Proteksiyon sa mga nurse na nasa training pa, ipinanukala

Iminungkahi ngayon sa Kamara de Representatantes ang pagbibigay ng proteksiyon sa mga nurse laban sa mga mapagsamantalang pribado at pampublikong mga ospital na tumatanggap ng on-the-job trainees at volunteer nurses samantalang sumisingil sila ng napakataas na bayad para dito.

Ang HB05641 na tatawaging Prohibiting Exploitative Volunteerism of Nurses” ay iniakda nina Gabriela Rep Emmi de Jesus, Bayan Muna Reps Teddy Casino at Neri Colmenares, Anakpawis Rep Rafael Mariano, ACT Teacher Rep Antonio Tino at Kabataan Rep Raymond Palatino.

Sinabi ni De Jesus na kumikita umano ng malaking salapi ang pribado at pampublikong mga ospital sa napakataas na bayad na sinisingil sa mga nurses at nakakatipid sila dito dahil hindi sila kumukuha ng mga registered.

Ayon kay De Jesus, dahil dito, nalilito daw ang mahigit 297,809 mga nurse na nag-aakalang mabigyan sila ng mahusay na pagsasanay sa mga ospital upang magamit nila para sa local at foreign employment.

Idinagdag pa ni De Jesus na ang mga registered nurse, lalo na ang mga nagsanay para sa Registered Nurse for Health Enhancement and Local Service Program ng Department of Health o sa iba pang kahalintulad na programa ng gobyerno, ay napipilitang magtrabaho bilang regular staff nurse sa public health centers ng isang taon at tumatanggap lamang ng allowance na P8,000 buwan-buwan.

Ang ilang daw sa kanila ay tumatanggap ng additional allowance na P2,000 mula sa local government units.

Aprubado na sa Kamara ang National Folic Acid Education Program

Pumasa na sa Kamara sa ikatlo at huling pagbasa ang HB00592 na naglalayong maitaguyod ang kampanya para sa national folic acid education upang maitaas ang antas ng kaalaman ng mga babaeng buntis sa kahalagahan ng folic acid para maiwasan ang depekto habang sila ay nagdadalang-tao.

Sinabi ni Cagayan de Oro Rep Rufus Rodrigurez na kabilang sa kampanya ng pamahalaan ang mahikayat ang mga babaeng buntis na uminom ng folic acid araw-araw, isang Vitamin B na matatagpuan sa mga gulay, beans, citrus, mga prutas at juices.

Ayon sa kanya, ang folic acid ay mabisang pang-alis ng natural tube defects sa lahat ng buntis kung iinom sila ng 400 micrograms araw-araw, o kahit na bago magbuntis.

Habang nagbubuntis ang isang babae, maiiwasan din umano nito na magkaroon ng cleft lip, cleft palate ang sanggol sa kanyang sinapupunan.

Idinagdag pa ni Rodriguez na libu-libong sanggol daw kada taon ang isinisilang na may depekto sa utak at spine na ang tawag ay neutral tube defects.

Ito ang tinatawag na spin bifida, ang pagsasara ng spinal column at anencephaly, isang nakamamatay na kung saan ang sanggol na isinilang ay may diperensya sa utak at bungo.

Inaataan sa panukala ang Department of Health para itaguyod ang programang ito at ipaalam sa publiko ang kahusayan ng folic acid sa pagbubuntis.

---

Internally displaced persons, protektado na

Pumasa na sa ikatlo at pinal na pagbasa sa Kamara ang HB05627 na may layuning magbibigay ng proteksyon sa anumang kaso hinggil sa lupa kagaya ng conversion, pagsira sa kalikasan, sapilitang pagpapatupad ng mga proyekto at iba pang sakuna na gawa ng tao at ito ay tatawaging Internally Displacement Act of 2011 na iniakda ni Cagayan de Oro Rep Rufus Rodriguez.

