Pagbuwag ng PASG, isinusulong sa Kamara

Ipinukala ni Albay Rep Al Francis Bichara na buwagin na ang Presidential Anti-Smuggling Group (PASG) dahil sa malawakang korapsiyon at hayagang pag-abuso sa tungkulin imbes na sugpuin ang smuggling at puksain ang korapsiyon sa bansa ay naging sanayan at itlugan ng mga tiwali at walanghiyang opisyales at kawani ang tanggapan ng PASG.

Sa isang privilege speech, sinabi ni Bichara na napakarami ng reklamo ang ipinupukol laban sa PASG mula sa mga lehitimo at mararangal na negosyante na nagbibigay buhay sa ekonomiya ng bansa at kabilang sa mga reklamo ang suhol, pangingikil at pangongotong.

Ayon kay Bichara, sa katunayan ay nagsasagawa sa kasalukuyan ng strike ang mga customs brokers at truckers associations para sa pagsibak kay PASG chief Antonio Villar at nagbabala rin ang mga ito na paparalisahin nila ang kanilang operasyon sa Cebu, Mactan, Davao at General Santos upang maipaabot ang kanilang protesta laban sa PASG.

Naging biktima rin umano siya sa pang-aabuso ng PASG nang isama nito ang apat niyang sasakyan noong Disyembre 2007 sa imbestigasyon at kalaunan ay kinumpiska ng walang kadahilanan o kaukulang ebidensya.

Mga may-ari ng kolorum na sasakyan, binalaang ikulong

Mga may-ari ng mga pampasaherong sasakyan na walang prangkisa o ang tinatawag na kolorum, sapol kapag naisabatas ang HB06691 ni party-list Rep Vigor Mendoza na may layuning magtataas ng multa mula P200 hanggang P100,000.

Sa ilalim ng panukala, papatawan din ng parusang pagkabilanggo ng hindi bababa ng anim na taon ang sinumang mapapatunayang nagkasala at ito ay magsisilbing babala sa mga lumalabag at hikayatin ang mga lehitimong operator na maglaan ng karagdagang sasakyan.

Sinabi ni Mendoza na matagal nang problema ang kolorum sa mga lansangan kung kayat ang panukalang ito ang tutugon upang maisaayos ang trapiko at madagdagan din ang kita ng mga lehitimong nagmamaneho ng pampasaherong sasakyan, gayun na rin ang kaligtasan ng mga mananakay.

Ang iligal na gawain ng kolorum ay lubhang nakakaapekto umano sa ekonomiya at dahil dito, lumaganap umano ang gawaing pangongotong at suhulan sa hanay ng mga nagpapatupad ng batas trapiko.

Ayon kay Mendoza, sagabal din umano ito sa pagpaplano ng lokal na pamahalaan sa pagsasaayos ng trapiko sa kanilang mga nasasakupan at bukod sa hindi nagbabayad ng buwis ang ito, napakababa rin ng kaparusahang ipinatutupad batay sa RA04136 o ang Land Transportation and Traffic Code na P200 lamang at suspensyon ng lisensya.

Sa ilalim ng bagong batas, hindi maaaring matubos ang sasakyang nasangkot sa paglabas mula sa nanghuli nang walang pahintulot mula sa hukumang may hawak ng kaso, suspensyon ng lisensya ng nagmaneho at rehistrasyon ng behikulo sa loob ng isang taon.

Pagbuwag ng PASG, isinusulong sa Kamara

Ipinukala ni Albay Rep Al Francis Bichara na buwagin na ang Presidential Anti-Smuggling Group (PASG) dahil sa malawakang korapsiyon at hayagang pag-abuso sa tungkulin imbes na sugpuin ang smuggling at puksain ang korapsiyon sa bansa ay naging sanayan at itlugan ng mga tiwali at walanghiyang opisyales at kawani ang tanggapan ng PASG.

Sa isang privilege speech, sinabi ni Bichara na napakarami ng reklamo ang ipinupukol laban sa PASG mula sa mga lehitimo at mararangal na negosyante na nagbibigay buhay sa ekonomiya ng bansa at kabilang sa mga reklamo ang suhol, pangingikil at pangongotong.

