PANUKALANG PROGRAMA PARA SA NATIONAL UNEMPLOYMENT INSURANCE, INIHAIN

Inihain ni Rep. Stella Luz Quimbo (2nd District, Marikina City) ang House Bill 490, o ang “PhilJobs Act of 2020,” na naglalayong protektahan ang ekonomiya at mga manggagawa na natanggal sa trabaho, sa pamamagitan ng pagtatatag ng National Unemployment Insurance Program (NUIP). 

Layunin rin ng panukalang NUIP na magbahagi ng ayuda sa mga manggagawa sa panahon na wala silang trabaho, upang maiwasan ang malakihang pagkawala ng kita, at tiyakin na ang antas ng konsumo ay hindi gaanong nababawasan. 

Sa paliwanag na nakasaad sa panukala, sinabi ni Rep. Quimbo na may pangangailangan na itaas ang katatagan sa ekonomiya ng bansa, bilang paghahalintulad sa pandemyang dulot ng COVID-19, na katibayan na ang paglalaan ng pondo ng pamahalaan ay hindi epektibo sa pamamahagi ng malawakang proteksyon sa lipunan. 

Ipinaliwanag rin niya na ang pangangailangan ng NUIP ay malinaw dahil ang kasalukuyang mga programa sa pamamahagi ng unemployment assistance ay maaaring ilarawan na magulo, hindi inklusibo at limitado. 

Layon ng HB 490 na limitahan ang mga benepisyo ng basic unemployment insurance ng hindi lalagpas sa tatlong buwang kabayaran, na katumbas ng 80 porsyento ng sahod ng isang manggagawa. 

Layon rin nitong magbahagi ng mga karagdagang benepisyo sa pamamagitan ng pagsasanay, training allowances at job counselling. 

Isinusulong rin ng panukala na lumikha ng Philippine Job Insurance Corporation (PhilJobs) na siyang mamamahala at magpapatupad ng NUIP. 

Ang mga miyembro ng Social Security System (SSS) at Government Service Insurance System (GSIS) ay otomatikong sakop ng programa. Samantala, ang mga manggagawa na hindi miyembro ng SSS o GSIS, kabilang na ang mga nasa informal sector ay hihimukin na sumapi sa NUIP, sa pamamagitan ng mga insentibo at makabagong diskarte.

PAGTATATAG NG E-GOVERNMENT, ISINUSULONG NI DS SINGSON-MEEHAN

Isinusulong ni House of Representatives Deputy Speaker at Ilocos Sur Second District Rep. Kristine Singson-Meehan ang pagtatatag ng Electronic Government o E-Government, na mangangailangan ng paggamit ng information at communications technology (ICT) ng pamahalaan, at ng publiko na magdadala ng episyente, wasto, may pananagutan at malinaw na paglilingkod ng pamahalaan. 

Sinabi ni Singson-Meehan na ang inihain niyang House Bill 11856, o ang panukalang “E-Government Act,” ay sumusuporta sa pamunuan ng Kapulungan, sa kanilang pagsisikap na itugma sa mga layunin ng administrasyon sa paggamit at kapakinabangan ng ICT, upang iangat ang pagiging episyente at produktibo sa paghahatid ng pampublikong paglilingkod ng pamahalaan. 

Sa panahon ng pandemyang dulot ng COVID-19, sinabi niya na napilitan ang pamahalaan na mag-imbento, upang makapamahagi lamang ng mga pangunahing pangangailangan ng mga Pilipino, at ang mga mamamayan ay nagsimulang pasalamatan ang kaginhawahan at kaluwagan ng kapakinabangan ng serbisyong digital ng pamahalaan, malayuan at online. 

Iminamandato ng panukala sa Department of Information and Communications Technology (DICT) ang paglikha at pagsusulong E-Government Master Plan, upang mahikayat ang kagalingan sa pagpapairal ng lahat ng serbisyo at proseso ng E-Government. 

Isasama sa master plan ang mga programa tulad ng: 1)  Philippine Government Interoperability Framework; 2) Archives and Records Management Information System; 3) Philippine Government Online Payment System; 4) Citizen Frontline Delivery Services; 5) Public Financial Management; 6) Procurement System; 7) Inventory and purchase of hardware and software of all government offices; 8) Utilization of servers, network connections and data centers in all government offices; at 9) Security, disaster recovery plans and archiving considering existing services. 

Ang kalihim ng DICT ang siyang mamumuno sa inisyatiba ng E-Government at ang implementasyon ng master plan nito.

LIBRENG LEARNING MATERIALS AT SCHOOL SUPLIES SA PUBLIC SCHOOL, ITINULAK SA KAMARA

Ipinupursige ni Manila Teachers party-list Rep. Virgilio Lacson ang panukala na bigyan ng libreng learning materials at school supplies ang lahat ng mga estudyante sa mga pampublikong paaralan.

Sa kanyang House Bill 2670, sinabi ni Lacson na mas may magandang learning experience ang mga estudyante na mayroong gamit sa pag-aaral.

