* Bahagi ng real property taxes, mapapakinabangan na ng LGUs

Pinag-aaralan ngayon sa Mababang Kapulungan ang panukalang mabigyan ng porsiyento o bahagi ang mga lalawigan sa kinukulektang real property taxes na ipinatutupad sa mga component cities.

Sinabi ni Negros Oeiwntal Rep George Arnaiz, chairman ng ways and means committee, bumuo na sila ng isang technical committee na siyang magsasagawa ng masusing pag-aaral hinggil sa panukala na isinumite ni Cebu Rep Pablo John Garcia.

Sa nakaraang pagdinig ng komite ni Arnaiz hinggil sa HB02000 ni Garcia, iminungkahi ni Arnaiz na magkaisa ang lahat ng mga lokal na pamahalaan upang magkaroon sila ng mas mataas na bahagi ng internal revenue allotments.

Iminungkahi naman ni Batangas Rep Hermilando Mandanas ang pagpapalit ng pamamahagi ng shares ng buwis ng mga LGU o dili kaya naman ay ang pagpapalit ng klasipikasyon ng mga lungsod.

Ayon kay Garcia, kailangan munang pag-aralan ang suhestiyon hinggil sa component cities upang matukoy kung ano ang magiging epekto dito dahil nakasaad umano sa Local Government Code na hindi ito maaaring makibahagi sa real property taxes na kinukulekta ng lalawigang sumasakop dito.

Idinagdag pa ni Garcia na ang mga component city ay hindi kasama sa pinapasan ng national government sa pamamagitan ng pagbubuwis kahit na sila ay may karapatang bumuto kapag may mga halalan para sa mga provincial positions.

Paliwanag pa ni Garcia na sa kasalukuyang sitwasyon, sa pamamagitan ng pagbibigay ng bahagi ng component cities sa buwis mula sa real property sa mga lalawigang kinasasakupan nito dahil hindi naman naaalis sa lalawigang kinasasakupan nito ang obligasyong panatilihing maayos ang mga kalsada sa loob ng mga component city at maging ang pagtulong sa mga barangay na nasasakupan nito.

Ayon pa sa kanya, dapat ay pantay na nakakatanggap ng bahagi o porsiyento ang mga probinsiya at maging ang mga munisipalidad dahil napakaliit ng kanilang kita upang matugunan ang kanilang pangangailangan samantalang nakaatang pa rin sa mga munisipalidad at lalawigan ang responsibilidad na mapanatiling maganda ang mga inprastraktura dito.

Sa ilalim ng panukala, 30 porsiyento ay mapupunta sa probinsiya, 40 porsiyento ay mapupunta sa general fund ng lungsod at ang 30 porsiyento ay ipamamahagi naman sa lahat ng barangay ng lungsod kung saan naroroon ang ari-ariang ipinagbayad ng buwis.

* Industriya ng konstruksiyon, paiigtingin

Isinusulong ngayon sa Mababang Kapulungan ang panukalang naglalayong patatagin, imodernisa at paigtingin ang industriya ng kontruksiyon sa bansa sa pamamagitan ng pagtatatag ng Philippine Construction Industry Development Authority (PHILCIDA).

Sinabi ni Camarines Sur Rep Diosdado Arroyo at ng kanyang inang si Pampanga Rep Gloria Macapagal-Arroyo, mga may akda ng HB01473, na makakatulong ang panukalang ito upang mapaunlad ang industriyang ito at makapagbigay ng trabaho at mas malaking kita sa mamamayan at sa bansa.

Ayon kay Arroyo, layunin ng panukalang ito na mapaunlad ang competitiveness ng industriyang ito sa pamamagitan ng pagtataas ng kalidad ng construction work, pagtataas ng kaalaman ng mga trabahador sa pamamagitan ng mga pagsasanay at dagdag kaalaman, pagsusulong ng kaligtasan sa lugar ng pinagtatrabahuhan at ang pagsusulong ng mas malawak na public-private partnership upang mapaunlad ang construction industry.

