-MGA PANUKALA HINGGIL SA RIGHT TO INFORMATION, HINASA SA TWG

Ipinagpatuloy ang deliberasyon hinggil sa ibat ibang panukala na naglalayong palakasin ang Freedom of Information (FOI) ng bansa.

Ang online na pagpupulong ng Committee on Public Information sa Kamara, sa pangunguna ni KABAYAN Rep. Ron Salo kahapon ay idinaos para balangkasin ang mga panukalang may layuning palakasin ang karapatan ng mga mamamayan sa impormasyon, pagsisiwalat ng buo sa publiko, katapatan sa serbisyo at sa mga bagay na may kinalaman sa publiko, ang patakaran ng estado ng buong pagsisiwalat ng lahat na mga transaksyon na kinasasangkutan ng interes ng publiko, na ginagarantiya ng Konstitusyon.

Sa kanyang pambungad na pahayag, sinabi ni Salo na inaasahan nila na maisasaayos nila ang ilan sa ating mga alalahanin, at makagawa sila ng isang mungkahing tunay na tutugon sa mga hinahangad ng ating mga mamamayan.

Pinagdebatehan ng Komite ang inilatag na substitute bill, upang matiyak na lahat ng mga komento at mungkahi ng mga kinauukulang ahensya at iba pang nagsusulong, ay mapapakinggan at maikokonsidera bago magkaroon ng pinal na bersyon.

Kapag naisabatas ang panukala, itatatag ang Freedom of Information Commission upang ipatupad ang mga isinasaad sa probisyon.

-PAGKAKAMALI SA MGA LEARNING MATERIALS AT MODULES NG DEPED, PATULOY NA SINIYASAT SA KAMARA

Ipinagpatuloy ng Committee on Public Accounts sa Kamara, na pinamunuan ni PROBINSYANO AKO Rep. Jose Singson Jr., ang pagsisiyasat sa mga natuklasan sa pag-audit ng Commission on Audit (COA), sa iba`t ibang mga pagkakamali na nakita sa mga learning materials at modules ng Departmen of Education.

Ang pagsisiyasat ay batay sa House Resolution 1670, na naglalayong ireporma, rebisahin ang mga polisiya, at suriin ang kakayanan ng DepEd.

Sinabi ni Singson, may akda ng resolusyon na magbibigay ang komite ng kanilang mga rekomendasyon sa mga kinauukulang ahensya at magbabalangkas ng mga naaangkop na batas, upang matugunan ang mga usapin na nagsisilbing balakid sa edukasyon ng mga Pilipinong mag-aaral sa gitna ng pandemya.

Ayon sa kanya, hindi umano sila nagsiyasat para maghanap ng kapintasan o sisihin ang sinuman kundi isinasagawa daw nila ang pagdinig upang malaman kung paano nila mapapagbuti ang sistema ng ating edukasyon sa pangkalahatan.

Binigyang diin naman ng mga miyembro ng komite na dapat pagbutihin ng DepEd ang paggamit ng mga pondo ng gobyerno.

-ECONOMIC RECOVERY ANG MAGIGING CONCERN SA 2022 ELECTIONS — CAYETANO

Umaasa si dating Speaker Alan Peter Cayetano na ang magiging mainit na usapin sa paparating na halalan ang economic recovery ng bansa.

Sinabi ni Cayetano na titingnan ng mga botante ang panukala ng bawat kandidato pagdating sa economic recovery at para sa pagpapatibay ng sistemang pangkalusugan.

Ayon sa kanya, ang single largest factor sa 2022 ay yung mga solusyon sa mga problema na dinala ng COVID-19.

Idinagadag pa niya na nakikita umano niya na may plano sa medical side: sa pagbakuna, sa pag contact tracing, sa isolation, sa pagpapalaki ng kapasidad ng mga ospital, ngunit doon sa economic side, kung ano daw yung galing natin before COVID-19, sana ganun din ngayon, kasi kumpara sa ibang mga bansa, naiiwanan na tayo sa economic stimulus.

