-TAMPERING NG MGA DONASYON PARA SA TYPHOON ODETTE, DAPAT SIYASATIN — BARBERS

Hinimok ni Surigao del Norte Rep. Robert Ace Barbers ang pamahalaang nasyunal na siyasatin ang mga napaulat na diumano ay tampering o pagre-repack ng mga donasyon galing sa mga pribadong indibidwal para sa mga biktima ng super-typhoon “Odette” na isinasagawa ng mga lokal na pulitiko.

Sinabi ni Babers na ang mga relief goods ay nire-repack ng mga naturang tiwaling politiko na may mga marka ng kani-kanilang mga pangalan.

Dahil dito, hinimok ni Barbers ang Department of the Interior and Local Government (DILG), ang Department of Social Welfare and Development (DSWD), at ang Presidential Anti-Corruption Commission (PACC) na magsagawa ng pasisiyasat hinggil sa mga ulat na ito na ayon sa kanya ay mga beripikadong totoo batay sa mga gumagamit ng social media.

Idinagdag ng mambabatas na sa sandaling mapruweba ang mga ito, dapat sampahan kaagad ng kaso ang mga nasangkot na mga politiko dahil ginagamit nila ang typhoon aid para sa kanilang kapakanan at personal na bentahe.

-UMABOT NA SA 19 NA KATAO ANG NAIULAT NA PATAY SA SIARGAO DAHIL SA BAYONG ODETTE — CONG MATUGAS

Iniulat ni Surigao del Norte 1st District Rep. Francisco Matugas II na pumalo na sa 19 ang bilang ng mga nasawi sa Siargao Island dahil sa bagyong Odette.

Sinabi ni Matugas na ang numerong kanyang nakamtan, batay sa impormasyon na nakarating sa kanya ay 19.

Nang tanungin siya kung may mga turista ba sa isla na naging biktima ng bagyo, sinabi ni Matugas na nasa 600 na ang nakalabas ng Siargao matapos ma-trap dahil kay Odette at meron pa segurong nasa humigi’t kumulang 1,000 pa ang domestic tourists na na-trap din doon.

Dahil dito, nananawagan siya na sana ay makapagpadala ang pamahalaang nasyunal ng mga food packs, potable water at ang pika-importante ay ang kanilang masisilungan o shelter dahil 90% ng mga tao daw doon at wala nang bahay. 

Kasalukuyan ay wala pa rin umanong suplay ng kuryente sa naturang sikat na tourist spot.

-E-SABONG, LULUNURIN SA UTANG ANG MGA OFW AT KANILANG PAMILYA — FORMER SPEAKER CAYETANO

Nagbabala si dating House Speaker Alan Peter Cayetano noong Huwebes na malulunod sa utang ang mga overseas Filipino workers (OFWs) at kanilang mga pamilya dala ng e-sabong.

Ito ay sa gitna ng diberasyon ng Senate Committee on Public Service tungkol sa application para sa 25-taong prangkisa ng e-sabong operator na Lucky 8 Star Quest Inc. nito lamang ika-9 ng Disyembre, mahigit-kumulang tatlong buwan pagkatapos aprubahan ng Kamara ang nasabing panukala.

Sinabi ni Cayetano na nababahala siya sa kapakanan ng mga OFW ngayong mayroon nang e-sabong na magkakaroon ng mga bankrapsiya sa ating mga OFW at sa kanilang mga pamilya.

Ayon sa kanya, madaling maging adik sa e-sabong dahil ito ay on-line at kahit saang lugar ay magagawa ito ng kahit sino.

Samantala, sinabi naman ni Senate Public Services Committee Chair Senator Grace Poe na mas nanaiisin niyang sumailalim ang panukalang e-sabong franchise sa isang technical working group (TWG) para makita kung ano nga ba ang mga problemang idudulot nito sa pamayanan.

“I’m very concerned about the 

well-being of OFWs now that e-sabong is here. As long as there is e-sabong, there will be waves of bankruptcies among our OFWs and their families,” sabi ng dating Speaker.

