Nagkalat na SIM card, ginagamit ng mga sindikato

Mainit sa mata ng mga walang-konsiyensiya at criminal syndicate ang paggamit ng subscriber identity module (SIM) card sa kanilang iligal na gawain at walang ginagawa ang gobyerno para masugpo ito.

Dahil dito, kumilos ang magkapatid na kongresistang sina Cagayan de Oro City Rep Rufus Rodriguez at Abante Mindanao Rep Maximo Rodriguez para matugunan ang problema sa pamamagitan ng paghahain ng HB01650 na naglalayong aregluhin ang pagbebenta ng SIM card.

Ayon sa magkapatid na kongresista, layunin ng kanilang panukala na tiyaking mabibigyan nito ng seguridad ang mga gumagamit ng cellular o mobile phone at ang mga may-ari at subscriber nito at tiyakin ang wstong paggamit ng mga ito bilang isa sa mahusay na paraan ng telekomunikasyon para sa isang maunlad na ekonomiya.

Ipinaliwanag pa ng mga mambabatas na kahit saan, makakabili ang tao ng SIM card dahil ito ay nabibili lamang sa halagang P80.00.

Sa ilalim ng panukala, kailangang ipa-rehistro ang SIM card sa National Telecommunications Commission (NTC) ng lahat ng manufacturer, seller, distributor at may-ari ng cellular o mobile phones.

Pagmumultahin ng P500,000 at anim na buwang pagkakabilanggo ang sinumang lumabag dito at pagpapawalang-bisa at kanselasyon ng business permit ng kumpanya.

Mga mamamahayag, mauuna sa botohan

Puwede nang bumoto ng mas maaga ang mga mamamahayag sa panahon ng halalan kapag naisabatas ang HB01510 ni Marikina City Rep Marcelino Teodoro na naglalayong gawaran ang mga Filipinong kagawad ng Media ng hanggang pitong araw bago ang takdang araw ng halalan para bumoto.

Sinabi ni Teodoro na malaki umanong bilang ng mga mamamahayag ang hindi nakakaboto tuwing halalan, karapatan ng isang mamamayan, dahil sa pagtupad sa kanilang tungkulin.

Sa ilalim ng kanyang panukala, magsumite ang nais na makaboto na mga kuwalipikadong miyembro ng media ng kanilang pangalan sa Commission on Elections (Comelec) tatlumpung araw bago sumapit ang halalan sa kung saan sila nakarehistro para mabigyan sila ng pagkakataon na magayak bago sila tumungo at maging abala sa kanilang mga tungkulin.

Matatandaang nagsumite rin ng kahalintulad na panukala sina Bayan Muna Reps Teodoro Casiño at Neri Colmenares, Gabriela Reps Luzviminda Ilagan at Emerciana De Jesus, Anakpawis Rep Rafael Mariano, Kabataan Rep Raymond Palatino at ACT Teachers Rep Antonio Tinio noong ika-14 na Kongreso.

Sinabi naman ni Casino, isa sa mga naghain ng kahalintulad na panaukala, na napakahalaga daw ng tungkuling ginagampanan ng mga mamamahayag sa panahon ng halalan dahil nagsisilbi silang bantay, nagsisiwalat ng mga kaganapan, katiwalian at karahasan, at nag-uulat ng mga kalituhan at kaguluhan sa mga presinto.

Ayon sa kanya, naaprubahan na ang panukala sa ikatlong pagbasa sa Kamara noong nakaraang Kongreso, pero hindi naipasa ang pinal na bersyon nito, kaya’t umaasa sila na ito ay maisasabatas na sa ilalim ng kasalukuyang liderato.

Mga salbaheng pulis, ikukulong

Kulang na nga sa kagamitan, korap pa at walang disiplina ang iilan sa mga kapulisan at ang maruming imahe ng Philippine National Police (PNP) ay ang naging sanhi ng hindi maalis-alis na pagpuna sa mga mata ng publiko.

Ito ang tinuran ni Antipolo Rep Romeo Acop, dating Heneral ng PNP, ng kanyang sinabi na kung ang pinuno nila ay korap, ano pa umano ang maasahan mula sa kanilang tauhan at ang pinuno ang nararapat daw at mainam na pagganyak at halimbawa para tularan ng kanilang mga tauhan.

Bilang solusyon sa negatibong pagpuna ng ibat-ibang sector ng lipunan, sinabi ni Acop na kailangan umanong repasuhin ang pagsanib at pagsasanay ng mga tauhan ng PNP at palakasin ang liderato nito mula sa pinakamataas na rangko.

Sinabi pa ni Acop na kailangan ding magtatag ng saing independent body katulad ng internal affairs department ng PNP na siyang uusig at magdesisyong ikulong ang mga scalawag na pulis upang isalba ang organisasyon para hindi ito lalung malugmok sa mga kahihiyan.

Ayon pa sa kongresista, tinatayang aabot sa 2,000 kaso sa National Police Commission o NAPOLCOM laban sa mga erring policemen at ang bilang ng pulis na nahaharap sa administrative case ay nasa 1.5% mula sa 135,000 pulis sa buong bansa.