Ang panukalang batas na ito ang magtataguyod at magpoprotekta sa karapatan ng internally displaced persons (IDPs) o yaong mga indibidwal na napapa-alis sa kanilang kinatitirikang lupa sa sitwasyon ng armadong labanan at karahasan.

Sinabi ni Rodriguez na layunin din ng panukalang ito na bigyan ng tulong pinansyal ang biktima ng internal displacement at tiyakin ang kanilang kaligtasan, pansamantalang tirahan at rehabilitasyon sa kani-kanilang lugar.

Sa ilalim ng panukala, magtatatag ng Joint Congressional Oversight Committee na magkakaroon ng kapangyarihan na magtanong, magpatawag at mag-imbestiga sa Order of Battle na nakasaad sa Batas.

---

Imbestigasyon sa Supreme Court-World Bank loan, kailangang isagawa na

Hiniling ngayon ni Eastern Samar Rep Ben Evardone na imbestigahan ng House Committee on Good Government and Public Accountability ang umano'y maanomalyang paggasta sa $21.9-milyong inutang sa WB o sa World Bank ng SC o Supreme Court.

Sinabi ni Evardone na ayon umano sa World Bank, mayroon daw itong natuklasang kuwestiyunableng pinagkagastuhan ang Kataasataasang Hukuman gamit ang inutang na pondo sa WB.

Batay sa HR02044 na inihain ni Evardone, sinabi nito na umutang ang Korte Suprema ng $21.9 milyong dolyar o P930.75 milyong piso mula sa WB sa ilalim ng high tribunal’s Judicial Reform Support Project (JRSP) na nakatalagang magsagawa ng mga pagsasaayos at magpanumbalik ng epektibong paggalaw ng hustisya sa bansa.

At batay naman sa aide memoire ng WB, mula umano ng manungkulan si Chief Justice Renato Corona noong kalagitnaan ng taong 2010, naging napakabagal ng progreso ng pagrereporma ng hudikatura at tinawag pa itong "unsatisfactory" na may "implementation delays and additional work required for smooth project closing" ng WB.

Ayon pa kay Evardone, binigyan din ng pagtaya na "high risk" at "unsatisfactory" sa ginawang judiciary review ng WB noong October 24 hanggang November 11, 2011 at ang JRSP sa aspetong project management, procurement, at financial management, dahilan upang ituring na "di-maaasahan" ang project financial statements.

Idinagdag pa ni Evardone na lumabas din sa daw ginawang pag-aaral ng WB ang paggamit ng pondong inutang sa WB para sa mga foreign travels ng mga hukom at ang pagbili ng mga kagamitan para sa information technology equipment na hindi naman kasama sa napagkasunduan nang mangutang ng pondo ang SC sa WB.

Dapat din umanong maliwanagan ang bayan kung bakit hinihingi ng WB na ibalik ang $199,900, na sumasakop sa 70% payments na itinuturing na ineligible o unauthorized sa ilalim ng napakasunduan sa JRSP.

Kabilang sa sinasabing "ineligible" purchases, ayon pa sa kanya, ang umano'y ginasta sa biyahe sa ibang bansa ng mga hukom at ng kani-kanilang mga staff, kasama dito ang airfare, hotel accommodations at meal allowances, speaker’s fee para sa mga ginawang seminar, registration fee ng mga hukom na dumalo sa mga international conferences.

---

VAT holiday para sa mga kagamitan sa eskwelahan, iminungkahi

Ipinanukala nina Buhay partylist Reps Irwin Tieng at Mariano Michael Velarde na iliban sa VAT o sa value added tax ang mga kagamitan sa eskwelahan tuwing weekend sa buwan ng Mayo para hindi mahirapan ang mga magulang sa kanilang paghahanda ng gastusin sa pagbubukas ng klase.

Ayon sa mungkahi nina Tieng at Velarde na nakapaloob sa HB05611, maglalaan ng tax holiday ang pamahalaan na magsisimula 12:01 ng madaling-araw sa unang Biyernes ng Mayo at magtatapos 11:59 ng gabi sa unang Linggo ng Mayo.

