Tatapyasan ng Kamara ang sobrang interes sa mga credit cards

Dahil sa lumalaking bilang ng mga nagrereklamo sa sobrang taas ng paniningil ng interes ng mga kumpanya ng credit card, nais ni Bohol Rep Arthur Yap na gawing krimen ang sobrang paniningil ng interes at multa sacredit card na mas mataas pa sa isinasaad sa batas.

Sa HB01235 o “Credit Card Users Protection Act of 2010”, layun nityo na limitahan ang interes na 1% kada buwan o 12% bawa’t taon, gayun din ang multa ng mga hindi nakakabayad sa takdang oras, sa 1% kada buwan o 12% bawa’t taon at ang kumpanyang mapapatunayang lalabag sa patakarang ito ay sasampahan ng kaso at pagmumultahin ng P500,000.00 bukod pa sa pagkabilanggo ng anim na taon at suspensyon o pagsasawalang bisa ng kanilang lisensya para makapagnegosyo.

Nababahala si Yap sa ulat na umabot na sa apat na milyong Pilipino ang nagtatangan ng anim at kalahating milyong credit cards, katumbas ng limang porsyento ng kabuuang populasyon ng bansa.

Ayon kay Yap, karamihan dito ay suwelduhan lamang at walang ibang karagdagang kita bukod sa suweldo at malaking bahagi nito ang walang disiplina sa paggamit ng credit cards.

Imbes na gamitin ito bilang kapalit ng salapi sa biglaang pangangailangan ay ginagamit nila itong pambili ng hindi naman nila kailangan kahit wala silang pera, kaya’t nauuwi silang lahat sa pagkakabaon sa utang, dagdag pa ni Yap.

Dahil umano sa mga agresibong patalastas at panghihimok ng mga kumpanya ng credit cards tulad ng mga promo at kung anu-anong gimik ay lalo pang tataas ang bilang ng mga nababaon sa utang dahil sa paggamit ng credit cards at hindi nila alam na napakataas pala ng interes na ipinapataw ng mga kumpanya sa paggamit nila ng credit card, bukod pa sa penalty, finance charges, at iba pa.

Mga negosyanteng mapagsamantala sa panahon ng kalamidad, uusigin

Bilang na ang araw ng mga tiwaling negosyante na nananamantala sa panahon ng kalamidad kapag naisabatas ang HB01229 o ang National Emergency Anti-Profiteering Act of 2010 na inihain nina Camarines Sur Rep Diosdado Arroyo at Pampanga Rep Gloria Macapagal-Arroyo.

Sinabi ni Congressman Arroyo na dapat umanong patawan ng mabigat na kaparusahan ang mga mapagsamantala na nagtataas ng presyo ng mga pangunahing bilihin at nagdedeklara ng kakulangan ng imbak ng mga produkto gayung malinaw na sapat naman ito tulad ng nangyayari sa kasalukuyan hinggil sa produkto ng langis na lubhang nakakaapekto sa ekonomiya, pampublikong kalusugan, kaligtasan at kabutihan ng mga mamamayan, at nagdudulot ng panganib sa pambansang seguridad.

Ayon sa kanya, ang ating bansa ay umaasa sa langis at dito nakasalalay ang kalagayan ng ating pambansang ekonomiya, ngunit madalas ay sinasamantala ito ng mga negosyante kapag abnormal ang kalakalan, pagbabago ng klima, mga epekto ng digmaan at militarisasyon, at pagkaubos o pagkawala ng mga pinanggagalingan ng enerhiya, na siyang idinadahilan para magkamal sila ng napakalaking tubo.

Sa ilalim ng batas, gagawaran ng kapangyarihan ang pangulo ng bansa na magdeklara ng state of economic emergency upang maparusahan ang sinumang magsasamantala para mapangalagaan ang sambayanan.

Pagdinig ng tax cases, eksklusibong gagawin ng BIR

Isinusulong ngayon ng isang mambabatas ang panukalang magbibigay ng eksklusibong kapangyarihan sa Bureau of Internal Revenue (BIR) na magsagawa ng paunang imbestigasyon, pagsasampa ng kaso at pagdinig ng mga kasong may kinalaman sa buwis.

