Defensor: Hindi sila mangingiming bumanat sa mga senador kung may babanatan ng mga ito ang sinumang kongresista kaugnay sa isyu ng pork barrel insertions

Nananawagan si Anakalusugan Partylist Rep. Mike Defensor sa mga Senador na huwag munang magpalabas ng kahit anumang pahayag hinggil sa isyu ng pork barrel insertions sa 2020 proposed national budget.

Sa isang forum sa Quezon City, iginiit ni Defensor na kung "ceasefire" ang nais ng mga senador ay wala na dapat pang patama na lalabas laban sa mga kongresista.

Sinabi ni Defensor na kinausap na niya si Senate Majority Floor Leader Migz Zubiri na tumalima ang kanilang hanay sa ceasefire gaya ng kanilang ginagawa sa Kamara.

Ayon pa sa kongresista, hindi sila mangingiming sumagot at tumira pabalik sa mga Senador kung may babanatan sa mga miyembro ng Kamara kaugnay sa isyu ng pork insertions.

Iginiit pa ng solon na mistulang nagiging punching bag na ang Kongreso sa isyu ng pork barrel at hindi nila hahayaang mangyari ito ngayong 18th Congress.