Ngunit kailangan pa ring tingnan, dagdag pa ni Acop, ang bigat ng kanilang kaso kung ito nga ay karumal-dumal na krimen man o kahiya-hiyang kasamaan man at nakaka-alarma na umano ito kung masyadong mabigat na ang maging kasalanan.

Pangangalaga ng mga personal na impormasyon at datos, sinusulong

Sinusuportahan ng National Statistics Office (NSO) at ng Government Service Insurance System (GSIS) ang dalawang panukalang isinumite sa Kamara na naglalayong mapangalagaan ang mga datos o data privacy lalu na yaong nasa pangangalaga nila.

Sinangayunan ng NSO, ang pangunahing ahensya na nangangalaga ng mga dokumento at datos, ang nilalaman ng HB00890 at HB01554 na naglalayong pangalagaan ang pananatiling lihim ng mga datos.

Sinabi ni NSO Administrator at Civil Registrar General Carmelita Ericta na naninindigan ang NSO sa pangungolekta lamang at pagmamantine, paggamit at paghahatid ng mga impormsayon sa mga mamamayan at negosyo sa wastong pamamaraan at pagtitiyak na ang mga ito ay nagagamit ng naaayon sa pangangailangan.

Sumusuporta rin si GSIS President Robert Vergara sa panukala dahil matutugunan umano nito ang pananatiling lihim ng mga impormasyon at datos para sa mga kliyente ng business process outsourcing (BPO), subali’t kailangan daw na isaayos ng kanilang tanggapan ang umiiral na proseso sa pagsang-ayon ng may 1.37 milyong aktibong miyembro nito para mabuksan at maproseso ang kanilang mga personal na impormasyon.

Ipinaliwanag naman ni Tarlac Rep Susan Yap na ang HB00890 na kilalanin ding Data Protection Act ay naglalayong magtatag ng patas na pangongolekta, pagmamantine, paggamit at paghahatid ng mga impormsayon at datos ng bawa’t mamamayan at dito paparusahan ang sinumang gumagamit o nagpo-proseso nito sa iligal na paraan at walang pahintulot.

Naniniwala naman si Pasig City Rep Roman T. Romulo, may-akda ng HB01554 o Data Privacy Act, na ang pagpasa sa panukala ay magbibigay-daan upang ang bansa ay makasabay sa kumpetisyon sa pandaigdigang ekonomiya, magsilbing ugnayan ng mga BPO at magsusulong ng pagtitiwala mula sa mga gumagamit ng electronic commerce.

* Pagsasanay para sa may edad na manggagawa, isinusulong

Isinusulong ngayon sa Mababang Kapulungan ang panukalang magtatag ng isang programa na magbibigay ng pagsasanay sa trabaho para sa may edad ng manggagawa upang mapalawig pa ang taon ng kanilang pagiging kapakipakinabang at mas matagal pa sa kanilang pagtatrabaho.

Batay sa HB01076 na inihain nina Cagayan de Oro Rep Rufus B. Rodriguez at ng kanyang kapatid na si Abante Mindanao Rep Maximo B. Rodriguez, mabibigyan na ng sapat na kaalaman at edukasyon ang bawat nagkakaedad ng manggagawa at mabigyan pa rin sila ng kakayahan na makapagtrabaho at maging kapakipakinabang kahit na sila ay magkakaedad na.

Ayon sa mga mambabatas, madalas ay napag-iiwanan at natatalo ang mas nakatatandang manggagawa kumpara sa mas nakababata na makapasok ng trabaho.

Sa panukalang ito, mas mabibigyan ng pantay na karapatan at mas tataas ang tsansa ang mga may edad nang manggagawa na makapagtrabaho pa at ang programang ito ay nakadisenyo para sa mga manggagawang may edad 40 pataas at ang suweldo ay maituturing na below the poverty line.

Ilan sa mga objective nito ay ang itinuturing na pangunahing kaalaman o basic skills, kaalaman sa kanyang trabaho, impormnasyon at kaalaman hinggil sa dati niyang trabaho, tsansa para mai-empleyong muli, mga interes, aptitude at support services.

* Mga pangunahing problema ng bansa, bibigyang lunas ng Kongreso

Apat na problemang pagbabasehan at magiging sentro ng susunod na national legislative agenda ang kailangan upang magkaroon ng mas masiglang negosyo sa loob ng bansa na siyang magsusulong sa pag-unlad at sa kapakanan ng bawat mamamayan.

Ito ang ibinahagi ni Speaker Feliciano Belmonte, Jr. sa nakaraang Wallace Business Forum Roundtable na isinagawa sa Marriott Hotel.

Sinabi ni Speaker Belmonte na determinado umano ang pamahalaan ng Pilipinas na kumilos upang matupad ang hangarin nito na magkaroon ng matatag na ekonomiya, gawan ng paraan ang problema sa hinggil sa narrow fiscal space, at magkaroon ng kakayahan upang mapanatili ang pagtaas ng kita ng pamahalaan at ang kakayahan nito sa paggasta.

Siniguro rin ni Belmonte sa mga dumalo sa forum ang pangako ng Mababang Kapulungan na iaangat nito ang mga polisiya hinggil sa kalagayang pang ekonomiya ng bansa upang masiguro ang pagkakaroon ng mas masiglang ekonomiya ng bansa at mas malawak na oportunidad para sa mamamayan higit sa lahat para sa mahihirap na mamamayan ng bansa.

