Ganap na roteksiyon para sa mga aplikante at manggagawa, isinusulong

Makukulong ng 12 taon at magmumulta ng di lalagpas sa P1,000,000.00, ang sinumang employer na mapapatunayang hindi pantay ang pagturing sa isang aplikante ng trabaho o kaya ay sa
kanyang empleyado, kung ang pagbabatayan ay ang HB07031.

Tataguriang Unlawful Employment Practice Act of 2009 ang nabanggit na panukala ni party-list Rep Narciso Santiago III na naglalayong bigyan ng proteksiyon ang lahat ng manggagawa at maging ang nag-a-apply pa lamang ng trabaho.

Ayon kay Santiago, ang diskiminasyon sa isang mangagagawa ay kung pinakitaan ng di pantay na pakikitungo o pagtrato ang isang tao dahil sa kanyang idad, lahi, kasarian, piniling uri ng pamumuhay, kakayahan o kapansanan, o relihiyon.

Dagdag pa ni Santiago maituturing na isang paglabag sa pantay na karapatang pantao kung ang isang employer ay laging may pinag-iinitan, kahit na hindi naman sapat ang dahilan upang pag-initan siya ng kanyang boss.

Ituturing na diskriminasyon sa isang empleyado, ayon pa sa kanya, kung ito ay hindi makakatanggap ng promosyon dahil lamang sa kanyang relihiyon, idad o kasarian,” ayon pa sa mambabatas,

Maging ang employer na tatanggi sa isang aplikante, ayon pa sa panukala, ang hindi pagbibigay ng pagsasanay o training para siya ay matanggap sa trabahong kanyang nais makuha dahil sa kanyang edad, kasarian, relihiyon, kalagayan sa buhay, lalo na at kung ang dahilan lamang ay ang pagiging may-asawa, at kapansanan ay posible ring maparusahan.

May karapatan naman tanggihan ng isang employer ang aplikante kung ang kanyang pisikal at mental na kakayahan ay hindi angkop sa kanyang nais pasuking trabaho.

Maaaring humingi ng medical at psychological examination ang employer sa mga aplikante upang matukoy kung angkop ang isang magnanais magtrabaho sa kanya sa trabahong nais nitong pasukin.

Mabigat na parusa sa kasong mail-order bride services

Iminingkahing patawan na ng mas mabigat na kaparusahan sa Kamara ang sinumang mapapatunayang may partisipasyon sa serbisyong mail-order bride na umano ay isang uri ng internet prostitution.

Sinabi nina CIBAC Party-list Reps Cinchona Cruz-Gonzales at Joel Villanueva na mayroong lamang parusang anim na taong pagkakakulong ang mga lumalabag sa Republic Act 6955 o batas na tinaguriang Anti-Mail Order Bride Law.

Batay sa HB06961 na inihain ng nabanggit na mga mambabatas, dapat lamang maparusahan ng hanggang 20 taong pagkakabilanggo ang mapapatunayang ginagawang negosyo ang pagpapadala ng Filipina sa ibang bansa upang maging mail-order bride.

May kaakibat na ring multa ang kaparusahan dito na nagkakahalaga ng hindi lalagpas sa P100,000 at kung isang dayuhan ang salarin, agad itong ipapatapon pabalik sa kanyang bansa at habang buhay nang ipagbabawal na muling makatuntong sa Pilipinas, matapos niyang pagdusahan ang parusa at makapagbayad ng multa.

Sinabi ni Gonzales na dahil sa RA 6955, ang mga kumpanyang nagbibigay serbisyong mail-order bride ay lumipat na sa cyberspace kung saan sa paraang ito na nila nagagawan ng paraan kung papaanong maipakikilala ang Filipina sa mga dayuhang nais magkaroon ng asawa.

Ayon sa kanya, sa sistemang ito, nagmumukhang isang paninda ang mga Filipina dahil para silang mga panindang nakadisplay sa internet at mga websites ang kanilang larawan at nabubukas sila sa mas malalang sitwasyon dahil na rin sa sindikato ang madalas na namamahala sa mga ganitong negosyo.