Ayon sa kanya, sa pag-aaral ng Kids in Need Foundation noong 2017, lumabas na mayroong kaugnayan ang libreng school supply sa kakayanan ng guro na epektibong maturuan ang kanyang mga estudyante.

“The presence of free school supplies creates a more equitable classroom, where no student will feel ostracized because of poverty,” sabi ng solon.

Sa ilalim ng panukala, ang Department of Education (DepEd) ang tutukoy kung anong learning materials at school supplies ang kailangan para sa mga estudyante mula sa kinder hanggang Grade 12.

Ang kakailanganing pondo ay isasama sa taunang national budget.

TANYAG NA ATLETA NG BANSA, NAMAYAPA NA

Nagpaabot ng taos-pusong pakikiramay si Speaker Martin G. Romualdez sa pamilyang iniwan ng retirado at tanyag na atleta ng bansa na si Lydia de Vega, isang sprinter na pumanaw kahapon, Miyerkules, sa edad na 57.

“Lydia de Vega was one of the greatest and the most decorated Filipino athletes. She brought honor and pride to our country by winning numerous medals in the Southeast Asian Games, Asian Games and Asian Athletics Championships. She was called Asia’s fastest woman after ruling the 100-meter dash in the 1982 and 1986 Asian Games,” ani Romualdez.

"Her death highlights the need for our government and the private sector to support Filipino athletes not only while they are healthy and physically able to compete but in retirement as well," ayon sa pinuno ng Kapulungan.

"Our prayers and thoughts are with Lydia de Vega’s family at this most difficult time," dagdag pa niya.

NAGSUSUSTINING KAUNLARAN SA AGRI-FORESTRY SA LAHAT NG UPLAND COMMUNITIES, ISINUSULONG NG MAMBABATAS

Matapos masaksihan ang tagumpay sa kanya mismong lalawigan, isinusulong ngayon ni Rep. Eddiebong Plaza (2nd District, Agusan del Sur) ang Upland Sustainable Agri-Forestry Development (USAD) Program sa lahat ng mga lalawigan, lungsod, at mga munisipalidad na may upland communities. 

Sa privilege hour sa sesyon ngayong Miyerkules, ibinahagi ni Plaza kung papaano ang USAD ay nakatulong sa sektor ng agrikultura sa Agusan del Sur na lumipat sa, “from planting crops to growing people” sa pamamagitan ng pagbibigay ng mga kagamitan at kapangyarihan sa mga magsasaka, imbes na paasahjin sila sa mga ayuda. 

Ipinaliwanag niya na ang programang USAD ay isang komprehensibong balangkas na naglalayong iangat ang kabuhayan ng mga mahihirap sa upland communities sa pamamagitan ng mga probisyon ng mga maaasahang pakikialam sa kabuhayan, imprastraktura, kalusugan, at serbisyong suporta sa lipunan, at iba pa. 

Ang programa ay magbibigay-daan sa mga mahihirap na upland communities na mabilis na makaahon mula sa mga kalamidad, makalahok sa pangangalaga sa kalikasan at malabanan ang kahirapan. Binanggit ng mambabatas ang na kasalukuyan nitong inaalalayan ang may 5,000 farmer-enrollees, at siyang naging dahilan sa pagbabawas ng kahirapan sa Agusan del Sur mula sa 45 porsyento noong 2016 sa 32.4 porsyento noong 2018. 

Dahil dito, sinabi ni Plaza na siya, kasama si Rep. Alfelito “Alfel” Bascug (1st District, Agusan del Sur), kamakailan ay naghain ng panukala na magtatatag ng upland sustainable agri-forestry development sa lahat ng upland agricultural lands sa buong kapuluan. 

Pinagunahan nina Deputy Speakers Kristine Singson-Meehan at Camille Villar ang sesyon sa plenaryo ngayong araw.

KALIGTASAN NG MGA MAG-AARAL AT MGA GURO SA PAGBABALIK ESKWELA, NAIS MATIYAK SA ISINAGAWANG PAGDINIG NG KOMITE

Nagsagawa ngayong Miyerkules ng organizational meeting ang Komite ng North Luzon Growth Quadrangle na pinamumunuan ni Ilocos Norte Rep. Angelo Marcos Barba, gayundin ang briefing ng Department of Education (DepEd) sa: 1) paghahanda nito para sa pagsasagawa ng face-to-face classes simula sa ika-22 ng Agosto, at 2) ang lawak ng pinsalang dulot ng lindol kamakailan, sa mga gusali ng paaralan sa mga rehiyon ng Hilagang Luzon. 

Binibigyang-daan din ng Komite ang Department of Public Works and Highways (DPWH) na ipakita ang mga iminungkahing plano at programa nito para sa FY 2023 para sa Hilagang Luzon. 

Sa kanyang pambungad na pananalita, hinimok ni Barba ang lahat na tiyakin ang ligtas na pagbabalik ng mga mag-aaral at guro. 

“May this day be meaningful as we would like to know the post-disaster assessment of North Luzon schools and infrastructure, the probability that we are now ready to conduct face-to-face classes again for the sake of our students and teachers, and most especially, our concrete actions towards this aim. 

