Sentro ng palahian ng mga kambing at tupa, itatatag

Tatalakayin na sa bulwagan ng Kamara ang panukalang naglalayong bigyang proteksiyon at paunlarin ang industriya ng mga maliliit na hayop tulad ng kambing, tupa at iba pa.

Ito ay makaraang maaprubahan ng komite ang HB01809 na inihain nina Pampanga Reps Gloria Macapagal-Arroyo at Camarines Sur Rep Diosdado Arroyo na naglalayong itatag ang Philippine Small Ruminants Center sa ibat-ibang bahagi ng bansa na kung saan ang pinakasentro ay matatagpuan sa CLSU o Central Luzon State University sa Nueva Ecija at magtatayo rin ng mga satellite center sa Luzon, Visayas at Mindanao.

Sinabi ni Macapagal-Arroyo na malaki umano ang maitutulong ng batas na ito sa magsasaka, higit sa lahat sa maliliit na magsasaka, na magkaroon ng de-kalidad na lahi ng kambing at tupa sa murang halaga dahil layon nito na magkaroon ng programa at tamang sistema kung papaanong mapapaunlad ang industriyang ito.

Layunin din umanong hikayatin ng panukalang ito ang mga maliliit na magsasaka na palaganapin at paunlarin ang kanilang negosyo upang dumami ang napagkukunan ng karne, gatas, at fiber na mula sa kambing, tupa at iba pang maliliit na hayop, upang matugunan ang pangangailangan kahit sa kani-kanilang probinsiya lamang.

Ayon sa kanya, mahalaga umano ang mga hayop na ito sa maliliit na magsasaka at malaking tulong din daw ang nagagawa nito sa pagpapaunlad sa sektor ng pangsakahan ng bansa at kung maisasaayos lamang ang programa hinggil dito ay maaari na itong mapagkunan ng kabuhayan ng mga mgasasaka.

Nakakalungkot lamang umano na sa kabila ng mga kahalagahan ng maliliit na hayop na ito at ang malaking silbi nila sa aspeto ng agrikultura ay hindi ito nabibigyan ng sapat na atensiyon ng pamahalaan tulad ng importansiyang naibibigay sa baka at kalabaw.

Anti-money laundering law, pinaiigting sa Kamara

Pinalalakas ng mga mababatas sa Kamara ang kasalukuyang batas hinggil sa anti-money laundering upang ito ay makasang-ayon sa pamantayan ng international anti-money laundering at counter-terrorist financing.

Idinideklara sa HB04275 ang terorismo at ang pagpopondo sa mga terorista at mga gawain nito, human trafficking, sexual exploitation ng bata, katiwalian, panunuhol, panghuhuwad at pamemeke, at mga krimen laban sa kapaligiran o environmental crime bilang mga iligal na gawain.

Ang naturang panukala na naglalayong amiyendahan ang RA09160 o ang Anti-Money Laundering Act of 2000 ay inihain sa Kamara nina Cagayan de Oror Rep Rufus Rodriguez, Abante Mindanao prtylist Rep Maximo Rodriguez, Paranaque Rep Roilo Golez at Leyte Rep Sergio Apostol.

Ibinabalik ng panukalang ito ang dati nang nakasaad sa batas ng anti-money laudering na pagbibigay ng pabuya at insentibo na inalis sa pamamagitan ng RA09194 na nag-aamiyenda sa naunang RA09160.

Panukalang magtatatag ng PTHA lusot na sa komite

Bubusisihin ng mga kongresista sa bulawagan ng Kamara ang panukalang magtatatag ng Philippine Thoroughbred Horseracing Authority (PTHA) bilang kapalit sa kasalukuyang Philippine Racing Commission (Philracom).

Ito ay makaraang maaprubahan sa committee level ang HB000224 na mas kikilalanin bilang Charter of the Philippine Thoroughbred Horseracing Authority na siyang mamamahala upang patuloy na umunlad at mapalawak ang de-kalidad na kabayo na magagamit sa pagpapalaganap ng industriya ng pangangabayo sa bansa.

Sinabi ni Manila Rep Amado Bagatsing, pangunahing may akda ng panukala na ang PTHA na ang pangunahing ahensiyang may responsibilidad at kontrol sa lahat ng aspetong may kinalaman sa industriya ng pangangabayo, kabilang na ang pagpaparami at pagpapaunlad ng mga ito.

Kasama pa sa pangangasiwaan ng PTHA ay ang importasyon at eksportasyon ng kabayo, breeding stock, framing at maging ang pagtatakda kung kailan ang mga isasagawang karera, kung sino ang may karapatang mag-alaga ng kabayo, pagpapagawa ng mga ligtas na karerahan, pagdidesisyon kung ano at magkano ang magiging papremyo sa mga karera ng kabayo at ang seguridad sa horseracing.

Ayon kay Bagatsing, hindi pa nagmamaliw ang importansiya ng karera ng kabayo bilang pinakamatanda at pinakatanyag na libangan ng mga kalalakihan sa bansa at kahit na sa buong mundo.

Idinagdap pa niya na kung tutuusin daw, naging mas de-kalidad at sopistikado na ang larong ito kaya mas kinakailangang bigyan ito ng pansin ng pamahalaan upang hindi ito mawalang saysay.

Batas hinggil sa pagmamanehong lasing, paiigtingin

Ipinasa na sa ikatlo at pinal na pagbasa ang panukalang naglalayong parusahan ang mga motorista na nagmamaneho kahit na sila ay nasa ilalim ng impluwensiya ng alak o sa iligal na gamot.

Sinabi ni Pampanga Rep Gloria Macapagal-Arroyo na kung sa ibang bansa ay mahigpit na ipinagbabawal ang pagmamaneho ng nakainom ng alak, kataka-katang naman daw dito sa Pilipinas na sa kabila ng mga pag-aaral na nagsasabing ikalawa sa sanhi ng pagkamatay ng bawat Pilipino ay ang aksidente sa kalsada at na dulot ng pagmamaneho na lasing, nananatili pa rin uamnong maluwag at ipinagwawalang bahala ang bagay na ito.