Ayon kay Bichara, sa katunayan ay nagsasagawa sa kasalukuyan ng strike ang mga customs brokers at truckers associations para sa pagsibak kay PASG chief Antonio Villar at nagbabala rin ang mga ito na paparalisahin nila ang kanilang operasyon sa Cebu, Mactan, Davao at General Santos upang maipaabot ang kanilang protesta laban sa PASG.

Naging biktima rin umano siya sa pang-aabuso ng PASG nang isama nito ang apat niyang sasakyan noong Disyembre 2007 sa imbestigasyon at kalaunan ay kinumpiska ng walang kadahilanan o kaukulang ebidensya.

Lumabag din daw ang PASG sa pagbibigay ng pahintulot sa mga taong gumanap ng mga tungkuling nakalaan lamang sa mga kawani ng tanggapan.

Sa katunayan pa nga, dagdag pa ng solon, may listahan umano siya ng mga non-government personnel kasama ang ilang broker at maging ang mga fixer na nag-inspeksyon ng mga kargamento kahit wala itong mga legal na karapatan.

Dapat na umanong buwagin ang PASG dahil wala nang silbi ang tanggapang ito at ang kanilang tungkulin ay maaaring nang gampanan ng Bureau of Customs (BOC) na mas mapagkakatiwalaan at may kakayahang ipairal ang matapat at malinis na paglilingkod.

Insentibo para makapagparehistro sa COMELEC, isinusulong sa Kamara

Gagawaran ng isang araw na bakasyon na may sweldo ang mga manggagawa na boboto sa kauna-unahang pagkakataon upang mabigyan sila ng oportunidad na makapagparehistro para sa eleksiyon sa darating na taong 2010.

Isinulong ngayon ni Kabataan party-list Rep Raymond Palatino ang HR01336 na mag-uutos sa Department of Labor and Employment (DOLE) na magpalabas ng kautusan sa mga publiko at pribadong kompanya, na gawaran ng isang araw na bakason na may sweldo ang mga kawani upang mahikayat silang magparehistro bago matapos ang itinakdang petsa.

Ayon sa mambabatas, kailangang mahikayat ang mga botante na agad na magparehistro sa Commission on Elections (COMELEC) dahil sa paglilimita sa panahon ng rehistrasyon mula sa orihinal na petsang itinakda sa ika-15 ng Disyembre, sa ika-30 ng Oktubre, 2009 na lamang.

Ipinapalagay ng mambabatas na hindi makakaapekto sa ekonomiya ang panukala dahil hindi naman aniya gaanong marami ang bilang ng mga kawani na boboto sa kauna-unahang pagkakataon. Tinatayang aabot sa 5 milyon ang magpaparehistro para sa halalan sa 2010, at ito kinabibilangan ng mga mag-aaral at mga mamamayan sa mga komunidad at iba’t ibang tanggapan.

Sinabi ni Palatino na ang mga kawani na boboto sa kauna-unahang pagkakataon ay walang panahon upang magparehistro dahil sa pagtupad nila sa kanilang mga tungkulin at sa kanilang paglabas mula sa kanilang mga pinagtatrabahuhan ay sarado na rin ang mga tanggapan ng COMELEC.

Batay sa mga datos, target ng COMELEC na makapagrehistro ng 3 milyong botante mula sa tinatayang 5 milyong bagong mga botante, ngunit sa huling taya ay mayroon pa lamang 841,200 ang nakakapagparehistro.

Responsibilidad umano ng DOLE na tiyaking makakaboto ang mga manggagawa sa darating na halalan at hindi maipagkait ang kanilang mga karapatang bumoto dahil lamang sa paglilimita at pinaigsing panahon para sa rehistrasyon.

Mababang turn-out ng mga dating absentee voting, bubusisihin ng Kamara

Nais alamin ng ilang mga mambabatas na kasapi ng House Committees on Suffrage and
Electoral Reforms, Foreign Affairs at Overseas Workers Affairs kung bakit napakababa ng bilang ng mga Filipinong nagtatrabaho sa ibayong dagat ang nakaboto noong mga taong 2004 at 2007.

Sa HR01298 na inihain nina party-list Rep Jonathan A. Dela Cruz at Ilocos Norte Rep Ferdinand “Bongbong” Marcos nais nilang ipabusisi sa mga komite ang dahilan ng mababang bilang ng mga nakaboto, upang makapagbalangkas ang Kamara ng mga panukala upang matiyak na hindi mapagkakaitan ang mga manggagawa ng kanilang karapatang makaboto kahit sila ay nakadestino sa ibang bansa.