Hindi natin kailanman magiging solusyon ang isa pang panibagong lockdown,” aniya. 

Dagdag pa ni Barba, sapat na ang sakripisyo ng mga estudyante at guro sa loob ng dalawang taon. 

“Let us all give our youth the freedom to enjoy their childhood with their friends and peers and most especially their right to education,” aniya. 

Sa kanyang ulat sa Komite, sinabi ni Estela Carino, EdD., CESO III, Department of Education Regional Director para sa Cordillera Administrative Region, na sa CAR, nakalap ang mga ulat mula sa mga pinuno ng paaralan tungkol sa kahandaan ng mga paaralan sa pagsisimula ng F2F na mga klase para sa school year 2022-2023. 

Nagsagawa rin ng inspeksyon at validation kung saan nalaman na karamihan sa mga paaralan ay may ligtas na silid-aralan para sa mga klase sa F2F. Para sa mga paaralang natagpuang hindi ligtas para sa F2F, iniulat ni Cariño na nakahanda ang mga bukas na gym para pansamantalang gawing silid-aralan. 

Sinabi niya na humiling din sila ng mga tolda mula sa UNICEF para sa mga pansamantalang silid-aralan, habang ang mga bagong itinayong ligtas na paaralan ay ibabalik para magamit sa mga klase sa F2F. 

Ang iba pang mga interbensyon ay: 1) agarang pagkukumpuni, kung maaari, para sa maliliit na pinsala, 3) bukas na mga klase sa pamamagitan ng distance learning, hybrid learning, 3) paggamit ng mga social hall at gymnasium kung idineklara na ligtas, at 4) kahilingan para sa pagtatayo ng slope protection sa protektahan ang integridad ng istruktura ng gusali ng paaralan, at iba pa. 

Para sa mga paaralang walang pinsala, sinabi niya na magkakaroon ng limang araw na personal na pagsunod sa F2F ng mga protokol sa kalusugan, tulad ng social distancing at hand sanitation. 

Kasama sa CAR ang lalawigan ng Abra, na naging sentro ng magnitude 7 na lindol na tumama sa Hilagang Luzon noong ika-27 ng Hulyo 2022. 

Samantala, sinabi ni Dr. Benjamin Diaz-Paragas, CESO III, DepEd Region 2 Regional Director, na sa kanilang lugar, ililipat ng Regional Office sa pamamagitan ng Schools Division Offices and Schools ang learning modalities sa alinman sa mga sumusunod na opsyon: 1) limang araw ng mga personal na klase; 2) pinaghalong paraan ng pag-aaral; at 3) full distance learning. 

Panghuli, sinabi ni Tolentino Aquino, DepEd Regional Director para sa Rehiyon 1, na ang kanilang pisikal na paghahanda para sa pagbubukas ng paaralan ay ginawa sa pamamagitan ng: 1) Brigada Eskwela, 2) Learning Recovery Plan na kinabibilangan ng class programming sa pamamagitan ng a) five-day in-person classes kada linggo , b) pinaghalo na pag-aaral, at c) buong distansya na pag-aaral; at 3) pagsuri sa katayuan ng pagbabakuna.

NAPIPINTONG JOINT VENTURE NG ABS-CBN AT TV5, PINASISIYASAT NI REP. MARCOLETA NTC

Nanawagan ngayon si Sagip Party-list representative Dante Marcoleta sa National Telecommunications Commission na  busisiin  ang napipintong  joint venture ng ABS-CBN at TV 5.

Sa panayam ng Radyo Pilipinas,  iginiit ni Marcoleta na marami silang nakitang  paglabag sa ikinakasang  merger ng dalawang kumpanya.

Dismayado ang kongresista sa kawalang aksyon dito ng NTC, sa kabila ng mga inihaing resolusyon para ito’y maimbestigahan.

Duda ang partylist representative na gusto itong pagtakpan ng nasabing ahensya.

Dagdag pa ni Marcoleta, bukod  sa NTC, kailangan ding dumaan ang planong  merger sa pagsusuri ng Philippine Competition Commission para matiyak na  nasusunod ang proseso.

ILANG PANUKALANG BATAS INAPRUBAHAN NG KOMITE SA UNANG PAGTITIPON; DEPED NAGBIGAY NG UPDATE SA PAGBUBUKAS NG ESKWELA

Naging masagana ang araw para sa Komite ng Basic Education at Culture ng Kapulungan ng mga Kinatawan ngayong Miyerkules, sa ginanap na organizational meeting nito. Inaprubahan ng Komite na pinamumunuan ni Pasig Rep. Roman Romulo ang ilang bersyon ng mga panukala, na inaprubahan ng Kapulungan sa ikatlo at huling pagbasa nang nakalipas na ika-18 Kongreso. 

Binanggit ni Romulo ang Section 48 ng House Rules ng ika-18 Kongreso na pinagtibay ngayong ika-19 Kongreso, sa pag-apruba ng mga panukalang batas. 

