang susunod na Kongreso ng kakayahang amyendahan ang mga mahihigpit ng probisyong pang-ekonomiya ng 1987 Konstitusyon.

“Layon nating alisin ang mga mahihigpit ng probisyong pang-ekonomiya ng 1987 Konstitusyon bilang pakikialam, upang pahintulutan ang mas maraming dayuhang pamuhunan, upang makabawi ang ekonomiya ng bansa mula sa COVID-19,” ani Velasco.

Sinabi ng pinuno ng Kapulungan na ang pagbabago sa 34 na taong Charter ay ilalatag sa ika-19 na Kongreso, matapos na aprubahan ito ng sambayanang Pilipino sa isang plebisito, na maaaring isabay sa pambansang halalan na gaganapin sa Mayo 2022.

Nanindigan si Velasco na ang mga panukalang pagbabago sa Konstitusyon ay “pawang pang-ekonomiya lamang,” at hindi bibigyan ng puwang ang mga “amyendang politikal.” #

-PAG-APRUBA SA ECONOMIC CHARTER CHANGE, SUSI SA PAGBUBUKAS NG ECONOMIYA — REP QUIMBO

Inirekomenda ni Marikina Rep. Stella Quimbo na buksan na ang ekonomiya sa pamamagitan ng pagapruba sa economic charter change. 

Ang mungkahi ng kongresista ay kasunod ng 4.2% na pagsadsad ng ekonomiya ng bansa sa unang quarter ng 2021 kung saan bumagsak din sa 18.3% ang gross capital formation. 

Hinihikayat ni Quimbo ang mga kasamahang mambabatas sa Kongreso na ipasa na ang economic cha-cha para sa pagbubukas ng ekonomiya upang makapasok na ang mga bagong investments sa bansa. 

Paliwanag ni Quimbo, ang tuluyang pagpapatibay sa panukala na nagaalis sa economic restrictions ng Konstitusyon ay magiging daan para sa pagdaloy ng mas maraming foreign capital at paraan para mas mahimok na mamuhunan ang iba't ibang sektor. 

Hiniling din ng mambabatas sa Kamara ang agad na pagapruba rin sa Bayanihan 3 sa muling pagbubukas ng sesyon sa May 17.

-COVID-19 INFORMATION DRIVE NG PCOO, DAPAT PAIGTINGIN PA — MAMBABATAS

Pinayuhan ni Ang Probinsyano PL Rep. Ronnie Ong ang Presidential Communications Operations Office o PCOO na doblehin pa ang mga ginagawa nito para sa COVID-19 information drive.

Ang pahayag ni Ong ay kasunod ng kumpirmasyon ng Department of Health o DOH na nakapasok na sa Pilipinas ang India variant ng COVID-19.

Ayon kay Ong, dapat na palakasin ng PCOO ang pagpapalaganap nito ng mga impormasyon ukol sa COVID-19 lalo’t ang virus ay nag-mutate na at sinasabing mas “contagious” o nakakahawa at mas nakamamatay.

Ani Ong, marapat ding i-maximize ng PCOO ang mga information dissemination assets nito gaya ng Philippine Information Agency, Philippine News Agency at Philippine Broadcasting Network, upang madagdagan ang kaalaman ng publiko sa masasamang epekto kapag binalewala ang virus.

-PANUKALA TUNGKOL SA PAGGAMIT NG MGA SASAKYANG DE KURYENTE, APRUBADO NA SA MGA KOMITE SA KAMARA

Inaprubahan kahapon sa isang online hearing ng magkasanib na Committee on Energy ni Pampanga Rep. Juan Miguel Macapagal Arroyo at ng Committees on Transportation at ng Ecology ang inilatag na substitute bill sa paggamit ng mga sasakyang de kuryente, at ang pagpapaunlad nito bilang isang industriya.

Pinamunuan ni Bataan Rep. Enrique Garcia III, Vice Chairman ng Energy Committee ang technical working group (TWG), na tumalakay sa pinagsama-samang mga panukala na nagbalangkas sa nasabing substitute bill.