Mariing sinabi ng Speaker na inaasahan naumano na makakabuo ng isang legislative agenda na pagmumulan ng susunod na pagpupulong ng Legislative-Executive Development Advisory Council (LEDAC) na sesntro sa apat na pangunahing suliranin ng bansa tulad ng mga sumusunod:

Iniisa-isa niya at ayon sa kanya, ang una daw ang social inequality na madalas na nakikita sa pagkakaroon ng di pantay na pagkakaroon ng oportunidad at sapat na social safety nets;

Ikalawa, ang pagkakaroon ng pagkakataong lumaban at sumagot sa mga hinaharap na usapin na anhi na rin ng kakulangan sa mga pampublikong inprastraktura, mababangbilang ng mamamayang may kakayahan at kakulangan sa mas prodaktibong pagtatrabahuhan;

Pangatlo, kahinaan ng pamahalaan dahil sa umano’y laganap na kurapsiyon, mahinang koleksiyon ng buwis at di matatag na pamahalaan;

At ang pang-apat, di sigurado at mga di kinakailangang problema na kinakaharap ng mga nagnanais magsimula ng negosyo na posible naman sanang maiwasan kung magiging maayos ang lahat ng polisiya ipinatutupad hinggil sa ekonomiya. Kadalasan ang mga magkakahalintulad na polisiya ay pinagmumulan ng di pantay na gawain at pang aabuso upang makalamang sa ibang negosyante.

Pagkabigo ng mga radyo sa pagsusulong ng OPM, pinaiimbestigahan

Pinaiimbestigahan nina Cagayan de Oro City Rep Rufus B. Rodriguez at Abante Mindanao Rep Maximo B. Rodriguez sa House Committee on Information and Communications Technology ang hindi pagsunod ng ilang estasyon ng radyo sa Executive Order 255 na nagsusulong nga mga orihinal na Pilipinong awitin (OPM).

Sa kanilang inihaing HR00247, ibinunyag ng mga mambabatas ang paglabag ng mga himpilan ng radyo sa EO 255 na naglalagay sa lokal na industriya ng musika sa alanganin, kumpara sa mga dayuhang awitin at kultura.

Ayon sa mga mambabatas, maging si Pangulong Benigno C. Aquino III ay nakapansin sa paglabag na ito ng mga istasyon ng radioat ang OPM ay mga awiting komposisyon ng mga Pilipino, na iniakda at nilikha sa wikang Pilipino, Inggles at iba pang uri ng lokal o dayuhang wika.

Ipinatatawag ng mga mambabatas sa Kamara ang National Telecommunications Commission, mga samahan ng istasyon ng radyo at telebisyon, at ang Organisasyon ng mga Pilipinong Mang-aawit (OPM) upang pagpaliwanagin sa nasabing isyu.

Ang EO 255 ay ipinatupad noong ika-25 ng Hulyo, 1987 sa ilalim ng administrasyon ni dating Pangulong Corazon Aquino, na nag-uutos sa lahat ng istasyon ng radyo na magpatugtog ng hindi bababa sa apat na orihinal na musikang Pilipino kada oras.

Sa ilalim ng kautusan, ang sinumang hindi susunod sa mga probisyon ng EO 255 ay pagmumultahin ng P100 sa bawa’t paglabag. Bukod dito, kapag napatunayan ng NTC sa pagdinig ang bigat ng paglabag ay maaari nitong isuspindi o tuluyang ikansela ang Certificate of Registration o permiso upang makapagsahimpapawid ang isang istasyon ng radyo.

Pambansang budget, ibabalik na sa Kongreso

Masidhi ang pagnanais ni Nueva Ecija Rep Rodolfo W. Antonino na maibalik sa Kongreso ang kapangyarihan upang pamahalaan ang pagpapalabas at pagpapalipat ng pondo ng gobyerno sa ilalim ng General Appropriations Act.

Dahil dito, inihain ng mambabatas ang HB00033 na naglalayong amiyendahan ang Presidential Decree 1177, na ipinatupad noong Batas-Militar na nagbibigay ng kapangyarihan sa Pangulo sa pamamahala ng gastusin ng gobyerno sa ilalim ng pambansang budget na ipinasa ng Kongreso.

Ayon kay Antonino, ang tungkulin ng sangay ng lehislatura sa pagbalangkas ng pondo ng pamahalaan ay pinahihina ng pagpapairal ng Presidential Decree 1177.

Sa ilalim ng kanyang panukala, ang tungkulin sa paghahanda, pagsasabatas, pagpapatupad at pagbusisi sa gastusin ng bayan mula sa pambansang budget ay dapat na maibalik sa Kongreso, at ang kapangyarihan ng Pangulo sa pagpapatigil o pagpapahinto ng gastusing ito ay aalisin sa kanyang poder .

Kasama sa probisyon ng panukala ang pag-aalis ng kapangyarihan sa Pangulo na magpapalipat-lipat ng pondo sa iba’t ibang sangay ng pamahalaan, programa o proyekto ng walang pahintulot mula sa mayoridad ng Mababa at Mataas na Kapulungan ng Kongreso, na magkahiwalay na pagbobotohan.

