-ISTRATEHIYA SA AGRESIBONG PAGBABAKUNA NG PAMAHALAAN, RAMDAM NA — SPEAKER VELASCO

Ipinahayag kahapon ni Speaker Lord Allan Velasco, na ang istratehiya sa agresibong pagbabakuna ng pamahalaan ay nararamdaman na, dahil sa malinaw na bumababang bilang ng impeksyon, hindi lamang sa Metro Manila kungdi sa buong sa buong kapuluan.

Sa kanyang talumpati sa unang flag-raising ceremony na idinaos sa Kapulungan matapos ang walong buwan, sinabi ni Velasco na ang kasalukuyang kalagayan ng COVID-19 sa bansa ay kapansin-pansing gumaganda na, kumpara sa mga nakalipas na buwan, at salamat sa agresibong pagbabakuna ng pamahalaan sa mga mamamayan.

[“The skies are bluer after the storm. The light brighter after going through a dark tunnel. And even if we are not officially ‘out of the woods’ yet and may have to live with COVID-19 for quite a while, it would seem that the government strategy of aggressive mass vaccination has dramatically brought down the number of mortalities and severe and critical cases of COVID in the country,” ani Velasco.]

At dahil dito, sinabi ni Velasco na inaprubahan na ng Inter-Agency Task Force on Emerging Infectious Diseases, o IATF ang pagbababa sa Alert Level 2 mula sa Alert Level 3 simula ika-5 ng Nobyembre, sa National Capital Region.

Subali’t sinabi rin ni Velasco na hindi dapat magpaka kumpyansa ang lahat, kahit pa bumaba na ang mga kaso ng COVID-19 at ang mga naoospital.

“Parang nabunutan tayo ng tinik sa lalamunan at tila nakahinga tayo ng maluwag matapos ang matagal na panahon ng pagpigil ng hininga. Subalit hindi ito ang panahon ng pagiging kampante. Let us not put our guards down,” ani Velasco.

Pinayuhan ng pinuno ng Kapulungan ang lahat na patuloy na sumunod sa mga health protocols na itinakda ng mga dalubhasa sa kalusugan, lalo na at marami nang establisimyento ang muling nagbubukas, at marami nang mamamayan ang pinahihintulutan na lumabas.

“We want to ensure that we can all work in a safe and healthy environment,” ani Velasco.

Samantala, ang HousePass system aniya, ay bahagi lamang ng malawak na repormang teknolohikal ng Kapulungan.

“As Speaker of the House at this time of this great change in our lives, it is my dream to bequeath these reforms to our House Members, Secretariat officials, and staff so that we all better adapt to the new normal working conditions,” ani Velasco.

Ipinunto ni Velasco na ang Kapulungan ay nagsimula ng mga pagbabagong ito sa pamamagitan ng pagbusisi sa kanilang organisasyon sa teknolohiyang pang-impormasyon at ang pagpapatupad ng programa sa Congvax, na naging ligtas para sa Kapulungan na makapagbakuna sa ligtas at maayos na paraan.

Sinabi niya na isa sa pangunahing pagsasaayos sa makabagong teknolohiya ay ang bagong HRep ID, na maggagawad ng pahintulot sa mga mambabatas at kawani ng akses sa mga tarangkahan, at magkakaroon din ng built-in e-wallet sa pamamagitan ng Paymaya.

“It remains an Identification Card but with advanced security features that opens the speedgates found in our building lobbies and it also symbolizes how the House of Representatives is also leading the way in embracing the new digital economy,” ani Velasco.

Binanggit din ng pinuno ng Kapulungan ang pinaunlad na Security Operations Center at ang paggamit ng RFID gates, at mga high-tech cameras sa pangunahing pasukan ng Kapulungan.

Sinabi niya na ang mga turnstile sa mga tarangkahan at lobbies ay nakakapagtala ng mga temperatura ng katawan ng tao, kaya’t ang may mga lagnat ay kagyat na hindi pahihintulutan na makapasok.

Bukod pa sa mga nabanggit na mga repormang pangkalusugan at seguridad, sinabi ni Velasco na sinimulan na ng Kapulungan ang pagpapatupad ng proyekto sa Solar Power para sa mas matipid na paggamit ng nasusustining enerhiya, gayundin ang pasilidad sa water catchment para sa mas nasusustini at makakalikasang paggamit ng tubig.

Sinabi ni Speaker na lubos na pakikinabangan ng Kapulungan, at mga kawani ang mga makabuluhang programa at proyektong ito, sa mga darating pa na maraming taon.

Pinapurihan niya rin ang mga kalalakihan at kababaihan ng bulwagan ng Kapulungan sa kanilang “unity and commitment to keep the legislative mill working despite the present public health crisis.”

Dahil sa mga inilatag na health at security protocols, hinimok ni Velasco ang mga mambabatas at mga kawani na ipagpatuloy ang pagganap sa kanilang mga tungkulin at responsibilidad, sa abot ng kanilang makakaya.

“Let us work; and work better regardless of dark or clear skies. The leadership of the House values your diligence and sacrifice and has engaged these technological reforms, systems improvement, and streamlining process to ensure your safety and continuous productivity," ani Velasco.

“All we ask now is for all of us to work well and to continue to work hard, so we can deliver the kind of public service the Filipino people deserve from the House of Representatives,” dagdag pa niya. #