Dahil dito, ipinanukala ni Cayetano na magkaisa ang mga nagbabalak tumakbo sa pagkapangulo sa paparating na halalan at makipag-ugnayan sa mga eksperto sa pagbuo ng isang five-year COVID-19 economic recovery plan.

-PAGPAPALAWIG SA NATIONAL FEEDING PROGRAM, INAPRUBAHAN NG KOMITE

Inaprubahan ng Committee on Basic Education and Culture sa Kamara kahapon, na pinamunuan ni Pasig City Rep. Roman Romulo, ang substitute bill sa House Bill 5970, ang panukala na may layuning palawigin ang Pambansang Programa sa Pagpapakain o National Feeding Program sa mga batang kulang sa nutrisyon sa mga paaralang sekondarya.

Aamyendahan nito ang Republic Act 11037 o ang Masustansyang Pagkain Para Sa Batang Pilipino Act.

Iniakda ni Marikina City Rep. Stella Luz Quimbo, ang panukala na nagmumungkahi ng mga amyenda, kabilang ang pagtitiyak na kasama ang mga magulang sa programa ng nutrisyon bilang bahagi ng kampanya sa edukasyon ay aprubado na sa komite.

Iminungkahi din niya ang posibilidad ng pakikilahok ng pribadong sektor sa pamamahagi ng pagkain, partikular na ang mga proyektong pangkabuhayan.

Napagkasunduan sa pagdinig na ang halagang ilalaan sa bawat pagkain ay P27.00, upang matiyak na ang mga batang mag-aaral ay makakatanggap ng sapat na nutrisyon at karagdagang 10 porsyentong allowance para sa pangangasiwa ng programa.

-MGA PRESIDENTIABLES, DAPAT MAGKIISA SA PAGGAWA NG FIVE YEAR ECONOMIC PLAN — CAYETANO

Hinikayat ni dating House Speaker Alan Peter Cayetano ang mga presidentable sa susunod na taon na makiisa sa paggawa ng five-year economic plan ng bansa.

Sinabi ni Cayetano na sa five-year plan, inaalok niya ang lahat ng mga presidentiable, [at] lahat ng eksperto sa tourism, sa finance, sa transportation, [at] sa agriculture to join us in forming a five-year plan.

Ayon sa kanya, tinitingnan nila ang posibilidad na isang “neutral” at non-partisan na opisyal o lider sa gobyerno ang mamuno para sa pagbuo ng nasabing post-pandemic plan.

Dahil dito, umaasa ang dating Speaker ng Kamara na maka-hikayat sila ng isang retired Supreme Court Justice o isang ekonomista na kilalang academician o kaya si Secretary Karl Chua ng NEDA mismo, isang non-partisan at matalinong-tao, kasama niyang palagi ang economic team ng pamahalaan ever since.

-UTANG NG GOBYERNO SA MGA SERVICE CONTRACTORS, DAPAT BAYARAN — SALCEDA

Inu-obliga ni House Committee on Ways and Means chairperson at Albay Rep. Joey Salceda ang Department of Transportation (DOTr) at Land Transportation Franchising and Regulatory Board (LTFRB) na bayaran ang utang nito sa mga service contractors na nagbibigay ng libreng sakay sa publiko.

Sinabi ni Salceda na umaabot sa P4.6 bilyon ang utang na dapat bayaran sa mga bus at jeepney operator na kasali sa transport service contracting program ng gobyerno.

Ang programa ay nasa ilalim ng Bayanihan to Recover as One Act (Bayanihan 2), na mage-expire sa Hunyo 30.

Sa isang briefing noong Hunyo 17, sinabi ng LTFRB na P1 bilyon pa lamang sa P5.5 bilyong pondo na nakalaan sa programa ang naibayad na sa mga service contractor.

(Iginiit din ni Salceda ang pagkakaroon ng ligtas at maaasahang masasakyan nang hindi nalalabag ang mga COVID-19 health protocols.)