Ang Department of Budget and Management na nasa ilalim ng Tanggapan ng Pangulo ay tatanggalan ng kapangyarihan sa pagpapalabas ng kabuuang pondo, kung wala itong kasamang listahan na isinumite, inaprubahan at pinahintulutan ng Kongreso.

Higit sa lahat, ang pondong nalikom mula sa pagtitipid, batay sa probisyon ng GAA, ay maaaring gamitin ng pamahalaang nasyonal upang bayaran ang mga pagkakautang at mga bayarin nito, na aaprubahan at pahihintulutan ng Kongreso at magkahiwalay na pagbobotohan.

The Choice We Make

Bolting out of Couples for Christ (CFC) and moving to Gawad Kalinga (CFC-GK) is undeniably a tough choice to make.

In July 1991, we have committed ourselves and our children to do work in God’s vineyard through Couples for Christ (CFC) and its Family Ministries. For twenty (20) solid years, we have strived to be faithful CFC servants .We tried to touch people for God every way we could. But somehow, somewhere and sometime in our service, we’ve been put to the test… we got wounded… we faltered and missed the mark… we got adrift. Yet, God in His goodness and mercy never fails to lend a hand and help us to stand up strong time and again and mend our brokenness. For months, we relentlessly prayed for guidance and discernment to come up with a clear, firm and spirit-led pronouncement to make a difference in our journey towards holiness. We prayed for patience and wait for the right moment to declare our certitude to align our spirituality with the work with the poor through Gawad Kalinga (GK). We prayed for boldness to choose a course of action in moving forward and the courage to survive the storms we will encounter if ever we go over the other side of the fence.

For a time, we’ve been so perplexed about what’s going on between the top echelons of leaders in community. Even as we assumed a higher service in the sector, we have been insulated and hardly knew the real score that prompted the CFC-GK mess. So, what is the use of hanging around in a community if we start to doubt its governance; if we start getting hypercritical and judgmental about community’s strategies and plans; if we could no longer get inspiration to keep going; if we could no longer fathom the rationale in unceremoniously removing dedicated leaders from the CFC roster because they’re perceived to be antagonistic to the CFC mission and vision; if we could no longer sense the community’s acceptance that nation-building is one component of evangelization; if we could no longer get the heightened spiritual enrichment and empowerment as we seek to fulfill our destiny as children and servants of God.

Though we see eye to eye with the CFC life and activities, there is one area where we differ in viewpoint with the IC - it's not about being right or wrong rather it's about arriving at a decision after exploring the “benefit of Solomonic wisdom and Jesus’ compassion,” so goes the words of an esteemed brethren.

In Philippians 1:9-10 Paul reminds us to make “excellent” choice – a choice that emanates from a heart fully committed to the Lord. Here, we are being taught that when love abounds in knowledge and discernment, we’re able to understand what is best so that we may “approve the things that are excellent.”

The Lord’s message to us: The recognition that we have to decide with our hearts, to be strong, and believe that what lies ahead is an opportunity to celebrate that elusive springtime in our journey of faith.

We guess it’s time to make a personal choice - to hit the road that leads us on doing what we can do not what we want to do. We cannot underestimate the impact of one’s choice. It can produce lifelong consequences, for good or bad. Of course, it comes with a price - responsibility. And when one is ready to accept and carry out that responsibility, then the reward is true greatness. The reward is timeless. Choosing a community in favor of the other will not always be an easy task. But it is a choice that brings the kind of consequence we can live with. We do not know where God will lead us, we only know that for those who love Him, all things turn out for the best.

There comes a time in a person’s life when he has to pack one’s bag and come to a parting of ways with a place, person or otherwise. Indeed, breaking up is one hard thing to do. It may not be the ultimate life crisis but it requires a special coping and adjusting. Just how does one say "good-bye" to a life of serving, sharing, loving, caring and friendship? Confidently, God in His kindness and compassion will guarantee us with the ability to let go, move on, depart with a smile and take along a handful of great memories. He will provide us with just enough light to see the next step - enjoy what we can see and not grumble about what remains in the dark.

Moreover, who could ever discount the role of a community that has introduced us to God’s work and taught us how to live in it – Couples for Christ, the community that has become a powerful channel for personal and family renewal; the community that has firstly provided us spiritual enrichment and brought us to where we are now in our spiritual journey.

With a heavy heart, we shall leave CFC – the community we have long regarded as a family, co-worker, companion and friend whom we shared great love, passion, and joy in service. We will carry on the CFC mission as a family in the Holy Spirit renewing the face of the earth. Our CFC identity will remain in our hearts and no one can take that away from us.

We will persevere to be God’s humble and zealous laborers who will do whatever it takes to respond to His call to serve the least of our brothers and sisters. Indeed, it is always a great privilege to become a servant when God calls one to it.

As we are about to cross deeper into the heart of God and our own selves, we will be facing a significant and different perspective of service that determines how we respond to the full revelation of His glory and majesty.

And by God’s grace we’ll be filled with a lively faith and find comfort in His promise to restore us back to vibrant undertakings to help us grow in our relationship with Him.

God bless us all.