Ayon sa kanila, ang VAT-free sa mga kagamitan sa eskwelahan ay malaking tulong para makatipid ang mga taxpayers at makaakit ang retailers ng maraming mga customer.

Ang mga kagamitan na ililiban sa buwis ay mga mula sa binder at krayola hanggang sa mga instructional materials, ready-made school uniforms at accessories, sapatos at school Physical Education at sports kits.

Ang VAT-free weekend ay ipapataw lamang sa mga kagamitan na nabibili sa halagang hindi tataas sa P1,000 bawat isa at ang maximum total amount ng nabili para sa bawat isang resibo ay hindi dapat lumampas ng P10,000.

---

Dapat bayaran din ang car insurance na hindi sakop sa Acts of God

Hiniling ni Cagayan de Oro Rep Rufus Rodriguez sa IC o ang Insurance Commission na atasan nito ang mga insurance company na bayaran ang mga sasakyang napinsala ng bagyong Sendong kahit na hindi ito sakop ng Acts of God para mabilis na makabawi ang mga biktima ng nabainggit na sakuna.

Sa HR02022, sinabi ni Rodriguez na dapat maglabas ng kautusan ang IC para sa mga napinsalang sasakayan kabilang na ang mga namatay at nasirang ari-arian at behikulo sa Cagayan de Oro at Iligan City dulot ng bagyong Sendong.

Ayon kay Rodriguez, lumubog daw sa baha ang 29 barangay sa Cagayan de Oro at bahagi nito ang mga sasakyan ng mga naninirahan doon, bagamat wala namang naiulat kung ilang sasakyan ang lumubog pero malamang na umabot ito sa isandaan.

Inamin ni Rodriguez na hindi lahat ng sasakyang na-apektuhan ay covered ng Acts of God insurance at wala silang karapatan sa bayad-pinsala ng mga insurance company.

---

Edukasyon para sa indigenous people

Nagsagawa na ng mga pagdinig ang House committee on National Cultural Communities upang mailatag ang kabuoang framework sa mungkahing Indigenous Peoples Scholarship Program para maitaguyod ang kalagayan ng mga indigenous people sa pamamagitan ng edukasyon.

Sa pangunguna ni Ifugao Rep Teddy Brawner Baguilat, tinatalakay ng nabanggit na komite ang HB01347 upang maitatag ang nationwide Scholarship Program para sa mga kapatid nating katutubo.

Sinabi naman ni Iloilo Rep Augusto Syjuco na ang kanyang panukala ay magbibigay ng kahulugan at katiyakan para sa affordable, accessible at quality education para sa mga indigenous people.

Ayon sa kanya, ang edukasyon ang isa sa susi para sa mapanatili ang maunlad na ekonomiya at ang mga katutubo ay nangangailangan ng tulong mula sa pamahalaan.

Sinuportahan ni Baguilat ang mungkahi ni Cagayan de Oro Rep Rufus Rodriguez na maglaan ng halagang P200 milyon para sa mga IPSP o Indigenous Peoples Scholarship Program.

---

Pansamantalang suspensiyon ng mga loan at contribution sa GSIS, SSS at Pag-ibig, hiniling

Iminungkahi ni Cagayan de Oro Rep Rufus Rodriguez at Abante Mindanao partylist Rep Maximo Rodriguez, Jr. sa GSIS o Government Service Insurance System, SSS o Social Security System at Pag-IBIG na pansamantala munang isuspendi ang mga bayarin sa loan at kontribusyon ng mga miyembro na grabeng naapektuhan ng bagyong Sendong, partikular na sa Cagayan de Oro at Iligan City.

Ito ang apila ng magkapatid sa Kamara at hiniling nila na pagtibayin ang HR02021 para maibsan at makatulong ito sa mga biktima ng nabanggit na bagyo sa naturang mga siyudad.