Idinagdag pa ni Arroyo na malaki umano ang pag-asa ng construction industry na siyang mag-angat sa ekonomiya ng bansa dahil na rin sa katotohanang nakakapagpasok ito ng hanggang 43.0% sa Gross Fixed Capital Formation ng bansa at 4.2% sa Gross Domestic Product (GDP).

Nakagawa rin daw ito ng halos 1.7 milyong trabaho noong 2005 at nakapagbigay ito ng basic physical, industrial, commercial at social infrastructure facilities na kinakailangan sa pag-unlad at pagpapanatili nito, sa iba’t-ibang sektor ng ekonomiya tulad ng pabahay, manufacturing, commerce, transport, serbisyong pang-agrikultura at iba pa.

Dagdag na benepisyo para sa mga hukom, isinusulong sa Kamara

Nanawagan ngayon si Pampanga Rep Carmelo Lazatin sa Kamara na agad aksiyunan ang panukalang naglalayong maitaas at madagdagan ang benepisyo ng may 2,308 na retiradong hukom ng bansa.

Sinabi ni Lazatin na kahit na delikado at napakahirap ng ginagampanan ng mga hukom sa pagpapanatili ng pantay na pagbibigay ng hustisya sa bawat mamamayan ng bansa at ang buong buhay nila ay nabahagi na sa bansa, hindi sila nabibigyan ng sapat at karapat-dapat na benepisyo kapag sila ay retirado na.

Ayon pa sa kanya Lazatin, hindi pa rin umano natatanggap ng mga retiradong hukom ang benepisyong nakalaan sa kanila ayon sa batas na ipinatupad sana noon pang 2007 na nagkakahalaga na ng humigit-kumulang sa 900 milyong piso.

Ang HB01436 na isinumite ni Lazatin sa Kamara ay naglalayong madagdagan ang benepisyo ng mga retiradong hukom ng bansa bilang pagkilala na rin sa kanilang kontribusyon sa sistema ng hustisya at sa pamahalaan.

Dagdag pa ni Lazatin hindi na angkop ang RA09946 sa mabilis na pagbabago ng ekonomiya ng bansa at hindi na sumasapat sa mga ito ang kanilang natatanggap sa kasalukuyan.

Nakasaad sa RA9946 ang pagbibigay ng dagdag na benepisyo sa mga miyembro ng judiciary na nagsilbi sa pamahalaan ng di bababa sa 15 taon at nag retiro na sa edad na 70 o tumigil na sa serbisyo dahil sa kapansanan.

Mabibigayn ang mga ito ng sweldo at aggregate allowances na natatanggap nila bago sila magretiro o magbitiw sa trabaho at may kaakibat din itong scholarship grant para sa mga anak.

Sa panukala ni Lazatin na kikilalanin bilang Judiciary Members Increased Retirement Benefits Act, masasakupan nito ang lahat ng retiradong miyembro ng hudikatura maging yaong mga napilitang magretiro na umabot ng edad na 70 taong gulang at nakapagsilbi ng kahit 15 taon lamang sa serbisyo.

Telephoto lenses at hyperbolic microphones, ipagbabawal na

Isinusulong ngayon sa Kamara de Representantes ang panukalang naglalayong ipagbawal na ang paggamit ng telephoto lenses at hyperbolic microphones na nagagamit upang makapanakot at ginagamit na pang-komersiyal o paninda.

Inihain ngayon ni Camarines Sur Rep Diosdado Arroyo at ng kanyang inang si Pampanga Rep Gloria Macapagal-Arroyo ang HB01472 na naglalayong mapanatili ang isinasaad ng Konstitusyon na nagbibigay ng proteksiyon sa kapayaan at katahimikan, buhay, kalayaan at kagamitan at ang pagsusulong ng pangkalahatang kabutihan ng lahat ng mamamayan na hatid ng demokrasya.

Sinabi ni Arroyo na isa sa mga nais bigyang proteksiyon ng panukalang ito ay ang karapatan ng bawat pamilya at ng bawat indibidwal na madalas ay nabibiktima ng mga mapagsamantalang photographer, videographer at audio recorder na pumapasok sa pribadong lugar tulad ng tahanan ng isang nais nilang pagsamantalahan at kunan ng mga litrato upang magamit sa pananakot at pagkita ng pera ng walang pahintulot ang kanilang kinukunan.

