Bioethanol plant sa Cagayan de Oro, di pinaburan

Hindi pinaburan ng House Committee on Ecology ang pagtatatag ng isang planta ng bioethanol sa Cagayan de Oro City sa dahilang possible umano itong makasira sa kapaligiran at sa mga lupaing ginagamit sa pagsasaka.

Sinabi ni Zamboanga Sibugay Rep at committee chairperson Belma Cabilao na bagama’t may mga benepisyong makakamtan ang ekonomiya sa pagtatayo ng isang bioethanol plant, nakikita rin umano ng komite ang posibleng negatibong epekto nito sa kalapit na ilog at sakahan kaya’t napagpasyahan nila na irekomenda na lang ang paglilipat ng nasabing proyekto sa isang mas ligtas na lugar o sa lugar na idineklara bilang agro-industrial kung saan ito naaangkop.

Dahil dito, inatasan ni Cabilao ang Environmental Management Bureau ng Department of Environment and Natural Resources (DENR) na iparating sa mga nagsusulong ng proyektong bioethanol plant ang naging desisyon ng Komite.

Nagpahayag naman ng pasasalamat si Cagayan de Oro Rep Rufus Rodriguez, may-akda ng HR00852 na siyang komokontra sa proyekto na nagsabi rin na dapat ay magsilbing babala sa mga nagsusulong ng kahalintulad na proyekto ang naging desisyon ng Komite.

Ayon kay Rodriguez, hindi papayagan ng Kongreso na tuluyang masira ang ating kapaligiran at malagay sa kapahamakan ang buhay ng nakararami kaya ang ganyang proyekto ay hindi makakalusot sa tao at sa Kongreso.

Ayon naman kay Cabilao, ang sinumang grupo o kumpanya na naglalayong magtayo ng bioethanol plant ay kinakailangang magsagawa ng pag-aaral sa pangmatagalan at agarang epekto nito, partikular na yaong negatibong epekto nito, sa agrikultura, anyong tubig, o ilog at sapa, sa mga pinanggagalingan ng tubig na ginagamit at iniinom ng mga mamamayang naninirahan sa lugar, sa kaligtasan ng tao at sa paggamit ng umano’y zero-waste technology.

Dapat ay siguraduhin umanong bago pasimulan ang bioethanol plant ay sumunod ito sa mga alituntunin para sa kaligtasan, tulad ng paglalagay ng konkretong bakod at engineered maps upang maalis ang takot ng mga naninirahan malapit dito tungkol sa kontaminasyon ng kanilang sakahan, ilog, at sapa o dagat at groundwater sources.

Pagtatanim ng mga punong kahoy at gulay, ipag-uutos

Magtanim ng mga punong kahoy at mga gulay sa kalungsungsuran at kanayunan at sa lahat ng dako ng bansa. Ito ang ipag-uutos sa mga mamamayan upang maprutektahan ang ating mga likas na yaman na maubos.

Sinabi ni partylist Rep Godofredo Arquiza, may pangangailangan umanong magpasa ng batas na magsalba sa ating kasalukuyang kapaligiran sa kalamidad kagaya ng pagbaha at upang mahadlangan ang pinsala sa buhay, ari-arian at kaligtasan.

Ayon kay Arquiza, hindi maitulak ang mataas na kalidad ng buhay ng tao hanggang hindi natin mapangalagaan ang estado ng ating kasalukuyang kapiligiran.

Idinagdag pa ng mambabatas na nararamdaman na ng mundo ngayon ang tinatawag na climate change kaya mahalaga na ang likas na kayamanan ng bansang Pilipinas ay maprotektahan at mapanatiling maayos.

Sa kanyamg inihaing panukala, lahat nang mga mamamayang naninirahan sa siyudad na nagmamay-ari ng hindi bababa sa dalawang daang metro kuwadradong bakanteng lote ay dapat na mag-allocate ng dalawampung prosiyento ditto sa lupang ito para taniman ng mga punong kahoy at gulay at ganun na rin sa kanayunan.

Ang mga lokal na pamahalaan ang aatasang mangasiwa, pakikipagtulungan sa Department of Environment and Natural Resources o DENR, para sa ganap na pagpapatupad ng naturang probisyon sa sandaling ang panukalang ito ay maisabatas na.

Pinasimple na ang proseso sa land application

Mabilis na ngayon ang pagkakaroon ng sariling lupa kapag tuluya nang maisabatas ang panukalang naglalayong gawing simple ang proseso ng land applications.