Ayon kay Arroyo, may akda ng panukala, hindi dapat na ang mga aksidente sa daan ay lagi na lamang itinuturing bilang resulta ng reckless imprudence, dapat ay ituring itong isang iresponsableng gawa lalo na kung ang sangkot ay isang lasing.

Kikilalanin ang panukalang ito bilang Driving Under the Influence of Alcohol, Dangerous Drugs and Similar Substances Act,” at ang panukalang ito ay magpapataw ng administrative sanctions at multa sa sinumang lalabag dito.

Nahaharap sa parusang isang taong pagkakakulong, multang di bababa sa P20,000 at pagsuspende ng lisensiya sa pagmamaneho ang sinumang mapapatunayang nagkasala at lumabag sa batas na ito.

Suliranin ng bansa sa malnutrisyon, tutugunan ng Kongreso

Iminungkahi ni Alagad partylist Rep Rodante Marcoleta na magtatag ng Barangay Integrated Development Approach for Nutrition Improvement (BIDANI), isang programang magsasagawa ng pag-aaral kung papaanong magkatulungan ang mga unibersidad at ang mga lokal na pamahalaan sa pagsasaayos at pagpapa-unlad ng nutrition program para sa mga mamamayan.

Sinabi ni Marcoleta na ang HB01330 na prinsipal na kanyang inakda ay naglalayong mapapangalagaan ang kalusugan ng mga mamamayan lalo na sa mga batang naninirahan sa mga itinuturing na depressed barangay.

Ayon sa kanya, ang programang kanyang iminungkahi ay magbibigay ng kamulatan sa kahalagahan ng nutrisyon at kung papaano maging produktibo uapng mapaunlad ang kalagayan ng bawat mamamayan.

Iginiit ng mambababats na ang malnutrisyon ang dahilan ng malawakang paghihirap ng bansa dahil ito ang nagpapaantala ng pisikal na kagalingan ng mga mamamayan at ito ay nakakaapeko sa paglaki ng mga bata at maging sa kanlang pag-iisip kung sila ay malnourished, dahilan para hindi sila maging alisto sa paaralan at hindi makakakuha ng magandang trabaho pagdating ng panahon.

Batay sa panukala, itatatag ang National Nutrition Council (NNC) na siyang mamamahala at magsasagawa ng pakikipag-ugnayan sa mga unibersidad na pinupondohan ng pamahalaan at siyang gagawa ng mga alituntunin at regulasyon na dapat sundin upang maipatupad ang mga probisyon ng panukalang ito.

212 na boto para ma-impeach ang Ombudsman, vote of confidence kay PNoy

Ipinahayag kahapon ni House Speaker Feliciano Belmonte na ang boto na 212 ng mga kongresista sa HR01089 upang ma-impeach si Ombudsman Merceditas Gutierrez ay isang pagpapakita lamang ng vote of confidence ng Kamara de Representantes kay Pangulong Benigno PNoy Aquino.

Ayon kay Belmonte, sa overwhelming majority ng Mababang Kapulungan sa impeachment ng Ombudsman, ipinakita lamang na malaki pa rin ang suporta ng mga kongresista kay Pangulong Aquino

Ngunit mabilis namang ipinalagay ng Speaker na ang solidong boto ng nabanggit na bilang ng mga mambabatas kahapon ng madaling araw laban kay Mercy ay assurance na rin ng kanyang kapangyarihan bilang lider ng Mababang Kapulungan.

Nanindigan aniya ang mga kongresista dahil alam ng mga ito na binabantayan ng taumbayan ang kanilang mga boto sa Gutierrez impeachment.

Kasabay nito, sinabi ni Belmonte na maaari nilang iakyat sa Senado ang Articles of Impeachment laban kay Gutierrez kahit naka-recess ang sesyon ng Kongreso para sa Holy Week.

Hindi naman aniya kailangang in-session ang Kongreso para sa transmittal nito kaya ipina-ubaya na lamang niya kay House Secretary General Marilyn Yap ang pagpapadala sa Senado ng Articles of Impeachment.

Idinagdag pa niya na sa pagbabalik na rin lamang ng sesyon sa Mayo kukompletuhin ng Kamara ang mga prosecutor sa Gutierrez impeachment.

Suplay ng langis ng Pilipinas, hindi kakapusin

Ipinahayag kahapon ni Department of Energy (DOE) Undersecretary Jose Layug sa isang pagdinig sa Kamara na nangako umano ang Saudi Arabia at International Energy Agency (IEA) na susuplayan ang Pilipinas ng dalawang milyong bariles ng langis kada araw sa loob ng dalawang taon.

Sinabi ni Layug na bukas daw ang DOE sa pagbibigay ng oil subsidy sa mga sector na matinding naaapektuhan kapag tumataas ang presyo ng langis.

Ayon sa kanya, ang pagkilos na ito ay hindi umano katulad ng nabuwag na Oil Price Stabilization Fund sapagkat ang isinusulong nilang oil subsidy ay hindi panglahatan kundi para lamang sa mga targeted vulnerable sector kagaya ng transportasyon.

Ipinaliwanag ni Layug na kung ibalik sa pamahalaan ang regulasyon ng oil industry at magkaroon ng pangkalahatang subsidiya, mangangilangan daw ang gobyerno ng 2 bilyong dolyares bawat buwan para ito ay matustusan at ang limitadong subsidiya aya puwedeng pondohan sa pamamagitan ng sobrang kita ng gobyerno kagaya ng windfall profit mula sa value added tax (VAT) ng langis.