Sinabi ni Garcia na layunin ng panukala na buuin ang isang pambansang polisiya at balangkas upang himukin ang mga nasa industriya ng mga sasakyang de kuryente sa mga pampubliko at pribadong sektor.

Ilan sa mga layunin ng panukala ay ang 1) imandato sa lahat ng mga istasyon ng gasolinahan, kabilang na ang mga pampubliko at pribadong establisimiyento, na maglaan ng lugar ng paradahan para sa mga sasakyang de kuryente, 2) iutos ang paglalagay ng mga charging stations sa lahat ng mga lugar na may paradahan para sa mga sasakyang de kuryente, 3) magtatag ng mekanismo ng akreditasyon sa lahat ng mga providers ng charging stations, 4) magtatag ng luntiang daanan na eksklusibo para sa mga sasakyang de kuryente, 5) isama ang mga lokal na nagmamanupaktura ng mga sasakyang de kuryente sa mga prayoridad na plano sa pamuhunan, kabilang na ang 6) pagpapalibre sa Value Added Tax (VAT) sa pagbili ng mga sasakyang de kuryente.

-PANUKALANG MAGPAPALAKAS SA MGA FIELD OFFICE NG COMELEC, LUSOT NA SA KAMARA

Pasado na sa House Committee on Suffrage and Electoral Reforms ang panukalang batas na magpapalakas sa mga field offices ng Commission on Elections o Comelec.

Sa vitual hearing ng komite na pinamumunan ni Rep. Juliet Marie Ferrer, mabilis na inaprubahan ang panukala na magpapalakas sa mga field office ng Comelec sa pamamagitan ng pag-upgrade at pagbuo ng iba’t ibang posisyon at pagtataas ng sweldo at benepisyo ng mga kawani sa pamamagitan ng pag-amyenda sa section 53 ng Omnibus Election Code.

Malugod namang tinanggap ng Comelec, partikular na ng mga empleyado at miyembro ng Comelec Employees Union na ayon sa kanila, ito ay magsisilbing inspirasyon sa mga field office at mga empleyado ng Comelec na lalong pagbutihin ang trabaho at pagseserbisyo para sa nakatakdang 2022 national and local elections.

Sa sandaling maging ganap na batas ang panukalang ito ay maraming empleyado ng Comelec ang makikinabang, lalo na’t kung madagdagan ang sweldong nakukuha ng mga kawani ng poll body na naapektuhan din ng COVID-19 pandemic.

Aabot sa 5,000 ang bilang ng field offices ng Comelec sa buong Pilipinas.

-KAMARA AT SENADO, DAPAT MAGKAROON NG IISANG BOSES HINGGIL SA ISYU NG WEST PHILIPPINE SEA — BARBERS

Iminungkahi ni Surigao del Norte Rep. Robert “Ace” Barbers sa Kamara de Representanes at sa Senado na magkaroon ng isang joint resolution na magpapahayag ng iisang boses ng mga mambabatas kaugnay sa isyu ng West Philippine Sea.

Sinabi ni Barbers na ang naturang joint resolution ay gagawin hindi para magdeklara ng giyera o kung anuman.

Ang joint resolution aniya ng dalawang kapulungan ng Kongreso ay layong magkaroon ng united voice o iisang posisyon hinggil sa pag-angkin ng China sa ating mga teritoryo at presensya ng kanilang pwersa sa West Philippine Sea kagaya ng sa Julian Felipe reef.

Naniniwala rin si Barbers na ang joint resolution ay magsisilbing matibay na boses na maririnig ng international community na maaaring magpalambot sa China.

Ayon sa kanya, sa kasalukuyan ay wala pang joint resolution ang Kamara at Senado, pero umaasa siyang makukonsidera ito dahil may “value” o halaga ang iisang boses ng dalawang kapulungan.

Dagdag pa ng mambabatas, kailangang magpakita ang ating bansa ng sinseridad para angkinin ang sariling atin, na patungkol sa ating mga karapatan sa West Philippine Sea.

