Reparation pay sa pinsala sa mga biktima ng gyera sa Marawi noong 2017, itinutulak

Itinutulak muli sa Kamara ang pagbibigay ng reparation pay o bayad pinsala sa mga biktima ng gyera sa Marawi noong 2017.

Muling inihain ni Lanao del Sur Rep. Ansaruddin Abdul Malik Adiong ang House Bill 3418 o ang Marawi Compensation Act  kung saan bibigyan ng kabayaran ang mga indibidwal at negosyo na apektado ng gyera.

Iminungkahi ni Adiong ang P50 Bilyong piso na reparation na hahatiin sa tatlong bahagi.

Ang unang bahagi na P10B ay manggagaling sa General Appropriations Act,ang ikalawang bahagi ay P20B na magmumula sa Philippine Charity Sweeptakes Office at sa huling bahagi ay P20B na magmumula naman sa Philippine Amusement and Gaming Corporation (PAGCOR).

Kapag naging batas ang panukala ni Adiong, magkakaroon ng standards para sa compensation ng may-ari ng mga bahay at negosyo na nasira ng limang buwang giyera maging ito ay partial o fully damaged.

Nakasaad din sa panukala na lumikha ng local board na mangasiwa ng screening at pagbabayad sa mga biktima.

Noong 17th Congress inihain na ni Adiong ang kaparehong panukala pero natulog lamang ito sa Kamara.