Sinabi ni Camiguin Rep Pedro Romualdo, may akda ng HB07101, na dapat nang amiyendahan na ang Public Land Act, o ang Commonwealth Act 141, upang ito ay makaagapay sa kasalukuyang panahon.

Ayon kay Romualdo, sa kasalukuyang batas, lahat ng mga land application ay kinakailangang maipalathala kada linggo sa loob ng anim na sunud-sunod na linggo, sa dalawang pahayagan, isa sa Metro Manila at isa sa lugar kung saan matatagpuan ang lupaing ninanais na makamit.

Ang probisyong ito, ayon sa kanya, ay nagdadagdag lamang sa pasanin ng nagnanais na magkalupa at nagagamit din ang probisyong ito sa red tape sa pamahalaan.

Ayon pa kay Romualdo, babawasan ang bilang ng araw na dapat na mailathala ang land application mula sa dating anim na lingo at gagawin na lamang itong dalawang linggo.

Babawasan din ang panahon ng paghihintay kung kailan maia-award sa winning bidder ang lupa mula sa dating 60 na araw, gagwin na lamng itong 30 araw.

Ani Romualdo ang panukalang ito ay siyang magpapadali at magpapasimple sa proseso ng pag aapruba ng lahat ng mga land application sa bansa.

Pagmodernisa ng PAGASA, ipinanukala

Magkaroon na ng mga gamit na state-of-the-art ang Philippine Atmospheric, Geographical and Astronomical Services Administration (PAGASA) sa sandaling maisabatas ang panukalang may layuning mabantayan at mapag-aralan ang bagyo, tropical depression, tsunami at hurricane bago pa man ito makapasok sa bansa.

Bago magtapos ang ika-14 na Kongreso, isinumite ni Camarines Sur Rep Diosdado Arroyo ang HB07069 na magbibigay pahintulot sa PAGASA na i-upgrade ang kanilang mga gamit, instrument at pasilidad upang mapabuti ang kanilang gawaing pagbibigay babala at forcasting hinggil sa mga kalamidad na papasok sa bansa.

Sinabi ni Arroyo na dapat mapaunlad ang kakayahan ng PAGASA sa gawain nitong magbigay ng serbisyo at maprotektahan ang mamamayan sa pamamagitan ng pagbibigay ng mas komprehensibong kaalaman hinggil sa mga dumarating na kalamidad sa bansa ng sa gayon ay maging handa ang bawat isa sa anumang dalang perwisyo ng bagyo at iba pa.

Aatasan ang PAGASA sa panukala na magsagawa ng upgrading ng kanilang physical resources at operational techniques sa pamamagitan ng pagbili ng mga makabagong instrument, kagamitan at pasilidad upang makasabay at makaagapay ito sa kasalukuyang panahon at makapagbigay ng mga importante, napapanahon at mapagkakatiwalang babala, forecasting, at serbisyo lalo na sa sector ng mga magsasaka o agrikultura, transportasyon at mga industriya ng bansa na kadalasang naaapektuhan kapag may dumarating na kalamidad.

Layunin din ng panukala na mapataas ang kakayahan ng ahensiyang ito sa pag-aaral, pagpapaunlad at madagdagan ang mga taong maaaring makatulong upang lalong mapabuti ang serbiosyong ibinibigay ng PAGASA.

Programang pabahay para sa mga guro isinulong sa Kamara

Isinusulong ngayon sa Kamara de Representantes ang isang panukalang naglalayong itatag ang permanenteng programang pabahay para sa lahat ng mga guro sa buong bansa.

Sinabi ni Cagayan de Oro Rep Rufus Rodriguez, ang mga guro sa mga pampublikong paaralan ay maituturing na mga unsung heroes ng bayan at napapanahon na upang sila ay mabigyan ng pagkilala at pabuya.

Ayon sa kanya, nagtatrabaho umano ang mga guro ng lampas-lampas sa oras ngunit di naman sila nababayaran ng tama at hindi natatapos ang kanilang trabaho sa pagtuturo lamang ng walong oras kada araw kundi ay hangang sa bahay ay nagtatrabaho pa rin sila dahil ginagawa nila ang kanilang lesson plan para sa susunod na araw at nagrerebisa at nagti-check pa ng mga examination.

Ang programang pabahay ay nararapat lamang umano, ayon pa kay Rodriguez, na abot-kaya para sa mga guro na may fixed low interest rate at may mas mahaba at kayang-kayang sistema ng pagbabayad.