Batay sa resolusyon, inaatasan nito ang GSIS, SSS at Pag-IBIG na ipahintulot ang isang taong moratorium sa loan payments at contributions ng mga biktima ni Sendong.

Bagamat nag-isyu si na Pangulong Aquino ng Proclamation No. 303 na nagdideklarang state of national Calamity sa mga nabanggit na lungsod, sinabi nmagkapatid na Rodriguez na hindi umano sapat ang tulong na ito sa malubhang pinsala sa dinanas ng mga biktima.

Bukod sa pagbibigay ng isang taong moratorium sa mga bayarin at kontribusyon, inaatsan din ang GSIS, SSS at Pag-IBIG na madaliin ang pag-apruba sa loan application ng mga biktima.

---

Usaping pagtanggal ng kursong nursing, hati sa Kongreso

Hati ang opinyon ng mga mambabatas sa Kamara sa mungkahi ng Commission on Higher Education (CHED) na dahan-dahang tanggalin ang mga sobrang kurso simula sa school year 2012-2013 para mapigil ang lumalalang unemployment ng libu-libong mga graduate taun-taon.

Sinabi ni Una Ang Pamilya partylist Rep Reena Concepcion Obillo na nakakalungkot umano na ang mga kabataan na mag-enroll sa naturang kurso ay sa bandang huli, magtatrabaho sa ibang bansa na hindi naman sa linya ng nursing ang pagtatrabahuan at nakakasama lamang ng loob dahil sinasamantala ng ilang private school ang paghikayat na mag-enrol ng nursing para lamang lumaki ang kanilang enrollment at kinikita.

Gayunpaman, sinabi ni Obillo na dapat linawin ng CHED kung hanggang kailan tatagal ang moratorium sa oversubscribed courses dahil maaring mahaharap ang bansa sa kakulangan ng mga professional na plano nilang alisin.

Ngunit sa bahagi naman ni Kabataan partylist Rep Raymond Palatino, hindi siya sang-ayon sa mungkahi ng CHED na alisin ang sobrang mga kurso gaya ng Bachelor of Science in Nursing and business education programs, Bachelor of Science in Hotel and Restaurant Management, BS Accountancy at iba pang katulad na kurso.

Ayon sa kanya, ito raw ay sobrang nakaka-alarma na ipapahinto ng bansa ang training ng mga bagong titser at health workers, samantalang kailangang-kailangan sila ng bansa lalo na doon sa mga mahihirap na komunidad.

---

Pagkabilanggong panghabambuhay, parusa sa mga carnapper

Iminungkahi ni Quezon City Rep Jorge Bolet Banal na gawin nang habambuhay na pagkakabilanggo ang parusang ipapataw sa carnapper kung napatay nito ang may-ari, driver at nakasakay sa kinarnap nitong sasakyan o kung nagtamo ang mga biktima ng sugat sa katawan.

Layunin ng HB05664 ni Banal na patawan ng mabigat na parusa ang mga carnapper upang matugunan ang lumalalang insidente ng carnapping sa ating bansa.

Sinabi ni Banal na sinasantamala ng mga kriminal ang umiiral na batas at hindi ang mga ito natatakot dahil madali silang makapag-piyensa para ituloy ang kanilang modus operendi.

Binanggit ni Banal ang isang probisyon sa Saligang Batas na nagsasabing bago ang conviction ng isang suspek maibba, maaari itong magpiyansa, subalit hindi sakop nito ang kasong may hatol na habambuhay na pagkakabilanggo at may matibay ang ebidensya.

Dahil nga ang kasong carnapping ay nagreresulta lamang sa physical injuries, rape at kamatayan ng biktima, iminunglahi ni Banal na amiyendahan ang Section 14 ng RA06539 o ang Anti-Carnapping Act of 1972.

----

Pagpapalawig ng Rent Control Law, isinusulong

Ipinanukala sa Kamara de Representantes ngayon na palawigin ang RA09653 o ang tinatawag na Rent Control Law of 2009 upang maisama dito ang mga micro at small business enterprises o yaong mga maliitang negosyo.

