Pagdinig para sa P4.1 Trillion 2020 national budget, inumpisahan na

Inumpisahan na ngayong umaga ang unang araw ng pagdinig para sa P4.1 Trillion 2020 national budget.

Una munang sumalang sa briefing ng House Committee on Appropriations sa pangunguna ng Chairman na si Davao City Rep. Isidro Ungab ang Development Budget Coordination Committee (DBCC).

Humarap sa briefing ang mga economic team ng Duterte Administration kabilang sina National Economic and Development Authority (NEDA) Director General Ernesto Pernia, Finance Undersecretary Gil Beltran, Budget Acting Sec. Wendel Avisado at Bangko Sentral ng Pilipinas Deputy Governor Francisco Dakila, Jr.

Inilatag ng economic team ang economic targets, expenditures at mga priority projects na paglalaanan ng pondo sa susunod na taon.

Bukod dito, tinalakay din ang macroeconomics assumptions, economic growth projection, price stability at magiging direksyon para sa 2020 fiscal year. 

Magiging gabay ito para sa mga mambabatas at business sectors para makabuo ng polisiyang pangekonomiya.