Dahi dito, nagbabala rin si Salceda sa inaasahang komplikasyon na magreresulta kapag nag-expire na ang Bayanihan 2.

-MGA PROBLEMA SA PAGPAPATUPAD NG SERVICE CONTRACTING PROGRAM SA SEKTOR NG TRANSPORTASYON, TINALAKAY SA KAMARA

Tinalakay kahapon ng Committee on Transportation sa Kamara, na pinamunuan ni Samar Rep. Edgar Mary Sarmiento, ang kalagayan ng ipinatutupad na Service Contracting Program, na naglalayong mapagaan ang masamang epekto ng pandemya ng COVID-19 sa sektor ng transportasyon sa bansa.

Ang programa ay inilunsad ng Department of Transportation (DOTr) at Land Transportation Franchising and Regulatory Board (LTFRB), na kung saan ang mga public utility vehicles (PUVs) ay binabayaran ng pamahalaan, batay sa mga kilometraheng binibiyahe nito upang matiyak ang kita ng mga nasa sektor sa panahon ng pandemya.

Ito ay may kabuuang pondo na P8.58-bilyon na nagmula sa subsidiya ng P5.580-bilyon Bayanihan 2 o ang ‘Bayanihan to Recover as One Act’ at P3-bilyon mula sa 2021 General Appropriations Act (GAA). 

(Ang planong pagpapatupad sa Service Contracting Program ay una nang nakatuon sa Kalakhang Maynila, Cebu at Davao.)

Ayon kay LTFRB Chairman Martin Delgra III, nagpasya ang technical working group ng ahensya na ipatupad ang programa sa buong bansa dahil sa slow-on boarding ng mga tsuper sa programa, kasama na ang pagpapabilis ng implementasyon at paggamit ng pondo.

Idinagdag pa ni Delgra na noong kanilang nirebisa ang implementasyon ng programa upang masakop ang lahat ng rehiyon sa buong bansa, ang kanilang tinutukan daw ay hindi ang realokasyon ng pondo, kungdi ang alokasyon sa dami ng tsuper sa bawat rehiyon.

-CAYETANO: KALAMPAGIN ANG GOBYERNO PARA SA 10K AYUDA

Hinikayat ni dating House Speaker Alan Peter Cayetano ang mga benepisyaryo at mga tagasuporta ng Sampung Libong Pag-asa na patuloy na manawagan sa gobyerno na mamahagi ng P10,000 ayuda sa bawat pamilya.

Sinabi ni Cayetano na ang gobyerno ay kailangan kalampagin, kasi kanya-kanyang pananaw ‘yan. Ngunit mapapatunayan daw nila na may pera at kaya itong ibigay.

Ani Cayetano, tulungan niyo rin kami, pero kami matigas ulo namin. Kapag tingin namin tama kami ay tuloy-tuloy ito. Kaya lang, para lahat mabigyan, kailangan gobyerno talaga ang mangunguna.

Nagpunta sina Cayetano at mga kaalyado niya sa probinsya ng Batangas para sa programang Sampung Libong Pag-asa, kung saan namahagi sila ng P10,000 ayuda bawat isa sa 625 benepisyaryo mula sa Batangas at iba’t ibang bahagi ng bansa.

Dahil dito ay umabot na sa 3,096 na ang bilang ng benepisyaryo ng Sampung Libong Pag-asa mula nang inilunsad ito noong Mayo.

-KAHANDAAN NG COMELEC SA DARATING NA 2022 HALALAN, SINURI NG KAMARA

Bilang bahagi ng pagsisikap na makapagbahagi sa isang matapat, maayos at ligtas na pagdaraos ng lokal at pambansang halalan sa ika-9 ng Mayo 2022, sa gitna ng pandemya ng Covid-19, pinagtibay kahapon ng Committee on Suffrage and Electoral Reforms sa Kamara, na pinamunuan ni Negros Occidental Rep. Juliet Ferrer, ang dalawang resolusyon na humihimok sa Commission on Elections, na isaayos ang lahat ng kinakailangang pag-iingat sa kalusugan at mga paghahanda para sa nakatakdang halalan.