“It’s so easy to get addicted to it because it’s online. Anyone can do it anywhere,” dagdag pa niya.

Sinang-ayunan naman ng dating Speaker ito dahil ayon sa kanya, dapat makita muna kung ano ang katumbas na epekto ng e-sabong sa pamilyang Pilipino.

Dagdag pa niya na milyon-milyong pamilya ng OFW na dati rati’y financially stable ay naapektuhan ang kita dahil sa pandemya.

“One of the reasons why I’m adamant against e-sabong is that many families are going through tough times right now, many people have lost jobs or are waiting for their contracts to be renewed, and do we just let this kind of gambling become more entrenched by giving franchises to operators?” aniya.

Binanggit din ni Cayetano ang ilang mga balita na may mga batang nalulong sa e-sabong na nagresulta ng pagkalunod nila sa utang o kaya nama’y sa suicide.

Madali aniya itong mangyari sa mga OFW na na-retrench o sa kanilang mga mahal sa buhay na nasa bahay lamang dahil sa mga paghihigpit sa pandemya.

Matagal nang tutol ang dating Speaker sa pag-apruba ng mga prankisa para sa mga e-sabong operators sa Kamara pa lamang.

Sa isang press conference noong ika-2 ng Disyembre, kinwestyon ni Cayetano ang pag-apruba ng 25-taong prangkisa sa e-sabong nang wala man lang pag-aaral kung paano ito makakaapekto sa lipunan.

“Bakit mo bibigyan ngayon ng full access o full authorization ng 25 years ang e-sabong na hindi mo pa nakikita kung eto talaga ay nakakabuti o nakakasama or neutral sa ating society. Kung ako tatanungin mo, gusto ko i-revoke din ng PAGCOR yung license,” aniya.

Sa kasalukuyan, ang Philippine Amusement and Gaming Corporation (PAGCOR) ang humahawak sa mga e-sabong operators sa Pilipinas, at nakapag-bigay na ito ng lisensya sa mahigit-kumulang pitong outlets. ####

-PRIBADONG SEKTOR, DAPAT BIGYAN NG PAPEL SA PROGRAMA NG PAGBABAKUNA LABAN SA COVID-19

Upang mapanatili ang momentum ng pagbabakuna laban sa COVID-19, hinihimok ni Speaker Lord Allan Velasco ang pambansang pamahalaan na humanap ng posibilidad na mabigyan ang pribadong sektor ng mas malawak na papel sa programa ng pagbabakuna laban sa nakamamatay na coronavirus. 

Sinabi ni Velasco na ang pambansang pamahalaan ay maaaring magsimula sa pamamagitan ng pagrerepaso at pagrerebisa ng polisiya sa pagbili ng bakuna laban sa COVID-19 upang bigyang-daan ang pribadong sektor na direktang makabili sa mga pabrikante.

 

Ayon sa kanya, dahil mayroon nang sapat na suplay ng ligtas at epektibong COVID-19 vaccines globally, panahon nang ikonsidera ng pamahalaan na payagan ang private sector na direktang makipag-ugnayan sa mga manufacturer upang maseguro  ang isang mas sustainable at dependable na suplay ng bakuna para mga mamamayan.

 

Alinsunod sa Republic Act 11525 o ang COVID-19 Vaccination Program Act of 2021, ang mga pribadong kumpanya at mga yunit ng lokal na pamahalaan (LGUs) ay pinahihintulutan na makabili ng mga bakuna at gamitin ito para sa mga hindi inaasahang pangyayari sa pamamagitan ng isang tripartite na kasunduan sa mga pabrikante at pambansang pamahalaan, na kinakatawan ng Department of Health (DOH) at ang National Task Force Against COVID-19 (NTF).

 

Sinabi ni Velasco, na siyang pangunahing may-akda ng RA 11525 sa Kapulungan ng mga Kinatawan, na bukas siya sa pag-amyenda sa batas para mapayagan ang mga pribadong kumpanya na direktang bumili ng mga bakuna para sa kanilang mga kawani at mga dependent. Sinabi ng pinuno ng Kapulungan na pumayag din siyang ilipat ang ilang mga responsibilidad at tungkulin sa programa ng pagbabkuna laban sa COVID-19 mula sa pambansang pamahalaan patungo sa mga LGU.