9 na bilyong pisong supplemental budget para sa paglikas ng mga OFW, iminungkahi

Sa layuning maisalba at mai-repatriate ang mga overseas filipino worker (OFWs) mula sa rehiyon ng North Africa at Middle East at bansang Japan, iminungkahi ni Bayan Muna partylist Rep Tedy Casino sa nakapaloob sa HB04406 na maglaan ang pamahalaan ng 9 na bilyong piso na pamamamahalaan ng Department of Foreign Affairs (DFA) at kalakip na rito ang paglalaan para sa Department of Trade and Industry, (DTI) Department of Labor and Employment (DOLE) at Department of Interior and Local Government (DILG).

Sinabi ni Casino na tatlong dekada nang isinasalba ng mga OFW ang ekonomiya ng bansa kaya marapat lamang umanong ibalik ng gobyerno ang pabor sa oras ng kanilang pangangailangan.

Nararapat lamang daw na madaliin ng pamahalaan ang pagdedesisyon kung dapat bang dagdagan ang pondo para sa kaligtasan ng mga OFW ngayong inaatake na ng allied forces ang puwersa ni Libyan leader Muamar Qaddafy.

15 milyon pamilya sa buong bansa, di nagkaroon ng mailinis na tubig

Tinatayang humigit-kumulang sa 15 milyong kabahayan at pamilya sa buong bansa ang walang nakakarating na malinis na patubig at 273 munisipalidad naman ang nananatiling walang sistema ng patubig.

Sinabi ni House Speaker Feliciano Belmonte na batay sa ulat na isinumite ng Department of Interior and Local Government (DILG), tumaas ang bilang ng mga walang patubig mula sa dating 189 noong 2003 at umabot na sa 273 nitong 2009.

Ayon kay Speaker Belmonte, lumitaw din sa pag-aaral ng DILG na kung mayroon mang mahigit sa 80% na pamilya ang mayroong malinis na inuming tubig at malinis na pasilidad ng palikuran, mahigit naman sa 15 milyong pamilya ang di nagkakaroon ng malinis na tubig at walang maayos at malinis na palikuran.

Dagdag pa ni Belmonte, ang problemang ito ay hindi lamang mga mahihirap na pamilya ang nakakaranas kundi maging mga pamilya na naninirahan sa mga itinuturing na maunlad na lugar tulad ng National Capital Region, Central Luzon, Southern Tagalog at Central Visayas.

Hinahalimbawa ng Speaker ang Metro Manila na umaasa ang karamihan dito sa tubig na nanggagaling sa Angat Dam para sa suplay ng tubig kung saan 97% ng tubig ay dito nanggagaling at isinusuplay sa 12 Milyong mamamayan sa lungsod.

Nitong nakaraang taon, sinabi daw ng mga eksperto na mayroong kakulangang di bababa sa 500 milliliters ang suplay ng tubig kada araw at inaasahan pang mas lalong lalaki at aabot hanggang sa 2,000 milliliters ang magiging kakulangan ng suplay ng tubig sa darating na taong 2015.

Upang matugunan ang darating na problemang ito, sinabi ni Belmonte na napagkasunduan sa nakaraang National Executive-Legislative Dialogue hinggil sa Water Supply and Sanitation workshop na isasama sa mga priority bills ang mga panukalang tungkol sa patubig tulad ng pagtatatag ng Water Regulatory Commission na siyang mamamahala sa usaping patubig ng buong bansa.

Ayon pa kay Belmonte, sa kasalukuyan, ayon na rin sa kontratang pinasok ng Metropolitan Waterworks and Sewerage System (MWSS), nagsisilbi lamang na mga developer at regulator ang MWSS sa dalawang concessionaires nito, ang Manila Water Company at ang Maynilad Water Services.

Isang bagong abugado, miyembro ng legal team sa impeachment

Hinimok ngayon na maging abugado ng mamamayan ang mga bagong abugado na pumasa sa 2010 bar examinations.

Kasabay ng pagbati ni Bayan Muna partylist Congressman Neri Colmenares sa mga bagong lawyers ay ikinatuwa din nito ang pagkakapasa ng pinakabata at bagong abugado na kabilang sa impeachment legal team-laban kay Ombudsman Merceditas Gutierrez.

Tinukoy ni Colmenares si Atty. Maria Cristina Yambot, 23 taong gulang at graduate ng University of the Philippines College of Law.

Sinabi ni Colmenares na malaki ang naging partisipasyon ni Atty.Yambot sa paghahanda ng mga testigo at documentary evidence sa Fertilizer Fund Scam at Euro Generals.

Ginawang halimbawa ni Colmenares si Atty.Yambot na tularan ng mga bagong lawyer para magsilbi sa mga mahihirap at naaping sektor sa bansa.

Hinikayat din naman ng kongresista ang mga hindi nakapasa sa bar exams na tumulong bilang paralegal para magbigay ng ligal aid sa komunidad.

Nauunawaan ni Colmenares na talagang napakahirap ng bar exams ngunit ang mga hindi nakapasa dito, ayon sa kanya, ay nagtataglay pa rin ng kaalamang legal na mapapakinabangan habang naghihintay muli ng susunod na eksaminasyon.

RH bill, sa Mayo na muli babalangkasin sa plenaryo

Mistulang nasapawan na ng impeachment case laban kay Ombudsman Merceditas Gutierrez at maging ng Autonomous Region in Muslim Mindanao (ARMM) election postponement ang Reproductive Health (RH) bill.

Ito ay matapos magpasya ang liderato ng Kamara de Representantes na isantabi muna ang floor deliberation sa RH bill upang bigyang daan ang impeachment case at ang ARMM election postponement sa huling linggo ng sesyon ng Kongreso.

Kulang umano ang tatlong huling araw na sesyon ngayong linggo kapag isinabay ang RH bill kaya nagpasya ang liderato ng Kapulungan na ituloy na lamang ang deliberasyon sa panukalang ito sa Mayo.

Mag-aajourn ang Kongreso sa Marso 25 at mula sa Marso 26 ay magbabakasyon na ang mga mambabatas at babalik ang mga ito sa Mayo 9, 2011.