Sinabi ni Isabela Rep Giorgidi Aggabao na ang mga batas hinggil sa pagbubuwis ay tunay na napakakumplikado at nangangailangan ng espesyal na kaalaman, kakayahan at karanasan.

Ayon sa kanya, hindi naman umano sa minimenos niya ang kakayahan at kapasidad ng mga prosecutor sa Department of Justice o DOJ at kung ang hahawak ng mga kaso sa pandaraya sa pagbubuwis ay mismong mga taga BIR, malaki daw ang posibilidad na mahawakan ang mga kaso ng gobyerno ng mga taong mas may karanasan at kakayahan hinggil sa pagbubuwis.

Idinagdag pa ni Aggabao na nahihirapan umano ang DOJ na agad harapin ang lahat ng kasong may kinalaman sa pagbubuwis na dumarating sa kanilang mga tanggapan kahit na ito ay paunang pagdinig pa lamang.

Sa kasalukuyang sistema, ang DOJ ang eksklusibong sumasakop at nagsasagawa ng preliminary investigation sa lahat ng kasong kriminal na nag-ugat sa paglabag sa batas hinggil sa National Internal Revenue Code at iba pang batas na pinapairal ng BIR.

Pagtatayo ng planta ng cellphones, maglilikha ng maraming trabaho sa bansa

Nais ni Iloilo Rep Augusto Syjuco na makibahagi ang pamahalaan sa pamamayagpag ng mga kumpanya ng cellphones na kumikita ng limpak limpak na tubo, kaya’t iniakda niya ang HB01279 na naglalayong itatag ng mga gumagawa ng cellphones sa bansa ang kanilang mga planta.

Sinabi ni Syjuco na bilyon-bilyon na ang kinita ng mga dambuhalang kumpanya ng cellphones tulad ng Glode at Smart at tinagurian na ang bansa bilang texting capital of the world.

Bukod sa bahagi ng buwis na kinikita ng pamahalaan sa kalakalan ng cellphones, dagdag ba ng mambabatas, ang pagtatatag ng lokal na planta ng mga kumpanyang ito ay makakalikha ng ng maraming trabaho para sa mga mamamayan at magpapatatag sa lokal at pambansang ekonomiya.

Sa ilalim ng panukala, ang Department of Transportation and Communications (DOTC) ang magtatakda at magpapatupad ng mga patakaran hinggil sa batas na ito.

Pagbibigay ng Vitamin A makakabawas sa maagang pagkabulag ng mga bata

Isinusulong ngayon ni Las Piñas Rep Mark Villar ang panukalang naglalayon magbigay ng libreng Vitamin A upang maiwasan ang mga sakit na dala ng kakulangan dito, partikular na ang maagang pagkabulag.

Ayon kay Villar napapanahon na upang harapin ng pamahalaan ang problemang kakulangan sa bitamina A o Vitamin A Deficiency (VAD), na kadalasang sanihi ng maagang pagkabulang sa mga batang nasa edad pito pataas.

Batay sa HB01250 patatatagin ang kasalukuyang batas sa kung saan nakasaad dito na lahat ng batang Pilipino mula sanggol hanggang pitong taong gulang ay bibigyan ng Vitamin A supplementation ng libre upang makaiwas ang mga bata sa mhga problemang pangkalusugan na dala ng VAD.

Sinabi ni Villar na importante umano ang vitamin A sa katawan ng bawat tao lalo na sa pagpapalusog ng paningin, malalakas na buto at normal na paghahati-hati ng bawat cell ng isang tao habang siya ay lumalaki.

Dagdag pa ng mambabatas, malaking tulong ang bitamina A sa pagpapalakas ng paanlaban sa sakit at impeksiyon ng bawat tao o mas kilala sa tawag na immune system.

Ilan sa maiiwasang mga sakit kung sapat ang suplay ng bitamina A sa katawan ng tao, batay na rin sa World Health Organization (WHO), ay diarrhea at tigdas, panlalabo ng paningin at tuluyang pagkabulag at ang tiyak na kamatayan.

