Hindi kokonsentihan ng Kamara ang mga narco-politicians ayon kay Cayetano

Hindi kokonsintihin ng liderato ng Kamara ang mga mambabatas na sangkot sa kalakalan ng ilegal na droga  sa bansa. 

Ito ang paniniyak ni House Speaker Alan Peter Cayetano sa  mga opisyal at kawani ng Philippine Drug Enforcement Agency (PDEA) sa ginanap na pagdiriwang ng ika-17 taong anibersayo ng ahensya  sa Quezon City. 

Sinabi ni Cayetano na kung mayroon mang mga kongresista na gumagamit, nagbebenta o  protektor ng ipinagbabawal na droga ay tiyak na  hindi ang mga ito makakalusot  sa ginagawang paglilinis sa Mababang Kapulungan na layon niyang maging real House of the people.

Ayon pa sa mambabatas, ang war on  drugs campaign ng Duterte administration ay hindi gyera para pumatay o  kontra  sa karapatang pantao kundi gyera para maprotektahan ang buhay ng mga mamamayan sa pamamagitan ng pagbibigay ng ligtas na mga lansangan at mga lugar kung saan matiwasay  na makapamumuhay ang bawat isa. 

Tiniyak din ni Cayetano sa mga taga PDEA na bilang pangunahing agensya ng gobyerno na nagpapatupad ng anti-illegal drug campaign ng pamahalaan  ay buo anya  ang kanyang supporta sa mga ito  at iginiit na nasa likod lamang nila ang Kongreso ng Pilipinas na handang tumugon sa mga pangangailangan ng ahensya.

Kasabay nito ay nanawagan din si Cayetano sa mga opisyal ng PDEA na maging  pro-active sa pakikipag-ugnayan sa mga mababatas sa pagpapa-abot ng kanilang mga hinaing pagdating sa pondo at  mga logistical o training constraints ng ahensya.