Libreng Wi-Fi, kasado na

Naging bungad ng talakayan ang usapin ng internet speed sa ginanap na pagdinig ng House committee on Information and Communications Technology (ICT) matapos na aprubahan ang  panukalang batas na magbibigay ng libreng Wi-Fi sa mga pampublikong lugar sa buong kapuluan. Natanong ang NTC at Telcos kung magkano ang pondong kakailanganin upang matiyak na magiging mabilis ang internet speed sa bansa kung ikokonsidera ang kasalukuyang 1.8 bilyong pisong pondo para sa kasalukuyang proyekto ng DICT ng libreng Wi-Fi.

Sinabi ni NTC Deputy Commissioner Edgardo Cabarios na 30 bilyon pisong halaga ang kakailanganin kung isasama sa pagtatayo ang 100,000 Wi-Fi hotspots sa buong kapuluan sa loob ng sampung taon.

Layunin ng mga panukala na magkaroon ng libreng free Wi-Fi sa lugar gaya ng national government offices, public primary at secondary schools, gusali sakop ng state universities and colleges, public libraries, parks at plazas, barangay centers, public hospitals at rural health units, at mga public transportation terminals.

Ayon kay Tarlac Rep Victor Yap, chair ng ICT Committee, matutugunan ng panukala ang problema ng bansa sa interconnectivity sa pagbibigay ng wireless access points sa lahat ng pangunahing pampublikong lugar sa pamamagitan ng broadband hotspots na ikakabit sa DICT o private Internet Service Providers sa lugar.

Sinabi ni Yap na hinihiling sa ilang panukala na magkaroon ng minimum internet speed na 10 mbps para sa free public Wi-Fi. Mahalaga aniya ito dahil kahit libre ang WiFi, bale-wala rin ito kung mabagal ang koneksyon.

Ayon kay Yap, isang halimbawa umano ang karanasan ng DepEd na mayroon silang sapat na pondo para sa higher bandwidth ngunit sa kasamaang-palad, hindi makapagbigay ang Telcos ng mabilis na signal ngunit maari umano itong mabago kung may requirement sa internet speed.

Ayon sa mambabatas, karapatang-pantao ang internet access sa naging klasipikasyon ng United Nations na itinuring na isa ito sa pinakamakapangyarihang instrumento sa 21st century upang madagdagan ang libreng pamamahayag at impormasyon na hihikayat sa mga mamamayan na makilahok sa pagtatatag ng demokratikong pamayanan.

Ang mga panukala para sa libreng Wi-Fi ay ang mga sumusunod: HB 515 ni Bagong Henerasyon partylist Rep Bernadette Herrera-Dy, HB 616 na iniakda ni Bataan Rep Geraldine Roman, HB 660 na inihain ni Kabataan Rep Sarah Jane Elago, HB 1954 ni Batangas Rep Vilma Santos-Recto, HB 1957 ni Paranaque City Rep Gus Tambunting, HB 2836 ni Ifugao Rep Teddy Brawner Baguilat, Jr, at HB 3250 na iniakda ni Pangasinan Rep Marlyn Primicias-Agabas.

Idinagdag ni Yap na marami ang makikinabang sa libreng WiFi na inaasahang magpapatatag ng ekonomiya sa pagpasok ng mga bagong negosyo at pamunuan, paglago sa larangan ng turismo, pagpapalaganap ng mga mahahalagang impormasyon bilang bahagi ng komunikasyon, gayun na rin para sa mabilisan at agarang pagtugon sa mga nangangailangan sa panahon ng kalamidad at iba pang panganib. 

Sa plenaryo kagabi ay aprubado na sa ikalawang pagbasa ang panukala sa libreng wi-fi na hayagang pinasalamatan ni Rep. Tambunting.