Idinagdag pa ng mambabatas ang mga batang mula sa mahihirap na bansa tulad ng Pilipinas ang kadalasang biktima sa kakulangan ng bitamina A dahil hindi sapat ang nutrisyong natatanggap ng kanilang katawan.

Isu-subpoena ng Kamara ang mga opisyal ng DBP at iba pang GOCC

Isu-subpoena ng House Committee on Good Government ang mga opisyales ng Development Bank of the Philippines (DBP) at iba pang government owned and controlled corporations (GOCC) na mabibigong dumalo sa pagdinig ng kinukuwestyong sweldo at allowances mula sa kani-kanilang tanggapan.

Ito ang babala ni Iloilo City Rep Jerry Trenas, chairman ng House committee on good government, kina Edgardo Garcia at Benedicto Ernesto Bitonio, chief operating officer at executive vice president ng DBP, ayon sa pagkakasunod, matapos nilang hindi siputin ang pagdinig sa Kamara, at nagdahilang may nauna na silang dinaluhang opisyal na pagpupulong.

Sinabi ni Trenas na binastos umano ng dalawang opisyal ang Kongreso sa hindi pagsipot kaya padadalhan sila ng subpoena sa susunod na pagdinig.

Sa ilalim ng House rules, ang mga personalidad na sangkot sa pagdinig ay dapat na dumalo at sumagot sa mga pagkwestyon ng mga mambabatas.

Ang pagkabigong makadalo sa pagdinig ay mangangahulugan ng pagpapadala ng subpoena, at sasampahan sila ng contempt upang arestuhin ng House Sergeant-at-Arms sakaling patuloy nila itong babalewalain.

Kasalukuyang iniimbestigan sa Kamara ang ulat ng maanomalyang sweldo at allowances ng mga naglilingkod sa mga government owned and controlled corporation (GOCC). “Mas malaki pa ang sweldo nila kesa sa presidente ng Pilipinas.

Ibinunyag ng Commission on Audit (COA) na si Garcia ay tumatanggap ng P5 milyon kada taon, samantalang si Bitonio naman ay sumasahod ng P4.5 milyon kada taon na ayon kay Rodriguez ay lubhang napakalaki.

Ang mga sweldo nina Garcia at Bitonio ay umaabot sa P416,000 at P300,000 kada buwan kumpara sa sweldo ni Pangulong Aquino na P1.1 milyon lamang bawat taon o P95,000 kada buwan.

Pagtatatag ng emergency rice reserve hiniling

Upang maiwasan ang pagkukulang ng suplay ng bigas sa bansa lalo na kapag nagkakaroon ng mga kalamidad, nais ng dalawang mambabatas na magtatag ang pamahalaan ng isang ahensiyang sisigurong mayroong bigas kahit na may mga bagyong dumaan sa bansa.

Naghain sina Cagayan de Oro Rep Rufus Rodriguez at Abante Mindanao partylist Rep Maximo Rodriguez ng HB01078 na naglalayong magtatag ng isang national rice reserve na siyang magsisilbing paghahanda kapag mayroong mga kalamidad at maiwasan ang pagkukulang sa suplay ng bigas.

Ayon sa knila, ang bigas ang pangunahing pagkain ng bawat Pilipino at ang pangunahing produktong inaasahan ng sector ng agrikultura ng bansa upang at ito ay maging maunlad at matatag, tama lamang na magkaroon ng isang contingency measures ang pamahalaan upang masiguro ang pagkakaroon ng sapat na suplay ng bigas para sa lahat ng mamamayan.

Nais nila na kagkakaroon ng sapat na suplay ng bigas upang hindi na kailangan pang mag-angkat nito at upang mapaghandaan ng bansa ang mga pagkakataong may kalamidad na dumarating.

Layunin ng panukala na mapanatiling mayroong sapat na stock ng bigas na sasapat sa loob ng 15 araw para sa pangkalahatang suplay ng buong bansa para sa kasalukuyang taon at ito ay dapat na napaghati-hati sa lahat ng lugar sa bansa lalo na sa mga madalas na naaapektuhan ng kalamidad.

Idinagdag pa ng mga mambabatas na ang taunang pondong kakailanganin dito ay kasama na sa taunang General Appropriations Act na inaaprubahan ng Kongreso.