Nakasaad sa Section 48 na, “In case of bills or resolutions that are identified as priority measures of the House, which were previously filed in the immediately preceding Congress and have been approved on third reading, the same may be disposed of as matters already reported upon the approval of majority of the Members of the committee present, there being a quorum.” 

Inaprubahan ang House Bill 561 na inihain ni ACT TEACHERS Rep. France Castro; HB 636 ni Albay Rep. Joey Sarte Salceda, HB 932 ni Romulo, HB 1348 ni Tarlac Rep. Christian Tell Yap, HB 1928 ni ANG PROBINSIYANO Rep. Alfred Delos Santos at HB 2466 ni Cagayan de Oro City Rep. Rufus Rodriguez; HB 929 ni Romulo; HBs 931 ni Romulo at HB 1097 ni Camarines Sur Rep. Luis Raymund Villafuerte Jr.; at HB 930 ni Romulo. Kikilalanin ng HB 561 ang taunang pagdiriwang ng World Education Support Personnel Day at idedeklara ang ika-16 ng Mayo ng bawat taon bilang National Education Support Personnel Day sa Pilipinas. 

Ang HBs 636, 932, 1348, 1928 at 2466 ay magtatatag ng mga pampublikong paaralan sa hinaharap sa teknolohiya. 

Palalakasin ng HB 929 ang pagtataguyod at paghahatid ng mga serbisyo sa mental health sa edukasyong elementarya, habang ang HBs 931 at 1097 ay magtatatag ng Philippine High School para sa Creative Arts System. Samantala, papalitan ng HB 930 ang Literacy Coordinating Council (LCC) sa National Literacy Council. Inaprubahan din ng panel ang mga iminungkahing tuntunin para sa Komite ng Basic Education at Culture para sa 19th Congress. 

Sa sumunod na briefing ng Department of Education, tinalakay ni Undersecretary Epimaco Densing III ang tungkol sa pagbubukas ng klase, kung ano ang ginagawa ng ahensya upang matugunan ang mga alalahanin sa mga gusali ng paaralan, sa mga lugar na tinamaan ng kalamidad, gayundin ang kanilang mga prayoridad sa lehislatura.

DAGDAG NA PONDO PARA SA PAGSASAAYOS NG MGA NASIRA NG LINDOL NA MGA ESKUWELAHAN, HINILING SA KAMARA

Umapela ng dagdag na pondo ang Dept of Education  para sa pagsasaayos ng mga nasirang eskuwelahan.

Sa unang pulong ng House Committee on Basic Education ang Culture, sinabi ni Education Usec. Epimaco densing na para pa lamang sa mga lugar na tinamaan ng lindol sa northern Luzon kakailanganin ng P1.7 billion pesos.

Pero sa kabuuan, lagpas sa P40 billion na ang kailangang budget para maisagawa ang repair sa lahat ng calamit hit school na hindi napondohan mula pa noong 2015 hanggang 2016.

Batay pa aniya sa kanilang mga datos sa nakalipas na limang taon, nag-a-average ang halaga ng mga eskuwelahan na nasisira ng kalamidad ng hanggang P5 hanggng P6 billion kada taon.

Bunsod naman ng kakulangan sa pondo, lalo na ang kanialng quick response fund na inilalaan para sa school repair ay nagkaroon na ng backlog o naipon na mga eskuwelahan na hindi pa rin napapa-ayos.

Aniya sa kanilang huling konsultasyon sa DBM, para 2023, paglalaanan ng P5.9 billion na pondo ang pagtatayo ng mga bagong paaralan, P1.5 billion ang para sa repairs at P2 billion ang para sa kanilang Quick Response Fund.

##

MGA UPUAN AT LAMESA NA BIGONG BILHIN NG DEPED KAHIT NAPUNDUHAN NA, PINA-AAKSIYUNAN

Kaugnay sa nakatakdang pagbubukas ng klase sa susunod na linggo ay nanawagan si CamSur Representative LRay Villafuerte kay Vice President and Education Secretary Sara Duterte-Carpio na aksyunan ang report ng Commission on Audit o COA.

Ito ay kaugnay umano sa kabiguan ng Department of Education sa ilalim ng nakaraang administrasyon na ayusin at lagyan ng sapat na mga upuan at lamesa ang 75% sa halos 11,500 mga silid-aralan na pinondohan ng P9.5 billion. 

Binanggit ni Villafuerta na base sa COA report, bigo ang DepEd na bilhin ang mahigit 553,000 na mga lamesa at upuan para sa mga estudyante sa elementarya at sekondarya at sa mga guro noong 2021.

Sabi ni Villafuerte, nasa COA report din na hindi natupad na mabigyan ang kanyang lalawigan na Camarines Sur ng mahigit P451 million pesos para sa repair ng 1,405 classrooms sa 296 paaralan sa  35 minusipalidad.

Bukod dito, nakasaad din sa COA report na 571 o 59.29% lamang sa  963 projects kaugnay sa electrification at installation ng solar panels sa mga pampublikong paaralan noong 2020 ang naisakatuparan.

Diin ni Villafuerte, malinaw sa COA report na hindi nakamit ang target ng Basic Education Facilities Fund o BEFF program na nakapaloob sa 2021 budget.