Sinabi ni Marcos na batay sa mga datos ng Commission on Filipinos Overseas at ng POEA, tinatayang may rehistradong 8,083,815 noong 2004 at 8,726,520 noong 2007, subali’t sa kabuuang bilang, 359,296 o 4.4% noong 2004, at 504,124 o 5.8% lamang ang nakaboto at kung susumahin umano ay lubhang napakababa ng bilang ng nakikilahok sa pambansang halalan at ito ay nakababahala.

Sa kasalukuyan, dagdag pa ni Marcos, ay 104,475 mga manggagawang Pinoy sa ibang bansa o 1.2% lamang kumpara sa 2007 datos ang nakakapagparehistro para sa halalan at nagtakda na ng petsa para tapusin ang rehistrasyon.

Sinabi naman ni Dela Cruz na ang layunin kung bakit naisabatas ang RA09189 na kilala sa katawagang The Overseas Voting Act of 2003 ay upang bigyan ng pagkakataon ang mga manggagawa sa ibang bansa na magampanan ang kanilang karapatang bumoto na matagal ng ipinagkait sa kanila.

Umani ng panunuligsa ang Intramuros Administration sa Kamara

Binatikos ni Iloilo Rep Raul Gonzalez Jr. ang Intramuros Administration (IA) sa ginawa nitong pagsibak sa 43 kawani na matagal nang nagsisilbi sa naturang tanggapan mula 10 hanggang 30 taon.

Inirekomenda ng House Committee on Civil Service and Professional Regulations na ibalik sa kanilang mga trabaho ang mga kawani dahil sa hindi makatarungang pagsibak sa kanila noong nakaraang Mayo 1, 2008, kasama ang kanilang mga benepisyo at insentibo na hindi nila natanggap sa panahon ng kanilang paglilingkod bilang kaswal na manggagawa.

Batay komite, nagkamali ang AI nang ibinaba nila ang kalagayan ng mga kawani mula casual sa job orders noong Mayo 2008, na naging dahilan ng otomatikong nagtatanggal sa kanila sa serbisyo sa pamahalaan.

Matapos nito ay muling pinatrabaho ang mga kawani bilang JOs at nagsilbi sa gayun ding trabaho at responsibilidad.

Ibinatay umano ng IA ang kanilang kautusan na ibaba ang posisyon ng mga kawani sa ipinalabas na audit observation memorandum ng Commission on Audit (COA), subali’t hindi naman iniutos ng COA sa pamunuan ng AI na palitan ang mga posisyon ng mga kawani mula casual sa job orders.

Ipinaliwanag ni Gonzalez na ipinunto lamang umano ng COA na ang suweldo at mga benepisyo ng mga kawani ay dapat na kunin sa Personnel Services Fund at hindi sa Maintenance and Other Operating Expenses ng tanggapan. paglilinaw ni Gonzalez.

Ayon sa mambabatas, hindi umano makatarungan para sa mga manggagawa ang ginawa sa kanilang mga posisyon bilang kawani ng pamahalaan dahil sa uri ng kanilang trabaho at hindi dapat na idahilan ang pagkukunan ng pang suweldo sa kanila.

Nagbabala ang mambabatas sa IA sa anumang aksyon na hindi naaayon at gaganti laban sa mga apektadong kawani at pinayuhan niya ang tanggapan na magpairal ng maaliwalas na relasyong manggagawa-tagapamahala para sa ikaaayos ng maganda at kalidad na paglilingkod sa pamahalaan.

Media, makakaboto na sa 2010 elections

Nakatakda nang balangkasin sa plenaryo ang HB06622 na iniakda ni Makati Rep Teodoro Locsin Jr. hinggil sa pagboto ng mga miyembro ng media sa panahon ng halalan.

Batay sa panukala ni Locsin, titiyakin ng batas na makakaboto ang mga miyembro ng media na nakadestino sa malayong lugar habang gumaganap ng kanilang mga tungkulin sa panahon ng eleksyon.

Sa ilalim ng panukala, papayagan lamang silang makaboto sa mga posisyon ng pangulo, pangalawang pangulo, mga senador at kinatawan mula sa partylist.

Sineguro ni Locsin, chairman ng komite, na mamadaliin nila ang pagsasabatas ng panukala upang maipatupad ito ilang buwan bago ang halalan sa 2010.