Layunin ng HB05636 na iniakda ni Bayan Muna Rep Teddy Casino na lalagyan ng pamantayan ang anumang mga pagtataas ng paupa sa mga commercial spaces, isa na napakalaking gastusin sa negosyo.

Sinabi ni Casino na mas malayang magugol ng mga maliliit na negosyante na gastusin ang kanilang salapi para sa kanilang capital, labor at iba pang operational expenses kontra sa napakataas na paupa.

Idinagdag pa ni Casino na lumitaw sa estatistika na may 780,437 business enterprises sa bansa at 99.6% dito ang micro, small at medium enterprises at sa numerong ito, 91.4% dito ang micro enterprises at 8.2% ang small enterprises.

Ayon pa sa kanya, ang mga negosyong ito umano ang siyang malaking bahagi ng manufacturing at export sales ng bansa kung kata'y kailangan tulungan sila ng ating pamahalaan sa pamamagitan ng pagpapalawig ng naturang batas.

Kasama dito sa nabanggit na panukala na tatawaging Expanded Rent Control Act ang mga commercial spaces at paglilimita ng pagtataas ng paupa.

---

Impeachment. It's more fun in the Philippines.

cuevas y tupaz

Paglalagay ng tamang libelo sa mga produktong pagkain, ipag-uutos

Isang panukalang batas na naglalayong gawing mandatory ang paglalagay ng iteketa sa mga produktong pagkain na genetically modified organisms (GMO) sa bansa ay inihain upang matiyak ang seguridad at karapatan ng bawat mamimiling Filipino.

Sinabi ni Bayan Muna partylist Rep Teddy Casino na isa sa may mga akda ng HB05247, layunin umano ng panukala na ipaalam sa mga mamimili ang nilalaman ng kanilang binibili at kinakain.

Ayon kay Casino, mahalagang maitaguyod ang karapatan ng mamimili para malaman ang kanilang binibili at kinakain kung may tamang labeling na nakalagay sa food product, lalo na yung mga naglalaman o dumaan sa genetic modifications.

Idinagdag pa ni Casino na mayroong mga kasong nadiskubre na ang genetically modified product ay nakapagdudulot ng malalang sakit sa katawan ng tao at maging sa kapaligiran.

Naiulat na daw ang mga kasong contamination of crops at ang mga ito ay nadiskubre sa mga kabukiran na malapit sa lumalalang genetically engineered crops.

---

Konsulado sa Federation of Malaysia, itatatag upang tulungan ang mga Filipino sa Sabah

Ipinagtibay na sa Kamara ang HR00204 na humihiling sa Department of Foregin Affairs na magtatag ng Philippine consulate sa estado ng Federation of Malaysia, malapit sa Sabah upang masuportahan ang mga Filipino na umaalis patungong Sabah.

Sinabi ni Albay Rep Al Francis Bichara, chairman ng House Committee on Foreign Affairs, ang naturang resolusyon naglalayong tiyakin ang kaligtasan at proteksyon sa karapatan ng mga Filipino sa Sabah.

Ang Philippine consulate na malapit sa Sabah ang siyang mangangasiwa sa pagproseso ng mga dokumento na kailangan ng mga Filipino doon.

Tinatayang nasa 350,000 ang hindi dokumentadong mga Filipino ang naninirahan sa Sabah na makikinabang mula sa pagka-tatatag ng naturang konsulado.

Ayon kay Bichara, sa pamamagitan ng Philippine consulate, malalaman umano ng ating gobyerno ang kondisyon ng mga nakakulong na Filipino doon at magbigyan sila ng kagyat na tulong.

Sa kasalukuyan ayon pa sa kanya, mayroong 30% na Filipino ang sumasakop sa populasyon sa Sabah na nahaharap sa ‘di-mabilang na mga kaso gaya ng trafficking, detention at labor problems na nangangailangan ng tulong ng ating pamahalaan.

