Pagtukoy sa pumatay sa mga bayani, iminungkahi

Iminungkahi ng isang mambabatas sa Kamara de Representantes na bumuo ng isang espesyal na lupon o commission na bibigyan ng kapangyarihang isaayos ang kasaysayan hinggil sa pagkamatay ng iilang mga bayani kagaya nina Gat Andres Bonifacio, Heneral Antonio Luna at Senador Benigno “Ninoy” Aquino, Jr.

Sa panukala ni Buhay Partylist Representative Jose Atienza, Jr., ang HB06332, itatatag ang Historical Fact-Finding Commission na siyang magsasagawa ng pagsisiyasat sa mga high-profile at hindi pa nareresolbang pagkamatay o kamatayan ng mga nabanggit na bayani.

Sinabi ni Atienza na napapanahon nang magtatag ng Historical Fact-Finding Commission para malaman na kung sino talaga ang pumatay sa ilang mga magagaling na bayani ng bansa.

Idinagdag pa ni Atienza na mapalad umano ang ating bansa dahil ito ay nagkaroon ng kasaysayan na puno ng kuwento ng katapangang ipaglaban ang kalayaan ng ating Inang Bayan.