Sinabi ni Locsin na hangarin ng mga miyembro ng media na makaboto sa halalan subali’t dahil sa pagganap nila sa kanilang mga tungkulin ay madalas na nasa malayong lugar sila at hindi sila makaboto sa mga presinto kung saan ay hindi sila nakarehistro.

Ayon sa mambabatas na, hindi umano natutugunan ang kalagayan sa pagboto ng mga miyembro ng media dahil sa ipinaiiral na patakaran na ang mga nakarehistro lamang sa presinto ang papayagang bumoto.

Idinagdag pa niya na nabuksan na ang usapin matapos aprubahan ng Korte Suprema ang overseas absentee voting na ang layunin ay bigyan ng prebilihiyo ang mga nagtatrabaho sa malayong lugar na gampanan ang kanilang karapatang bumoto at batay na rin sa itinatadhana ng Saligang Batas.

Ang mga miyembro ng media ay gumaganap ng kanilang tungkulin kahit nasa gitna ng halalan upang maihatid ang mga kaganapan, balita at impormasyon upang matiyak ang malinis na eleksyon.

Iginiit pa ni Locsin na karapatan din umano ng mga miyembro ng media na bumoto at pumili ng kanilang nais na ihalal sa liderato.

Pandaigdigang martsa para sa Kapayapaan, isinusulong sa Kamara

Nagpahayag ng suporta si Quezon Rep Proceso Alcala sa nakatakdang pandaigdigang martsa para sa kapayapaan na isinusulong ng pro-peace organization na World Without Wars International (WWW) na magsisimula sa buwan ng Oktubre sa bansang New Zealand.

Sa HR0339 na inihain ni Alcala, hinikayat niya ang Mababang Kapulungan ng Kongreso bilang isang komunidad na suportahan ang panawagan para sa pandaigdigang kapayapaan.

Sinabi ni Alcala na wala umanong ng nagwawagi sa digmaan at ang pagwasak nito sa sangkatauhan ay walang pinipiling idelohiya, lahi, relihiyon o kasarian kaya't tungkulin umano ng mga mambabatas na magpasa ng mga panukalang naaayon sa Saligang Batas, para sa pagpapairal ng kapayapaan at kaayusan, kaligtasan ng buhay, kalayaan at ari-arian, at pagsusulong ng pangkalahatang kabutihan bilang bahagi ng ating tungkulin para sa mga susunod na henerasyon.”

Ayon sa kanya, ang kaganapan ay magsisimula sa bansang New Zealand sa ika-2 ng Oktubre, kasabay sa pagdiriwang ng kaarawan ni Mahatma Gandhi at maglalakabay sa anim na kontinente ang grupo ng pandaigdigang martsa at hihimpil ng tatlong araw sa bansang Pilipinas mula ika-5 hanggang ika-7 ng Oktubre at bibisita sa Mababang Kapulungan ng Kongreso upang ideklara ang kanilang mensahe ng kapayapaan.

Ang WWW ay isang pro-peace organization, na nagsusulong ng nagkakaisang panawagan sa mapayapang resolusyon sa mga nag-iiringang mga bansa sa pamamagitan ng pagtatanggal ng mga sandatang nuklear, pagbabawas ng mga kumbensyunal na sandata, pagtatakwil sa terorismo, at paglagda sa kasunduan sa pagitan ng mga nag-iiringang mga bansa na hindi sila gagamit ng dahas upang ayusin ang kanilang di-pagkakaunawaan.

Tataguriang World March for Peace and Non-Violence ito at suportado rin ito ng mga pandaigdigang samahan, mga kilalang tao, at mga taong boluntaryong naghahangad ng pandaigdigang kapayapaan, at ito ay magsasagawa ng iba’t ibang kaganapan dito at sa mahigit sandaang bansa sa buong daigdig.

De-botelyang tubig, kinuwestyon ng mambabatas

Nanawagan ngayon si Valenzuela Rep Magtanggol Gunigundo sa mga Komite ng Trade and Industry, Ecology, at Health sa Kamara na magsagawa ng imbestigasyon hinggil sa pinagkukunan, kaligtasan, pagsusuri at kinahahantungan sa kalikasan ng mga de-botelyang tubig o inumin.