---

Suwelduhan at hindi na porsiyentuhan ang mga bus driver

Umani ng papuri galing kay Bayan Muna partylist Rep Teddy Casino ang pagkilos na ginawa ng Land Transportation Franchising and Regulatory Board (LTFRB) para sa public utility bus (PUB) operators na ipatupad ang government-prescribed salary scheme, working hours at minimum benefits para sa lahat ng bus drivers.

Ipinahayag ni Casino na matutuwa na raw ang mga bus driver dahil suwelduhan na sila at walong oras lamang sila magta-trabaho o magmamaneho at talagang nagbunga na umano ang matagal nang plano ng gobyerno para sa mga bus drivers.

Sinabi naman ni Gabriela partylis Rep Luzviminda Ilagan na suportado ng kanilang partido ang mungkahing bigyan ng sahod ang mga PUB drivers.

Ayon sa kanya, nakakatiyak na raw ang mga bus driver na mayroon silang fixed salary at hindi na sila makikipag-agawan ng pasahero at tiyak pa ang kaligtasan sa kalsada.

Sa ilalim ng Memorandum circular 2012-001 na nilagdaan ni Chairman Jaime Jacob, ang compensation scheme na itinakda ng Department of Labor and Employment ay aangkop sa part-fixed-part-performance based scheme.

Gagawin nang P5M ang pondo ng National Museum

Pumasa na sa Kamara sa ikalawang pagbasa ang panukalang magpapayag sa National Museum na gamitin ang kanilang kinikita upang matustusan ang kanilang mga pangangailangan.

Sinabi ni Muntinlupa Rep Rodolfo Biazon na pinapayagan ng panukala na gamitin ng National Museum ang kanilang kinikita ngunit hindi dapat lumampas ito sa P5 milyon kada taon na galing sa proceeds of sale, reproduction, cultural items, publications, creation, restoration, conservation, identification, earnings mula sa planetarium programs, entrance fees at iba pang auxiliary services nito.

Ayon kay Biazon, sa umiiral batas, pinapayagan umano ang Museum na gumastos lamang ng P2 milyon kada taon at limitado rin ang paggamit nila para sa maintenance at iba pang auxiliary expenses.

Layunin din daw ng panukala na amiyendahan ang charter ng National Museum para maitaas ang halaga na dapat nilang gamitin bilang revolving fund mula sa P2 milyon at ito ay gagawing P5 milyon na.

Idinagdag pa ni Biazon na gagamitin umano ang revolving fund para sa upgrading at modernization ng communication at transportation facilities; repair and rehabilitation ng structure at facilities ng mga tanggapan, koleksyon at acquisitions; updating ng insurance payments nito; tataasan ang level of security na ginagamit nito; at popondohan ang para sa mga gastusin sa reproduction at acquisition ng mga cultural items at iba pang mga auxiliary activities.

----

SALN ng mga miyembo ng Kamara, hindi sekreto

Ipinahayag ngayon ni House Secretary General Marilyn Barua-Yap na bukas para saliksikin ng sinuman ang mga Statement of Assets, Liabilities and Net-Worth (SALN) ng mga miyembro ng Kamara de Representantes.

Sinabi ni Yap na mayroon silang standing directive galing House Speaker Feliciano Belmonte, Jr. na ipanatiling bukas ang mga record ng Kamara lalu na sa media at na dapat wala silang pinipiling pagbibigyan ng mga ito.

Nilinaw naman ni Atty Ricardo Bering, hepe ng House Records Service, na bilang mga custodian ng SALN records, sinusunod lamang nila ang batas at ang mga rules and procedures hinggil sa nabanggit na mga dokumento.

Ayon kay Bering, bago magkakamit ng certified true copy ng naturang papeles, isang request ang ia-accomplish ng requesting person na nagbabanggit ng espesipikong layunin para sa request upang maiwasan na ang naturang dokumento ay gagamitin lamang ayon sa itinadhana ng batas.