Nangangamba si Iloilo Rep Janette Garin, isa sa mga sponsor ng nabanggit na panukala sa magiging epekto ng pagpapaliban sa deliberasyon nito.

Sinabi ni Garin na lalong magkakaroon ng panahon ang mga anti-RH group lalo na daw ang mga obsto at kaparian para gapangin ang mga mambabatas at harangin ang nasabing panukalang batas.

Benepisyo sa mga miyembro ng SSS, pinadagdagan

Bunsod sa patuloy na pagtataas ng presyo ng mga bilihin, painadadagan ni Bayan Muna Reps Teddy Casino at Neri Javier Colmenares ang tinatanggap na pensiyon at iba pang benepisyo ng mga miyembro ng Social Security System(SSS).

Batay sa HB04365, dadagdagan ang ang kasalukuyang 1,200 hanggang 2,400 pesos na buwanang pensyon ng mga SSS members ay magiging 7,000 pesos na.

Nakasaad sa kasalukuyang batas na tatanggap ng P1,200 ang mga SSS members na nagretiro na sa trabaho kapag umaabot lamang ng 10 taon ang paghulog ng mga ito ng kontribusyon.

Doble naman o P2,400 ang pensyon ng mga SSS members na mahigit 20 taon nang naghulog ng kontribusyon bago sila nagretiro sa edad na 65 years old, ngunit walang halaga na umano ang perang natatanggap ng mga retirees dahil sa masyadong mataas na ang presyo ng mga bilihin.

Dahil dito, nais nina Casino at Colmenares na gawing P7,000 na ang magiging pensyon ng mga SSS members na wala nang trabaho upang makaagapay sa mataas na presyo ng mga bilihin.

Gayunpaman, magsisimula pa rin sa mga nabanggit na halaga ang mga pensioners at itataas ng P500 kada buwan ang kanilang matatanggap na pensyon hanggang sa umabot ito sa P7,000.

Nais ng dalawang mambabatas na mabigyan ng prayoridad ng administrasyon ang nasabing panukala upang matulungan din ang mga mamamayan kasabay ng mga mahihirap na binibigyan ng tig P1,400 kada buwan sa ilalim ng Conditonal Cash Tranfer (CCT) program na pinondohan ng P21 bilyon pesos.

Contractualization law, bubuwagin na

Inaprubahan na sa committee level nga Kamara de Representantes ang pagbubuwag sa contractualization law sa bansa o pangongontrata sa mga manggagawa upang makaiwas sa mas malaking gastusin sa labor.

Matapos ang ilang pagdinig, inaprubahan na rin sa House committee on labor ang iba’t ibang panukalang batas na magbabawal na sa mga kumpanya at mga employer na ikontrata ang trabaho sa kanilang kumpanya.

Ihinahanda na ang committee report ukol dito para maipasa na sa committee on rules para pagdebatehan bago aprubahan sa ikalawa at ikatlong pagbasa.

Ang pangunahing may-akda sa panukalang ito na si DIWA party-list Rep Emmiline Aglipay ay nagsabi na malapit nang magkaroon ng job security sa bansa.

Sa ilalim ng inaprubahang panukala, ipagbabawal na ang kontraktuwalisasyon o sistema sa paggawa kung saan, hanggang anim na buwan lamang puwedeng magtrabaho ang isang manggagawa.

Karaniwan nangyayari ito sa mga department store kung saan ang mga sales lady ay nasa ilalim ng contractualization kaya pagkatapos ng kanilang anim na buwang kontrata ay awtomatikong tanggal ang mga ito sa kanilang trabaho.

Mahigit isang biyong pisong earthquake contingency fund, pinabubusisi

Iminungkahi ni Bagong Henerasyon partylist Rep Bernadette Herrera -Dy busisihin ng Commission on Audit (COA)ang mahigit sa isang bilyong pisong pondo na kinolekta mula sa mga water consumer para sa matinding paglindol

Hiniling ni Herrera-Dy sa Metropolitan Waterworks and Sewerage System (MWSS) na ilantad nito ang mahigit isang bilyong piso na earthquake contingency fund na kinolekta mula sa mga water consumer sa Metro Manila at karatig na lokalidad.

Ang pondo ay ipinalalagay ni Herrera-Dy sa escrew o isang kontrata na nakadeposito ang pera sa isang bangko at maari lamang makuha sa panahon ng water crisis pagkatapos ng lindol.

Ang mambabatas ay nababahala sa naturang pondo bunsod na rin sa matinding lindol sa bansang Hapones at siya ay nabahala na sa oras ng kalamidad ay hindi agad maibigay ang pondo ng mga water utility para sa earthquake emergency.

Ang mga water concessionaire ay inatasang komolekta ng P4.130 billion pesos para sa Earthquake Contingency project.

Nalalabing iilang araw ng sesyon, dapat ituon sa mga importanteng panukala

Nagbabala si Cagayan Rep Jack Enrile sa mga kapwa kongresista sa pagsentro lamang ng mga ito sa impeachment case laban kay Ombudsman Merciditas Gutierrez sa kabila ng iba pang mga importanteng panukalang batas na dapat nilang aktuhan.

Sinabi ni Enrile na marami pang bagay na dapat pagkakaabalahan ang Kamara de Representantes at maraming ding mga problema pa ang dapat resolbahin sa mga nalalabing ilang araw bago mag-Semana Santa.

Binigyang diin ng kongresista na hindi pa man lamang napapag-usapan ang impact na bunsod ng malakas na lindol na tumama sa bansang Japan at seguradong tatama sa ekonomiya ng bansang Pilipinas.

Ni hindi man lamang umano pinag-uusapan sa Kamara kung paano hahanapin ang mga Filipino sa Japan na naapektuhan ng paglindol.

Hindi pa rin binabantayan, ani ni Enrile, ang retrieval operations sa Christchurch sa New Zealand at ang rescue ng mga Filipinos na inabot ng crossfire sa Libya.