Sa ilalim ng panukala, ipagbabawal na ang matchmaking website business, na nagbibigay ng libreng membership sa mga Filipina para mailagay ang kanilang impormasyon sa internet upang makakuha ng mapapangasawang dayuhan, maging ito man ay sa paraang personal na pagpapakilala o sa pamamagitan ng mail-order basis.

Mga paaralan hiniling na tumulong maiwasan ang mga bisyo

Hinikayat ni party-list Rep Narciso Santiago ang bawat paaralan na tumulong sa pamahalaan upang makaiwas ang mga kabataan, lalo na ang mga kababaihan, sa bisyo tulad ng paninigarilyo.

Sa isinumiting panukala ni Santiago, ang HB06980, aatasan ang lahat ng paaralan at institusyong pang-edukasyon na isama sa kanilang curriculum ang kurso o mga aralin tungkol sa alak, sigarilyo at mga ipinagbabawal na gamot at ang masamang epekto nito sa katawan ng tao.

Sinabi ni Santiago na ang pag-inom ng alak habang nagbubuntis ang isang babae ay siyang tinutukoy na sanhi ng fetal alcohol syndrome sa mga sanggol.

Isa umano ito sa nagtulak sa kanya upang ihain ang panukalang magkaroon ng isang subject sa mga eskwelahan sa buong bansa, pribado man o pampubliko, kung saan tatalakayin ang epekto ng sigarilyo, alak, marijuana, shabu at iba pang pinagbabawal na gamot sa katawan ng tao.

Ayon sa kanya, ito ay upang maaga pa lamang ay alam na ng kabataan ang masamang epekto ng pagkakaroon ng bisyo at sa gayon ay sila na mismo ang umiwas dito.

May mga pag-aaral aniya na nagpapatunay na ang batang ipinanganak ng isang babaeng gumamit at gumagamit pa ng marijuana ay lumalabas na mas maliit, magaan, at may pagka punggok at mas maliit din umano ang ulo kumpara sa mga batang ipinapanganak ng isang babae na hindi gumagamit ng ipinagbabawal na gamot.

Kapag maliit ang isang bata, mas madali siyang kapitan ng sakit at mas maraming problemang pangkalusugan ang nakikita sa mga batang ito.

Ang nicotine daw ay napatunayan na rin, base sa mga pag-aaral, na may kinalaman sa maaga o wala sa panahong panganganak ng isang babaeng naninigarilyo kahit sa nagdadalantao.

Sa ilalim ng panukala, ang mga educators lamang na may hawak na sertipikasyon na magpapatunay na siya ay karapat-dapat magturo ng mga bagay-bagay hinggil sa alak, alcohol, sigarilyo, tabako, at mga ipinagbabawal na gamot.

Pangasinan, magdiriwang ng World Wetlands Day

Ipagdiwang sa Pangasinan ang World Wetlands Day nitong buwan ng Pebrero sa pamamagitan ng paglilinis sa mga baybayin ng mga bayan at pagtatanim ng bakawan sa buong lalawigan, lalo sa mga barangay ng Lucap, Victoria at Telbanc sa Alaminos.

Ang proyektong tatagurianng “Alay Pagmamahal sa Kalikasan” ay pangungunahan ni Pangasinan Rep Arthur Celeste, kasama ang mga pribado at boluntaryong samahan tulad ng Alliance for a Cleaner Earth (ACE), at sa pakikipagtulungan ng Department of Environment and Natural Resources-Pangasinan.

Sinabi ni Celeste na ang mga nakapanlulumong epekto ng sunod-sunod na bagyo sa bansa, lalo na sa lalawigan ng Pangasinan ang pumukaw sa kamalayan ng mga mamamayan upang gumawa ng mga paraan upang mapangalagaan at maprotektahan ang kalikasan.

Ayon sa kanya, kung nais umano nating datnan pa ng mga susunod na henersayon ang kagandahan ng ating kapaligiran tulad ng Hundred Islands, Bolinao Cape at Lingayen Gulf, ay kailangang simulan na daw ngayon ang pagsusulong ng mga sistema upang matugunan ang epekto ng pagbabago ng panahon.

