Maanomalyang P3.5B dengue vaccine ng DOH, iniimbetigahan

Ibinunyag ni Oriental Rep Doy C. Leachon ang kaduda- dudang pagbili ng Department of Health (DOH) ng Tetravalent Dengue Vaccine na nagkakahalaga ng P3.5 bilyon para sa school-based immunization program.

Aniya, tila minadali ang pagbili ng bakuna sa panahon ng termino ni dating DOH Secretary Janette Loreto-Garin at sa kanyang pananaw ay maaring may nilabag na batas sa nasabing transaksyon.

Sa pinagsanib na pagdinig ng House committees on health at good government and public accountability, nagtaka si Leachon kung bakit nag-desisyon ang DOH na maglaan ng pondong P3.5 bilyon para sa single vaccine gayung mayroon silang taunang pondo para sa buong national immunization program ng 2015 at 2016 na nagkakahalaga ng P3.3 bilyon at P3.9 bilyon, ayon sa pagkakasunod.

Kinuwestiyon ng mambabatas kung bakit hindi naisama ang mga nakatala sa DOH annual procurement budget ng 2015 at 2016 General Appropriations Act (GAA) samantalang nakapagpalabas ng SARO ang Department of Budget and Management (DBM) at napasama rin ito sa usapin ng unconstitutional disbursement acceleration program (DAP) fund.

Ayon kay Anitpolo City Rep Romeo M. Acop, hindi kasama ang pagbili ng vaccine sa 2015 at 2016 GAAs at expanded immunization program ng DOH kaya’t ayon sa House committee on rules ay iimbestighan ng dalawang pangunahing komite ng Kamara ang umano’y anomalya sa kagawaran.

Sinabi naman ni Surigao del Sur Rep Johnny Ty Pimentel na sisiyasatin umano ng committee on good government and public accountability ang sinabing iregularidad sa pagbili ng dengue vaccine, habang ang isyu ng kaligtasan at bagsik ng vaccine ay sakop ng committee on health.

Ang imbestigasyon ay nagbunsod mula sa privilege speech ni Rep Leachon matapos na tuligsain niya ang DOH sa maanomalyang transaksyon, at mula sa HR 444 na iniakda ni Quezon Rep Angelina D. L. Tan, at HR 480 ni Nueva Ecija Rep. Estrellita B. Suansing na parehong nananawagan na imbestigahan ang DOH sa pagbili nito ng Tetravalent Dengue Vaccine makaraang mamatay ang dalawang estudyante na tumanggap ng vaccine noong Abril noong nakaraang taon.

Ayon kay Suansing, kailangan ang masusing imbestigasyon sa naturang transaksyon upang linawin kung ang mga ahensya tulad ng FDA, FEC at DOH ay lumampas sa kanilang mandato o kung mayroon bang conflict of interest mula sa mga nag-apruba sa ng naturang transaksyon, dahil mas mahalaga aniya ang pangunahing tungkulin ng Kamara na magbalangkas ng batas na magtataguyod sa kapakanan at kaligtasan ng publiko.

Pinagpapaliwanag ni Misamis Occidental Rep Henry S. Oaminal, ang lahat ng kinauukulang ahensiya kung nasunod ba ang procurement procedures sa pagbili ng mga bakuna at tinanong din niya ang Philippine Children’s Medical Center (PCMC) kung ano ang naging basehan nila para sabihing rasonable ang presyo ng dengue vaccine, dahil ayon kay Garin ay kinuha nila ang serbisyo ng PCMC hindi bilang isang procuring agency kungdi tagapagpatupad at tagapamahala ng buong programa dahil dalubhasa na sila at malawak na ang kanilang karanasan.

Pinasalamatan ni Rep Tan ang liderato ng Kamara sa mabilis nitong pagtugon sa isyu kaugnay ng school-based dengue immunization program ng DOH para maprotektahan ang kalusugan ng publiko lalo na ang mga kabataang mag-aaral.