Dapat aniya ay pinaghahandaan din ng Kamara kapag dumating sa scenario na umabot na sa US$200 kada bariles ang langis.

Dapat umanong harapin ng Kongreso ang mga nasabing isyu sa limang natitirang araw ng sesyon at hindi daw nila puwedeng sabihin sa kanilang mga constituent na diyan muna kayo at si Merci muna ang mahalaga sa kanila.

Ang Kongreso ay magri-recess umpisa sa March 25 hanggang May 8.

AFP chief of staff, 3 taon na lamang ang termino

Inaprubahan na sa ikatlo at pinal na pagbasa sa Kamara ang panukalang batas na magbibigay ng tatlong taon na lamang na termino sa bawat Chief of Staff (COS) ng Armed Forces of the Philippines (AFP).

Batay sa HB00006, ang panunungkulan AFPCOS ay magsisimula sa araw na itinalaga ito ng Pangulo ng Pilipinas at hindi kung kailan siya kinumprima ng Commission on Appointment.

Sinabi ni Muntinlupa Rep Rodolfo Biazon na layunin ng kanyang panukala na mabigyan ng seguridad ang bawat maitatalagang AFPCOS na matatapos ang bawat programang nasimulan nito na walang dapat isaalang-alang o pangilagan.

Idinagdag pa ni Biazon, chairman ng House committee on national defense, na maging sa pagpili ng itatalagang AFPCOS ay maliligtas na rin sa pamumulitika at ang kakayahan, kagalingan at kaalaman sa posisyon na lamang ang pagbabatayan.

Nakasaad sa panukala ni Biazon na ipagbabawal na ang pagtatalaga ng COS kung ang nabanggit na opisyal ay mayroon na lamang isang taon sa serbisyo at hindi rin maaring palawigin ang kanyang terminong tatlong taon, maliban na lamang kung may giyerang nagaganap o di kaya ay idineklara ng Kongreso.

Kung ang naitalagang COS at abutan ng pagreretiro, mangingibabaw ang isasabatas na tatlong taong termino kung saan kailangang tapusin ang tatlong taon bago magretiro ang ito.

Ngunit nilinaw din sa panukala na bilang Commander-in-Chief, may karapatan ang Pangulo na tanggalin sa kanyang puwesto ang naitalagang COS kung nawalan na ito ng tiwala sa kanya.

Ang HB00006 ay nag-aantabay na lamang na ipasa rin sa ikatlo at pinal na pagbasa sa Senado bago ito maging ganap na batas.

Pagtatatag ng Millennium Development Fund, sinuportahan

Agarang pagsasabatas ng panukalang magtatatag ng Millennium Development Fund na siyang daan upang makatugon sa pangako ng bansa hinggil sa Millennium Development Goal ay sinusuportahan ng ilang ahensiya ng pamahalaan.

Ang HB03252 na inihain ni Ilocos Norte Rep Imelda Marcos na aniya ay siyang magiging daan upang mapondohan ang mga pangunahing proyekto ng MDG ay buong sinusuportahan ng Social Work and Development sa pamumuno ni division chief Cynthia Lagasca.

Pinapurihan naman ni League of Provinces Project Director Angelica Sanchez ang panukala na ayon sa kanya ay makakatulong ng malaki sa mga local na pamahalaan upang matugunan din ang adhikain ng MDGs.

Idingdag n Sanchez na karamihan umano sa mga proyekto ng MDG ay nakasalalay at nakaatang sa mga lokal na pamahalaan.

Ayon naman kay Director Honorata Catibo ng Department of Health, kapuri-puri daw ang panukala dahil masusutinehan nito ang mga pagsisikap na gagawin at nilalayon ng MDG hanggang sa taong 2015 at malaki ang maitutulong ng panukala para magkaroon ng sapat na pondo para sa health care ng lahat ng Pilipino.

Nauna rito, bumuo si Marcos, chairperson ng House Committee on Millennium Development Goals, ng isang technical working group na siyang mag-sasaayos at magsasama-sama ng lahat ng posisyon at suhestiyon na iprinisinta ng bawat ahensiyang may kinalaman sa panukalang ito.

Layunin ng panukala ni Marcos na magtatag ng isang corporate body na kikilalanin bilang Philippine Millennium Development Fund na naglalayong maiangat ang anumang makakayanan at matutupad ng MDG.

Reporma sa batsa hinggil sa SK, pinanawagan

Reporma lamang at hindi abolisyon ang kailangan sa batas hinggil sa Sangguniang Kabataan (SK).

Ito ang panawagan ni San Juan Rep Jose Victor “JV” Ejercito bunsod ng kanyang pagkadismaya sa kabila ng naging resulta ng nakaraang eleksiyon ng miyembro ng SK.

Sa kanyang talumpati, sinabi ni Ejercito na inakala niyang isang simpleng eleksiyon lamang noong nakaraang Liga ng mga Barangay at Pederasyon ng SK sa kanilang lugar ngunit nahaluan pala umano ito ng pandaraya.

Sinabi nn mambabatas na ang nagwaging pangulo ng kasalukuyang SK Federation sa kanilang lugar ay nanalo sa pamamagitan ng pandaraya, pananakot, at panunuhol at mismong ama nito na dating ring opisyal ng barangay, dating pangulo rin ng SK at barangay kagawad, ang may pakana nito.

Bagamat dismayado umano siya sa naging resulta ng nakiaraang eleksiyong pambarangay, naniniwala pa rin siya na dapat manatili ang pagkakaroon ng SK sa bawat barangay.

Dapat pa rin umanong may kumakatawan sa mga kabataan sa pagsusulong ng mga programang laan para sa kanila at dapat pa ring may partisipasyon sila sa anumang programang magpapaunlad sa bawat komunidad at higit sa lahat, ang SK ay dapat magsilbing sanayan ng mga susunod na pinuno.

