Makabayan bloc sa Kamara, hinamon ni DND Sec Lorenzana na ikundena ang CPP-NPA

Hinamon ni Defense Sec. Delfin Lorenzana ang mga miyembro ng Makabayan bloc sa Kamara de Representantes na ikundena nila ang Communist Paty of the Philippines - National Democratic Front o CPP-NPA.

Ito ay kasunod ng pag-alma ni Bayan Muna partylist Rep Carlos Isagani Zarate sa pagharap ng Department of National Defense o DND sa budget hearing na pag-u-ugnay sa kanila sa NPA ngunit wala namang maipakitang ebidensya ang Armed Force of the Philippines o AFP.

Sinabi ni Lorenzana na hindi sila ang nagsimula ng red-tagging sa mga makakaliwa sa NPA kundi ito ay kagagawan ni CPP Founder Jose Maria Sison.

Depensa pa ni Lorenzana, mayroong intelligence unit ang nagbibigay sa kanila ng impormasyon sa paggamit ng NPA sa mga militanteng grupo at marami na ang sumuko na dating rebelde na nagbigay ng testimonya kung papaano sila na-recruit ng NPA.

Sinabi ng Kalihim na kung hindi talaga kasapi ng CPP-NPA ang Makabayan, kundenahin nila ang mga masasamang gawain ng mga rebelde tulad ng pagpatay at pagsira ng mga equipment ng pamhalaan at ng mga pribadong kompanya para madisassociate ang mga ito sa mga komunistang rebelde.

Suportado naman ng Kalihim ang activism sa mga estudyante ngunit hindi ang paglaban ng mga ito sa pamamagitan ng armadong pakikibaka.