Giit pa ni Barbers, huwag dapat umalis ang pwersa ng Pilipinas sa teritoryo dahil kailangang magpakita tayo na may nagbabantay doon kahit isang libo o gaano pa karami ang mga barko ng China.

-CAYETANO, HINDI SANG-AYON SA P1,000 LANG NA AYUDA SA BAYANIHAN 3

Hindi sinang-ayunan ni dating House Speaker Alan Peter Cayetano ang panukala ng House Committee on Economic Affairs at Committee on Social Services na P1,000 lamang ang ayudang ipamimigay bawat indibidwal sa ilalim ng Bayanihan 3.

Sa isang panayam, sinabi ni Cayetano na sapat ang P200 bilyong pondo ng panukalang Bayanihan 3 para makapag-pamahagi ng P10,000 ayuda sa bawat pamilya.

Idinagdag pa ng dating Speaker na hindi limos ang hinihingi ng ating mga kababayan kundi tulong, dahil extraordinary ang kanilang problema kinakaharap.

Nitong Pebrero, inihinain ni Cayetano at kaniyang mga kaalyado ang 10k Ayuda Bill na naglalayong mabigyan ng tigsa-sampung libong pisong tulong-pinansyal ang bawat pamilyang Pilipino habang patuloy ang kawalan ng trabaho at kagutumang dulot ng pandemya.

Isinama ang panukalang batas sa bagong bersyon ng Bayanihan 3, ngunit sa kasamaang-palad ay hindi isinali ang probisyon na P10,000 ayuda bawat pamilya.

Dahil dito, hinimok ngayon ni Cayetano ang publiko na manawagan sa mga mambabatas na suportahan ang mungkahi nilang mabigyan ng P10,000 tulong-pinansyal ang bawat pamilya.

-KAMPANYA NI PNP CHIEF ELEAZAR LABAN SA MGA HOODLUM AT TIWALING PULIS, SINUPORTAHAN NG ISANG DEPUTY SPEAKER SA KAMARA

Bagama’t suportado ni Deputy Speaker at Manila Rep. Benny Abante ang paka-hirang kay PNP Chief Gen. Guillermo Eleazar, hinamon niya ito na agad aksyunan ang mga insidente ng pagpatay at iba pang karahasang kinasasangkutan ng mga myembro ng Philippine National Police (PNP). 

Sinabi ni Deputy Speaker Abante na kanyang sinusupotahan ang kampanya ni Eleazar laban sa mga hoodlum o tiwaling mga pulis. 

Binigyang diin ng mambabatas na sa mga nakalipas na buwan ay nadadawit ang PNP sa mga insidente at nangangahulugan ito na kailangan na ng institusyon ng tapat, desidido at may 'sense' na liderato upang tuluyang masawata ang mga kahalintulad na trahedya. 

Umaasa si Abante na hindi lamang sa matapang na salita kundi pati na rin sa matapang na gawa ay isasakatuparan ni Eleazar ang kanyang mga sinabi. 

Kailangan na rin aniya ng reporma at seryosong mga hakbang para maitama ang mga mali at iligal na gawaing kinasasangkutan ng mga pulis.

-MGA TAHANANG APEKTADO NG COVID-19 SA ILALIM NG BAYANIHAN 3, MATATATANGGAP DIN NG AYUDA

Makatatanggap din ng ayuda ang mga household o mga tahanang apektado ng COVID-19 sa ilalim ng Bayanihan 3. 

Ipinahayag ito ni Ways and Means Chairman Joey Salceda kahapon bagama’t inamin ni Budget Secretary Wendel Avisado na walang mahuhugutang pondo ang pamahalaan para maisulong na ang P405.6-bilyong Bayanihan to Arise as One Act. 

Sinabi ni Salceda na mayroong nakapaloob sa Bayanihan 3 na P5,000 hanggang P10,000 na ayuda para sa bawat household na apektado ng COVID-19 pandemic. 