Para sa praktikalidad, sinabi rin ni Bering na dini-discourage nila ang wholesale request ng mga kopya ng 285 miyembro ng House upang maiwasan ang sitwasyong magkakaroon pa ng maraming repository ng SALN at upang mapanatili ang kaayusan at maseguro ang integridad ng mga record.

Ayon pa sa kanya, bukas ang kanilang tanggapan para sa mga magsasagawa ng research at maaaring silang kumopya ng mga pertinent document na kanilang ninanais.

---

Pagbabaibayo ng koleksiyon sa GSIS premium contribution, hiniling

Iminungkahi ni CIBAC party-list Rep Sherwin Tugna sa GSIS o Government Service Insurance System na pag-ibayuhin ang koleksyon sa monthly premium contribution ng mga empleyado ng gobyerno upang matugunan ang pinansyal na pangangailangan ng mga miyembro nito.

Sinabi ni Tugna na ang GSIS ang tanging mapagbabalingan ng mga miyembro sa kanilang pag-utang gaya ng salary, policy, housing at emergency loans.

Ayon sa kanya, bukod umano sa monthly premium contribution inaasahan din ng mga empleyado ng gobyerno ang principal benefit package ng GSIS tulad ng compulsory at optional life insurance, separation, retirement, disability benefits na may kaugnayan sa aksidente at pagkamatay.

Noong June 2011, dagdag pa ni Tugna, ang average monthly pension na natanggap ng isang old-age pensioner ay P8,650, ang survivor of a deceased ay P2,442 at ang disability at survivorship ay P1,647.

Ang nakuhang benepisyo ng mga miyembro sa GSIS ay hindi sapat para matiyak ang kanilang kinabukasan bagaman at nagsilbi sila ng mahabang panahon sa gobyerno.

Ang isang malaking hamon para sa GSIS ay nahaharap sila sa patuloy na pagbaba ng kontribusyon sa pagbayad ng mga benepisyo at tumaas ng 10% ang taunang binabayarang benepisyo ng GSIS mula sa P17 bilyon sa taong 2000 na naging P32.3 bilyon noong 2007.

Tumaas din ng kaunti ang kontribusyon ng miyembro mula P35 bilyon noong 2000 sa P41 bilyon noong 2007 o dalawang porsiyento ang itinaas kada taon.

Ayon pa kay Tugna, ang ratio of contribution ng benefit payment ay patuloy na bumababa mula sa 2.1 sa 2000 at 1.3 naman sa 2007.

Anomalya sa transaksiyon ng PEACe bonds, iimbestigahan

Pina-iimbestigahan ng mga miyembro ng Kamara ang kontrobersyal na pagbubuwis ng Poverty Eradication and Alleviation Certificates (PEACe) bonds para matukoy kung sino ang dapat managot at para na rin sa Kongreso na magbalangkas ng batas para matugunan ito.

Sinabi ni Isabela Rep Giorgidi Aggabao, kailangang umanong rebisahin ang mga pangyayaring nakapalibot hinggil sa transaksyon sa PEACe bonds para mapigilan ang mga iregularidad sa issuance ng government debt instruments sa darating na panahon.

Batay sa HR01949, hiniling ni Aggabao sa House Committee on Ways and Means na imbestigahan ang anomalya kaugnay sa transaksyon ng PEACe bonds para malaman kung naka-apekto ito sa gobyerno at sa pribadong sektor.

Ayon kay Aggabao, malinaw umano na mayroong namumuong krisis sa pagitan ng dalawang magkataliwas na ruling BIR o ang Bureau of Internal Revenue 2001 at 2011 at nakadagdag pa umano dito ang walang koordinasyon ng sangay ng ehekutibo, ang BIR, Bureau of Treasury at Department of Finance at Hudikatura.