Ayon pa sa mag-inang Arroyo na higit na naging mas mapangahas ang mga gumagawa nito nang magkaroon ng mga makabagong teknolohiya tulad na may modernong sangkap na may visual o auditory enhancement devises, halimbawa na rito ang malalakas na telephoto lenses at hyperbolic microphones na nagagawang makapasok maging sa mga pribadong lugar ng hindi kinakailangan ang personal o malapitan ng mga gumagawa ng illegal na bagay.

Ipinaliwanag pa nila na dahil sa mga pagbabago at pag-unlad na ito, ang pananakot, pagpasok ng walang pahintulot sa mga pribadong buhay ng isang pamilya, maging ito man ay pribado o may pampublikong buhay at nagkaroon ng trahedya sa buhay, ay napakikialaman kahit wala silang pahintulot at naipapalabas sa media.

Pinaigting na batas laban sa mga sindikatong gumagamit ng bata, ipapasa

Paiigtingin ng Mababang Kapulungan ang operasyon laban sa mga sindikatong gumagamit ng kabatan sa kanilang iligal na gawain sa pamamagitan ng pag-aamiyenda ng kasalukyang batas hinggil sa juvenile justice system.

Sinabi ni Sorsogon Rep Salvador Escudero, may akda ng HB00467, na sa kasalukuyang batas, ang RA09344, lahat ng bata na may edad 15 pababa at mga kabataang nasa edad 15 pataas ngunit di lalampas sa 18 napapagitna sa isang kaguluhan ay walang pananagutang kriminal o hindi dapat masampahan ng kasong kriminal.

Ayon Kay Escudero, ang probisyong ito umano ay nagagamit ng mga sindikato upang makaligtas sila sa pananagutan at maiwasan ang kaparusahan ng batas at dahil na rin sa katotohanang ang mga bata ay hindi maaaring makasuhan ng anumang krimen kaya sila ang madalas na ginagamit ng mga sindikato.

Ang RA09344 ang nagtatag ng isang komprehensibong juvenile justice at welfare system sa pamamagitan ng pagtatag ng juvenile justice and welfare council na nasa pangangasiwa ng Department of Justice (DOJ).

Idinagdag pa ni Escudero na sa pag-amiyenda ng RA09344, ang mga kabataang masasangkot at makagagawa ng krimen ay hindi na makakaiwas sa kaparusahan ng batas ayon sa isinasaad sa HB00467.

Ito rin halos ang nakasaad sa mga panukalang inihain nina Caloocan City Rep Mary Mitzi Cajayon, may akda ng HB02611 at Bacolod City Rep Anthony Rolando Golez Jr. na nagpanukala rin na amiyendahan ang RA09344 na nagbabalik sa pananagutang kriminal ng mga kabataang masasangkot sa iligal na gawain kahit na sila ay 18 pa lamang ang edad.

Naniniwala naman si Davao Rep Karlo Alexei B. Nograles, may akda ng HB03077, na dapat sumailalim sa isang masusing intervention program na pangangasiwaan ng lokal na social welfare and development officer ang mga kabataang paulit-ulit na makakagawa ng krimen at dapat silang ituring na mga kabataang napabayaan.

Karagdagang benepisyo para sa mga kasambahay

Naghain ng isang panukalang batas si Navotas Rep Toby Tiangco na naglalayong bigyan ng karagdagan benepisyo at maayos na kondisyon ang mga kasambahay.

Sinabi ni Tiangco na ipagpapaibayo ng HB03717 na inihain niya ang hanay ng mga kasambahay na kadalasan ay naging biktima sa mga pang-aabuso at palaging napababayaan ng pamahalaan.

Ayon sa mambabatas, may mga pagkakataon umano na nakakadanas ang iilang mga kasambahay ng mga mapapait na na buhay sa minsan ay ikinakandado ng kanilang amo sa loob ng kuwarto at minsan ay nakakaranas ng pambubugbog.

