-Kamara, nagdadalamhati sa pagkamatay ng ika-apat na kongresista ngayong 18th Congress

Nakikiramay sina House Majority Floor Leader at Leyte Rep Martin Romualdez at Tingog Partylist Rep Yedda Marie K. Romualdez sa naiwang pamilya ni Senior Citizens Partylist Rep Franciscol Datol.

Ayon kay Majority Leader Romualdez, isang mahusay na mambabatas ang yumaong si Congressman Datol na walang kapaguran sa pagbibigay serbisyo sa mga senior citizen.

Nagpasalamat naman si Romualdez sa malasakit at serbisyo ng yumaong kongresista ng mga nakatatanda lalo na at ito ang main author ng RA No. 11350 National Commission of Senior Citizens Act.

Si Datol ang ika-apat na kongresistang pumanaw na ngayong 18th Congress kabilang na sina LPGMA partylist Rep Rodolfo “Rudy” Albano Jr.  na nasawi noong November 5, 2019 sa edad 85, si Benguet Rep Nestor Fongwan, 68 taong gulang na pumanaw noong December 18, 2019 at ang yumaong si Camarines Sur Rep Marissa na sumakabilang buhay noong July 5, 2020 sa edad na 51.

Hanggang sa mga sandaling ito ay wala pang pahayag ang pamilya ng 71-taong gulang na kongresista sa dahilan ng pagpanaw ng mambabatas.