Pambansang pondo ng hudikatura para sa 2020, lusot na sa komite

Mabilis na nakalusot sa House Committee on Appropriations ang pambansang pondo ng hudikatura para sa fiscal year 2020.

Tumagal lamang ng 25 minuto sa kamay ng house panel ang pagtalakay sa P38.71-billion na pondo ng hudikatura sa susunod na taon.

Ayon kay Court Administrator Midas Marquez na siyang nagpresenta ng budget proposal, nasa P55.66 Billion pesos ang 2020 request ng judiciary subalit P38.71-billion lamang ang inaprubahan ng Department of Budget and Management.

Dahil diyan, umaasa si Marquez na madaragdagan pa ang pondo na paghahatian ng lahat ng mga korte sa buong bansa.

Kabilang naman sa mga sangay ng hudikatura ay ang Supreme Court (SC), Presidential Electoral Tribunal (PET), Court of Appeals (CA), Court of Tax Appeals (CTA), Sandiganbayan at mga lower courts.