Ang dalawang resolusyon, HR 1583 ni Batangas Rep. Mario Vittorio Mariño at HR 1796 ng Minority bloc na pinangunahan ni Minority Leader Joseph Caraps Paduano, ay nanawagan para suriin ang mga posibleng panganib at pag-aaral ng mga hakbang sa kaligtasan para sa kalusugan, mga pamamaraan, at mga protocol na ipatutupad, bilang paghahanda sa 2022 na pampanguluhan, pambansa, at lokal na halalan; at ang resolusyong humihimok sa COMELEC na magtatag ng mga karagdagang satellite registration centers upang pagbigyan ang mas maraming nasasakupan na nais magparehistro bilang botante.

Hiniling ng mga mambabatas na isumite ng Comelec sa Komite ang kanilang Consolidated Plan para sa 2022 elections bago nila ito aprubahan.

-MGA PANUKALANG MAGBIBIGAY NG SUPORTANG PINANSYAL SA MGA MAY KAPANSANAN, APRUBADO NA SA KAMARA

Inaprubahan kahapon ng Special Committee on Persons with Disabilities sa Kamara, na pinamunuan ni Negros Occidental Rep. Ma. Lourdes Arroyo, ang House Bill 7180, na naglalaan para sa taunang P750 na emergency grant sa mga taong may kapansanan sa panahon ng krisis dulot ng COVID-19.

Kinilala ni Arroyo, tagapagtaguyod ng panukala, ang mga hadlang na nararanasan ng kanyang mga kapwa PWD o persons with disabilities, na lalong pinalala ng pandemya.

Inaprubahan din ng Komite ang HB 9243, na magbibigay ng karagdagang benepisyo sa mga PWD. 

Aamyendahan nito ang Republic Act 7277 o ang Magna Carta for Disabled Persons.

Kapag ito ay naisabatas, ang mga PWD ay bibigyan ng P500 na buwanang sahod upang madagdagan ang kanilang pangtustos sa gastusin sa pang-araw-araw at matugunan ang kanilang mga medikal na pangangailangan.

-PHILHEALTH, DAPAT ISAILALIM SA ISANG REGULATORY PANEL

Iminungkahi ni Manila Teachers Partylist Rep. Virgilio Lacson at ilan sa kanyang mga kasamahang miyembro ng Special Committee on North Luzon Growth Quadrangle na isailalim sa isang regulatory panel ang Philippine Health Insurance Corporation o Philhealth.

Sinabi ni Lopez na kailangan nang magkaroon ng regulatory body na aakto bilang referee o mediator na tututok sa mga ginagawa ng Philhealth para matiyak na mababayaran ang mga hindi pa nababayaran nitong claims o utang sa mga ospital at pasilidad.

Kinatigan naman ito ni Chairman at Pangasinan Rep. Ramon Guico sa pagsabi na sa ngayon ay walang regulatory body na nagmomonitor sa mga government owned and controlled corporations o GOCCs gaya ng Philhealth.

Ani Guico, ang Philhealth na nga ang ahensya, ito pa ang lumalabas na regulatory body at implementor at taga-desisyon.

Bilang tugon, sinabi ni Philhealth Pres. Dante Gierran na bukas naman sila na makipag-tulungan sa third-party regulatory body para mabusisi ang kanilang mga record.

-KWARANTINA PARA SA MGA NABAKUNAHANG MAGBABALIK-BAYANG PINOY, DI NA KAILANGAN

Ipinanawagan ni ACT-CIS Partylist Rep. Niña Taduran sa pamahalaan na tanggalin na ang kwarantina sa mga nagba-balikbayang Pinoy na bakunado na. 

Ito ay kaugnay sa ipinatutupad na pitong araw na quarantine sa inaprubahang pasilidad para sa mga balikbayan na nakatapos na ng kanilang bakuna. 