Ipinanukala ni Tiangco na magkaroon ng kontrata sa pagitan ng employer at employee para sa pagbibigay ng ka¬ragdagan mga benepisyo tulad ng Social Security System at Philhealth coverage, mandatory days-off at holidays.

Panukala hinggil sa pagkontrol ng industriya ng LPG, isinusulong

Iminungkahi sa Kamara ang pagtatatag ng isang regulatory framework na siyang magtatakda ng panuntunan kung papaanong maisasaayos ang industriya ng liquified petrolium gas o LPG para maseguro ang kaligtasan at kapakanan ng mga konsiyumer.

Sinabi ni Tarlac Rep Susan Yap, may akda ng HB01418, na layunin umano ng panukala na magtakda ng iisang panuntunan na susundin ng mga nasa kalakal ng LPG, auto-LPG, LPG containers at LPG cylinder industries upang maiwasan ang mga sakuna na kaakibat ng kalakal na ito kung ang mga nasa industriyang ito ay gumagamit ng sub-standard LPG products.

Sa ilalim ng panukala na mas kikilalanin bilang LPG Industry Regulation and Safety Act of 2010, aatasan ang Department of Energy (DOE) na siyang mangasiwa at magbantay sa industriya ng LPG at sa lahat ng mangangalakal na may kaugnayan dito kung ang mga ito ay sumusunod sa alituntunin at regulasyong pangkaligtasan na itatakda ng batas na ito.

Nakasaad din sa panukala na dapat ay mayroong sapat na dokumento at lisensiya ang alinmang LPG cylinder o container manufacturers, requalifiers, repairers at scrapping centers na magmumula sa Department of Trade and Iindustry bago pa man ito magsimula ng negosyo.

Mahaharap sa P5 milyong multa ang isang tao o di kaya’y P10 milyon kung ang sangkot ay isang korporasyon na magsisimula ng negosyong may kinalaman sa LPG ng walang sapat na dokumento at Standard Compliance Certificate na magmumula sa DOE.

Pagpapa-ibayo ng Millenium Development Goals (MDGs) ng bansa isinusulong

Pinag-iibayo ng Kongreso ang pagsusulong na mabawasan ang utang ng bansa upang makamit ang layunin ng Philippine millennium development goals (MDGs) matapos na aprubahan ng House Special Committee on Millennium Development Goals na pinamumunuan ni Ilocos Norte Rep Imelda Marcos ang panukala na magtatatag sa pinagsanib na legislative executive council on debt to MDG swap.

Ang joint legislative executive council ay kabibilangan ng 3 kinatawan mula sa Senado, 3 kinatawan mula sa Mababang Kapulungan at 5 naman sa ehekutibo.

Inilarawan ni Minority Leader at Albay Rep Edcel Lagman na panalo ang solusyon ng mga nagpapautang na bansa na bayaran ng bansang may utang ng halagang katumbas ng kaunlaran at kalusugan na naaayon sa MDG upang matugunan ang pandaigdigang krisis pampinansyal.

Sinabi ni Marcos na ang pangangailangan na matugunan ang natitirang hamon upang makamit ang layunin ng MDG na kinabibilangan ng pag-aalis ng gutom at kahirapan, pandaigdigang pagsulong sa edukasyon, pantay na pagtrato sa kasarian at pagbibigay kapangyarihan sa kababaihan, pagbabawas ng pagkamatay sa mga sanggol, pakikidigma sa sakit na HIV at AIDS, malaria at iba pang karamdaman, pangangalaga sa kalikasan, at pandaigdigang pakikipag-ugnayan para sa kaunlaran.

Sinang-ayunan naman ang panukala ni National Economic Development Authority (NEDA) Director Erlinda Campones basta at wala lamang umanong malalabag na kasunduan hinggil sa pangungutang.

Panukalang pag-alis ng karahasan laban sa kababaihan, sisertipikahan ni PNoy

Nananawagan ngayon ang mga kababaihang mambabatas kay Pangulong Bengno Noynoy Aquino na sertipikahan ang panukala na magdedeklara sa petsang ika-25 ng Nobyembre kada taon bilang National Consciousness Day for the Elimination of Violence Against Women.