Ngunit nilinaw ni Salceda na hindi ito 'universal' tulad sa P2,000 o P216-billion cash asssistance na kung saan lahat ng 108 million na mga Pilipino ay makakatanggap. 

Ayon sa kanya, ang household ayuda na ito ay 'targeted' at ibabase sa pinakamahihirap na bahagi ng populasyon. 

Ang ayuda para sa bawat pinakamahihirap na household ay 'top-up' o dagdag lamang sa mga tulong na pwedeng makuha ng mga Pilipino sa ilalim ng Bayanihan 3.

-ECONOMIC CHARTER CHANGE RESOLUTION, MAPAG-BOBOTOHAN BAGO MAG-SINE DIE ADJOURNMENT

Kompiyansa si House Committee on Constitutiona Amendment Chairman Alfredo Garbin, Jr. na mapag-bobotohan sa Kamara ang Resolution of Both Houses 2 RBH 2 o ang tinatawag na Economic Charter Change o Cha-Cha bago mag-sine die adjournment ang Kongreso sa ika4 ng Hunyo.

Buong tiwalang ipinahayag ito ni Rep. Garbin, ilang araw bago magbalik-sesyon ang Kongreso sa May 17, 2021.

Sinabi ni Garbin na tatapusin na lamang nila ang plenary debates para sa RBH no. 2, na ini-akda sa pangunguna ni House Speaker Lord Allan Velasco.

Bago aniya nag-bakasyon ang Kamara noong huling bahagi ng Marso ay nasa pitong kongresista na lamang ang nalalabing naka-lista para sumalang sa debate.

Madali na umanong matatapos ito lalo’t paulit-ulit na lamang ang diskusyon hinggil sa isinusulong na pag-amiyenda sa iilang itinuturing na restrictive economic provisions ng Saligang Batas.

Sa oras naman na matapos na ang debate ay pagbobotohan na ang RBH no. 2 sa ikalawang pagbasa, at ikatlong pagbasa bago mag-adjourn ang Kongreso.

-MGA POLISYA NA IPINATUTUPAD SA PAGBYAHE SA KARAGATAN SA PANAHON NG BAGYO, NAIS REPASUHIN

Nais ni Speaker Lord Allan Velasco na repasuhin ang walong taong polisiya na nagsususpindi sa pagbyahe sa karagatan sa mga lugar na isinailalaim sa Public Storm Warning Signal (PSWS) Number 1, o 36 na oras bago manalasa ang isang bagyo.

Sinabi ni Velasco na ang polisiya – na inilatag sa isang memorandum circular ng Philippine Coast Guard (PCG) noong 2013 – ay napatunayang hindi produktibo at nakakasagabal sa industriya ng paglalayag sa bansa, at ng publiko.

Ayon kay Velasco, ang kautusan ng PCG ay nagreresulta sa nakakabahalang pagkaantala, hindi inaasahang pagkansela, pagbaba sa pagkaproduktibo sa ekonomiya at paghinto ng serbisyo sa paglalayag.

Ipinahayag ito ni Velasco matapos na makipagpulong siya sa mga opisyales ng PCG, Philippine Atmospheric, Geophysical ang Astronomical Services Administration (PAGASA), at Maritime Industry Authority (MARINA) kamakailan lamang.

Tumuon ang talakayan sa PCG Memorandum Circular No. 01-13, na nagsasaad ng “Guidelines on Movement of Vessels During Heavy Weather,” na epektibong nagbabawal sa anumang uri ng sasakyang pangdagat o barko, sa paglalayag mula sa pinanggalingan, ruta, hanggang sa patutunguhan nito kapag ang babala ng PSWS No.1 ay naitaas na.

-PAG-AALIS NG INTELLECTUAL PROPERTY PROTECTION SA POLISIYA NG ESTADOS UNIDOS, SUPORTADO NI ML ROMUALDEZ

Sinusuportahan ni House Majority Leader at Leyte Rep. Ferdinand Martin Romualdez ang plano ng gobyerno ng Estados Unidos na alisin ang intellectual property protection ng mga bakuna laban sa COVID-19.