Nakasaad na sa panukala ang pagpapatupad ng fixed interest rate na limang porsiyento kada taon at ang equity ay dapat na nasa 5% din lamng ng kabuuang halaga ng bibilhing lupa at bahay.

Sa panig naman ng mga guro, magiging basehan upang makasali sa programang pabahay ang length of service sa pagtuturo ng hindi bababa sa limang taon, dapat may permanenteng posisyon, at wala pang pag-aaring bahay o hindi pa nakakapag-avail ng anumang housing program, na nakalagay sa kanilang pangalan at hindi lalampas sa 65 taong gulang.

Mahigpit namang ipagbabawal ang paglilipat o conveyance of the property sa ibang tao maliban na lamang kung ang paglilipatan nito ay kamag-anak na hanggang sa second degree of consanguinity o sa isa pang qualified na guro.

Ituturing na resigned na ang opisyal na nahaharap sa recall proceedings

Itatadhang resigned na ang mga lokal na opisyal na mahaharap sa recall proceedings, ito ang layunin ng HB04801 na naipasa na ng Kongreso sa ikatlong pagbasa at nag-aantabay na lamang sa aksiyon ng Senado.

Sinabi ni Party-list Rep Narciso Santiago, may-akda ng nabanggit na panukala, na para maiwasan na ang malaking gastusin na gagamitin sa mga recall proceedings, dapat nang ituring na resigned sa kanilang puwesto ang sinumang elective official na mahaharap dito.

Sa kasalukuyang batas, ang isang nakapwestong halal na opisyal na nahaharap sa recall ay hindi maaaring magbitiw sa kanyang posisyon hanggang hindi natatapos at napagdedesisyunan ang recall proceedings.

Ayon kay Santiago, dapat hayaan na lamang na magbitiw ang naturang opisyal upang makatipid na ang pamahalaan sa kakarampot na pondo nito na galing sa buwis ng mga mamamayan.

Ang gastusin sa mga recall proceedings o recall elections ay nakaatang sa Commission on Elections, sanhi upang madagdagan pa ang dinadalang gastusin ng pamahalaan.

Ang recall ay isang mekanismo na nakasaad sa Saligang Batas upang makagawa ng isang mapagkakatiwalaan, responsive and accountable na lokal na pahalaan at isa itong proseso ng pagtatanggal ng sinumang halal na opisyal.

Aamiyendahan ng panukala ang Section 73 ng Republic Act No. 7160, ang Local Government Code of 1991, hinggil sa prohibition against resignation of officials being recalled.

Subic-Clark ecozones, umunlad na ng ibayo

Ipinagmamalaki ng admindistrasyon ni Pangulong Gloria Macapagal Arroyo bilang pangunahing tagumpay sa Central Luzon ang pagyabong at pag-unlad ng Subic Special Economic and Freeport Zone (SSEFPZ) at Clark Freeport and Special Economic Zones (CFSEZ).

Sinabi ni Quezon Rep Danilo Suarez, chairman ng House Committee on Oversight, na nagawa ng dalawang freeport zones na makaengganyo ng mga dayuhang mangangalakal at makagawa ng libo-libong trabaho para sa mamamayang Filipino mula nang gawing investments destination ang dalawang dating base militar.

Nabigyan ng pansin ang dalawang Freeport zones na ito nang magpalabas ng kautusan ang pangulo, ang EO 504 na nagtatatag ng Subic-Clark Alliance Development Council (SCADC), isang coordinative body na siyang mamamahala sa pagpapaunlad ng Subic at Clark.

Nakatutok ang nabanggit na council sa pagtatatag ng iisa at patuloy na economic growth corridor na siyang magbibigay daan upang magkaroon ng isang world-class logistics infrastructure at serbisyo tulad ng multi-modal transport hub, isang kaaya-kaayang lugar para sa mga nagnanais na maglagay ng negosyo sa bansa.

Sa ilalim ng plano, ang Subic at Clark ay may layunin paunlarin ang lugar bilang isang world-class mega logistics hub na magbibigay ng mga sumusunod; seamless delivery of goods, services, people at impormasyon mula at patungo sa produksiyon, pagmamanupaktura hanggang sa mga kalakalan o trading centers sa buong bansa.

Layunin ng SCADC na di lamang maging gateway for locators sa loob ng Subic at Clark, ngunit gawin ding main gateway ng Pilipinas ang Subic at Clark maging sa buong mundo.