 

Ipinahayag din ni Velasco na ang pagbibigay sa pribadong sektor ng pahintulot na direktang bumili ng mga bakuna laban sa COVID-19 ay "makakagaan sa pasanin ng pamahalaan sa pondo nito lalo na sa pagbili ng bakuna at pangangasiwa nito ay nangangailangan ng maraming mga hamon sa logistik."

“By granting the private sector greater participation in the vaccination campaign, the government can focus its resources on the inoculation of frontliners, uniformed personnel and vulnerable sectors,” sabi ni Velasco.  “The amount the government will save can be channeled to efforts to help economic recovery post-pandemic,” dagdag niya.

Dahil sa mataas na antas ng kahusayan ng pribadong sektor, sinabi ni Velasco na ang higit na pakikilahok nito sa pagbabakuna laban sa COVID-19 ang magpapahusay sa mga pagsisikap ng pamahalaan upang matiyak ang mabilis at mahusay na paglulunsad ng mga magagamit na bakuna.

 

Samantala, hinimok ni Velasco ang DOH at NTF na isapubliko ang anumang kanilang matutuklasan kung gaano tatagal ang kaligtasan mula sa sakit ng mga bakuna laban sa COVID-19.

“They should inform the public how long a certain vaccine brand lasts so that people would know when they get a booster or get inoculated again,” sabi ni Velasco.

Nauna nang pinuri ni Velasco ang pambansang pamahalaan para sa agresibo nitong pagsusumikap sa pagbabakuna, na nagresulta sa napakalaking pagbaba ng mga bilang ng impeksyon sa COVID-19, partikular sa National Capital Region kung saan ang ilang bilang ng mga residente ay ganap na nabakunahan. Binati rin niya ang administrasyong Duterte sa matagumpay na paglulunsad ng National COVID-19 Vaccination Days, na kung saan may karagdagang 9.9 milyong Pilipino ang nabakunahan mula Nob. 29 hanggang Disyembre 3. Ang programa ng pagbabakuna ay magkakaroon ng pangalawang paglulunsad sa Dis. 15 hanggang 17. #

-IMPLEMENTASYON NG LIMITADONG FACE-TO-FACE CLASSES NG DEPED, TINALAKAY NG KOMITE

Tinalakay kahapon Huwebes ng Committe on Basic Education and Culture sa Kamara na pinamumunuan ni Pasig City Rep. Roman Romulo ang mga resolusyon na nagpapatupad ng mga klaseng face-to-face sa mga paaralan sa sentro ng lungsod at kanayunan. 

Ang mga resolution nina Quezon City Rep. Alfred Vargas at Romulo na nanawagan ng pagsisiyasat sa iminungkahing pagpapatupad ng blended and distance learning at humimok sa Department of Education (DepEd) at ang Department of Health (DOH) na isaalang-alang ang pagpapatupad ng mga klaseng face-to-face sa mga sentro ng lungsod ang tinalakay ng Komite.

Nagbigay naman ng pangkalahatang ideya si DepEd Assistant Secretary Malcolm Garma sa patuloy na pagpapatupad ng DepEd sa limitadong face-to-face na mga klase.

Aniya, pumili ang DepEd ng humigit-kumulang 277 pampublikong paaralan at 20 pribadong paaralan na kabilang sa pagpapatupad at nagsimula umano sila sa inisyal na 100 public schools noong nakaraang buwan habang ang karagdagang 177 mga eskuwelahan ay nagsimula nitong linggong ito.

(partikular na ang limitado at kontroladong face-to-face na mga klase para sa mga praktikal na pagsasanay sa mga paaralan.

alinsunod sa mga kondisyong itinakda sa ilalim ng DepEd Memorandum No. 071, serye ng 2021 o ang Preparations for the Pilot Face-to-Face Expansion and Transitioning to New Normal.