Ang pagdiriwang ito ay sinuportahan ni Pangasinan Gov Amado Espino, Sangguniang Kabataan at iba pang boluntaryong samahan at pasisinayaan ng isang konsyertong pang-kamalayan na tinawag na “Rakrakan Para sa Kalinisan ng Kalikasan” at nakatakdang daluhan ng mga banda, mang-aawit at mga tagapagsalita at dalubhasa sa larangan ng kalikasan

Vision screening program, isinusulong

Isinusulong ngayon sa Kamara ang panukalang naglalayong magkaroon ng nationwide vision screening program para maiwasan ang pagdami ng kabataan na may diperensiya sa paningin.

Sa nakapaloob sa HB07025 ni Party-list Rep Liza Maza ang pagsasagawa ng nationwide vision screening program na ipatutupad sa ilalim ng School Health and Nutrition Program (SHNP) ng Department of Education (DepEd).

Sinabi ni Congresswoman Maza, ang maagang kaalaman kung ang isang bata ay may diperensiya sa paningin ay isang paraan kung papaanong maiiwasan o magagamot ito upang magkaroon ng maraming kabataan ang maililigtas na malagay sa sitwasyong hindi makapag aral ng maayos dahil sa malabong paningin.

Ayon kay Maza, ang vision screenings at exams ay makakatulong upang maiwasan ang isang pangmatagalang gastusin na maaaring harapin ng isang bata at pamilya nito, kung hindi agad malalaman ang kalagayahn ng mata ng isang bata.

Batay sa pag aaral na ginawa ng Helen Keller Worldwide Foundation aniya, mayroong 20% hanggang 25% ng mga kabataan na nasa edad 11 hanggang 14 sa Pilipinas, ang may malabong paningin sanhi upang hindi sila makapag aral ng maayos at maapektuhan ang kanilang buhay.

Dagdag pa ng mambabatas na ang maagang kaalaman kung malabo ang paningin ng isang bata ay makakatulong upang maiwasan ang paglala nito.

Batay sa panukala, ang bawat pampublikong paaralan sa elementary at sekondarya ay aatasang magsagawa ng vision screening program sa ilalim ng kani-kanilang SHNP at ang mga tauhan ng SHNP ang aatasang magsagawa ng basic vision screening assessment.

Maaari umanong isama ang vision screening sa taunang health assessment sa lahat ng antas sa elementarya sa ilalim na rin ng pangangasiwa ng Regional Health and Nutrition Units at ng Division Health and Nutrition Sections.

Lahat ng mag-aaral sa Grade 2 at 1st year ay kailangan sumailalim sa isang mandatory, age-appropriate annual vision screening.

Sa ilalim ng panukala, may 10 part-time o full-time na lisensyadong ophthalmologist/optometrists ang maaaring kunin ng pamahalaan bilang mga consultants, referents at additional screening personnel sa bawat distrito o health unit sa buong bansa

Pagtatatag ng National Flood Management Commission, isinusulong

Ipinanukala sa Mababang Kapulungan ang pagtatatag ng National Flood Management Commission na naglalayong magpatupad ng mga batas na may kinalaman sa pag-sasaayos at solusyon sa pagbabaha sa Metro Manila at iba pang bahagi ng bansa.

Sinabi ni Party-list Rep Narciso Santiago, layunin ng komisyon maitatatag sa bisa ng panukalang ito na makabuo ng mga short at long-term program na naglalayong bigyang solusyon ang pagbabaha sa bansa.

Ayon sa kanya, isa ang Pilipinas sa madalas na biktima ng malalakas na bagyo na nagiging sanhi ng pagkalugi ng sektor ng agrikultura, pagkawala ng mga pananim, kagamitan at ari-arian, kabilang na ang buhay.

Nito lamang nakaraang taon, dagdag pa ni Santiago, ay iniulat ng National Disaster Coordinating Council (NDCC) na humigit-kumulang sa P10.45 bilyong piso ang halaga ang nasalanta nang bayuhin ng bayong ‘Ondoy’ ang kalakhang Maynila at ilang kalapit na probinsiya.