Naging matagumpay naman ang Subic at Clark at nagawa nitong abutin ang nilalayon nito, katibayan na ang p[agiging matagumpay ng Clark na nagkaroon ng aktwal na investments na nagkakahalaga ng P79.8 bilyon mula sa dati nitong P31.78 bilyon noong 2004. Nitong nakaraang 2008, nagkaroon ng kabuuang exports na nagkakahalaga ng US$950 milyon, ito ay 7.51% na mas mataas kumpara noong 2007.

Base sa pinakahuling tala, noong unang quarter ng 2008 ay mayroon pa umanong inaasahang 48 na bagong kontrata na ang investment commitment ay nagkakahalaga ng P1.43 bilyon.

Mga bakuna, nais bantayan upang maseguro ang kaligtasan

Magtatag ng isang sistema kung papaanong mababantayan at mapahinto ang mapamamahagi sa mga mamamayan at ang posibleng negatibong epekto ng bakuna sa tao.

Ito ang iminungkahi ni Camarines Sur Rep Luis Villafuerte, may akda ng House Resolution 1551, at ayon sa kanya, isasama sa talaan ang pagdudokumento ng mga bakuna na hindi naging matagumpay at ang naging epekto nito, pati na kung may namatay sa paggamit ng bakuna at kung ito man ay naitala sa mga pangunahing medical journals sa buong mundo.

Sinabi ni Villafuerte, napakarami na ring umanong libro ang naisulat at naipatala ng mga doctor, research groups at mga independent investigators na nagsasabi at nagbubulgar ng mga depekto, pagkakamali at kapalpakan sa mga immunization theory at practice.

Ayon sa kanya, may mga pag-aaral na na ang lumalabas ay hindi naman talaga kailangan ang bakuna at kung tutuusin limitado ang benepisyong idinuduloy nito at may masama ring epektong naibibigay ng mga bakuna sa katawan ng tao.

Mayroon na dim umanong mga kumukuwestiyon at kumikilos upang mapigilan ang pagpapatupad ng mass mandatory immunizations at umiwas sa bakuna dahil na rin sa mas marami nang magulang ang nakakaalam at nakakaintindi sa epekto ng bakuna sa katawan ng tao.

Batay sa panukala, bibigyan ng mandato ang Bureau of Food and Drugs Administration (BFAD) at ang Department of Science and Technology (DOST) at iba pang ahensiya na may kinalaman at nagsasagawa ng mga pag-aaral at research study, na muling pag-aralan at busisiin at magsagawa ng mas malalim na pag-aanalisa, pagbabantay tungkol sa mga negatibong epekto ng bakuna sa katawan ng tao.

Pampublikong mga ospital, bawal isapribado

Tuluyan nang ipagbabawal ang pagsasapribado ng mga pampublikong ospital, ito ay makaraang ipasa sa ikatlo at huling pagbasa sa Mababang Kapulungan ang panukalang nagbabawal sa pagsasapribado ng mga ospital na pinopondohan ng pamahalaan.

Sinabi ni South Cotabato Rep Arthur Pingoy, Jr na sa pagsasabatas ng House Bill 3777, tuluyan nang pagbabawalan ang kalihim ng Department of Health (DoH) makipag-usap, makipagkasundo, magbenta at ialok na ibenta at gawing pribado ang alinmang ospital ng bansa na pinupondohan ng pamahalaan.

Ayon kay Pingoy, ilan sa mga hindi maaaring galawin upang maging pribadong ospital ay ang sumusunod; mga ospital na pinupondohan o ginagastusan ng pamalahaan, maging ito man ay maintained partially o wholly ng national, provincial, municipal, o ng city government o iba pang political subdivision, o ng alinmang departamento, dibisyon, board o iba pang ahensiya.

Sinabi naman ni Cagayan de Oro Rep Rufus Rodriguez, may akda ng panukala, layunin sana ng pagsasapribado ng mga pampublikong ospital na mareporma at maresolba ang problema sa gastusin ng
pagmimintena at pagpapatakbo ng mga pampublikong ospital.

Ngunit nakita rin ni Rodriguez na malaki ang posibilidad na ang pagsasapribado ng mga pampublikong ospital ay sasabay din sa paglaki ng medical cost na posibleng hindi na makayanan ng mga simple at mahihirap na mamamayan kung sila ay pupunta at kunin ang serbisyo ng mga ospital na isasapribado.