Sinabi ni Taduran na pabigat lang ito sa balikbayan lalo na at mababa na ang panganib na makakuha ang mga ito ng virus o maikalat ito matapos na makuha ang full dose ng bakuna laban sa Covid-19. 

Ayon sa kanya, karamihan sa mga balikbayan ay limitado lamang ang oras ng kanilang pananatili dito at talagang cash-strapped na sila at nais lamang nilang makasama ang kanilang mga pamilya ng ilang sandali.

-HULING KAGANAPAN SA MINDANAO HINGGIL SA COVID-19, TINALAKAY SA KAMARA

Nakipagpulong kahapon si Lanao del Norte Rep. Mohamad Khalid Dimaporo, Chairman ng House Committee on Muslim Affairs, sa mga opisyales ng iba’t ibang mga ahensya sa pamalaan upang talakayin ang mga huling kaganapan hinggil sa COVID-19, estado ng programa sa pagbabakuna, at ang kalagayan ng National Action Plan sa Mindanao.

Binanggit ni Dimaporo na nagtakda ng pagdinig ang Komite dahil sa tumataas na bilang ng mga kaso ng COVID-19 sa Mindanao.

Sa pagdinig, iniulat ni Alethea de Guzman, Director ng Department of Health Epidemiology Bureau, na huminto ang pagbaba ng kaso ng COVID-19 at ang iba pang mga lugar sa Luzon at Mindanao ay hindi rin bumababa matapos itong tumaas muli.

Ayon sa kanya, habang patuloy na tumataas ang mga kaso sa Visayas at Mindanao, dapat nang dagdagan ang kapasidad ng health care ng pamahalaan, lalo na ang kapasidad natin sa critical health.

Dahil dito, nanawagan si Deputy Speaker Rufus Rodriguez sa mga ahensya na dagdagan ang suplay ng bakuna sa Mindanao, dahil mas marami ngayong kaso ang naiuulat sa lugar kumpara sa NCR.

-AGARANG PAGPASA NG PANUKALANG OFW DEPARTMENT, MULING IPINANAWAG

Muling nanawagan si dating House Speaker Alan Peter Cayetano sa 18th Congress na aprubahan na ang panukalang batas na bubuo sa Department of Migrant Workers and Overseas Filipino (DMWOF).

Ayon kay Cayetano, panahon na para ipagkaloob ito sa Overseas Filipino Workers (OFWs) na binabansagan pa man din ng gobyerno bilang "bagong bayani" ng bansa.

Si Cayetano ay isa sa mga pangunahing may-akda ng panukalang Department of Filipinos Overseas (DFO) Act na naglalayong bumuo ng isang departamento para lamang sa OFWs.

Naaprubahan ito noong Marso 2020 sa ilalim ng pamumuno ni Cayetano bilang Speaker, habang ang katumbas na panukalang batas naman nito sa Senado ay nakabinbin pa rin.

-PAGDINIG SA IREGULARIDAD SA FREE WI-FI INTERNET ACCESS PROJECT, TINAPOS NA NG KOMITE SA KAMARA

Tinapos na kahapon ng Committee on Good Government and Public Acountability sa Kamara de Representantes na pinamunuan ni DIWA Rep. Michael Edgar Aglipay ang deliberasyon sa House Resolution 1751 na nananawagan ng imbestigasyon sa umano’y iregularidad at kabiguan ng proyektong Free Wi-Fi Internet Access in Public Places na ipinatutupad ng Department of Information and Communications Technology (DICT) na labis na nakasira at nakaapekto sa paghahatid ng serbisyo sa mamamayang Pilipino.

Sa pagtatapos ng diskusyon, sinabi ni Aglipay na mabusising tinalakay ng Komite ang mga usapin na isiniwalat sa resolusyon.

Ayon kay Aglipay, narinig nila ang mga paliwanag at tugon ng mga tagapagsalita at ang mga paglilinaw mula sa mga miyembro ng komite.