Samantala, hinihimok ng HR 2387 ni Romulo ang Department of Education (DepEd) at ang Department of Health (DOH) na isaalang-alang ang pagpapatupad ng mga klaseng face-to-face sa mga sentro ng lungsod, alinsunod sa mga kondisyong itinakda sa ilalim ng DepEd Memorandum No. 071, serye ng 2021 o ang Preparations for the Pilot Face-to-Face Expansion and Transitioning to New Normal.)

Gayunpaman, batay sa mga ulat na nakuha nila mula sa kanilang mga regional director, sa 177 karagdagang paaralan, 165 lamang na pampublikong paaralan ang nakapagsimula at nagpatupad ng kasalukuyang face-to-face na mga klase.  

Para naman sa mga pribadong paaralan, sinabi ni Garma na 18 ang nakasali sa isinasagawang implementasyon.  

Aniya, binabalak ng DepEd na wakasan ang pansamantalang pagpapatupad sa katapusan ng Disyembre ng taong ito at gawing batayan ng kanilang ulat at rekomendasyon sa Tanggapan ng Pangulo ang mga natuklasan sa kanilang pag-aaral para sa posibleng pagpapalawak ng pagpapatupad nito sa unang bahagi ng susunod na taon.

Sa tanong ni Romulo tungkol sa kahulugan ng pagpapalawak, sinabi ni Garma na ang pagpapalawak ay mangangahulugan ng mas maraming paaralan at mas maraming antas ng baitang na makakasali sa yugto ng pagpapalawak, depende sa maaaring maging sitwasyon ng pandemyang dulot ng COVID-19 sa panahong iyon. 

Subalit, iginiit ni Garma na ang pagpapalawak ay mangyayari lamang kung papayagan sila ng Tanggapan ng Pangulo at ito ay ibabase sa kanilang mga isinumiteng ulat sa pansamantalang pag-aaral.

Tinanong naman ni Deputy Minority Leader Stella Luz Quimbo si Garma kung mayroon ba silang naging pagsusuri sa pilot study. 

“Kelan natin malaman ang assessment based on the pilot study at kelan lalabas ang recommendation for a potential rollout of face-to-face classes,” tanong niya. 

Sinabi ni Garma na mayroon silang lingguhang pagsusuri para sa lahat ng paaralan na nagpapatupad ng limitadong face-to-face na mga klase.  

Dagdag pa niya, nasa proseso sila ng pangangalap ng lahat ng impormasyon at datos gamit ang kanilang mga kasangkapan sa pagsubaybay at pagsusuri.  

“Once we gather all these information and data, iko-consolidate namin ito together with our analyses and together with the recommendation of what possible adjustments can be done as a way of recommending to the Office of the President the direction for the expansion phase,” ani Garma.

Sinuspinde ng Komite ang deliberasyon sa mga resolusyon habang nakabinbin ang pagsusumite ng impormasyon at datos na hiniling nila mula sa DepEd. 

Samantala, inaprubahan ng Komite ang HB 911 na inihain ni Iloilo City Rep. Julienne Baronda. Layon ng panukalang batas na gawing integrated school ang Nabitasan Elementary School sa Barangay Nabitasan, Lapaz, Iloilo City at kikilalanin bilang Nabitasan Integrated School.

 

#SpeakerLordAllanVelasco

#SpeakerLAV

-PAGSIYASAT SA PAGKAMATAY NI PMMA CADET JONASH BONDOC, IPINAGPAPATULOY NG KOMITE SA KAMARA

 Ipinagpatuloy noong nakaraang Martes ng Komite ng Higher and Technical Education sa Kapulungan ng mga Kinatawan na pinamumunuan ni Baguio City Rep. Mark Go ang kanilang pagsisiyasat sa pagkamatay ni Philippine Merchant Marine Academy Cadet 4th Class Jonash Bondoc sa ilalim ng mga kuwestiyonableng pangyayari sa loob ng PMMA, gayundin ang mga polisiya sa pagpasok at pagsasanay, mga kasanayan, proseso, at mga tradisyon, opisyal o hindi opisyal na sinusunod ng mga opisyales ng mga kadete doon.