Terence and Thel Grana

Balitaktakan hinggil sa charter change, suportado sa Kamara

Pinahayag ni House Deputy Speaker Ma. Isabelle Climaco na sinusuportahan ng mga mambabatas ang isang malusog na diskusyon at balitaktakan sa panukalang pag-aamiyenda sa 1987 Saligang Batasnang kanyang sinabi na ang pagtalakay o debate sa charter change ay isang proseso ng lehislatura.

Ayon kay Climaco, ang debate sa isyu ay bahagi ng proseso ng lehislatura at kailangang bigyang-halaga ang mga usaping tatalakayin ng Legislative Executive Development Advisory Council (LEDAC) at pamumunuan ang mga ganitong balitaktakan ng House Committee on Constitutional Amendments at maglalahad ng mga mahahalagang bahagi ng diskusyon.

Sinabi naman ni Maguindanao Rep Simeon Datumanong, isa sa mga may-akda ng HJR0003, ang panukalang nananawagan ng isang constitutional convention, na maghahain ng mga amiyenda sa 1987 Constitution at sinusuportahan niya ang panukala lalo na ang mga probisyon sa ekonomiya at repormang pampulitika na magdadagdag ng representasyon sa Senado.

Ayon sa kanya, bagama’t isinaisantabi ng palasyo ang usapin sa chacha ay nanawagan siya na bigyang-daan ang mga benepisyong makukuha sa pag-amyenda sa Saligang Batas.

Umaasa naman si Camiguin Rep Pedro Romualdo, chairman ng House Committee on Constitutional Amendments noong ika-10 at 11 Kongreso, na pagbibigyan na ang deliberasyon ng chacha sa plenaryo.

Idinagdag pa niya na lahat umano ng ating pagnanais ay walang silbi kapag hindi nagpakita ang Pangulo ng political will upang suportahan ang chacha at nasa kanyang mga kamay ang pagbibigay ng pag-asa na matalakay ang mga benepisyo nito matapos ang napakaraming pagdinig na isinagawa na at nawa umano’y pagbigyang umusad ang usapin ngayon.

Nangangamba si Romualdo na ang ekonomiya ng bansa ay hahawakan pa rin ng mga negosyante na dati ng kumokontrol dito hangga’t hindi naaamyendahan ang Saligang Batas hinggil sa mga mahahalagang probisyon sa ekonomiya.

Retirement program para sa mga OFW

Inihain ni Alagad Party-list Rep. Rodante Marcoleta ang isang panukalang maghahatid ng tuloy-tuloy na pangkabuhayan para sa mga Overseas Filipino Workers (OFWs) sakaling magdesisyon na sila na magbitiw sa trabaho o magretiro.

Sinabi ni Marcoleta na layunin ng kanyang panukala na magtatag ng isang sistema sa pagreretiro upang ang mga manggagawa ay makapag-impok mula sa bahagi ng kanilang mga kinikita para mapaghandaan ang kanilang pagtanda, pagkakasakit o pagkasawi.

Sa ilalim ng HB01334, itatatag ang Overseas Filipino Workers Social Security and Retirement System na siyang mangangasiwa sa pagdodokumento sa lahat ng OFWs na nakarehistro sa Philippine Overseas Employment Administration (POEA) at layunin nito na pangasiwaan ang mga benepisyo, puhunan sa negosyo at ayuda sa mga OFWs at kanilang mga kaanak. Itatatag din ang isang trust fund na lalagakan ng kanilang mga kontribusyon.

Ayon sa kanya, kapag ang isang manggagawang rehistrado ay natanggal sa trabaho ay tsaka lamang mahihinto ang kanyang kontribusyon sa panahon ng kanyang pagkakatanggal at kanyang matatanggap ang lahat ng benepisyo sa ilalim ng batas na ito.

Ang isang miyembro na umabot sa 120 buwanang kontribusyon bago siya nagretiro at yaong umabot sa edad na 45 taong gulang ay makatatanggap ng buwanang pension at kung sakaling nasawi ang retiradong OFW pensioner, ang kanyang mga benepisaryo sa panahon ng kanyang pagreretiro ay makatatanggap ng 80 porsyento ng kanyang buwanang pensyon batay sa isinasaad sa panukala.

* Kawani ng mga biniling kompanya, protektado na

Isinusulong ngayon ni TUCP Party-list Rep Raymond Democrito C. Mendoza ang HB01557 na naglalayong protektahan ang mga karapatan, kaseguruhan at katiyakan sa trabaho ng mga kawaning labis na apektado sa tuwing may pagbabago sa pamamahala tulad ng pagbebenta o pagbili ng kompanya at pagsasanib ng dalawa o higit pang negosyo.

Sinabi ni Mendoza na ang pag-unlad ng negosyo sanhi ng globalisasyon ay napapanahon at ang pagsasanib puwersa ng mga kompanya ay bahagi ng kumpetisyon sa negosyo na nakakaapekto sa mga empleyado at paminsa’y nalalabag ang karapatan ng mga kawani.

Ayon sa kanya, para maiwasan ang di-makatuwirang paglabag sa kaseguran ng trabaho ng mga kawani ay kailangang manatili ang mga pribilehiyong kanilang tinatanggap tulad ng sahod at karapatan sa seniority ng mga kawani na matagal nang naglilingkod kahit na magbago ang pamamahala ng kompanyang kanyang pinaglilingkuran.