Sinabi ni Romualdez na nangangahulugan ang pagtanggal sa patent ng mas maraming drug manufacturer ang makagagawa ng bakuna laban sa nakamamatay na COVID-19 kaya mas mabilis na matutugunan ang problemang naglimita sa galaw ng tao.

Ayon sa kanya, dapat umanong bantayan ng mga opisyal ng gobyerno ang mga kaganapan sa pahayag ng Estados Unidos at makilahok sa mga usapan kung kinakailangan.

Kung mabibigyan ang Pilipinas ng patent, mas mabilis umanong makatatanggap ng bakuna ang mas maraming Pilipino kaya dapat itong paghandaan.

Idinagsag pa ng mambabatas na ipinakita rin ng pandemya ang kahalagahan na mapondohan ang research and development ng bansa lalo at hindi naman nahuhuli ang talino ng mga Pilipino pagdating sa pagtuklas ng mga bagay na makatutulong sa pag-unlad ng tao.

-PAGBUO NG ENERGY ADVOCATE OFFICE (EAO), BABALANGKASIN SA KAMARA

Binuo kahapon sa isang online hearing ng Committee on Energy sa Kamara de Representantes ang isang technical working group (TWG) na babalangkas sa mga panukalang naglalayong bumuo ng pambansang polisiya sa enerhiya at balangkas para sa adbokasya sa kuryente.

Sinabi ni Pampanga Rep. Juan Miguel Macapagal Arroyo, Chairman ng Komite, na ang bubuuing TWG ay pamumunuan ni Deputy Speaker Wes Gatchalian, may-akda ng HB 7608.

Layon ng panukala ang pagtatatag ng Energy Advocate Office (EAO), na ipinaliwanag ni Gatchalian, na magiging isang independyenteng kinatawan ng mga gumagamit ng enerhiya sa pagtatakda ng halaga, patakaran, gayundin ang mga kaso at paglilitis ng mga may kaugnayan sa enerhiya, sa mga ahensya ng pamahalaan, kabilang na ang judicial at quasi-judical bodies.

Ang EAO ay magsisilbi bilang independyente at may autonomiyang tanggapan sa ilalim ng Department of Justice (DOJ), alinsunod sa Administrative Code of 1987.

*VELASCO: MGA HINDI PA REHISTRADONG NARS, MAAARING IKONSIDERA NG DOH BILANG KARAGDAGANG MANGGAGAWA SA KALUSUGAN

Mananawagan si Speaker Lord Allan Velasco sa Department of Health (DOH) at sa Professional Regulation Commission (PRC), na ikonsidera at paganahin ang mga hindi pa rehistradong nars, bilang karagdagang manggagawa sa health sector, dahil sa labis na kakulangan nito sa bansa.

Sa isang panayam, sinabi ni Velasco na since na-postpone din recently ‘yung nursing board exam, actually puwede natin i-tap ‘yung mga supposedly magbo-board exam at gamitin sila bilang mga health worker.

Ayon sa Speaker, ang hindi pa mga rehistradong nars na ito ay maaaring maglingkod sa ilalim ng pangangasiwa ng mga rehistradong nars o doktor, sa isang espesyal na kasunduan sa PRC.

Nagpasya ang PRC na ipagpaliban ang unang batch ng nursing board exam ngayong taon, na nakatakda sa ika-30 at 31 ng Mayo, sa kahilingan ng Philippine Nursing Association dahil sa paglobo ng kaso ng COVID-19. Ang pagsusulit ay muling itinakda sa ika-21 hanggang 22 nang Nobyembre ngayong taon.

-BAYANIHAN 3 DETERMINADONG IPASA NG KAMARA DE REPRESENTANTES – SPEAKER VELASCO

Ipinahayag kahapon ni Speaker Lord Allan Velasco na determinado ang House of Representatives na ipasa ang ikatlong COVID-19 relief package o Bayanihan 3, upang matulungan ang mga naghihikahos na mga Pilipino, at buhayin ang lugmok na ekonomiya ng bansa dahil sa pandemya.