Ang pagsisiyasat ay batay sa House Resolution 1953 na inihain ni Agusan del Norte Rep. Lawrence ‘Law’ Fortun. 

Sinabi ni Go sa Komite na ang susunod na pagdinig ay isang executive session kung saan ay hihilinging tumestigo ang mga kadete. 

Ipinahayag din ni Go ang pangangailangan na mag-anyaya ng bihasang psychologist na maaaring makapagbigay ng liwanag sa mga isyung pinag-uusapan.

Sinabi ni Fortun na sa kabila ng mahigpit na batas ng bansa laban sa hazing, ang mga kaganapan - pagkamatay ng mga kadete o estudyante sa pamamagitan ng hazing - ay patuloy na nangyayari kahit pagkatapos ng pagkamatay ni Bondoc. 

Samantala, para protektahan at isulong ang kapakanan ng mga alagang hayop sa bahay, inaprubahan ng Komite ang House Bill 9804, na nagtatatag ng isang ospital ng beterinaryo sa Southern Luzon State University (SLSU) campus sa Catanuan, Quezon.

Inaprubahan din ng Komite ang HB 10203, na naglalayong magtatag ng College of Veterinary Medicine sa Bicol University sa Ligao, Albay. Nagpahayag naman ng kanilang suporta sa dalawang panukala ang pangulo ng Philippine Association of State Universities and Colleges (PASUC) na si Dr. Tirzo Ronquillo at Commission on Higher Education (CHED) Region 5 Director Freddie Bernal, gayundin ang iba pang nagsusulong.

Si Deputy Speaker Evelina Escudero ang nagmosyon upang aprubahan ang HBs 9804 at 10203, na sinang-ayunan at pinagtibay ng Komite. Matapos ang pag-apruba sa HB 9804, inalam ni Albay Rep. Joey Salceda kay SLSU's Doracie Zoleta-Nantes (ANU College of Asia and the Pacific) ang bilang ng mga beterinaryo sa bansa. Ipinahayag naman ni Bicol University president Dr. Arnolfo Mascarinas na mayroon lamang mahigit na 10,000 beterinaryo sa Pilipinas, at mayroon namang mahigit na 20 beterinaryo lamang sa Albay.

 

#SpeakerLordAllanVelasco

#SpeakerLAV

-PANUKALANG MANDATORYONG PAGPAPAREHISTRO NG MGA SIM CARD, LUSOT NA SA KAMARA

Inaprubahan kahapon (Lunes) ng Kamara, sa ilalim ng pamumuno ni Speaker Lord Allan Velasco, sa ikatlo at huling pagbasa ang panukalang “Subscriber Identity Module (SIM) Card Registration Act.”

Ang panukala ay naglalayong tulungan ang mga ahensyang nagpapatupad ng batas sa pagsubaybay sa mga delingkuwenteng gumagamit ng mga mobile phone na may post-paid at pre-paid na mga SIM card upang ituloy ang mga masasamang gawain tulad ng pagkidnap para ipatubos at maliliit na krimen tulad ng pagnanakaw.

Ito ay magtatatag ng isang sistema ng Pagbebenta at Pagpaparehistro ng mga SIM Card para sa lahat ng mga gumagamit sa pamamagitan ng pagrerehistro ng kaugnay na datos sa isang pamamaraan na itinakda para sa layunin nito.

Inaprubahan din ng Kapulungan sa ikatlo at huling pagbasa ang HB 4553, na mag-aamyenda sa Article 70 ng Revised Penal Code. Nakakuha ang panukala ng 167 pabor na boto, pito na negatibo, at walang abstensyon. 

Aalisin nito ang 40-taong pinakamatagal na panahon ng pagkakakulong tulad ng nakasaad sa nasabing Artikulo upang matiyak na mabibigyan ng hustisya ang mga Pilipinong biktima at ang kanilang mga pamilya.