Iginiit pa ni Mendoza na responsibilidad ng mga kompanyang mamamahala sa biniling negosyo na panatiliin ang karapatan ng mga kawani lalo na ang kanilang mga benepisyo, sahod, kaseguruhan sa trabaho at ang pagkilala sa kanilang inilaang panahon ng paglilingkod, bago nailipat ang pamamahala ng negosyo sa mga bagong may-ari ng kompanya.

* Pagtatatag ng Amusement Parks Safety Board, ipinanukala

Nababahala si Marikina Rep Marcelino Teodoro sa mga napapaulat na aksidente sa mga karnabal o amusement parks na nagreresulta sa malubhang pagkasugat o pagkamatay ng ilang bata na sumasakay sa mga palaruan.

Sinabi ni Teodoro na dapat na umanong umaksiyon ang pamahalaan para sa kaligtasan ng mga kabataan na nabibiktima ng mga aksidente dahil sa kapabayaan o kakulangan ng pag-iingat mula sa mga namamahala ng karnabal.

Sa kanyang inihaing HB01549, nais niyang maitatag ang isang ahensya na titiyak sa kaligtasan ng lahat ng mga palaruan sa karnaba sa buong bansa. Itatatag nito ang Amusement Parks Safety Board na gagawaran ng kapangyarihan na magpahintulot at mangasiwa ng mga theme parks, amusement parks, carnivals at iba pang kahalintulad na establisimyento na titiyak sa kaligtasan ng mga mamamayan, lalo na ng mga kabataan.

Bukod sa permiso ng lokal na pamahalaan upang makapagtatag ng ganitong negosyo ay kakailanganin na rin na kumuha ng permiso sa APSB ang lahat ng bago at dati nang amusement parks, maliit man o permanente na nakatayo.

Babantayan ng naturang Board ang kahandaan ng isang amusement park na pagbabasehan ng permisong igagawad dito at ikukunsulta rin ito sa mga dalubhasang enghiniyero na sumusuri at nagpapaunlad sa kaligtasan ng mga palaruan sa buoang bansa.

Pre-audit sa gastusin ng gobyerno, isinusulong

Isinusulong ngayon ni Cebu City Rep Rachel Marguerite Del Mar ang panukalang mag-aatas sa lahat ng ahensya ng pamahalaan na isailalim ang gastusin ng mga ito sa sapilitang pagsusuri o pre-audit examinations bago gamitin at gastusin ang mga pondo ng gobyerno.

Layunin ng HB00372 na suriin ang mga proyektong pang-imprastraktura, pagbili ng mga kagamitan ng pamahalaan, kasama na ang mga serbisyong binabayaran ng gobyerno tulad ng mga consultants.

Sinabi ni Del Mar na sa paraang ito ay mapoprotektahan ang gastusin ng pamahalaan mula sa pondong nanggagaling sa kabang-bayan bukod pa sa matitipid at mababantayan din ang mga iligal na paggasta sa panahong ito na nangangailangan ang ating gobyerno ng kinakailangang pondo.

Ayon sa mambabatas, ang pre-audit ay maaaring makapagtatag ng isa pang antas ng pagsusuri na magreresulta sa pagkabalam ng pagpapairal ng mga minamadaling proyekto ng gobyerno.

Sa ilalim ng panukala, aatasan ang Commission on Audit (COA) na magsagawa ng masusi at kumpletong pre- audit examination sa lahat ng gastusin ng pamahalaan, kasama na ang pagpapaupa ng mga ari-arian ng lahat ng ahensya.

Kasama rin dito ang mga government owned and controlled corporations (GOCCs), financial institutions, state universities and colleges at ang mga lokal na pamahalaan ngunit hindi kasama sa panukala ang mga ahensya ng hudikatura at yaong mga ginawaran ng fiscal autonomy.

Pagbebenta ng dalawang kampo, tinatalakay sa Kamara

Mariing tinututulan ng ilang mambabatas ang panukalang ibenta ang mga kampo ng Crame at Aguinaldo para gamitin sa komersiyal na layunin.

Nakatakda na ring magsumite si Batangas Rep Hermilando Mandanas, chairman ng House Committee on Ways and Means, ng panukalang naglalayong ideklara ang dalawang kampo bilang mga historical sites.

Sinabi ni Mandanas na ang mga kampo militar na ito ay simbolo ng kagitingan ng mga Pilipino at ng pag-ibig ng bawat Pilipino sa kalayaan at ito ang ipinakita ng mga mamamayan noong magkaroon ng EDSA revolution.

Samantala, ilang mambabatas naman ang pabor na ibenta ang mga pag-aaring ito ng pamahalaan na iminungkahi ni Finance Secretary Cesar Purisima nang sinabi nito na layon ng panukalang ito na mapondohan ang ilang proyekto at programa ng pamahalaan at ang pondo ay magmumula sa pagbebentahan ng dalawang kampong nabanggit.

Ayon naman kay Isabela Rep Rodolfo Albano, pabor siyang maibenta ang dalawang kampong ito ng militar lalo na kung makakatulong ito sa pagpapadali sa modernisasyon ng Armed Forces of the Philippines at ng Philippine National Police.