Ayon sa kanya, bagamat hindi siya naging kasapi ng Kabataang Barangay noong panahon ni dating Pangulong Ferdinand Marcos, ginugol naman umano niya ang kanyang kabataan sa pagsiserbisyo sa kanilang komunidad sa pamamagitan ng pagsali sa iba’t-ibang organisasyon tulad ng Junior Chamber International-Philippines o Philippine Jaycees, Kabataan ng Masang Pilipino, Estudyanteng Responsible para sa Aktibong Pamamahala at Mamamayang Ayaw sa Droga.

Dagdag pa nito na ang pagsali umano niya sa mga nabanggit na samahan ang nagbukas sa kanyang isipan sa importansiya ng kabataan sa pagpapaunlad ng komunidad.

Plea bargain ni Gen Garcia, kasama sa impeachment complaint

Pinahayag ni Justice Committee chair at Iloilo Rep Niel Tupas Jr. na tugma ang nilalaman ng kanilang committee report katulad sa inisyal na pag-uulat ng Senate Blue Ribbon Committee para ipa-impeach si Ombudsman Merceditas Gutierrez sa isyu ng plea bargaining agreement sa Garcia case dahil ang akto naman daw ng ombudsman sa plea bargaining ay act of betrayal of public trust.

Ayon kay Tupas, isa sa 6 na alegasyon sa omplaint ay ang low conviction rate at ang incompetence sa pagpasok sa plea bargaining agreement, ngunit mabililis namang nilinaw nito na masusing pinag-aaralan umano ito ngayon ng legal team ng committee kung isasama sa impeachment trial sa Senado.

Idinagdag pa niya na ang plea bargain ay general statement sa complaint na inihain ng grupo ng Akbayan.

Kumuha na rin daw sila ng external counsel para sa drafting ng articles of impeachment at sa kasalukuyan, wala pang desisyon ang legal team kung isasama ang Garcia plea bargain.

Ngunit kahit wala daw ang Senate blue ribbon committee report ay malakas ang ebidensiya laban sa Ombudsman sa kaso ng fertilizer fund scam.

Pagbaba sa 6% mula sa 12% VAT, aprubado na

Ipinahayag ni Batangas Rep Hermilando Mandanas kahapon na aprubado na ang House Committee on Ways and Means ang panukalang naglalayong ibaba sa 6% ang ipinapataw na value added tax (VAT) sa mga bilihin at serbisyo mula sa kasalukuyang 12%

Ayon kay Mandanas, nakatakda nang isama sa calendar of business ng plenaryo ng Kamara de Representantes ang kanilang inaprubahang panukala.

Sa sandaling ito ay maipasa na, maibaba na umano sa 6% and VAT sa mga produktong petrolyo, tubig at kahit pa sa kuryente ngunit sa kabila nito ay tinatayang P50 bilyon pa rin ang itataas ng gobyerno sa buwis dahil kasabay na aalisin ang tinatawag na input tax credit deductions ng mga kumpanya na itinuturing umanong devils' playground sa koleksiyon ng buwis.

Ipinaliwanag ni Mandanas na sa input tax credit deductions ay umaabot sa 12% hanggang 13% ng operation costs ng mga kumpanya ang naibabawas sa buwis at ditor in naipapasok ang mga pekeng invoices at bentahan ng tax credits.

Government take-over sa oil at gas fields na minamay-ari ng mga dayuhang kumpanya, iminungkahi

Iminungkahi ni Bayan Muna partylist Rep Teddy Casino na kailangan nang -take-over ng pamahalaan ang mga oil at gas fields sa bansa na pag-mamay-ari ng mga dayuhang kumpanya.

Sinabi ni Casino na hindi umano mapapakinabangan ito ng ating mga kababayan dahil ayaw i-develop ng mga kompanyang ito.

Noong taong 2006, ang bansang Pilipinas ay may oil reserve na 138 million barrels, hindi pa kasama ang 30-40 million barrels mula sa Malampaya oil fields, 10-20 million barrels mula sa Galoc oil fields na matatagpuan sa West Linapacan A and B na lahat ay sa lalawigan ng Palawan.

Mayroon din umanong 3.9 trillion cubic feet ng natural gas na nasa Malampaya at 260 million na tonelada ng coal, maliban pa sa unlimited supply ng bansa sa renewable energy gaya ng water, wind at solar energy.

Ibinigay na halimbawa ni Casino ang compressed natural gas o CNG na nasa Malampaya, ngunit hindi umano ipinagpaibayo ng Shell at Chevron ang supply nito sa Pilipinas dahil direkta itong makikipagkumpetensya sa supply na gasoline at diesel sa bansa mula sa kanilang mga mother companies sa ibayung dagat.

Paghain ng annual information ng mga pribadong taxpayer, pinasosuspendi

Iminungkahi ni Cagayan de Oro Rep Rufus Rodriguez na umatras ang bagong Revenue Regulation ng Bureau of Internal Revenue (BIR) para obligahin ang mga pribadong taxpayer na maghain ng kanilang mga annual information kasabay ng income tax return.

Sinabi ni Rodriguez na kahit ipagpaliban ng isang taon ng BIR ang mandatory filing nito/ay labag pa rin sa batas.

Ayon sa kanya, binago lamang daw ng BIR ang pangalan ng annual information ngunit sa katunayan ay ito pa rin ang tinatawag na SALN o statements of assets,liabilities and networth.

Lalabagin lang daw ng regulasyong ito ng BIR ang bank secrecy law dahil sa mga hinihinging impormasyon ng ahensya mula sa mga deposito ng taxpayer sa bangko.

Reaksiyon ito ng kongresista sa ipinalabas na regulasyon ng BIR na dapat mag-file ng SALN ang mga taxpayer na kumikita ng P500 thousand pesos kada taon.

Dahil dito, ikinakasa na ni Rodriguez ang paghahain ng resolusyon para ipatawag ang Department of Finance (DOF) at BIR upang pagpaliwanagin sa Kamara kung ano ang ligal na basehan para ipatupad ito.