Idinagdag pa ni Rodriguez na isang malaking disadvantage para sa mamamayan kung isasapribado ang mga ospital ng gobyerno dahil sa oras na pasukin na ito ng mga pribadong tao at kumpanya ay sila na ang maaaring magdikta ng mga dapat bayaran ng mga pasyenteng kukuha ng serbisyo nito at magiging isa itong malaking dagdag pasanin para sa mamamayang mahihirap.

Antigo nang Immigration Act, aamiyendahan na

Nakaantabay na lamang ng ratipikasyon ang bagong Immigration Act of 2010 ng Kongreso at Senado at ito ay inaasahang magdadala ng mas makahulugang batas na mas makakasagot at makakaagapay sa kasalukuyang pangangailangan ng mamamayan.

Ang pangunahin at mahalagang probisyon ng bagong immigration act ay ang pagtatatag ng Commission on Immigration and Naturalization na siyang mangangasiwa at magpapatupad ng lahat ng batas hinggil sa immigration at ang pagtatala ng lahat ng dayuhang pumapasok sa bansa at mga batas hinggil sa citizenship at naturalization.

Sinabi ni Camiguin Rep Pedro Romualdo, isa sa mga pangunahing nagsulong ng panukalang ito, napapanahon na umano upang baguhin at isabay sa kasalukuyang panahon ang Commonwealth Act No. 613 o mas kilala sa Philippine Immigration Act of 1940 na ipinatutupad pa sa ngayon na binuo pa noong panahon ng Commonwealth.

Ayon Kay Romualdo, mayroon nang halos 70 taong ipinatutupad ang batas na ito at bagamat dumaan na rin ito sa kung ilang beses na rebisyon, marapat lamang umano na magkakaroon na ng makabagong immigration and naturalization law na may kaakibat na tama at angkop na batas upang maipatupad ang mga tungkulin at gawain nito.

Ang komisyon, ayon pa sa kanya, ay magkakaroon ng pitong departamento na aatasang epektibo at episyenteng magpatupad, magsagawa at maglingkod sa mamamayan upang maiwasan na rin ang burukrasiya at red tape.

Idinagdag naman ni Cavite Rep Jesus Crispin Remulla, isa rin sa mga nagsulong ng batas na ito, na layunin umano ng bagong immigration act na isulong at itaguyod ang kapakanan at interes ng Filipino maging sa loob at labas ng bansa.

Ayon kay Remulla isa sa paraan upang mapangalagaan ang ating mamamayan ay ang pagpapalawak ng mga pag-uuri o pagkaklase ng mga dayuhan na pagbabawalang pumasok sa loob ng bansa at ang pagpapataw ng mas mabigat na parusa sa mga dayuhang gagawa ng krimen sa loob ng ating bansa.

Programa sa pagtitipid sa tubig, itaguyod

Pagsasanib puwersa ng Department of Environment and Natural Resources (DENR) at ng Department of Science and Technology (DOST), sa utos ng Kongreso upang bumalangkas at magsaliksik ng programa na magtataguyod sa paggamit at pagtitipid ng tubig.

Ito ang iminungkahi ni Camarines Sur Rep Diosdado “Dato” Arroyo at kanyang sinabi na kasama sa pagsasaliksik ang makabagong teknolohiya at proseso upang maisaayos ang koleksyon, pag-iimbak, paggamit sa tubig-ulan at pamamahagi nito.

Ayon kay Arroyo, kailangang umanong maturuan ang mga komunidad upang makamit natin ang tamang paggamit at pagtitipid sa tubig.

Nais din ni Arroyo na magamit ang tubig na galing sa poso para sa paglalaba, pahuhugas ng pinggan at pampaligo.

Nababahala ang kongresista sa pagsira ng kalikasan dahil sa banta ng pagbabago ng panahon. Kailangang kumilos ng Kongreso upang pagaangin ang epekto nito, dagdag pa ni Arroyo.

Kaya, huwag sana tayong paglaruan ng panahon dahil sa kasalukuyang kaganapan sa ating daigdig, nababahala ang lahat sa epekto ng global warming o ang pagbabago ng panahon at ang banta ng El Niño phenomenon o tagtuyot.

Naglipana ang may mga baril sa Davao

Nagpahayag ng pagkabahala si House Speaker Prospero Nograles dahil umano sa kapabayaan ng Commission on Elections sa tungkulin nito na magpatupad ng isang malinis at mapayapang eleksiyon, dahil sa umano’y pagkabigo ng ahensiya na ipatupad ang total gun ban.