Mga magnanakaw ng cell phone, bilang na ang mga araw

Nababahala na si Cebu City Rep Rachel Marguerite del Mar sa lumalala at tumataas na bilang ng pagnanakaw at pang-aagaw ng portable telecommunications devices tulad ng cellular phones, laptops, i-pads, at iba pa, kaya’t mas mabigat na kaparusahan ang kanyang isinusulong sa ilalim ng HB00373.

Sinabi ng mambabatas na ay napakarami na umano ng mga biktimang napapatay na kagagawan ng mga masasamang loob na nagkalat sa lansangan dahil sa pagtangging ibigay ang kanilang mga personal na gamit, salapi at celphones kunga kayat panahon na umano upang wakasan na ang krimeng ito sa pamamagitan ng napakabigat na parusa.

Ayon sa sa kanya, ang portable telecommunication devices ay kinabibilangan ng cellular phones, personal digital assistants, portable computers, two-way very high frequency (VHF) o ultra high frequency (UHF) radios at iba pang portable communication equipment na ginagamit sa pagpapadala ng mensahe, dokumento, larawan, imahe, videos o mga impormasyon sa pamamagitan ng himpapawid, radyo o satellite frequencies.

Sa ilalim ng panukala ni del Mar, ang sinumang mahahatulan ng pagnanakaw ng portable telecommunication device ay papatawan ng mas mataas na parusa kaysa sa kasalukuyang ipinapataw ng hukuman at hindi na rin ito papayagan pa ng hukuman na magtamasa ng probisyon sa plea-bargaining at pribelihiyo na iginagawad sa ilalim ng Probation Law.

Paggamit ng security watermarked paper para makontra ang katiwalian

Nanawagan ngayon sina Buhay Reps Mariano Michael Velarde at William Irwin Tieng sa pamahalaan na aksiyunan na ang panukalang mag-uutos sa lahat ng mga pribadong tanggapan at gobyerno na gumamit ng security watermarked paper sa lahat ng kanilang mga opisyal na dokumento tulad ng resibo, invoices, permits, licenses, clearances at iba pa upang maiwasan ang mga tiwaling transaksyon at mapatatag ang koleksyon sa buwis.

Layunin ng HB03210 na kanilang inihain na matiyak at mabantayan ang wastong pagdodokumento ng mga usaping negosyo at kalakalan sa bansa.

Sinabi ni Velarde na iba’t ibang sistema na ang ginagawa ng pamahalaan sa mahabang panahon, mula sa mga pa-raffle ng mga resibo, hanggang sa paggamit ng mga artista at kilalang personalidad para mag-endorso sa wastong pagbabayad ng buwis, ngunit lahat ng ito ay bigo sa hindi malamang kadahilanan.

Lahat umano ng mga papel na ginagamit na dokumento sa mga transaksyon ay dapat watermarked na at may mga naka-imprentang tatak o selyo ng ahensya tulad ng Rentas Internas at ng Bureau of Customs.

Sa ganitong paraan daw ay hindi madadaya o mapepeke ang mga dokumentong ito dahil magkakaroon ng proseso upang madaling malaman kung tunay ito.

Sinabi naman ni Tieng na ang paggamit ng security watermarked paper sa lahat ng mga resibo at dokumento ay magpapatatag sa koleksyon ng buwis ng pamahalaan at lubos na maiiwasan ang mga katiwalian sa mga transaksyon dahil magiging opisyal na lahat ang kalakalan.

Tax exemption sa real properties na ibebenta sa gobyerno

Posible ng malibre sa pagbabayad ng buwis ang sinumang pribadong indibidwal na magbebenta ng kanilang pag-aari tulad ng gusali, sa gobyerno.

Sa HB00181 na inihain ni Nueva Ecija Rep Joseph Gilbert Violago, ie-exempt ang mga pribadong indibidwal na nagmamay-ari ng mga lupain o gusali na ibebenta sa gobyerno sa pagbabayad ng capital gains tax.

Ayon kay Violago layunin ng panukalang ito na hikayatin ang mga pribadong mamamayan na magbenta ng kanilang gusali o real properties upang magamit ng pamahalaan bilang tanggapan nito o di kaya naman ay gamitin bilang pampublikong paaralan, hospital at iba pang uri ng imprastraktura.