#####

MATIBAY NA ISTRATEHIYANG UGNAYAN SA JAPAN, MULING TINIYAK NI SPEAKER ROMUALDEZ

Tiniyak ngayong Martes ni Speaker Martin G. Romualdez sa Embahador ng Japan sa Pilipinas na si Koshikawa Kazuhiko, at ng kanyang mga kasama, na ang Pilipinas ay patuloy na magiging kaakibat ng Japan sa usapin ng istratehiyang pang-ekonomiya.

“It’s really great that Japan remains and has been one of the country’s foremost trade, investment and development partner for a very long time. Through strategic policy reforms, we will improve the business climate in the Philippines to attract more direct investments from Japan,” ani Romualdez.

Nag courtesy call si Ambassador Koshikawa kay Romualdez sa Kapulungan ng mga Kinatawan ngayong hapon. 

Kasama ng Embahador sina Kuronuma Kenji, Senior Representative ng Japan International Cooperation Agency (JICA); Akihiko Hitomi, First Secretary; at Yukari Koike,

Political Officer.

Tinalakay nina Romualdez at Embahador Koshikawa ang mahabang bilateral at relasyong inter-parliamentaryo sa pagitan ng Pilipinas at Japan, at nangakong mas lalo pang paiigtingin ang kanilang ugnayan, at palalawigin ng dalawang bansa ang kooperasyon.

 

Noong 2021, ang kabuuang kalakalan ng bansa sa Japan ay umabot sa US$21.83-bilyon, na tumaas ng 17.1 porsyento, mula sa halaga noong 2020 na US$18.65-bilyon, upang maging ikalawang pinakamalaking trading partner ng Japan ang Pilipinas noong 2021.

Ang export at import ay nagkakahalaga ng US$10.73-bilyon at US$18.65-bilyon, ayon sa pagkakasunod. Kumpara sa antas ng 2020, ang export ay tumaas ng 7 porsyento, at ang import ay tumaas ng 28.9 porsyento.

Pinasalamatan din ni Romualdez ang pamahalaan ng Japan sa pamamagitan ng JICA para sa "immediate response in providing humanitarian assistance” sa Pilipinas, matapos na manalanta ang nakaraang lindol sa Hilagang Luzon.

“We deeply appreciate the aid provided and acknowledge the strong cooperation with Japan on humanitarian assistance and disaster response,” aniya.

Ipinaabot rin ni Speaker ang taos-pusong pakikiramay sa pagpanaw ni dating Japan Prime Minister Shinzo Abe.

Pumanaw si Abe noong ika-8 ng Hulyo. Siya ay 67 taong gulang.

Nauna nang pinagtibay ng Kapulungan ang House Resolution (HR) No. 121 na pangunahing iniakda nina Speaker Romualdez, House Majority Leader at Zamboanga City Rep. Manuel Jose "Mannix" M. Dalipe, House Minority Leader at 4Ps party-list Rep. Marcelino Libanan, at senior Deputy Majority Leader at Ilocos Norte Rep. Ferdinand Alexander Marcos, na nagpapaabot ng taimtim na pakikidalamhati sa maybahay ni dating Prime Minister Abe na si Akie Abe, kay Prime Minister Fumio Kishida at sa mamamayan ng Japan. #

“NO CONTACT APPREHENSION POLICY,” PINASUSUSPINDI AT PINAREREBISA NG MAMBABATAS

Tinalakay ni Rep. Robert Ace Barbers (2nd District, Surigao del Norte) sa kanyang privilege speech ngayong Martes, ang 'No Contact Apprehension Policy' (NCAP), at nanawagan sa Kapulungan na agad itong suspindihin upang rebisahin ang pagpapairal nito. 

Binanggit niya na bagama’t kapuri-puri ang bagong polisiya, ay mas marami pang katanungan kesa kasagutan ang nararanasan sa implementasyon ng NCAP. 

Sinabi ni Barbers na maraming dapat linawin sa implementasyon ng NCAP, tulad ng kung saang ahensya ang dapat na namamahala ng mga regulasyon sa trapiko ng National Capital Region (NCR). 

Kinuwestyon rin niya kung may sapat bang karatula at mga babala sa lansangan, at kung may kakayahan ba ang mga camera nito na makunan ang mga umano’y lumalabag, ang kanilang mga numero ng plaka sa gabi o sa kasagsagan ng malakas na ulan. 

Bukod pa rito, tinanong niya rin kung ang violation citations ba ay iniisyu sa mga sasakyan ng gobyerno.

 "With these questions, I ask the leadership (to) initiate actions to immediately effect the suspension of this NCAP until we have answered the questions to the satisfaction of the public," ani Barbers. 

Samantala, sinabi ni Rep. Franz Pumaren (3rd District, Quezon City), dating Konsehal at pangunahing may-akda ng NCAP sa Lungsod ng Quezon, na ang polisiya ay sumailalim sa masusing konsultasyon sa mga nagsusulong sa lokal na pamahalaan ng Lungsod Quezon. 

