Pagkakamali sa isang probisyon sa No Homework on Weekend bill, nilinaw ng proponent

Humingi ng paumanhin si Quezon City Rep. Alfred Vargas, ang principal author ng No Homework on Weekends Bill sa Kamara dahil sa pagkakamaling lagyan ng penal clause o kaparusahan ang sino mang guro na lalabag sa panukala.

Ani Vargas, technical error ang pagkakalagay ng penal clause o penalty laban sa mga guro na mapapatunayang nagbigay ng home work sa mga estudyante sa weekend.

Sa panukala ni Vargas, papatawan ng P50,000 multa at isa hanggang dalawang taong pagkakakulong ang mga guro na magbibigay ng assignment kapag weekend.

Nangako naman si Vargas na babaguhin ang laman ng kaniyang panukala sa paniniwalang hindi dapat maparusahan ang mga guro.

Gayunpaman, nanindigan si Vargas na napapanahon nang ipatupad ang kaniyang panukala upang magkaroon ng sapat na panahon ang mga estudyante sa kanilang pamilya.