Ang iba pang mga panukalang batas na inaprubahan sa ikatlo at huling pagbasa ay ang: 1) HB 9981, na nagdedeklara sa mga maritime zone sa ilalim ng hurisdiksyon ng Republika ng Pilipinas at 2) HB 10521, na nagpapalakas ng propesyonalismo at nagtataguyod ng pagpapatuloy ng mga polisiya at mga inisyatiba sa modernisasyon sa Sandatahang Lakas ng Pilipinas. 

Ang hybrid na sesyon ngayong araw ay pinangunahan ni Speaker Velasco, gayundin nina Deputy Speaker Isidro Ungab, Bernadette Herrera, at Divina Grace Yu.

 

#SpeakerLordAllanVelasco

#SpeakerLAV

-KINALABASAN NG MGA HAKBANG NG SUMMIT SA PANDAIGDIGANG KLIMA, TINALAKAY NG KAPULUNGAN

Nagmeeting ang Committee on Climate Change sa Kamara, na pinamunuan ni Bohol Rep. Edgar Chatto kahapon, upang talakayin ang resulta ng 26th Session of the Conference of Parties (COP26) to the United Nations Framework Convention on Climate Change (UNFCCC) na isinagawa sa Glasgow, Scotland, United Kingdom. 

Ang COP26, na idinaos mula ika-30 ng Oktubre hanggang ika-13 ng Nobyembre 2021, ay isang summit sa mga hakbangin sa pandaigdigang pagbabago ng panahon. 

Ayon kay Chatto, ang mga delegado ng Pilipinas sa COP26 ay pinamunuan ng Department of Finance (DOF), kasama ang mga kinatawan mula sa Department of Foreign Affairs (DFA), Department of Energy (DOE), at Department of Environment and Natural Resources (DENR), na nagpahayag sa Komite sa kinahinatnan ng COP26. 

Sinabi ni Chatto na sa idinaos na kumperensya, dalawang Pilipino ang pinapurihan dahil sa ginampanan nilang mahalagang bahagi sa summit ng klima.

Sina Atty Vicente Paolo Yu III at Depatment of Energy Undersecretary Felix pinapurihan sa William Fuentebella ang dalawang nabanggit na Pilipinong pinapurihan sa COP26.

“One was lawyer Vicente Paolo Yu III, the lead negotiator for the G77 and China group. The other was former member of the House and current undersecretary of the DOE, Usec. Felix William, Fuentebella who is here with us today,” ani Chatto. 

Sinasabing silang dalawa ay tumulong upang hubugin ang plataporma na tinawag na SantiagoNetwork, na naglalayong tumulong na tugunan ang mga nawala at napinsala, na naranasan ng mga umuunlad na bansa dahil sa mga bagyo, pagtaas ng lebel ng karagatan at iba pang mga panganib dulot ng klima. 

Ang unang nagprisinta sa kinalabasan ng talakayan sa COP26 ay si DOF Undersecretary Mark Dennis Joven, na sinundan ni Fuentebella, at nina DFA Assistant Secretary Roberto Manalo at DENR Chief Albert Magalang ng Climate Change Information and Technical Support Division. 

Tinalakay ng mga tagapagsalita ang paninindigan ng Pilipinas sa pinansya sa klima; paghahalaw, pagkawala at pinsala; Artikulo 6 ng Paris Agreement; Glasgow Work Programme on Action for Climate Empowerment; pangunahing resulta ng COP26 na nakalinya at naaayon sa paninindigan ng Pilipinas; 1.5 Centigrade Paris Goal; at ang pagsusuri sa mga resulta ng COP26, at iba pa. Samantala, pinagtibay ng Komite ang pinag-isang House Resolution 2355 na inihain ni Laguna Rep. Ruth Mariano-Hernandez at HR 2365 ni AN-WARAY Rep. Florencio Noel. 

Pinupuri at binabati ng dalawang resolusyon si Brikko Iyanev Martillo Dumas sa kanyang pagwawagi sa DIGITALART4CLIMATE Art Contest for Climate Change sa 26th Session of the COP26 to the UNFCCC.         