Ayon sa mambabatas ang insentibong ito ay kinakaliangan upang matugunan ang pangangailangan ng pamahalaan sa mga gusali at lupain na magagamit upang makapagsilbi ng maayos sa mga mamamayan.

Tax Credits sa mga Pregnancy Care Centers, isinusulong

Hinihimok ngayon ni Parañaque City Rep Edwin Olivarez ang pamahalaan na gawaran ng insentibo ang mga pribadong pregnancy health care center sa buong bansa upang mapangalagaan ang mga nagbubuntis at maisulong ang responsableng pagpapamilya.

Kanyang inihain ang HB00155 na naglalayong gawaran ng tax credits ang mga nagtatayo ng mga pribadong pregnancy care center na mangangalaga at gagabay sa mga nagdadalang-tao, hindi lamang ng kanilang mga pangangailangang pangkalusugan, kundi maging ang pang kaisipan at emosyonal na aspeto ng responsableng pagpapamilya.

Batay sa mga datos, 49 por syento lamang ng mga Pinoy ang gumagamit ng contraception kahit pa 98 hanggang 99 porsyento ng mga mag-asawa ang may kamalayan na hinggil sa ganitong uri ng pagpaplano.

Batay sa panukala, gagawaran ng tax rebate ang organisasyon o ahensya at dapat na isa itong pribado at nonprofit corporation na siyang nangangasiwa sa pregnancy care center na hindi naniningil sa mga kababaihan sa mga serbisyong nasa ilalim ng programa.

Corporate social responsibility sa mga negosyo, gagawing batas

Magkatuwang na inihain ng mag-inang mambabatas na sina Camarines Sur Rep Diosdado Arroyo at Pampanga Rep Gloria Macapagal-Arroyo ang panukalang HB01224 o ang Corporate Social Responsibility Act of 2010 na naglalayong itatag sa mga lokal at dayuhan na korporasyon ang pag-ako ng responsilbidad sa pamayanan at kalikasan, sa ikauunlad ng ekonomiya.

Ayon sa mga mambabatas, marami umano sa mga korporasyon at establisiyemento ngayon ang walang malasakit sa kanilang kapaligiran at walang pakialam sa pamayanan kung saan ay nakatayo ang kanilang mga negosyo bagkos sariling interes at malaking kita lamang ang mahalaga sa kanila at hindi alintana ang epekto ng kanilang negosyo sa mga mamimili, empleyado, kasosyo, pamayanan at kalikasan kung kaya at sila ay nagtatanong kung nasaan na umano ang kanilang mga konsensya.

Sinabi ng mga Arroyo na nararapat na makipag-ugnayan at makipagtulungan ang pamahalaan sa lahat ng ahensya para maisulong at maitatag ang corporate social responsibility sa lahat ng mga nagnenegosyo sa bansa.

Maataas na kabayaran sa walang salang mga bilanggo

Isinusulong ngayon ni Albay Rep Al Francis Bichara na mababayaran ng P60,000 bawat taon ng pagkakabilanggo ang mga taong nabilanggo subalit napatunayang walang sala ng hukuman.

Sa inihaing HB01138 ni Bichara, sinabi nito na ginagarantiya ng bill of rights sa Konstitusyon ang karapatan ng bawat mamamayan na mabuhay ng matiwasay, may kalayaan, katarungan at hustisya sa ilalim ng mga batas na ipinaiiral sa ating bansa.

Ayon sa mambabatas, may mga pagkakataon umano na ang isang mahirap na akusado ay matagal ng nakakulong sa bilangguan habang sumasailim sa mahabang proseso ng paglilitis ng hukuman, ngunit sa huli ay mapapatunayan na wala itong kasalanan.

Nakakalungkot daw na sa mahabang panahon na ginugol nito sa bilangguan ay nasayang ang mga taon na sana ay naging isa itong produktibo at kapakipakinabang na mamamayan kaya nararapat lamang umano na ibalik sa kaawa-awang taong ito ang katumbas na halaga na ipinagkait sa kanya sa mahabang taon na pagkakakulong.