Kinuwestyon ng mambabatas ang mga pamantayang ipinaiiral kung ligtas ba ang mga ipinagbibiling tubig sa botelya dahil hindi aniya malinaw kung mas malinis ito sa tubig na ipinamamahagi ng Metropolitan Waterworks and Sewerage System (MWSS) at mga lokal na distrito ng tubig.

Ayon kay Gunigundo, maliit umano ang kakayahan at kapasidad ng Bureau of Food and Drugs at ng National Water Resources Board na bantayan at suriin ang mga ipinagbibiling tubig upang matiyak ang kaligtasan nito sa mga umiinom na mamamayan. Bukod pa rito ay nagiging problema ang pagdami ng mga plastik na botelyang itinatapon sa mga basurahan, na labis na nakakaapekto sa kalikasan.

Inihain ni Gunigundo ang HR01274 na humihiling sa mga komite sa Kamara na “magsumite ng mga rekomendasyon upang tiyakin ang ligtas na kapaligiran sa ilalim ng mandato ng estado, tulad ng mga ipinatutupad ng mga konseho ng mga pangunahing lungsod sa Estados Unidos, na nagpatupad ng pagbabawal sa pagbili ng de-botelyang tubig para sa kanilang mga kawani.

Samantala, ang mga guro mula sa Vancouver, Canada ay nanawagan na ipagbawal ang mga de-botelyang tubig sa mga paaralan.

Lumaganap sa bansa ang pagbebenta ng mga de-botelyang tubig noong dekada 80 dahil sa pinaghihinalaang maruming tubig sa maraming lugar.

SLEX, pinamamadaling makumpuni ng DPWH

Nagpahayag si Quezon Rep Proceso Alcala ng pagkadismaya sa mabagal na pag-usad ng pagkokumpuni at pagsasaayos ng Southern Luzon Expressway (SLEX) at iminungkahi nito ang pagmamadaling masolusyunan ang matagal nang inirerklamog pagkabalam sa pagsaayos ng naturang proyekto na nagreresulta ng labis epekto sa mga bumibiyahe.

Dahil dito, nananawagan si Alcala kay Public Works and Highways (DPWH) Secretary Hermogenes Ebdane na madaliin ang pagkumpuni ng SLEX na ayon sa kanya ay inaabot lamang ng 3 oras na biyahe mula Makati hanggang Lucena City noon, subalit ngayon ay umaabot na ito ng 6 na oras na byahe na kung kaya't labis na nakakaapekto ito sa ekonomiya dahil sa nasasayang na oras sa pagkabalam ng kalakalan tulad ng mga biyahero ng mga gulay, prutas, isda at iba pang paninda na ibinibyahe sa mga pamilihang bayan sa lalakhang Maynila.

Inihain ng mambabatas ang HR01258 na nag-aatas kay Ebdane na madaliin ng kanyang tanggapan ang pagsolusyon sa problema dahil sa tumataas na bilang ng reklamo mula sa mga mamamayan, na
iritado na sa araw araw kalagayan ng mabigat na trapiko sa SLEX, at mas malala pa umano tuwing katapusan ng Linggo at panahon ng tag-ulan.

Ayon pa kay Alcala, ang mga naglalakbay mula sa mga lalawigan ng Laguna, Batangas, Quezon, Camarines Norte at Sur, at Sorsogon ang labis na apektdo sa mabigat na trapiko sa kabuuan ng SLEX. Walang silbi at wala sa katuwiran ang mga inilalagay na concrete barriers at rubber pylons ng Philippine National Construction Company sa hi-way dahil lalo lamang nitong pinasisikip ang daloy ng trapiko.

Tax exemption base sa edad ng mga dependent, pinatatanggal

Isinusulong ni Nueva Ecija Rep Eduardo Nonato Joson na tanggalin ang edad bilang kwalipikasyon ng dependents, na basehan ng mga nagbabayad ng buwis upang mabigyan ng additional tax exemption.

Sa HR01117 na inihain ni Joson, nais ng mambabatas na balangkasin ng Kamara ang umiiral na patakaran hinggil sa tax exemptions at kung papaano madadagdagan ito sa ilalim ng National Internal Revenue Code.

Sinabi ni Joson na kung ang pagbabasehan ay ang kaugalian ng mga Pilipino, hindi edad ng dependent ang batayan sa suportang ibinibigay ng mga magulang sa kanilang mga anak dahil mas madalas ay lumalampas pa ito ng sa 21-taong gulang.