Ito, aniya, ay dahil na rin sa ang Pilipinas ay kabilang sa tinaguriang regional hot spot na kadalasang binabayo ng bagyo, malalakas na pag-ulan, pagkasira at unti-unting pagkawala ng mga dalampasigan dahil sa patuloy na pagtaas ng lebel ng dagat at riparian flooding.

Magsagawa ng mga pag-aaral at obserbasyon ang Komisyon upang makabuo ng iisang plano kung papaanong makakaiwas o maiiwasang mapinsala ng malaki ang mga bayang tatamaan ng bagyo, ikonsidera at isama ang lahat ng sector na maaapektuhan , pagpapatupad ng integrated measures at ang pagtutulungan ng lahat ng ahensiya ng gobyerno at local na pamahalaan.

Ang komisyon na rin ang magbibigay sa mga lokal na pamahalaang itinuturing na flood-prone lands ng mga technical data at mga mapa na makakatulong upang mapag-aralan kung ano ang posibleng solusyon upang mabawasan ang negatibong pekto ng matataas na pagbaha.

Ang komisyon na rin ang bahalang magsagawa ng mga pagpaplano at pagpapatupad ng flood plain management activities tulad ng flood warning systems, land acquisition at relocation programs

Organic agriculture, isinusulong

Isinusulong ngayon sa Kongreso ang pagpapaunlad ng organic agriculture sa bansa upang maisulong ang isang sistema sa pagsasaka na hindi banta sa kapaligiran at upang masiguro ang sapat na pagkukunan ng pagkain.

Sinabi ni Camarines Sur Rep Luis Villafuerte na layunin ng kanyang panukala, ang HB07043, na isulong ang pagpapalaganap at pagpapaunlad ng organic agriculture na may layuning masiguro ang pagkakaroon ng ligtas na pagkain at kapaligiran dahil hindi ito gagamitan ng toxic pesticides, chemical fertilizers, synthetic chemicals, genetically modified organisms, antibiotics, sewage sludge o irradiation.

Ayon pa kay Villafuerte, ang mga nabanggit na pestisidyo ay makapagdudulot ng polusyon na maging sanhi upang makontamina ang aning ginamitan nito, ang hangin at ang tubig na nasa paligid ng sakahang ginagamitan ng pestisidyo.

Idinagdag pa niya na ang mga magsasakang lumilipat sa pagsasaka gamit ang organic system ay nahaharap sa maraming pagsubok tulad ng mataas na halaga ng organic products certification, limitadong impormasyon sa tamang pamamaraan ng organic agriculture at ang kakulangan sa oportunidad na maibenta ng tama ang kanilang produkto.

Ani Villafuerte pangunahing layunin ng panukala na maipakalat ang kaalaman, maiparating sa mamamayan ang kahalagahan ng organic farming at produkto nito, at magsagawa ng isang komprehensibong programa hinggil sa organic farming sa bansa upang maunlad na maisulong ang organic agriculture sa bansa.

Good conduct time allowance ng mga preso, isinusulong

Nakatakdang aprubahan na ang bicameral conference committee ng panukalang magbibigay ng good conduct time allowance sa mga preso na sumailalim sa mga programa ng institusyon tulad ng pag-aaral at values development sa loob ng kulungan.

Sinabi ni Iloilo City Rep Raul Gonzalez Jr na layunin ng kanyang panukala, ang HB04925 na mapaangat ang kaalaman ng bawat preso maging ang kanilang paniniwala at pag-uugali upang maging madali na ang muling pakikisalamuha niya sa ibang tao kapag siya ay nakalabas na ng kulungan.

Ang pagbibigay ng good conduct time allowance, ayon pa kay Gonzales, ay makakabawas sa taon ng kanilang pagkakakulong ng isang preso. Isang mainam na paraan upang mabawasan ang gastusin sa lahat ng kulungan dahil bababa ang bilang ng mga nakakulong dahil sa magandang ipinapakita ng isang preso.

Sa ilalim ng panukala, ang time credit ay ipagkakaloob sa isang preso na nakatapos ng post-graduate o college degree, high school o nakakuha ng diploma sa elementarya, nakakumpleto ng isang vocational o technical skill o di kaya ay nakakuha ng values development certificate, maging ang mga magtuturo ng mga aralin sa mga nabanggit na kurso at pag-aaral ay mabibigyan din ng time credit.