Ani Aglipay, tinandaan din nila ang mga komento at mga manipestasyon na inilatag sa tatlong pagdinig na idinaos sa paksa ng mga katanungan.

Ayon sa kanya, nakalap ng Komite ang mga mahahalaga at may kaugnayang materyales at mga dokumento na gagamitin sa preparasyon ng Committee Report.

-PANGKALAHATANG TAGUMPAY NG KAMARA SA PAG-ADJOURN NITO NG 2ND REGULAR SESSION

Nag-adjourn noong a-dos ng Hunyo 2021 ang Ikalawang Regular na Sesyon ng Ika-18 Kongreso ng Kamara de Representantes na pinamumunuan ni Speaker Lord Allan Velasco, hatid ang pangkalahatang tagumpay dahil sa mga ipinasang mga mahahalagang panukala na mag-aahon sa sambayanang Pilipino sa kahirapan mula sa pananalasang idinulot ng pandemya ng COVID-19.

Muling babalik ang mga mambabatas sa Batasang Pambansa sa ika-26 ng Hulyo sa pagbubukas ng Ikatlong Regular na Sesyon at sa pang-huling State of the Nation Address ni Pangulong Rodrigo Roa Duterte.

Sa kanyang mensahe, nagpahayag si Velasco ng pag-asa na ang mga reporma at panukalang isinulong at isinabatas ng 18th Congress ay lubos na nakapaghatid ng seguridad lalo na sa kalusugan at kapakanan ng samabayan at sa pagpapabilis ng pag-ahon ng bansa mula sa lugmok na ekonomiya.

Ani ni Velasco, sa kapakanan ng sambayanan na parating nasa sa kanilang isipan hindi naging balakid ang kasalukuyang krisis pangkalusugan upang gampanan nila ang kanilang mga tungkulin.

-IILANG MGA PANUKALANG BATAS, PASADO NA SA IKALAWANG PAGBASA SA KAMARA BAGO ANG SINE DIE ADJOURNMENT NITO

Maraming mga panukala ang ipinasa ng Kamara de Representantes, sa pamumuno ni Speaker Lord Allan Velasco, sa ikalawang pagbasa bago idineklara ang sine die adjournment nito noong nakaraang linggo.

Isa sa mga to ay ang HB09538 na naglalayong palawigin pa ang pagpapalabas, obligasyon at pamamahagi ng pondo sa Republic Act 11494 o “Bayanihan to Recover as One Act” o “Bayanihan 2” hanggang sa katapusan ng taong 2021.

Aamyendahan ng panukala ang RA 11519, na nagpalawig sa hangganan ng bisa ng Bayanihan 2 Act hanggang Hunyo 2021.

Samantala, ang HB09559 naman ay inaprubahan din sa ikalawang pagbasa, na naglalayong itatag ang Virilogy Institute of the Philippines (VIP).

Ilan sa iba pang mga panukala na aprubado na rin sa second reading ay ang HB09560, o “Philippine Center for Disease Prevention and Control (CDC) Act; HB09171 o “Plastic Bags Tax Act,”; HB09556 o “New Development Bank of the Philippines (DBP) Act,”; HB09147 o “Single-use Plastic Products Regulation Act,” na inamyendahan; HB09216 o “Philippine Physical Therapy Law,” atHB07407 o “Institutionalizing the Participation of Civil Organizations in the Annual National Budget Process.

#SpeakerLordAllanVelasco

#SpeakerLAV

-PAGTATAAS NG SOCIAL PENSION SA MGA SENIOR CITIZEN, LUSOT NA SA KAMARA

Aprubado na sa ikalawang pagbasa sa Kamara de Reprentantes ang panukalang batas na magtataas sa “social pension” ng mga senior citizens sa bansa lalo na ang mga mahihirap.

Ang ipinasang HB09459 ay may layuning amyendahan ang Republic Act 9994 o Expanded Senior Citizens Act of 2010.

Sinabi ni Senior Citizens patrylist Rep. Rodolfo Ordanes, napapanahon ang naturang panukala lalo’t maraming nakatatanda ang apektado ng COVID-19 pandemic at nangangailangan ng dagdag na tulong.

