ETIKA, PANANAGUTAN, PANUNTUNAN, AT PAMAMARAAN – PINAGTUUNAN SA EXECUTIVE COURSE ON LEGISLATION

Pinagtuunan ng pansin ngayong Martes ng mga bagong halal na Miyembro ng Kapulungan sa ika-19th na Kongreso ang hinggil sa legislative ethics at accountability, gayundin ang parliamentary rules and procedures ng Kapulungan ng mga Kinatawan. 

Ito ay bahagi ng Executive Course on Legislation na isinasagawa para sa mga baguhang mambabatas. Ibinahagi ni House Legislative Operations Department Deputy Secretary General (DSG) Atty. David Robert Amorin ang kanyang kakayahan at binigyang-diin na ang pangunahing tungkulin ng mga mambabatas ay gumawa ng batas. 

Tinalakay din niya ang mga mandato ng konstitusyon sa mga bagong mambabatas, mga institusyonal na imperatiba, pamantayan ng asal, at mga mekanismo ng pagpapatupad. 

Hinimok din ni Amorin ang mga mambabatas na bigyang pansin ang Republic Act 3019, o ang "Anti-Graft and Corrupt Practices Act," at RA 6713, o ang "Code of Conduct and Ethical Standards for Public Officials and Employees." 

Samantala, si Iloilo Rep. Janette Garin ay nagsilbing resource speaker sa Parliamentary Rules and Procedures, na binibigyang diin ang kahalagahan ng mga mambabatas na magsalita hangga't ito ay nasa saklaw ng paksa na kanilang tinatalakay. 

"That is actually what gives beauty to Congress. The right to voice out, the right to participate and the right to perform your function within the rules as ordered by the Committee on Rules," ani Garin, senior deputy minority leader noong ika-18 Kongreso. 

Sinabi rin niya na dapat sundin ang mga pangunahing prinsipyo ng batas parlyamentaryo. Ito ay: 1) Paggalang sa Panuntunan ng Karamihan, 2) Pagprotekta sa Mga Karapatan ng Minorya, at 3) Pagtatanggol sa Mga Karapatan ng mga indibidwal na Miyembro ng Kapulungan. Tinalakay din ni Garin ang mga pangunahing alituntunin, mga sesyon ng plenaryo, order of business, pagkakaroon at kawalan ng korum, calendar of business, wastong kagandahang-asal at debate, pangunguna sa mga mosyon, pagboto, pribilehiyo at oras ng pagtatanong, Committee of the Whole House, code of conduct, at pag-amyenda sa Konstitusyon, bilang bahagi ng mga tuntunin at pamamaraan ng parlyamento. 

Panghuli, sinabi ni House Secretary General Mark Llandro Mendoza sa kanyang presentasyon na ang Kapulungan ay isa sa dalawang pangunahing demokratikong institusyon na bumubuo ng mga patakaran sa parehong lokal at pambansang aplikasyon, na naglalaman ng sama-sama at mga mithiin at adhikain ng mga Pilipino. 

Ang mga ito ay upang itaguyod ang kabutihang pangkalahatan, pangalagaan at paunlarin ang patrimonya ng mga tao, gayundin ang pagtiyak sa kasalukuyan at sa hinaharap na mga henerasyon ng mga Pilipino, na may mga pagpapala ng kalayaan at demokrasya. 

Binanggit niya ang mga patakaran sa pagpapatakbo at tungkulin ng iba't ibang tanggapan ng Secretariat, na kinabibilangan ng iba't ibang proseso at pamamaraan ng paggawa ng batas upang matulungan ang mga mambabatas.