Sinabi ni Bulacan Rep Linabelle Ruth Villarica na igigiit nila ang kanilang panawagan sa pangulo sa pagpupulong ng Legislative-Executive Development Advisory Council (LEDAC) na ipatatawag ng Malacañang upang talakayin ang mga mahahalagang panukala na ilalatag sa ika-15 Kongreso.

Ang HB03427 na iniakda nina Cagayan de Oro City Rep Rufus Rodriguez, Abante Mindanao Partylist Rep Maximo B. Rodriguez, Jr., BH Partylist Rep Bernadette Herrera-Dy, Tarlac Rep Susan Yap-Sulit, Malabon City Rep Josephine Veronique Lacson-Noel, GABRIELA Partylist Luzviminda Ilagan at Rep Villarica, ay nakatakda nang aprubahan ng House Committee on Women and Gender Equality (CWGE).

Sinabi ni Rep Ilagan, chairperson ng CWGE, na sinusuportahan ng buong Kongreso ang kampanya para sa pambansang kamalayan sa gender equality at anti-violence against women na nangangailangan ng masusing pagrepaso at amiyenda sa umiiral na Anti-Rape Law at Anti-Sexual Harassment Law.

Isinulong ng Gabriela ang programang rage against rape na nagsusulong ng kampanya ng araw para sa pag-aalis ng karahasan at paglapastangan sa mga kababaihan at pagpapahayag ng pagtutol dito.

Nakababahala umano ang lumalaking bilang ng mga kababaihan, ayon pa kay Ilagan, na napipilitang magtrabaho sa gabi hanggang madaling araw sa mga opisina at pagawaan tulad ng Business Process Outsourcing Industry (BPOs) at call centers na lubhang mapanganib at kadalasan ay nakararanas sila ng pambabastos, panghahalay, panggagahasa, at iba pang uri ng karahasan kaya dapat lamang na magpatupad ng mga pamamaraan upang maalis ang kahirapan na siyang dahilan ng mga panganib na ito sa mga kababaihan at kabataan.

Iginiit naman ni Yap-Sulit ang isyu sa trafficking ng mga kababaihan na kasamang tinalakay sa Regional Ministers’ and Parliamentarians’Actions at Legislations on the Elimination of Violence against Women na isinagawa sa Yogyakarta, Indonesia.

Karapatang pantao, prayoridad ng Kongreso: Belmonte

Bilang tugon ng ika-15 Kongreso sa pandaigdigang pakikibaka sa karapatang pantao, ipinahayag ngayon ni House Speaker Feliciano Belmonte na nananatiling matatag ang paninindigan ng Kamara de Representantes na pangalagaan at protektahan ang karapatang pantao.

Sinabi ng lidder ng Kamara, ang mga karapatang tinatamasa ngayon sa bansa ay pamana umano ng ating mga bayani na nakibaka at nakipaglaban para sa isang tunay na kalayaan at kasarinlan.

Nakakalungkot lamang daw na wariin na matapos ang 62 taon nang ideklara ang makasaysayang Universal Declaration of Human Rights noong 1948 ay patuloy pa ring nakikibaka ang adhikaing ito upang ganap na maging pandaigdigang layunin ito.

Inihalimbawa ng Speaker ang kasalukuyang karanasan ng may 9 na milyong OFW sa ibayong dagat na nakararanas ng pagmamalabis at diskriminasyon, ang hamon ng pagbabago ng panahon at klima sa mga mahihirap na mamamayan at ang karumaldumal na masaker sa Maguindanao na nagsilbing paalaala sa ating kabiguan na igarantiya ang karapatang pantao ng sambayanan.

Tiniyak ni Belmonte na patuloy na isusulong ng Kamara ang adhikain para sa mga karapatan ng mga mamamayan, sa pamamagitan ng mga panukalang batas na kasalukuyang binabalangkas sa plenaryo.