Dagdag pa ni Albano, makakatulong ng malaki ang mapagbibentahan ng dalawang kampong ito upang mapondohan ng mga proyektong pang-inprastraktura ng gobyerno, pagpapatayo ng mga gusaling pang paaralan, pabahay para sa mga mahihirap at iba pang mga proyekto ng gobyerno.

Ayon naman kay Kabataan party-list Rep Raymond Palatino, maaari rin umanong magamit ng pamahalaan ang lugar bilang mga freedom park dahil naging lugar naman ito sa bahagi ng EDSA upang maidaos ang dalawang pag-aaklas na tinawag na EDSA people power revolts.

Maaari din itong maging pabahay para sa mga kawani ng gobyerno, green parks o public parks, ayon pa kay Palatino.

Ayon kay Purisima ang dalawang kampong ito ang ilan sa mga ikinukunsidera ng pamahalaang Aquino na isapribado at ang iba pang pag-aari ng pamahalaan na pinaplano ring sumailalim sa pagsasapribado ay ang New Bilibid Prisons sa Muntinlupa City, Iwahig Penal Colony sa Palawan, Davao Penal Colony sa Davao del Norte, at ang 40 ektaryang pag-aari ng Health Department sa Cebu.

Idinagdag pa ni Purisima na pumayag na ang Department of National Defense (DND) na mailipat ang dalawang kampo sa mas malaki at mas modernong lugar upang mas mapabuti at mapagtibay ng serbisyo ng mga kampong ito.

Libreng serbisyo ng mga doktor, bibigyan ng insentibo

Maraming manggagamot ang nag-iisip umaalis ng bansa dahil nais nilang humanap ng mas masaganang buhay kaysa paglingkuran ang kanilang kababayan sa sariling bayan.

Dahil dito, naghain sina Buhay Party-list Reps Erwin Tieng at Mariano Michael Velarde na bigyan ng tax credit ang mga doktor na nagbibigay ng libreng serbisyo sa mga mahihirap na pasyente.

Sinabi ng dalawang mambabatas na sa ganitong paraan, lalong mahihikayat ang mga doktor na manatili sa bansa kung mabibigyan sila ng tax credit.

Ayon kina Tieng at Velarde, ang kanilang panukalang ang HB03588 ay naaayon sa deklarasyon ng estado na protektahan at itaguyod ang karapatan ng tao sa kalusugan, at ipaalam sa kanila ang kahalagahan ng kalusugan.

Ang iba umanong mga doktor sa bansa ay nag-aaral ng nursing courses para lamang mag-empleyo sa ibang bansa para kumita ng mas malaking salapi at ang masama dito, wika pa ni Tieng, na nagkukulang ang ating mga health workers at nababawasan din ang basic health services sa ating mga kababayan.

Ang Kagawaran ng Rentas Internas, sa pakikipagtulungan sa Department of Health at Philippine Medical Association ang magpo-proklama ng mga alituntunin sa pagpapatupad ng nasabing panukala kapag ito’y naging ganap na na batas.

Indigenous cultural center, itatatag

Isinusulong ngayon ni Aurora Rep Juan Edgardo Angara, may akda ng HB00244 na may layuning magtatatag ng Philippine Center for Studies on Indigenous Cultural Communities sa Unibersidad ng Pilipinas bilang isang sentro ng pag-aaral hinggil sa cultural communities upang masiguro ang kapakanan at mapangalagaan ang pang-ekonomiyang kalagayan ng bawat indigenous community sa bansa.

Sinabi ni Angara na ang kasalukuyang Institute on Islamic Studies na nasa Unibersidad ng Pilipinas at ang Institute of Studies on Non-Islamic Cultural Communities ang siyang sasaklaw sa itatayong sentro.

Sa ilalim ng panukala, ang sentro ang siyang mag-oorganisa ng taunang pambansang kumperensiya hinggil sa indigenous cultural communities kung saan dapat ay may partisipasyon ang pamahalaan at ang pribadong sektor.

Sa gaganaping kumperensiya, mabubuo ang mga rekomendasyon hinggil sa polisiya at programang gagawin para sa mga indigenous cultural communities.

Batas hinggil sa puslit na mga produktong pang-agrikultura, paiigtingin

Susuportahan ng Department of Agriculture (DA) ang anumang hakbang sa agarang pagpasa ng mga panukala hinggil sa pagpapalakas ng batas laban sa pagpupuslit o smuggling ng mga produktong pang-agrikutura sa bansa batay sa isang liham ni DA Undersecretary for Policy and Planning Segfredo Serrano kay Batangas Rep Hermilando Mandanas, chairman committee on ways and means.

Sinabi ni Serrano na sinusuportahan ng DA ang pagkakaroon ng amiyenda sa kasalukuyang batas hinggil sa Tariff and Customs Code kung saan ay dapat umanong isama ang mga probisyon hinggil sa paglutas ng suliranin sa smuggling o pagpupuslit ng mga produktong pang-agrikultura at ang pagbuo ng mekanismo na siyang sisiguro na ang mga produktong ipinapasok sa bansa ay dumaan sa mga pagsusuri at siguradong ito ay malinis at walang dalang sakit.