Hindi pa rin nawala ang dangal at integridad ng AFP, Aumentado

Naniniwala si Bohol Rep Erico Aumentado na hindi nawala ang integridad at dangal ng Armed Forces of the Philippines (AFP) kahit na nahaharap ito sa masusing pagmamasid ng publiko tungkol sa isyu ng korapsyon at iregularidad.

Sinabi ni Aumentado sa kanyang privilege speech na mayroon umano mga commands, divisions, brigades, battalions, companies, platoons, squads, men and women ang nagsisilbi sa kanilang bayan na mayroong dangal at karangalan.

Binanggit ni Aumentado ang National Development Support Command (NADESCOM) sa pamamahala ni Maj Gen Carlos Holganza na nagpatayo ng mga gusaling paaralan sa lalawigan ng Bohol.

Ayon sa kanya, nagpatayo daw ang NADESCOM ng apatnapung two-classroom school buildings na nagkakahalaga ng P780,000 bawat gusali at ang buong building ay pinturado na may 56-square meter classroom na may toilet, water, electricity, blackboard, steel trusses at heat insolator.

Idinagdag pa niya na nagbigay din ang NADESCOM ng 40 piraso ng armchair para sa mga estudyante ng bawat paaralan sa lalawigan at mga mesa at naman para sa mga guro.

Pinagmalaki ni Aumentado ang matibay na pakikipagtulungan ng Bohol civilian authorities, military at pulis, ang simbahan at civil society sa ilalim ng Team Bohol na siyang naging pangunahing susi para sa matagumpay na pakikibaka nito laban sa kahirapan at insurhensiya sa lalawigan.

Iginagagalak umano niyang malaman na idineklara ng Department of National Defense at ng Philippine National Police ang lalawigan ng Bohol bilang insurgency-free province noong ika-11 ng Pebrero noong nakaraang taon.

Usaping paglalaan ng pondo sa pamahalaan, lalahukan na ng mamamayan

Isinusulong ngayonsa Kamara de Representantes ang pagsasabatas ng panukalang naglalayong magkaroon ng partisipasyon ang mamamayan sa deliberasyon ng paglalaan ng pondo sa pamahalaan nasyunal at maging sa mga lokal na pamahalaan.

Naniniwala si Deputy Speaker at Quezon Rep Lorenzo Tañada III, pangunahing nagsusulong ng HB03773, na susuportahan ng kanyang mga kasamahan sa Kongreso ang kanyang panukala, na naglalayong gawing legal ang partisipasyon ng mga bona fide civil society organizations (CSOs) sa pagdinig at deliberasyon sa mga usaping may kinalaman sa pagpopondo ng pamahalaan.

Tatawaging People’s Participation in Budget Deliberation Act ang panukala na inaasahang pag-uusapan na sa bulwagan sa Kamara at papasa sa ikalawang pagbasa anumang araw sa loob ng buwang ito.

Sinabi naman ni kay CoopNatco Rep Cresente Paez, isa sa mga nagsusulong sa panukala, na kung magkakaroon ng partisipasyon ang mamamayan sa mga usaping pagpopondo sa pamahalaan, magkakaroon ng mas mabisang pagdedesisyon at ang pananagutan sa bayan ng mga namumuno ay mas mabibigyan ng bigat at importansiya.

Batay sa panukala, ang lahat ng People’s Organizations (POs) or Non-Governmental Organizations (NGOs) na kikilalanin ng pamahalaan ay maaaring magsumite ng kanilang mga posisyon at suhestiyon kung papaanong popondohan ang isang programa, aktibidad o proyekto.

Magkakaroon din ng karapatang makakuha ng kopya ng mga panukalang batas at mga suhestiyon kung saan at magkano ang pondo sa isang proyekto, ahensiya at programa na magmumula sa Senado, Kamara at sa lokal na sanggunian.

Karadragang P10,000 burial assistance para sa beterano, aprubado na

Inaprubahan na ikatlo at pinal na pagbasa sa plenaryo ng Kamara de Representantes ng Kongreso ang panukalang batas na magbibigay karagdagang halaga ng salapi mula P10,000 at gagawing P20,000 na ang burial assistance para sa mga beterano.

Sinabi ni Bataan Rep Herminia Roman, chairperson ng House committee on veterans affairs and welfare at may akda ng HB00229 na malaking tulong umano ito para sa pamilya ng Filipino veterans.

Ayon sa kanya, hindi na umano sapat ang P10,000 burial assistance para sa namatay na beterano at sa kanyang pamilya para maibigay ang isang disenteng burol sa isang unipormadong sundalo bilang pagkilala sa kanyang kagitingan sa panahon ng digmaan at kapayapaan.

Sa ilalim ng panukala, ang P20,000 ay ibibigay sa taong tumulong gumastos sa lahat ng bayarin sa punerarya ng namatay na beterano bilang burial assistance sa sandaling maghain ng mga dokumento dalawang taon matapos namatay ang naturang beterano.

Mga retirement benefit, ganap na mapapakinabangan na ng retirado

Mapapakinabangan na ng mga retirado ang kanilang retirement benefits dahil ipag-uutos na labing-limang araw ang itatakda mula araw ng pag-retiro, ang mga ito ay mai-relese na.

Ito ang isinasaad sa HB03862 nina Sorsogon Rep Salvador Escudero, Paranaque Rep Roilo Golez at Capiz Rep Jane Tan-Castro na nagkataong inaprubahan ng Kamara sa ikatlo at huling pagbasa kamakailan lamang.

Layunin ng panukalang ito na suspendihin ng hanggang anim na buwan ang hepe ng alin mang opisina ng pamahalaan na hindi tumupad sa loob ng labing-limang araw na itinakda ang benepisyo subalit hindi naman ito papatawan ng parusa kung may sagabal o hindi makumpleto ang release papers ng retirement benefits.

Kailangang i-sumite ng retiree ang lahat ng dokumento sa Government Service Insurance system (GSIS) anim-napung araw bago sa dumating ang takdang araw ng kanyang retiro.