#SpeakerLordAllanVelasco

#SpeakerLAV

-AGARANG PAGSARA NG MGA BORDER NG PILIPINAS, MAS MAKABUBUTI SA BANSA LABAN SA OMICRON — TADURAN

 Pinuri ni ACT-CIS Partylist Representative Rowena Niña Taduran ang agarang aksyon ng pamahalaan kaugnay ng bagong Omicron variant ng Covid-19. 

Sinabi nI Taduran na ang agarang pagsasara ng mga border ng Pilipinas sa mga biyahero mula sa mga bansang may mataas na impeksyon ng Omicron variant ay makakatulong para maiwasang makapasok ang bagong variant ng Covid-19 sa bansa. 

Labing-apat na bansa ang nakalista ngayon sa pulang listahan kung saan ang mga biyahero mula rito ay pagbabawalang makapasok sa bansa. 

Tutulungan naman ng pamahalaan na makabalik sa bansa ang mga Pilipinong mata-trap sa mga bansang ito.

[(“Yes, the action of the government will hurt tourism and the businesses related to the industry, but it’s better to keep the infection at bay. This is also a wake up call for everyone to be on guard and protect oneself by following health protocols and getting the Covid-19 vaccine,” ayon kay Taduran. 

“We live in a precarious time and we have to think of the welfare of the entire populace. 

The World Health Organization  studies say that as long as the COVID-19 virus continues to infect unvaccinated people, it will keep mutating,” dagdag ni Taduran.)]

-30-

-PANUKALANG MAG-UUTOS SA MGA LGU NA MAGLAAN NG 15% PARA SA SERBISYONG PANGKALUSUGAN, PASADO NA SA KAMARA

Ipinasa na ng Kamara de Representantes sa ikatlo at pinal na pagbasa noong nakaraang Martes ang panukalang nag-uutos sa lahat ng mga probinsya, lungsod, bayan, at barangay na maglaan ng hindi bababa sa fifteen percent (15%) ng kanilang bahagi sa national tax allotment para sa serbisyong pangkalusugan. 

 

Pinasalamatan ni Quezon Rep. Angelina “Helen” Tan, Chairperson ng Committee on Health ang principal author ng House Bill 10392 na si Speaker Lord Allan Velasco at ang liderato ng Kamara sa pagpasa ng panukala.

Sa ilalim nito, ang lahat ng local government units (LGUs) ay kailangang maglaan mula sa kanilang taunang national tax allotment ng hindi kukulangin sa fifteen percent (15%) para sa health services, kasama rin dito ang pagbibigay ng libreng gamot para sa mga mahihirap na Pilipino – isang inisyatiba na ipinaglaban ni Tan.

Sinabi ng solon na kasama sa local development initiatives, ay ang pagbibigay ng dekalidad at abot-kayang serbisyong pangkalusugan na lubhang mahalaga lalo na sa harap ng kinakaharap nating COVID-19 pandemic.

 

Kanyang ipinaliwanag na ang House Bill 10392 ay naglalayong amendahan ang Section 287 ng Local Government Code (LGC) of 1991 upang tiyakin ang paglalaan ng hindi bababa sa 15% ng annual national tax allotment para sa health services ng lahat ng LGUs bilang paghahanda sa mas malaking gampanin ng mga lokal na pamahalaan sa pagbibigay ng serbisyong pangkalusugan kasunod ng Mandanas-Garcia ruling.

Ang 15% ng annual national tax allotment para sa health services ay hiwalay sa pondong ibinibigay sa ilalim ng kasalukuyang development projects tulad ng isinasaad sa ilalim ng LGC at Special Health Fund (SHF), isang bahagi ng Universal Health Care Act (UHC).

 

Ayon kay Tan, “Ang pandemya ay nagbigay diin sa kahalagahan ng mga LGUs na manguna sa pagpapatupad ng UHC sa bansa at ang bawat lider sa lokal na pamahalaan ay kailangang kilalanin na ang pagbibigay serbisyong pangkalusugan ay isang estratehikong tungkulin na kailangang gampanan at tugunan dahil ito ay lubhang mahalaga para sa pag-unlad ng lipunan.#