Ilan sa mga iniindorsong panukala ng DA ayon pa kay Serrano ay ang anti-smuggling bill na may kinalaman sa rice importation, ang panukala tungkol sa National Food Authority (NFA) kung saan nais ng DA na magkaroon electronically manifest and bill of lading na siyang magsisilbing paraan upang masusing mabantayan ang aktuwal na dami ng bigas na ipinapasok sa bansa ng mga otorisado at lisensiyadong rice importers.

Inirekomenda rin ng DA na hindi dapat mag-imbak ng mga produktong pang-agrikultura sa mga warehouse ng customs nang walang clearance mula sa kanila upang maiwasan ang pagpasok ng peste at sakit mula sa ibang bansa na dala ng mga produkto.

Hinggil naman sa pag-aabandona ng mga imported articles, inirerekomenda ng DA ang agarang pagtatapon dito at hindi ang nakagawian ng pagbebenta nito sa paraang pagsusubasta.

Sa kasalukuyan, dinidinig sa komite ang anim na panukalang batas hinggil sa pag-aamiyenda sa ilang probisyon sa Presidential Decree 1464 o mas kilala bilang Tariff and Customs Code of the Philippines.

Ito ay ang mga sumusunod: HB00046 na isinumite nina Cagayan de Oro Rep Rufus Rodriguez at Abante Mindanao partylist Rep Maximo Rodriguez; HB00114 ni camiguin Rep Pedro Romualdo; HB00171 ni Ilocos Sur Rep Eric Singson, Jr.; HB00572 ni Aurora Rep Juan Edgardo Angara; HB01694 ni Quezon Reps Lorenzo Tanada III at Agap partylist Rep Nicanor Briones; at ang HB03055 ni Sorsogon Rep Salvador Escudero III.

Para Sa Aking Kumpareng +Ding

Nais kong magbigay pugay sa Iyo, Pare, pagpupugay na hindi ko man lamang naipahiwatig noong Ikaw ay puno pa ng buhay at sigla.

Pinasasalamatan ko ang buong pagkakataon na nakilala at naging kaibigan Ka - naging isang inspirasyon Ka sa aking buhay-mamahayag.

Ang Iyong kahinahunan at kabaitan, bukod pa sa Iyong angking katalinuhan, ay aking kinaiinggitan ngunit ginawa kong huwaran.

Sa Iyong pagpanaw, sana nawa ay maging maligaya Ka sa piling ng ating Poong Maykapal.

Paalam, Kaibigan.

pareng terence

-------------------


(Nakikiramay ang pitak na ito sa pagpanaw kahapon ng 12:30 ng tanghali (ika-4 ng Enero 2011) ng isang kasamahan sa hanap-buhay na si G. Fernando "Ding" Cariaso ng Journal Group of Companies. May his soul rest in peace, Amen.)

* Buwagin na ang mga fly-by-night drug testing center

Hiniling ngayon ng mga mambabatas sa Department of Health (DoH) at sa Land Transportation Office (LTO) na hulihin na ang mga fly-by-night drug testing center na nambibiktima ng aplikanteng kumukuha ng driver’s license.

Sinabi ni Tarlac Rep Jeci Lapus, umabot na sa 1,500 na ang mga iligal na drug testing center sa buong bansa at nangongolekta lamang sila ng pera mula sa mga aplikante.

Ayon kay Lapus, may mga insidente umano na hindi sinusuri nang mabuti ang urine samples ng aplikente, basta nakabayad sila ng examination fee.

Sinabi naman ni PBA party-list Rep Mark Aeron Sambar na kailangan umanong imbestigahan ng DoH at LTO kung ang mga drug testing center ay kumpleto sa tamang pasilidad.

Paano umanong mapipigilan ang pagkakaroon ng negatibong resulta kung mayroong mga huwad na drug testing center sa ating bansa, pagtatanong pa ni Sambar.

Chinese New Year, idineklarang holiday

Pumasa na sa House committee on Revision of Laws ang panukalang nagdedeklara sa Chinese New Year bilang special non-working public holiday.

Sinabi ni Pangasinan Rep Marlyn Primicias Agabas, ang pinagsanib na panukalang batas, ang HB01072, HB00611 at HB02715 ay naglalayong kikilala sa makabuluhang ambag ng Filipino-Chinese community sa bansa at ang kanilang yaman sa kultura at tradisyon.

Ayon naman kay Cagayan de Oro Rep Rufus Rodriguez, dapat umano nating pahalagahan ang matagal na nating relasyon sa mga Chinese dahil karamihan sa kanila ay nanirahan na sa ating bansa.

Ang panukala ay tiyak na magpapalakas sa relasyon ng dalawang bansa, wika naman ni Aurora Rep Juan Edgardo Angara, na ayon sa kanya, ang matagal na umanong relasyon sa mga intsik ay nagbunga sa ating bansa ng isang mayamang kultura.

Ayon naman kay Northern Samar Rep Emil Ong, bilang isang bansa umano na may 25 porsiyentong dugong intsik, marapat lamang na aprubahan na ang panukalang ito upang pasalamatan sila sa kanilang ambag sa ating pambansang kasaysayan.