Naniniwala rin siya na madidisiplina ng NCAP ang mga motorista, at hindi aniya dapat na mag-alala ang mga motorista kung susunod lamang sila sa mga pangunahing batas sa pagmamaneho. 

Subali’t sang-ayon rin siya kay Barbers na dapat rebisahin ang pagpapatupad ng NCAP bago ito ipatupad sa buong kapuluan. 

"The Honorable Barbers is right, we really have to fine-tune everything especially if we are going to adopt it on a national level. So konting polishing na lang Mr. Speaker," ani Pumaren.

ESPESYAL NA KOMITE SA ENERHIYANG NUKLEAR, BINUO NG KAPULUNGAN

Binuo ngayong Martes ng Kapulungan ng mga Kinatawan sa pamumuno ni Speaker Ferdinand Martin Romualdez ang Espesyal na Komite sa Enerhiyang Nuklear at hinirang si Pangasinan Rep. Mark Cojuangco bilang Tagapangulo nito. Binubuo ng 25 kasapi, ang bagong tatag na Komite ay naatasang talakayin ang "lahat ng mga usaping direkta at pangunahin na may kaugnayan sa mga polisiya at programa sa produksyon, paggamit, at pag-aalaga ng enerhiyang nuklear, kabilang ang pagpapaunlad ng imprastraktura ng kapangyarihang nuklear, pati na rin ang pakikipag-ugnayan sa iba pang pinagmumulan ng enerhiya na may enerhiyang nuklear na maaasahan, matipid, at ligtas sa kapaligiran upang matiyak ang seguridad ng enerhiya na naaayon sa pambansang interes at polisiya ng pamahalaan ng may kalayaan mula sa mga sandatang nuklear.” 

Sa kanyang manipestasyon, ipinaliwanag ni Cojuangco na ang enerhiyang nuklear ay pinanggagalingan ng enerhiya na mura, malinis, at maaasahan anuman ang kondisyon ng panahon. 

Tiniyak niya na gagawin ng kanyang Komite ang bahagi nito sa pagpapaalam sa publiko hinggil sa kahusayan at benepisyo ng enerhiyang nukleyar, gayundin sa paggawa ng mga panukalang batas na maaaring makatulong para sa pagtatayo ng mga plantang nuklear sa bansa. 

Samantala, inamyendahan naman ng Kapulungan ang hurisdiksyon ng Komite ng Enerhiya, na nasasaad na: “All matters directly and principally relating to the exploration, development, utilization or conservation of energy resources, including the development and utilization of alternative and renewable energy sources and the entities involved in energy or power generation, transmission, distribution and supply, excluding nuclear energy and its sources and infrastructures.” 

Nahalal naman sa araw na ito si Mandaue City Rep. Emmarie “Lollipop” Ouano-Dizon  bilang Tagapangulo ng Komite ng People’s Participation. 

Ang hybrid na sesyon ay pinangunahan nina Deputy Speakers Kristine Singson-Meehan at Vincent Franco “Duke” Frasco.

MGA PANUKALANG PASADO NA NOONG 18TH CONGRESS, PINAGTIBAY NG KOMITE SA KAMARA

Ilang panukala ang mabilis na lumusot sa unang pulong ng House Committee on Basic Education and Culture.

10 panukala ang inaprubahan ng komite matapos ang mga ito ay lumusot na sa ikatlo at huling pagbasa noong 18th congress.

Salig ito sa Rule 10 Section 48 ng House Rules kung saan ang isang house bill na pinagtibay sa 3rd reading sa nakalipas na kongreso ay maaaring aprubahan agad ng Komite at isalang na sa plenaryo.

Ilan sa mga panukalang ito ang HB 561 o Pagkakaroon ng National Education Support Personnel Day, HB 929 o pagpapalakas ng mental health service sa ma paaralan sa pamamagitan ng pagkuha ng dagdag na mental health professionals at limang panukala na nagsusulong ng isang public schools of the future in technology; 2 panukala para sa pagtatatag ng Philippine High School for the Creative Arts System at HB 930 na layong palitan ang National Literacy council bilang Literacy Coordinating Council at palakasin ito.

##

MATAAS NA BANK TRANSFER FEES, BINATIKOS NI REP SALCEDA

Sa gitna ng mataas na presyo ng bilihin ay binatikos ni House Ways and Means Chairman at Albay, 2nd district Representative Joey Salceda ang mataas na bank transfer fees.

pangunahing inahilambawa ni Salceda ang singil sa paggamit ng  Instapay at PesoNet, gayundin ang paglilipat ng pera sa magkakaparehong bangko o interbank transfer systems at maging ang pera na "for pick-up" ay pinapatawan pa ng 100 pesos.

Dismayado si Salced na labis kung maningil ang mga bangko gayong walang garantiya kung ligtas ang sistema nila para sa bank transfer.

Pinaalala ni Salceda na ilang buwan ang nakakalipas ay marami ang nabiktima o nawalan ng pera sa kanilang online account sa ilang mga banko.