Ayon sa kanya, ang nagbabayad ng buwis batay sa batas ay makakakuha ng karagdagang exemption na P25,000.00 kada dependent na nag-eedad ng hindi lalampas sa 21-taong gulang.

Idinagdag pa ni Joson na ang salitang dependent ay tumutugon sa mga legitimate, illegitimate o legally adopted child na umaasa sa kabuhayan ng isang nagbabayad ng buwis.

Ayon pa sa kanya, hindi lamang ang mga ank ang sinusuportahan ng isang ama ng tahanan kungdi maging ang mga kapatid, magulang, malalapit at malalayong kamag-anak na walang kakayahang
suportahan ang kanilang mga sarili.

Dapat lamang aniyang pag-aralan at bigyang halaga ng Kongreso ang tunay na kalagayan ng mga nagbabayad ng buwis upang makapagpasa ng mga batas na tutugon sa problemang ito.

Mga mandarayang kontraktor, karampatang kaparusahan ang naghihintay

Isinusulong ngayon ni party-list Rep Narciso Santiago III ang HB06526 na naglalayong parusahan ang mga kompanya at kontraktor ng kalakal at serbisyo na nandaraya sa kanilang kontrata sa pamahalaan.

Sinabi ni Santiago na layunin ng kanyang panukala, ang War Profiteering Prevention Act, na maiwasan o lubusan ng matanggal ang pandaraya sa mga kontrata na may kaugnayan sa mga serbisyo at kalakalan sa militar, relief at reconstruction upang ganap nilang magampanan ang kanilang tungkulin.

Ayon sa mambabatas, walang umanong kakayahan ang pamahalaan na bantayan ang sistema ng pangongontrata sa gobyerno at busisiin ang mga responsibilidad at accountability ng mga kontraktor.

Dagdag pa ni Santiago na hangad din umano ng publiko na maiwasto at maisaayos ang sistema ng procurement sa gobyerno.

Sa ilalim ng panukala, ang sinumang mapapatunayang lumalabag at may paghahangad na mandaya sa kanilang kontrata sa pamahalaan ay paparusahan ng hindi bababa ng anim na buwang pagkabilanggo o pagmumultahin ng hindi bababa ng P100,000, o pareho, depende sa hatol
ng hukuman.

Kaarawan ni Cory, gagawing pambansang pagdiriwang

Ipinadedeklara ni Marikina Rep Marcelino Teodoro ang kaarawan ng yumaong dating Pangulong Corazon Aquino na holiday, bilang bilang pagpupugay sa kanyang mga ibinahagi sa sambayanang Pilipino at sa pamahalaan.

Sa kanyang HB06647, nais ng mambabatas na ideklara ang petsang 25 ng Enero bawat taon bilang pambansang pagdiriwang o President Corazon C. Aquino’s Natal Day.

Layunin ng panukala na kilalanin ang mga ibinahagi ni dating Pangulong Cory sa sambayanan, sa pagbabalik niya ng demokrasya sa bansa at pagiging isang inspirasyon sa lahat ng mga pinuno ng bansa sa buong daigdig.

Ayon sa mambabatas, si Cory ay isinilang noong ika-25 ng Enero 1933 at at siya ang kauna-unahang babae na naging pangulo ng isang bansa sa Timog-Silangang Asya.

Kinilala din umano si Cory ng buong mundo bilang isa sa pinaka-makasaysayang tauhan sa pagbabalik ng demokrasya sa isang bansa at ang kanyang buhay ay isang halimbawa ng isang dapat na maging tunay na pinuno.

Nauna ng inihain sa Kamara ang dalawang resolusyon na naghahangad na ideklarang pambansang bayani ang dating pangulo.

Ayon naman kay Agusan del Sur Rep Rodolfo Plaza, may akda ng HJR0041, kahit pa natapos na ang termino ni Pangulong Aquino ay nanatili siyang isang moog, na pinagkaisa ang sambayanan upang labanan ang mga abusado sa pamahalaan.

Ang pagpo-proklama daw kay Gng Aquino bilang isang pambansang bayani ay isang paraan upang maipagpatuloy ang kanyang mga simulain sa pangangalaga ng demokrasya at maipalaganap ang
pagka-makabayan sa mga Pilipino.