Layunin din ng panukala na makaiwas ang mga preso sa pagtatangkang tumakas at sa mga riot o gulo na kadalasang nangyayari kung walang maliwanag at kapakipakinabang na programa ang institusyon.

Cybercrime bill, pumasa na sa Kamara

Pinapurihan ni Aurora Rep Juan Edgardo Angara ang kanyang mga kasamahang mambabatas sa Kamara sa pagkakapasa sa ikatlo at pinal na pagbasa ng panukalang cybercrime bill na magpapataw ng kaparusahan sa mga lalabag sa nabanggit na batas.

Dahil dito, hinikayat ni Angara, isa sa mga may-akda ng HB06794 na tinaguriang Cybercrime Prevention Act, ang kanyang mga kasamahang mambabatas sa Senado na bigyan ng panahon at pagsikapang ipasa sa lalung madaling panahon ang naturang panukala na may layuning maproteksiyunan ang mga mamamayan sa tumataas na insedente ng iligal, malisyuso at nagbabanta sa buhay ng kreming isinasagawa sa pamamagitan ng paggamit ng internet, cellular phone at iba pang mga computer device.

Sinabi ni Angara na sa gitna ng paglaganap ng teknolohiya, kahit ang mga database ng pamahalaan ay isa na rin sa mga pangunahing biktima ng mga ganitong uri ng krimen.

Ayon sa kanya, mahalagang magpasa ng batas ang Kongreso laban sa cybercrime para sa prevention, apprehension at prosecution ng mga salarin sa cybercrime act.

Marapat lamang, dagdag pa ni Angara, na magkaroon ang bansa ng isang mahalagang pagsasabatas upang mahadlangan na ang gawaing pagkuha, pag-upload at pag-distribute ng mga sex videos sa pamamagitan ng mga nabanggit na kagamitan.

Ekstensiyon ng termino ni Gen Ibrado, kinatigan ng mga mambabatas

Kinatigan ng mga mambabatas sa Kongreso kahapon ang balak ng administrasyon na palawigin ang termino ni outgoing Armed Forces of the Philippine (AFP) chief of staff Gen Victor Ibrado para maseguro ang katatagan ng bansa sa panahon ng eleksiyon.

Sinabi nina Paranaque Rep Roilo Golez, Muntinlupa City Rep Ruffy Biazon, Rep Teofisto Guingona III at Cavite Rep Joseph Emilio Abaya na ang patuloy na panungkulan ni Ibrado hanggang sa ika-30 ng Hunyo ay kailangan habang aantabayanan ng bansa ang krusyal na pagsalin ng kapangyarihan matapaos ang eleksiyon.

Ayon kay Golez, maganda ang naging desisyon dahil si Ibrado ay isang competent at non-controversial na officer kung saan ang kanyang leadership ay nakatulong sa katatagan ng AFP at ng peace and order situation ng bansa lalu na sa nalalapit na eleksiyon.

Ipinaliwanag naman ni Biazon na ang pananatili ni Ibrado sa posisyon ay makakatulong na maiwasan ang power play sa military sa panahon ng eleksiyon.

Naniniwala si Biazon na mahalaga ang nabanggit na ekstensiyon upang maseguro na mayroong continuity at consistency sa pamamahala ng peace and order concerns ng eleksiyon sa panig ng AFP at ang transisyon ng liderato sa gitna ng eleksiyon ay hindi nararapat.

Sinabi naman ni Guingona na ang pagpapalawig ng termino ni Ibrado ay makapagbibigay daan at ng free hand na magtalaga ng panibagong AFP chief para sa susunod na pangulo ng bansa.

Ayon naman kay Abaya, ang pag-extend ng termino ni Ibrado ay pinapayagan batay sa saligang batas at ito ay nangyari at ginawa na ng mga nakaraang pangulo ng bansa.

Naniniwala si Abaya na ang extended term ni Ibrado hanggang sa ika-30 ng Hunyo ay makapagdudulot ng magandang interes para sa lahat ng sektor ng lipunan.