Dahil dito ay iginiit ni Salceda sa Bangko Sentral ng Pilipinas o BSP na tuludukan ang pagmamalabis ng mga bangko sa paniningil kaugnay sa mga transaksyon sa kanila ng publiko partikular sa paglilipat o pagwithdraw ng pera.

Hiling ni Salceda sa BSP, lagyan ng limitasyon ang halaga ng bank transfer fees.

Kaakibat nito ay nanawagan din Salceda para sa agarang pagpasa ng mga inihain niyang panukala na Virtual Banking Act at Financial Technology Development Act.

########

PANUKALANG PAGTATATAG NG DEPARTMENT OF SPORTS, MULING BINUHAY SA KAMARA

Muling binuhay ni 1-PACMAN Party-list Rep. Mikee Romero ang panukalang pagtatatag ng Department of Sports.

Sa ilalim ng kanyang House Bill 335, bubuwagin na ang Philippine Sports Commission at sa halip ay magtatag ng ahensya na tututok sa larangan ng palakasan sa bansa.

Naniniwala ang kongresista na panahon na ngayon para sa gobyerno na unahin ang sports sa pambansang agenda, at isaalang-alang ang sports bilang mahalagang bahagi sa pagbuo ng bansa.

Ang DOS ang mangunguna sa pagpapatupad ng mga polisiya sa pagsulong at pagpapaunlad ng mga programa sa palakasan, health fitness programs gayundin ang mga kung paanong mapagbubuti pa ang performance sa mga international competition.

Maglalatag din ito ng solusyon sa kinahaharap na mga problema ng Philippine sports partikular ang kawalan ng isang komprehensibong national sports program, ugnayan sa pagitan ng iba’t ibang sektor, obsolete o luma nang training methods pati na ang kawalan ng dekalidad na training equipment at facility.

P500 million ang ipinapanukalang pondo para sa initial na pagtatatag ng DOS na kukunin sa national treasury habang ang mga susunod na funding ay isasama na sa taunang pambansang pondo.

##

PABABALIK NG LTO SA DATING INFORMATION TECHNOLOGY PROVIDER NITO, PINASISIYASAT

Pinapa-imbestigahan ni Bagong Henerasyon Party-list Rep. Bernadette Herrera sa Kamara ang plano ng Land Transportation Office o LTO na bumalik sa dati nitong Information Technology o IT provider.

Nababahala si Herrera na ang nasabing hakbang ng LTO ay paatras at maaring magresulta sa mas mahal na singil sa mga motorista at may-ari ng mga sasakyan at maaring magdulot ng mas mabagal na transaksyon.

Sa isinagawang konsultasyon ay nabatid ni Herrera mula sa mga key stakeholders na mas pabor sila sa kasalukuyang IT provider ng LTO dahil hindi na ito sumisingil ng interconnectivity fees para sa motor vehicle registration, driver’s license transactions, gayundin sa law enforcement and traffic adjudication service transactions.

Pero ayon sa LTO, may mga glitches ang kasaluyang IT system nito na ayon naman sa mga reports mula sa field ay bunga ng human interventions at manual overrides na ginagawa ng mga tauhan mismo ng ahenya.

Tinukoy ni Herrera na Simula noong 2018, Dermalog Identification Systems na ang IT systems provider ng LTO na may 27-taong  track record sa biometrics at data security, at may operasyon din sa Singapore, Malaysia, Thailand, Vietnam, Indonesia, at India.   

Ang dati namang IT provider ng LTO ay ang Stradcom Corporation na nakakuha umano ng multi-bilyong pisong halaga ng kontrata mula 1998 hanggang 2016 at hanggang ngayon ay bigo pa ring magturn oveer sa ahensya ng database ng mga motorista.

#####

BAGONG PHILIPPINE BUILDING ACT, ISINUSULONG SA KAMARA

Pinabibigyang prayoridad ni Bulacan 6th District Rep. Salvador Pleyto sa Mababang Kapulungan ng Kongreso ang pagpapatibay sa bagong Building Act ng bansa.

Kasunod na rin ito ng pagtama ng magnitude 7 na lindol sa Abra at iba pang lugar sa Northern Luzon noong July 27.

Sa privilege speech ng kinatawan nitong Lunes, hinimok ni Pleyto ang kanyang mga kapwa mambabatas na iprayoridad ang pagpasa ng kanyang House Bill 1180 na layong palitan ang Presidential Decree 1896 at magtatag ng bagong Philippine Building Act.

Sa ilalim ng panukala, magtatakda ng mga regulasyon sa pagpaplano, disenyo, konstruksyon, paninirahan, maintenance, at paggiba ng mga gusali, kabilang ang pagsusulong ng katatagan ng mga gusali laban sa mga lindol, sunog, baha, pagguho ng lupa, bagyo, pagputok ng bulkan at iba pa.

Ayon sa kongresista, bagamat walang kapangyarihan ang tao na baguhin o ipahinto ang isang natural phenomenon tulad ng lindol, ay maaari naman paghandaan kung paano maiwasan ang matinding pinsala at pagkasawi ng buhay.