Inihain naman ni Camarines Norte Rep Liwayway Vinzons-Chato ang HJR0042 na inihahalintulad si dating Pangulong Aquino bilsng Joan of Arc ng Asya at makabagong Gabriela Silang na mapayapang nakipaglaban para sa kalayaan at demokrasya ng bansa, sa gitna ng mga panganib sa kanyang buhay at pamilya.

Kanyang ipinakita sa buong buhay niya, hanggang kamatayan, ang larawan ng makabago at isang tunay na bayani.

Buwis sa pag-aangkat ng libro, tinutulan ng mambabatas

Pinaiimbestigahan ni party-list Rep Ana Theresia Risa Hontiveros sa Kamara ang legalidad ng DOF Order 17-09 at Bureau of Customs (BOC) Memorandum Circular No. 79-09, hinggil sa patakarang
ipinaiiral sa pagpapataw ng buwis sa inaangkat na mga libro, na aniya ay taliwas sa RA08047, o Book Publishing Industry Development Act at ng Florence Agreement, o pandaigdigang kasunduan kung saan ay kasama ang Pilipinas sa mga lumagda rito at niratipikahan noong ika-30 ng Agosto 1950.

Inihain ni Hontiveros ang HR01147 na nanawagan ng isang imbestigasyon upang linawin at pagpaliwanagin ang mga naturang tanggapan ng aniya ay paglabag sa Florence Agreement, na gumagarantiya sa mga lumagdang bansa, na hindi ito sakop ng buwis sa pag-aangkat ng mga libro, pahayagan, babasahin at iba pang dokumento.

Ayon sa mambabatas, malinaw na nakasaad sa kasunduan na ang mga lumagdang bansa ay ginagarantiya ng patuloy na pagsusulong ng malaya at libreng sirkulasyon ng mga educational, scientific o cultural materials at hindi maaaring isailalim sa mga customs tax at duties.

Sinabi ni Hontiveros na malinaw na nilalabag ng Department of Finance (DOF) at ng BOC ang pagpapataw nila ng buwis sa mga libro upang palaguin ang kanilang kita at mapunuan ang kanilang kapalpakan sa tinatarget nilang koleksyon sa buwis.

Dapat silang imbestigahan at papanagutin sa idinulot nilang problema, hindi lamang sa mga nag-aangkat at namamahagi ng mga libro, na nahinto dahil sa kautusan ng mga naturang tanggapan, kungdi maging sa sambayanan na nawalan ng mga karapatan sa mahahalagang impormasyon na makkikita sa mga libro at pahayagang ito.

Mga guro sa kolehiyo, isasailalim sa pagsasanay

Isasailalim muna sa pagsasanay ang mga guro sa kolehiyo na hindi kuwalipikadong magturo bago sila isabak sa mga pribado t pampublikong pamantasn.

Ito ang nilalaman ng panukala , ang HB06505, na inihain ni Davao Oriental Rep Nelson Dayanghirang at na may layuning magpapatupad ng mga programa para sa pagsasanay sa mga guron magiging basehan din para sa kanang promosyon at bilang ng kanilang hahawakang klase sa kanilang pagtuturo.

Sinabi ni Dayanghirang na bagama't kabisado na ng mga guro ang mga paksang kanilang itinuturo sa mga mag-aaral, kinakailangan pa rin nilang sumailalim sa pagsasanay sa tamang metodolohiya at pamamaraan upang hindi maapektuhan ang kalidad ng edukasyon sa bansa.

Ayon kay Dayanghirang, dapat lamang umano na huwag bigyan ng karapatang makapagturo at humawak ng klase ang isang guro kapag hindi ito sumailalim sa isang kumpletong programa sa pagsasanay.

Sa kasalukuyan, ang mga guro sa high school at college ay sumasailalim sa patuloy na pagsasanay sa ilalim ng Teacher Education Centers of Excellence batay sa mandato ng RA07784.

Layunin ng kanyang panukala na amiyendahan ang RA07784 para isama ang lahat ng guro sa lahat ng antas sa pagsasanay sa professional education, general education at teaching methods sa kani-kanilang espesyalisasyon minsan kada limang taon, na maaaring ganapin sa panahon ng bakasyon.

Dinagdag pa ng solon na ang programang ito umano ang mag-aangat ng kakayahan at antas ng kahusayan ng ating mga guro.