Sinabi ni Nograles na mismong sa Davao City, may mga opisyal ng barangay at maging mga motorcycle-riding goons na walang takot na kumakalat sa lugar at ni hindi itinatago ang kanilang mga baril sa publiko, samantalang ang mga miyembro naman ng New People's Army (NPA) ay malayang pakalat-kalat sa mga barangay sa kanilang lugar at nananakot sa mamamayan at mga boluntaryong nangangampanaya para sa mga lokal na kandidato sa lungsod na tumatangging magbigay ng protection money sa kanila.

Ayon kay Nograles, ang mga pulis at mga otoridad na binigyan ng karapatan ng Comelec na magpatupad ng total gun ban ay nagbubulag-bulagan sa mga kaganapang ito.

Idinagdag pa ni Nograles na dahil sa patuloy na pagtanggi ng Comelec na ilagay ang Davao City sa ilalim ng full Comelec control, mayroon nang dalawang katao ang nagbuwis ng buhay, ito ay ang mga campaign volunteers ng Bantay Party-list group na pinamumunuan ni retired Major General Jovito Palparan, na kilalang anti-communist advocate at kritiko ni Mayor Rodrigo Duterte.

Ang katawan ni Juliana Noquera, 51, ng Barangay Dominga, Calinan, ay natagpuan sa dalampasigan ng Island Garden City sa Samal, Davao del Norte noong Sabado, samantalang ang labi naman ni Ronald Miranda, 49, ng Landmark Village sa Buhangin District, ay natagpuan naman sa Sta. Maria, Davao del Sur, sa magkaparehong araw.

Ayon sa imbestigasyon, ang mga labi ng dalawang biktima ay naaagnas na nang makita at may mga saksak sa katawan. Ayon pa sa pulisya, ang mga biktima ay huling nakita noong Marso 14 habang nangangampanaya para sa Bantay Party-list. Dinampot umano ang dalawa sa isang national highway dito at nang matagpuan ay bangkay na.

Itinanong tuloy ng Speaker kung ilan pang buhay ang dapat magbuwis bago kumilos ang Comelec at kung hanggang kailan pa magbibingi-bingihan ang Comelec sa kanilang panawagan?

Ayon pa kay Nograles, maliban pa sa kapalpakan sa pagpapatupad ng total gun ban, hanggnag sa kasalukuyan ay hindi pa rin umano kumikilos ang Comelec upang linisin ang voter’s list kung saan mayroon double registrants at maging ang mga patay na ay nasa talaan pa rin.

Natuklasan umano ito ng Parish Pastoral Council for Responsible Voting (PPCRV) kung saan mayroong humigit-kumulang sa 40,000 multiple and double at dead registrants sa Davao City at Davao del Sur, ilan sa mga nasa talaan ay kapatid at anak umano ni Mayor Duterte. Ang hinala ng PPCRV ay mayroong 3 hanggang 5 milyong multiple o double at dead dead registrants sa buong bansa.

Ayon kay Nograles, sapat na ang bilang na ito upang madetermina kung ano ang magiging resulta ng eleksiyon sa darating na May 10 elections.

COMELEC,handa na sa may 2010 elections

Pinapurihan ng House committee on oversight, sa pangunguna ni Quezon Rep Danilo Suarez, ang naging kahandaan ng Commission on Elections na patunayan sa buong bansa na harapin ang responsibilidad bilang electoral body sa darating na halalan sa Mayo 10, 2010.

Sa isang panayam, nagpahayag ng kompiyansa si Suarez na magiging matagumpay ang eleksyon bagama't ito umano ay ang kauna-unahang pagtikim ng Filipino sa automated election.

Sinabi ng mambabatas na magkakaroon na ng katuparan ang mithiin ng administrasyon na makamit ang tunay na malinis, matapat, matahimik, maayos at mabilis na eleksyon na siyang kaakibat sa nabanggit na uri ng pagpapatupad ng halalan.

Ayon pa sa kanya, ang naging ugat sa problema noong nakaraang halalan ay ang kawalan ng tiwala ng mamamayan sa proseso ng eleksyon dahil sa malawakan at talamak na dayaan na naging sanhi sa kinalabasan ng halalan.

Bumagsak ang grado ng Comelec at nawalan ng tiwala ang taumbayan sa nangyari kay dating Comelec chairman Benjamin Abalos nang ito ay sumabit sa iskandalo ng NBN-ZTE broadband deal.

Ani Suarez, dapat umanong pasalamatan ng mamamayan ang Comelec, lalo na ang kasalukuyang liderato, sa muling pag-bangon muli ng tiwala ng taumbayan sa proseso.