Paalala pa ni Pleyto na makailang beses nang nagbabala ang Philippine Institute of Volcanology and Seismology na ang West Valley Fault mula sa Bulacan hanggang Lungsod ng Quezon at silangang bahagi ng Kalakhang Maynila, hanggang Laguna at Cavite ay maaaring yumanig anumang sandali, dahil gumagalaw aniya ito kada ika 400 na taon.

Huli itong gumalaw noong 1658 o 359 na taong nakalipas.

##

KARAGDAGANG PONDO PARA SA 4PS, HINILING SA KAMARA

Hinimok ni Senior Deputy Minority Leader Paul Daza ang kanyang mga kasamahang mambabatas na ikonsidera ang pagdaragdag ng pondo para sa Pantawid Pamilyang Pilipino Program o 4Ps.

Sa gitna ito ng delisting ng nasa 1.3 million Filipino households na umano’y ga-graduate na sa programa.

Sa privilege hour ng Kamara kahapon, hinikayat ni Daza ang mga kapwa kongresista na itaas ang alokasyon ng 4Ps pagsapit ng 2023 budget deliberation upang mas maraming pamilya ang mabenepisyuhan.

Ipinunto ng kinatawan na noong State of the Nation Address ng Pangulong Ferdinand Marcos Jr ay inilatag nito ang planong pagpapababa sa poverty incidence ng hanggang 9 percent pagsapit ng 2028.

Bunsod nito, mas maraming family beneficiaries pa aniya ang dapat na maipasok sa 4Ps.

Kasabay nito ay hinimok ng Northern Samara representative ang House leadership na pangunahan ang pag-convene sa Joint Congressional Oversight Committee upang siyasatin ang napipintong delisting ng family beneficiaries ng programa at iba pang isyu para sa mas maayos na implementasyon ng 4Ps.

##

PANUKALANG ITURING NA KRIMEN ANG PAGGAWA AT PAGPAPAKALAT NG FAKE NEWS, INIHAIN SA KAMARA

Inihain sa Mababang Kapulungan ang isang panukalng pbatas na layong ituring na krimen ang paggawa at pagpapakalat ng fake news.

Sa House bill 2971 ng mag-asawang Malabon Rep. Veronique Lacson-Noel at An Waray Rep. Florencio Noel, aamyendahan ang RA 10175 o Cybercrime Prevention Act.

Bahagi ng amyenda ay ang pagturing sa fake news bilang isa sa gawain na maaaring patawan ng parusa salig sa RA 10175.

Bunsod nito, ang parusa na nakasaad sa Cybercrime Law ang susunding parusa para sa mga gumagawa at nagpapakalat ng pekeng balita.

Diin ng dalawang kinatawan sa paghahain ng panukala, hindi maaaring palagpasin ang misinformation at disinformation na anila’y lumalason sa isip ng publiko sa pamamagitan ng pagbaluktot sa katotohanan.

Sa kasalukuyan ang umiiral na batas laban sa fake news ay nakapaloob sa Article 154 ng revised penal code na inamyendahan noong 2017.

Batay dito ang parusa para sa mga nagpapakalat ng fake news ay pagkakakulong hindi bababa sa anim na buwan at multa na aabot sa ₱40,000  hanggang ₱200,000.

##

MGA LOKAL NA OPISYAL NG LUNGSOD NG SAKAI, JAPAN BUMISITA SA KAPULUNGAN NG MGA KINATAWAN

Tinanggap ngayong Lunes ng Kapulungan ng mga Kinatawan, sa pamumuno ni Speaker Ferdinand Martin Romualdez ang mga lokal na opisyal ng Lungsod ng Sakai, Japan, na pinamumunuan ni Mayor Masahiro Hashimoto. 

Ang mga Japanese local officials ay mga bisita ni Rep. Marjorie Ann Teodoro (1st District, Marikina City), kung saan ang lungsod ay kasalukuyang nakikipag partner sa ilalim ng isang Memorandum of Agreement (MOA). 

Malugod na tinanggap nina House Inter-Parliamentary and Public Affairs Department (IPAD) Deputy Secretary General (DSG) Atty. Gracelda Andres at House Inter-Parliamentary Relations and Special Affairs Bureau (IPRSAB) Executive Director Lourdes Rajini Rye ang 16 na delegado sa House North Wing Lobby patungo sa Bulwagan ng Kapulungan, na kung saan ay kanilang sinaksihan ang aktuwal na sesyon sa plenaryo. 

Nagbigay din ng mainit na pagbati si Senior Deputy Majority Leader Ferdinand Alexander Marcos sa kanila sa sesyon. 

Samantala, naghandog naman ang mga delegadong Hapon ng regalo bilang alaala ng pasasalamat kina Speaker Romualdez at Majority Leader Manuel Jose Dalipe. 

Bilang kapalit ay naghandog naman si Rep. Teodoro ng mga lokal na produkto, bilang regalo sa mga opisyal ng Lungsod ng Sakai. Noong 2019, ang Lungsod ng Sakai ay naghandog ng ambulansya na may Advance Life Support (ALS) system sa Lungsod ng Marikina bilang donasyon.