Sa isang panayam, sinabi ni Velasco na ang lehislatura ay naghahangad na mapabilis ang pag-apruba sa plenaryo ng panukalang Bayanihan 3, sa pagbabalik sesyon ng Kapulungan sa ika-17 ng Mayo.

Ayon sa kanya, sa kanilang pagbabalik sa ika-17 ng Mayo, mamadaliin daw nila ang pag-apruba ng Bayanihan 3.

Ang naturang pahayag ni Velasco ay kanyang ipinalabas matapos na aprubahan sa tatlong Komite sa Kapulungan habang naka recess, ang substitute bill sa ilang panukala sa Bayanihan 3.

Kailangan na lamang ng pag-apruba sa substitute bill ng Committee on Appropriations, bago ito iulat sa plenaryo para naman sa pagpasa nito sa ikalawa at ikatlong pagbasa.

Inaprubahan kamakailan lamang ng mga Committees on Economic Affairs, Social Services, at Ways and Means ang Bayanihan 3, ng halagang P405.6-bilyong pondo, na kinabibilangan ng dalawang yugto ng ayudang pinansyal na nagkakahalaga ng P1,000 bawat Pilipino.

Ang ayudang pinansyal na nagkakahalaga ng P216-bilyon ay ipamamahagi sa 108 milyong Pilipino anuman ang kanilang estado sa lipunan.

-MGA PROBISYON SA PONDO PARA SA SUBSTITUTE BILL NG BAYANIHAN 3, APRUBADO NA SA KAMARA

Inaprubahan nang walang amyenda kahapon sa isang online hearing ng Committee on Ways and Means na pinamunuan ni Albay Rep. Joey Salceda, ang mga probisyon sa pondo na isinisaad sa Seksyon 34 at 35 ng substitute bill, sa panukalang “Bayanihan 3.”

Ayon sa Seksyon 34 ng “Bayanihan 3” substitute bill, itinatalaga ang Bangko Sentral ng Pilipinas (BSP) bilang awtorisadong ahensya na maaaring magdagdag ng direktang provisional advances, na mayroon o walang interes para sa nasyunal na pamahalaan.

Gugugulin ang mga direktang advances na ito sa mga gastusin ng pamahalaan alinsunod sa batas, upang tugunan ang kalagayan ng COVID-19 sa bansa. 

Samantala, ang Seksyon 35 naman ay magmamandato sa ilang government-owned and -controlled corporations (GOCCs), na inirekomenda ng Joint Executive-Legislative Bayanihan Council, na dagdagan ang pagpapadala ng mga dibidendo upang makatulong na mapondohan ang naturang panukala.

Karamihan sa panggagalingan ng pondo para sa “Bayanihan 3” ay magmumula sa umiiral na unutilized appropriations, unreleased balances at mga dibidendo mula sa GOCCs, kabilang na ang mga labis na nakolektang buwis mula sa tax at non-tax sources.

-PINAPURIHAN NG ISANG SOLON ANG MEDIA BILANG TAGAPAGBANTAY NG KATOTOHANAN

Pinapurihan ni ACT-CIS Partylist Representative Rowena Niña Taduran ang media sa matapang nitong pagbibigay ng impormasyon sa publiko sa gitna ng pandemya ngayong nagdiriwang ang mundo ng Press Freedom Day.

Ayon kay Taduran, hindi tumigil ang mga mamamahayag sa pagkalap ng istorya at paghahayag nito sa iba’t ibang plataporma kahit na mapanganib ang kanilang kinakaharap dahil sa impeksyon ng Covid-19. 

Sinabi ni Taduran na ang ilang mamamahayag ay naharap pa sa dagdag na hamon ng bawas sa sweldo, mahabang oras ng trabaho at kawalan ng benepisyong makakaprotekta sa kalusugan, subalit nagpapatuloy pa rin sila sa pagsisilbi sa publiko. 

Ipinaalala ng mambabatas sa lahat ng mamamahayag na patuloy na maging responsable sa pag-uulat ng totoo at makatarungan.