Sa ilalim ng panukala, dodoblehin ang kasalukuyang P500 na buwanang nakukuha ng mga senior citizens.

Ang mga benepisyaryong nakatatanda ay pagkakalooban ng P1,000 na buwanang pinansyal na ayuda upang maipambili ng kanilang pangangailangan gaya ng mga pagkain o gamot at iba pang medical needs.

-PHILHEALTH, UOBLIGAHIN NG KAMARA NA BAYARAN ANG MGA PAGKAKAUTANG SA MGA OSPITAL SA NORTH LUZON QUADRANGLE

Nagkaisa sina Nueva Vizcaya Rep. Luisa Lloren Cuaresma at ang Special Committee on North Luzon Quadrangle sa Kamara de Representantes na pinamunuan ni Pangasinan Rep. Ramon Guico III na maghain ng resolusyon na nag-uutos sa Philippine Health Insurance Corporation o PhilHealth na agad na bayaran ang kanilang mga obligasyon sa mga hindi pa nababayarang claims ng lahat ng mga pampubliko at pribadong ospital sa Regions 1, 2 at Cordillera Administrative Region.

Sa idinaos na pagdinig ng Komite hinggil sa bayad ng PhilHealth sa mga sinisingil ng mga ospital sa mga rehiyon ng Hilagang Luzon, siniyasat ni Isabela Rep. Antonio Albano ang pagkakaiba-iba sa pagitan ng ulat ng PhilHealth sa aktuwal na talaan ng nakabinbing claims na isinumite sa kanya ng mga district hospital.

Isiniwalat din ng mga mambabatas ng North Luzon Quadrangle na mayroon pa ring mga hindi nababayaran ang PhilHealth noong mga nakaraang taon.

Muling magdaraos ng pagdinig ang Komite sa susunod na linggo para sa estado ng mga PhilHealth claims.

-LUSOT NA SA KAMARA ANG MGA PANUKALANG MAGTATATAG NG INSTITUSYONG MAKATUTULONG SA PAGLABAN AT PAGKALAT NG MGA SAKIT

Dapat mahadlangan ang pagkalat ng mga sakit sanhi ng mga virus na posibleng umusbong sa bansa.

Dahil dito, ipinasa ng Kamara ang panukalang magtatatag ng Virology Institute of the Philippines (VIP) sa ilalim ng HB09559 at ang HB09560 na magtatatag naman ng sariling Center for Disease Control and Prevention (CDCP), mga institusyong makakatulong sa paglaban at pagkalat ng mga sakit sa bansa.

 

Sa sponsorship nila Committee on Health Chairperson Angelina Helen Tan at Zambales Rep. Cheryl Deloso-Montalla, tinukoy ng mga ito ang pagkakaroon ng bansa ng sariling virology institute at ng disease control center upang mapag-aralan ang detection at limitasyon sa pagkalat ng virus gayundin ang makalikha ng bakuna bilang long-term protection at gamot.

Magsisilbing premier research at development institute sa field of virology na sakop lahat ng uri ng virus at viral diseases na matatagpuan sa mga tao, halaman at mga hayop.

Samantalang ang CDCP naman ang magsisilbing hiwalay na ahensya na nasa ilalim ng kontrol ng Department of Health (DOH) na sesentro sa pagpigil ng mga kumakalat na communicable o infectious disease o iyong mga rapid o sudden onset health hazards and emerging diseases tulad ng novel corona virus.

-ECONOMIC CHA-CHA, APRUBADO SA THIRD AND FINAL SA KAMARA

Tiniyak kahapon ng Kamara de Representantes na matatapos ang kanilang trabaho bago ang sine die adjournment ngayong linggo.

Pasado na sa ikatlo at huling pagbasa ang Resolution of Both Houses No. 2, na nagmumungkahi ng amyenda sa ilang probisyong pang-ekonomiya ng 1987 Konstitusyon ng Pilipinas, lalo na ang mga Articles XII, XIV at XVI.

