Automation, mas maganda pa rin kaysa sa manual na sistema

Sa gitna ng maraming agam-agam at pagdududa hinggil sa resulta ng katatapos pa lamang na eleksiyong nasyunal at local na nagresulta ng serye ng mga pagdinig ng Kamara de Representantes, kinatigan pa rin ni Muntinlupa Rep Rozzano Rufino Biazon na ang susunod na eleksiyon ay isasagawa pa rin sa pamamaraang automation.

Sinabi ni Biazon na mas madali pa rin umanong malaman ang dayaan sa automated elections basta’t ang tamang mga safeguard ay mai-instala sa mga makenang gagamitin dito.

Ayon sa kanya, alam na umano niya na talagang mayroong dayaan sa manual system at mahirap ito i-control, ngunit mahirap umanong isagawa ang pandaraya kung may mga safeguard na ilalagay sa sistema ng automated election.

Mahalaga umano itong isinagawa ng Kongreso na evaluation at review ngayon para malinis ang sistema dahil may iilan pang mga kakulangan ang naturang sistemang ito.

Si Biazon, isang talunang senatorable noong nakaraang eleksiyon, ay nangakong tumulong na mapaganda ang electoral sytem sa pamamagitan ng pagtutuloy ng automated election.

Idinagdag pa ni Biazon na siya ay naniniwala na mapabuti pa rin ang automation system bagamat may mga nakikita pang mga deperensiya ngunit kaalunan naman umano ay mas magandang sistema pa rin ang automation kaysa sa manual counting.