Pagpapalawig ng validity ng 2019 budget, hiniling sa Kamara

Hiniling ni National Economic and Development Authority (NEDA) Director General Ernesto Pernia sa House Committee on Appropriations na ikunsidera ang pagpapalawig ng validity ng 2019 budget.

Sa budget hearing ng P4.1 Trillion 2020 national budget, inirekomenda ni Pernia ang extention ng validity ng 2019 budget upang magamit ang matitirang pondo sa susunod na taon.

Sa ganitong paraan ay hindi maantala ang mga nakalatag na proyekto sa 2020 gayundin ang target na economic growth.

Sinabi pa ni Pernia na umaasa silang maaaprubahan sa itinakdang oras ang P4.1 Trillion 2020 national budget.

Matatandaan na noong nakaraang taon ay inaprubahan ng Kamara ang extension ng validity ng 2018 budget upang magamit ang natitirang pondo sa 2019 para sa Marawi rehabilitation.

Inaasahan naman ang paglago ng ekonomiya bago ang matapos ang taon sa 2019 sa 6% kung saan pangalawa ang bansa sa China na may 6.2% economic growth.