Ayon kay Escudero ang maagang pagbibigay ng retirement benefits ay para matiyak na mabilis na maibibigay ang nakalaan para sa isang empleyado ng gobyerno.

Sakaling may kasong administratibo na isinampa laban sa empleyado, kailangan muna itong mapawalang-bisa sa loob ng tatlong buwan mula sa takdang araw ng pagre-retiro.

Maipagtatanggol ng Ombudsman ang kanyang sarili

Itinanggi ngayon ni House Speaker Feliciano Belmonte, Jr. ang mga pasaring na sinusuportahan umano niya si Ombudsman Merceditas Gutierrez sa kanyang laban hinggil sa kasong impeachment na pinag-uusapan sa Kamara de Representantes.

Bunsod ito sa lumabas na headline sa isang pahayagan na ang lider ng Kamara ay nasa likod umano ni Gutierrez na mariin naman niyang pinabulaanan sa pagsasabing ito ay isang malaking kasinungalingan.

Sinabi ni Belmonte na sumagot lamang daw siya sa isang tanong kung hihikayatin ba niya si Gutierrez na dumalo sa mga pagdinig sa Kamara bilang pagsunod sa proseso hinggil sa kasong impeachment, sa pamamagitan ng text, na sinagot naman niya na hindi at bahala na daw ito sa depensa niya.

Ayon kay Belomonte, ikinabigla niya ang lumabas na balita at ito ay taken completely out of context at wala umanong konkretong pahayag sa kabuuan ng balita na susuporta siya ayon sa isinasaad ng headline.

Hindi umano ito ibig sabihin na sumusuporta siya kay Gutierrez at ito ay simpleng nagsasabing hindi siya nag-aabugado o pumapayo sa kanya kung ano ang dapat niyang gawin.

Nauna rito, nagsumite si Gutierrez ng Motion for Reconsideration sa Korte Suprema sa desisyon na nagbibigay pahintulot sa Kamara na ipagpatuloy ang pagdinig sa kasong impeachment laban sa kanya.

Pagdadagdag sa sweldo ng mga guro, sinusuportahan

Marami na ang mga mambabatas na nagnanais maitaas ang sweldo ng mga gurong nagtuturo sa pampublikong paaralan sa bansa.

Inihain ngayon ni ACT Teachers partylist Rep Antonio Tinio ang HB02142 na may layuning maitaas ang tinatanggap na suweldo ng mga guro mula sa Salary Grade (SG) 11 at gawin itong SG 15 para mahikayat ang mga guro na manatili sa bansa at ipagpatuloy ang kanilang pagsiserbisyo sa mga kabataang Pilipino.

Nais ni Tinio na makasabay ang karamihan sa mga guro sa bansa sa pagkakaroon ng maayos na buhay kasama na ang kanilang pamilya at pantay na pagpapahalaga tulad ng ibang kawani ng gobyerno na may kaparehong kaalaman, kakayahan at kasanayan.

Ayon kay Tinio sa kasalukuyang sistema, napag-iiwanan ang sweldo ng mga guro kumpara sa ibang posisyon sa ibang sangay ng pamahalaan.

Ang isang lisensiyado at propesyunal na guro na may posisyong entry-level o Teacher I na tumatanggap ng buwanang sweldong P15,645 ay di hamak na mas mababa kaysa sa tinatanggap ng isang high school graduate na pumasok sa Philippine Military Academy o PMA bilang kadete na tumatanggap ng buwanang suweldo na P21,709.

Ang isang pamilya umano na naninirahan sa Maynila ay tinatayang gumagastos ng di bababa sa P957 kada araw o humigit-kumulang sa P21,054 kada buwan, isang malaking kakulangan sa tinatanggap ng mga guro sa kasalukuyan na tumatanggap lamang ng P15, 649 buwanang sahod.

Idinagdag pa ni Tinio ni hindi magiging matagumpay ang layunin ng pamahalaan na mapabuti at mapaunlad ang edukasyon sa bansa kung maiiwanang naghihirap ang mga guro nito.

Dapat lamang daw na bigyan ng pantay na pagpapahalaga ang mga pasilidad, kagamitan at ang mga taong nagpapagalaw at nagpapatakbo ng mga ito tulad ng mga guro.

Ilan pa sa nagsusulong ng katulad na adhikain ay sina Aurora Rep Edgardo Angara at Pampanga Carmelo Lazatin.

Deliberasyon hinggil sa climate change, lalahukan ng mga kabataan

Iminungkahi ni Zamboanga City Rep Maria Isabelle Climaco na bigyan ng mahalagang papel ang mga kabataan sa pagpapatupad ng mga programa hinggil sa pagbabago ng klima.

Layunin ng panukala ni Climaco na maiangat ang kamalayan ng mga kabataan sa pagsusulong ng mga pamamaraan upang matugunan ang epekto climate change sa darating pang mga henerasyon.

Sinabi ni Climaco na ang sektor ng kabataan ang lubhang apektado ng pagbabago ng klima kaya’t nasa kanilang mga kamay ang tugon sa lumalalang suliranin ng kalikasan.

Mahalaga umano ang pakikilahok ng mga kabataan sa pagbalangkas at pagpapatupad ng mahahalagang programa sa pagbabago ng klima kaya’t inihain niya ang HB01711 na naglalayong amiyendahan ang RA09729 o Climate Change Act of 2009 upang ilahok ang mga kabataan sa Climate Change Commission, ang pangunahing ahensiya na namamahala sa mga programa upang matugunan ang problema.

Ayon sa kanya, batay sa prinsipyo ng 1992 Rio Declaration on Environment and Development, ang pagkamalikhain, paninindigan at katapangan ng mga kabataan ng daigdig ay dapat pag-ibayuhin at dapat silang magkaisa tungo sa isang pandaigdigang ugnayan upang makamit ang kaunlaran at matiyak ang magandang kinabukasan para sa lahat.