Ilan sa mga nakalatag na panukala ngayon sa Kamara ang mga sumusunod:

- HB00048, HB00205, HB02635 at HB02982 na naglalayong paunlarin ang pangangalaga ng karapatang pantao sa pamamagitan ng pagpapairal ng mga patakaran hinggil sa masamang epekto ng internal displacement;
- Pagpapatatag sa Commission on Human Rights (HB00055, HB01141);
- Pagtatatag ng human rights resource centers sa buong bansa (HB00471);
- Pagbabawal sa diskriminasyon dahil sa kasarian (HB00515);
- Pagpapatatag sa karapatan para sa malayang pamamahayag, malayang pagtitipon-tipon at malayang pamamahayag ng mga hinanakit laban sa pamahalaan (HB00010, HB01065; HB02636); at
- Pag-aamiyenda sa RA07277, o Magna Carta for Disabled Persons; at RA09745, o Anti-torture Act of 2009.

Batas sa anti-bouncing checks, ipinababasura

Upang mabawasan ang sangkatutak na kasong nakabinbin sa mga hukuman, ipinababasura ni Palawan Rep Victorino Dennis M. Socrates ang batas hinggil sa anti-bouncing checks o Batas Pambansa Blg. 22 para garantiyahan at tiyakin na walang nakukulong sa utang.

Ayon kay Socrates, ang paglabag sa BP 22 ay kinasasangkutan ng pagbabayad ng postdated checks bilang kabayaran sa pagkakautang at tugon na rin sa patakaran ng naturang batas, ngunitt taliwas ito sa ginagarantitya ng Saligang Batas sa ilalim ng Bill of Rights na walang sinuman ang maaaring makulong dahil sa utang.

Sa inihain niyang HB03045, ito ang magpapawalang bisa sa lahat ng nakabinbing kaso sa paglabag ng BP 22 ngunit tiniyak naman dito na hindi malalabag ang karapatan ng mga nagpapautang dahil maaari silang magsampa ng kasong estafa sa ilalim ng Revised Penal Code at kasong sibil upang makolekta ang kanilang mga pautang.

Matatandaang ipinatupad ang BP 22 noong 1979 upang parusahan ang sinumang nagbayad ng tseke kahit hindi kaila sa kanya na wala itong pondo sa bangko at ang nakalaang parusa dito ay pagkabilanggo ng 30 araw hanggang isang taon o multang doble ng halaga ng tseke, o pareho depende sa hatol ng hukuman.

Bukod sa mababawasan na ang mga kasong nakabinibin sa korte, mababawasan na rin ang pangongolekta ng utang sa pamamagitan ng mga paglilitis ng kaso sa mga korte dahil sa paglabag sa BP 22.

Pagpapatatag ng propesyon sa interior design isinusulong

Babalangkasin na sa plenaryo ang HB00909 ni Tarlac Rep Susan A. Yap at HB02134 ni Nueva Vizcaya Rep Carlos M. Padilla na naglalayong tapusin ang pamamayagpag ng mga huwad at nagpapanggap na professional interior designers sa bansa.

Ang pinagsanib na panukalang tatalakatin ay magpaparusa sa mga dayuhang indibidwal at korporasyon na iligal na nagtatrabaho sa bansa bilang mga consultant at nag-aalok ng serbisyong interior design na labis na nakakaapekto sa mga lokal na propesyunal at biktima ng pagnanakaw ng disenyo o intellectual property right sa kanilang mga dibuho at disenyo.

Sinabi ni Padilla na hindi na epektibo sa kasalukuyan ang umiiral na Philippine Interior Design Law o RA08534 kung saan ay sumusunod ang bansa sa polisiya na itinatagubilin sa General Agreement on Trade Services (GATS) at dapat na umanong repasuhin ang batas na ito upang mapangalagaan ang karapatan ng ating mga propesyunal at mapaunlad ang industriya ng interior design.

Sa ilalim naman ng panukala ni Yap, ang HB00909, paparusahan ang mga dayuhang kompanya at indibidwal na iligal na nag-aalok ng serbisyo sa interior design sa bansa.

Ang bagong tatag na Professional Regulatory Board of Interior Design ng Professional Regulation Commission (PRC) ang mangangasiwa at magpapatupad ng mga patakaran ng mga probisyon ng batas.