Pangunahing iniakda ni Speaker Lord Allan Velasco, layon ng RBH 2 na alisin ang mga mahihigpit na probisyong pang-ekonomiya sa Konstitusyon, upang mahikayat ang mas maraming direktang dayuhang negosyo at puhunan sa bansa.

Sa mga idinaos na debate sa plenaryo, binigyang-diin ni AKO BICOL Rep. Alfredo Garbin Jr., Chairman ng Committee on Constitutional Amendments at ang nag-isponsor ng panukala sa plenaryo, ang rekisitos sa Konstitusyon na kailangang ratipikahan ng sambayanang Pilipino ang mga iminungkahing amyenda sa isang plebisito bago ito ipatupad.

Ang bola ng pagpasa sa naturang panukala ay nasa Senado ng Pilipinas na.

-BIKE LANES SA IBA’T IBANG LUGAR SA BANSA, TINATAPOS NA — DOTr

Tinatapos na ang konstruksyon ng mga protected bike lanes sa iba’t ibang lugar sa bansa ng Department of Transportation o DOTr, isa sa mga proyekto sa ilalim ng Bayanihan 2.

Ito ang paniniyak sa pahayag ng DOTr sa pagdinig ng House Committee on Transportation sa pamumuno ni Rep. Edgar Mary Sarmiento, matapos hiningan ito ng update hinggil sa bike lane networks project, na pinaiimbestigahan sa Kamara dahil sa matagal na paggawa nito.

Sinabi ni Transportation Asec. Steve Pastor, nasa 540 kilometers ang proyekto na hinati sa National Capital Region o NCR, Metro Cebu at Metro Davao. At sa pinaka-huling update noong May 27, nasa 65.13% na ang overall accomplishment dito.

Sa NCR, ani Pastor, aabot sa 340 kilometers ang bike lane project na target na matapos sa katapusan ng buwan ng Hunyo.

Ang bike lane project naman sa Cebu ay halos 138 kilometers, habang halos 60 kilometers sa Davao na kapwa inaasahang matatapos sa June 15, ayon kay Pastor.

Sinabi ng opisyal na nasa higit P1 billion ang pondo para sa bike lane networks project, sa ilalim ng Bayanihan 2.

-PAUNANG AD HOC COMMITTEE MEETING PARA SA MUP PENSION SYSTEM, IDINAOS; PANUKALANG “SAVING MUP PENSION” TINALAKAY

Sa idinaos na pagpupulong para sa pag-oorganisa kahapon, pinagtibay ng Ad Hoc Committee on Military and Uniformed Personnel (MUP) Pension System, na pinamunuan ni Albay Rep. Joey Sarte Salceda, ang Rules of Procedure.

Matapos nito ay nagdaos ng isang briefing ang Komite hinggil sa House Bill 9271, na iniakda ni Salceda mismo na naglalayong buuin ang isang nagsusustining taunang balangkas para sa separation, pagreretiro, at mga benepisyo sa pensyon ng mga military and uniformed personnel (MUP).

Tinakalay ni Salceda ang teknikal, ekonomiya, at pagsusuri sa pondo ng panukala sa iprinisintang Implications of the MUP Pension Fiscal Reform.

Sumang-ayon ang Komite na aprubahan ang pangunang inilatag na substitute bill, na naglalaman ng mga usapin na pinagkasunduan, na may pagsang-ayon din nina Defense Secretary Delfin Lorenzana, Finance Assistant Secretary Maria Teresa Habitan at National Treasurer Rosalia de Leon.

Ang panukala ay naglalaman ng mga probisyon sa taunang pamamahala ng pensyon at mga sistema sa benepisyo ng MUP; sapilitan at boluntaryong pagreretiro ng mga MUP; mga benepisyo ng survivorship, benepisyo sa mga biktima ng pakikipaglaban, kabilang na ang pamamahala ng MUP Trust Fund.