Matatandaang noong Mayo 31, 2001, nag-isyu ang BIR ng BIR Ruling 020-2001 na tumutukoy sa zero-coupon o Zeros bilang tax-exempt bonds at ito ay na-reaffirm sa ilalim ng BIR Ruling 035-2001 noong Agosto 16, 2001.

At noong Oktubre 3, 2011, napag-usapan ng Bureau of Treasury ang zeros tax-exemption sa Government Securities Eligible Dealers o GSEDs at may pagmamalaking inanunsyo ang kauna-unahang handog ng zeros sa bansa.

Binanggit ng BoT ang tax exemption sa Bankers Association of the Philippines at nag-isyu ng memorandum na nagpatibay sa tax exemption noong Oktubre 16, 2001.

---

Pagpapatupad ng pagbubuwis ng mga pensiyon, iimbestigahan

Iimbestigahan ng House Committee on Ways and Means ang hakbang ng Bureau of Internal Revenue na magpapataw ng buwis sa kontribusyon ng mga insurance institutions gaya ng SSS o Social Security System, GSIS o Government Insurance Security System, PhilHealth at ang PAG-ibig Fund.

Sinabi ni Valenzuela Rep Magtanggol Gunigundo na ang direktiba na inisyu ni BIR Commissioner Kim Jacinto-Henares noong nakaraang taon na buwisan ang optional contributions, pensyon at insurance ay hindi umano makatuwiran.

Binatikos ni Gunigundo ang naturang direktiba bilang anti-poor at paglabag sa batas na na siyang nagliliban sa kontribusyon ng mga empleyado mula sa taxation, maging voluntary man o mandatory.

Ayon sa kanya, sobrang ma-aapektuhan umano dito ang mga overseas Filipino workers at ang mga self at part-time employees, pati na ang mga domestic helpers, dahilan para mag-mosyon siya sa komite na imbestigahan ang memorandum.

Ayon naman kay Cagayan de Oro Rep Rufus Rodriguez, ito daw ay kontribusyon at hindi dapat ikonsiderang investment gaya ng sinasabi ng BIR, kaya hindi dapat itong buwisan.

---

Sagot ng prosekusyon sa ang mga tugon ni Corona sa reklamo sa kanya

Isinumite na kahapon ng prosecution panel ang sagot ng mga kongresista sa tugon ni SC Renato Corona sa impeachment laban sa kanya.

Sa 38-pahinang dokumento na ipinareseb ng House prosecution panel na pinangunahan ni Iloilo Rep Niel Tupas, Jr. sa Senado, nakapaloob dito ang punto por puntong sagot ng mga kongresista sa mga banat ni Corona sa impeachment laban sa kanya.

Sinabi ni Tupas na nais lamang ng sambayanan na maisiwalat ang katutohanan at marapat lamang umanong isagawa ito alang-alang sa kapakanan ng bayan.

Sa kanilang dokumento, iginiit ng mga rosecutor na hindi si Pangulong Aquino at ang Liberal Party ang pasimuno ng impeachment ni Corona bagkos ito ay isang pagkilos ng soberanya na sumusuporta sa pangulo ng bansa.

Ayon pa sa kanila, si Corona lang, at hindi ang Korte Suprema bilang institusyon ang puntirya ng impeachment at pakay umano nila na papanagutin si Corona sa personal nitong pagboto pabor kay dating Pangulong Gloria Arroyo sa maraming kaso.

May mga kasalanan daw si Corona sa bayan at kabilang umano dito ang pagpayag ng korte na makaalis ng bansa si Ginang Arroyo, pagpapalit-palit ng desisyon ng korte sa kaso ng flight attendants ng Philippine Airlines, at pagpigil noon sa impeachment ni dating Ombudsman Merceditas Gutierrez, na kakampi rin ni Arroyo.

Umaasa naman ang Malakanyang na hindi haharangin ng Korte Suprema ang impeachment ni Corona at nananawagan ang House prosecution panel sa Senado na ituloy ang impeachment trial at patalsikin si Chief Justice Corona.